Atail Pwoson Kin Kamwekid Kitail en Wia Dahme Mwahu
1 Pwoson kamwekid Noha, Moses, oh Reap en wia dahme mwahu. Noha kauwada warihmwo. Moses tohnmeteiki pai en mour nan imwen Parao. Reap karukihala lipoahrok ko oh peikiong ara kaweid, kahrehda ih oh eh peneinei pitsang ohlahn Seriko. (Ipru 11:7, 24-26, 31) Soangen wiewia mwahu dah kan me atail pwoson pahn kamwekid kitail en kapwarehda rahnwet?
2 Kalohk: Pwoson kin kamwekid kitail en kalohk oh koasoia duwen atail Koht me inenen mwahu oh sapwellime koasoandi kan me kin sewese kitail en ahneki peren ahnsou kohkohlahte. (2 Kor. 4:13) Ekei pak, kitail kin pweiek oh sohte men kalohk ong aramas me kitail kin tuhwong. Ahpw, ni ahnsou me kitail kin ‘kihong Siohwa en mihmi mwotail ahnsou koaros,’ kitail pahn kehlailda oh atail masepwehk pahn tikitikla. (Mel. 16:8) Ih ahnsou me atail pwoson kin kamwekid kitail ni ahnsou konehng koaros en ehukihong atail peneinei, mehn mpatail, iengetail tohndoadoahk, iengetail tohnsukuhl, oh meteikan duwen Rongamwahu.—Rom 1:14-16.
3 Pokonpene Ni Mihding kan: Pwoson pil kin kamwekid kitail en kaukaule iang towehda mihding kan koaros. Iaduwen? Ma kitail pahn iang towehda mihding kan koaros, e pahn kasalehda me kitail kin kamehlele me Sises ieiang kitail ki sapwellimen Koht ngehn sarawi ni ahnsou me kitail kin pokonpene ni mihding en Kristian kan. (Madiu 18:20) Met pil kin kasalehda me kitail inengieng en “rong dahme Ngehn Sarawi mahsanihong mwomwohdiso kan.” (Kaudiahl 3:6) Kitail kin kapwaiada kaweid me kin kohwong kitail pwehki atail pwoson kin sewese kitail en wehwehki me kaweid kin kohsang rehn atail Sounpadahk Lapalap, Siohwa.—Aiseia 30:20.
4 Pilipil kan me Kitail Kin Wia: Ma atail pwoson kin kehlail, e pahn kamwekid kitail en mwohneki mehkan me ngehnin nan atail mour. (Ipru 11:1) Met kin wehwehki me kitail anahne tohnmeteiki naineki mwohni tohto oh dipwisou tohto. Karasepe ieu, emen elder sohte ale doadoahk pweilaud ehu me eh kaunen doadoahk men kihong ih pwehki e wehwehki me: ma e pahn ale doadoahko, e solahr kak iang towehda mihding kan koaros, e sohte kak mihmi rehn eh peneinei, oh e solahr kak Regular Pioneer. Kitail en alasang mehn kahlemeng mwahu en elder menet oh likih Siohwa unsek pwe Pwuhk Sarawi kin kasalehda me E kak kaitarala anahn akan en irail me “rapahki mahs Wehin Koht oh dahme E kin ketin kupwurki.”—Madiu 6:33.
5 Pwehki pwoson me kitail kin ahneki kin kamwekid laud atail mour, aramas teikan kak kilang met. Ni mehlel, pali laud en aramas nan sampah kin wehwehki duwen atail pwoson kehlail. (Rom 1:8) Ihme kahrehda, kitail koaros anahne wia dahme mwahu pwehn kasalehda me atail pwoson kin memour.—Seims 2:26.