Kahrepen met, kawehwe mie me pwarada nan mihding lap nan University of Heidelberg, Germany, nan November 2000. Oaralap en mihding wet: “Repression and Self-Assertion: Jehovah’s Witnesses Under the National Socialist and Communist Dictatorships” (“Kanaudok oh Roporop: Sounkadehdehn Siohwa kan Mih Pahn Kaunda Lemei en Socialist oh Communist”). Dr. Clemens Vollnhals en Hannah-Arendt-Institute for Research Into Totalitarianism koasoia: “Kaundahn palien totalitarian kan sohte kin irehdi arail wiewia kan ongete palien politik. Irail kin kaunla mour en aramaso unsek.”

Kristian mehlel akan sohte kak kihong “mourarail unsek” ong koperment en aramas ehu, pwehki irail inoukihdahr arail lelepek unsek ong Siohwa Koht kelepw. Sounkadehde kan me kin mihla pahn kaunda idihd en totalitarian kin lelohng irair me kosonned en wehi oh koasoandi kan en arail pelien lamalam kin uhpene. Eri, dahme re kin wia ni ahnsou me soangen irair wet kin pwarada? Pak tohto mahs, Sounkadehdehn Siohwa kan kin doadoahngki nan arail mour kaweid me sapwellimen Sises Krais tohnpadahk kan kasalehda: “Se uhdahn pahn peikiong Koht, a kaidehn aramas.”​—Wiewia 5:29.

Sounkadehde kid kei kin kolokol arail lelepek oh sohte kin uhki wehi en sampah, mendahte ma re kin lelohng kalokolok me keieu suwed. Dahme wiahiong irail en kak lelepek oh dadaurete? Irail kin doadoahngki kaweid en Paipel: “Dehr mweidohng me suwed en poweiukedi, ahpw omw mwahu en powehdi me suwed.” (Rom 12:21) Ei, mwahu uhdahn pahn powehdi suwed.

Peidek kan Sang Sounwadawad kan

Dahme kahrehda Aiseia 30:21 mahsanihki me mahsen en Siohwa kin peipeidohsang “mwurumw,” pwehki iretikitik en mwohn meto kasalehda me Siohwa ketin tieng mwowe ni ah mahsanih, “Pwoaren masamwail akan uhdahn pahn wiahla pwoaren mas akan me kin udiuhdial amwail Sounkaweid Lapalapo”?

Aiseia 30:20, 21 mahsanih: “Amwail Sounkaweid Lapalapo solahr pahn ketin kaririala pein ih oh pwoaren masamwail akan uhdahn pahn wiahla pwoaren mas akan me kin udiuhdial amwail Sounkaweid Lapalapo. Oh pein salengemwail akan pahn karonge mahsen pwoat sang mwurumwail me mahmahsanih: ‘Iet ahlo. Keid loale, kumwail aramas akan,’ pwe kumwail dehr weidila pali maun de weidila pali meing.”

Ma kitail pahn kawehwe ire pwukat me likamwete e uhdahn mehlel, sounwadawado pahn kilang Siohwa, me wia Sounkaweid Lapalapo, mwowe ahpw rong kapitie peipeidohsang mwuri. Ahpw, mahsen pwukat kin wiawi ni karasaras oh kitail pahn ale wehwehpe ni karasaras.

Mahsen en karasaras me iretikitik 20 ketikihong nan atail madamadau iei me ladu men miher rehn ah soumas oh onopadahngehr en uhpah nin duwen kaweid akan en ah soumas. Rasehng ladu men me kin tetehk kanahieng limen ah mwohnsapw pwe en kasawihada mwahu sapwellime anahn, pil sapwellimen Siohwa aramas akan nan rahnwet kin katengediong pwoaren masarail akan ong ni kaweid akan me poahsoankihda Paipel me Siohwa kin ketikihda sang rehn sapwellime pwihn sansal nan sampah. (Melkahka 123:1, 2) Ei, irail kin mwekidki sapwellime kaweid, oh kin pehmitik ong soahng koaros me Siohwa ketin kaweidiki irail “ladu lelepek oh loalokong.”​—Madiu 24:45-​47.

