Komw Pahn Kosoula Wasakis?
Ma ke pahn sapengki “ehi” ong peidek wet, mie soahng tohto me komwi oh meteikan anahne wia. Sang ni omw pahn kapwaiada soahng kesempwal pwukat me ntingihdi pah, ke pahn kak mwadangete soandi mwahu nan mwomwohdiso kapw me ke pilahn en kosoula ie.
(1) Ni ahnsou me ke esehda iawasa ke pahn kohla ie, Secretary en mwomwohdiso me ke iang ahnsouwet ele mwein pahn kak ale adres en Kingdom Hall de mwomwohdiso kapw me ke pilahn en kohla ie. Ni ahnsou me ke pahn lel wasao, mwadang rapahki Kingdom Hall oh tehk iahd irail kin tuhpene ong mihding kan. Ma mie mwomwohdiso tohto sang ehu me kin doadoahngki Kingdom Hall, idek rehn elder kan mehnia mwomwohdiso ke pahn iang. Dehr pwand en iang towehda mihding kan oh esehla elder kan nan mwomwohdiso.
(2) Secretary en mwomwohdiso me ke iang ahnsouwet oh Secretary en mwomwohdiso me ke pahn kosoula ie pahn doadoahkpene pwehn kadarala noumw doaropwe oh nein ahmw peneinei doaropwe en “Congregation’s Publisher Record.” Elder kan sang mwomwohdiso me ke mihmi ahnsouwet pahn kadarala kisinlikou ieu me pahn kawehwehong elder kan nan mwomwohdiso me ke pahn kosoula ie duwen komwi oh ahmw peneinei. (Kilang Our Kingdom Ministry en February 1991, Question Box.) Congregation Service Committee nan mwomwohdiso me ke pahn kosoula ie pahn padahkiong brother me kin wia Pwuhk Study en wasao me ke pahn iang iahd ke pahn lel wasao pwe e kak tuhwong komwi oh sewese komwi en diarada wasao me re kin wia Pwuhk Study en Mwomwohdiso.—Rom 15:7.
(3) Sounkalohk koaros nan mwomwohdiso me ke pahn kosoula ie pahn kasamwo komwi. (Pil kilang 3 John 8.) Ahpw, re kak wia met ihte ma ke pahn iang towehda mihding kan oh ih ahnsowo me re kak koasoiong komwi oh kangoange komwi.
(4) Ke sohte anahne awih lao lel noumw doaropwe pahn lel mwomwohdiso me ke pahn kosoula ie mwohn ke pahn iang kalohk. Ma ke pahn mwohnki doadoahk en Wehio, soahng teikan pahn soandi oh ke pahn nsenamwahu nan mwomwohdiso me ke pahn kosoula ie. (Madiu 6:33) Ni ahnsou me ke pahn soandi nan wasao me ke pahn kosoula ie, mwein ke men luhke ekei sang nan mwomwohdiso en mwemweit oh kapehseiong uhk.—Rom 12:13b.
En kosou sang ehu wasa kohlahng ehu wasa kin wia doadoahk laud. Ahpw, ma koaros wia dahme re anahne wia, e pahn soandi mwahu. Koaros pahn perenki limpoak me riatail brother oh sister kan pahn kasalehda.