Eri, dahkot mahseno me ladu kan rong mwurirail? E konehng kitail en nda me ngihlo me sang mwuri iei mahsen en Koht me kin wiawi kawao me kin pwilipwildohsang nan sapwellime mahsen ntingihdi me kin wehwe mwahu ni ah kepwildohsang sapwellime “ladu lelepek oh loalokong.” (Luk 12:42) Sapwellimen Koht ladu kan nan rahnwet kin rong kapitie ni arail kin kaukaule onop kanahieng Paipel oh doadoahngki sapwellimen Koht kaweid akan nan arail mour, ki sawas me kin kohsang ni pwuhk kan me irail “ladu lelepek oh loalokong” kin wiahda. Ni ladu kan arail kin ngoangki esehla kaweid me Sounkaweid Lapalapo kin ketikihda ni ahnsou me konehng, oh pil onop Mahsen en Koht me ntingda pahr epwiki kei samwalahro, irail (ladu kan) ni karasaras kin udial ih mwohrail oh kin karonge kapitie sang mwurirail.​—Rom 15:4.

“Kolokolete Oh Peikiong Ei Padahk Kan”

“Ma kumwail pahn peikiong ei padahk kan, kumwail uhdahn pahn wiahla nei tohnpadahk mehlel.”​—SOHN 8:31.

1. (a) Ni en Sises pwurala nanleng, dahme e ketikihdi nin sampah? (b) Mehnia peidek kan kitail anahne en medemedewe?

NI AHNSOU me Sises Krais, me tepida pelien Kristian, pwurehng ketidala nanleng, e sohte ketikihdi nin sampah pwuhk kan me pein ih ntingihdi, de sansal en kataman me pein ih kauwada, de kepwe tohto me pein ih ketikihpene. Ihme e ketikihdi nin sampah iei tohnpadahk kan oh pil iren kaweid kan ni oaretik me re anahne en idawehn pwe en kak wia emen tohnpadahk. Ni mehlel, nan Rongamwahu en Sohn, kitail kilang me Sises kasalehda ire kesempwal siluh me emen me men wiahla sapwellime tohnpadahk anahne en wia. Ia ire siluh pwukat? Dahme kitail kak wia pwe en kak kapwaiada ire pwukat? Oh iaduwen atail kak ese ni mehlel me pein kitail kak iang wia tohnpadahk kei en Krais rahnwet?a

2. Soangen ire kesempwal dah kan me tohnpadahk kan anahne kapwaiada me kileledi nan pwuhken Rongamwahu en Sohn?

² Mpen sounpwong weneu mwohn e matala, Sises ketidahla Serusalem oh padahk ong pokon ehu me pokonpene mwo pwe en kawauwih Sarawien Impwal kan erein wihk ehu. Imwilahn met, nan werengen Sarawien Impwal kan, “me tohto sang nan pokono pwosonla ih.” Sises pousehlahte kalkalohk oh ni rahn me kasarawio pahn neko, “me tohto sang nan pokono pwosonla ih.” (Sohn 7:10, 14, 31, 37; 8:30) Ni ahnsowo, Sises kihong ah madamadau ong irail akan me kapw nan pwoson oh kasalehda ehu ire kesempwal pwe en kak iang wia tohnpadahk, nin duwen me wahnpoaron Sohn ntingihdi: “Ma kumwail pahn peikiong ei padahk kan, kumwail uhdahn pahn wiahla nei tohnpadahk mehlel.”​—Sohn 8:31.

3. Irair dah me emen anahne en ahneki pwe en “kolokolete mahsen en [Sises]”?

³ Ni en Sises mahsanih met, e sohte wehwehki me irail me kapw nan pwoson kan sohte itar arail pwoson. Ahpw, e kasalehiong irail wasaht me irail kak alehdi kapai en wiahla sapwellime tohnpadahk mehlel kan ma irail pahn kolokolete oh peikiong sapwellime mahsen kan oh ma irail pahn kasalehda kanengamah oh dadaurete. Irail kasalehda me irail pwungkiher oh alehdahr sapwellime mahsen kan, ahpw irail anahne kaukaule kolokolete oh kapwaiada mahsen pwukat. (Sohn 4:34; Ipru 3:14) Ei, Sises kin kilangwohng kanengamah nin duwen irair ehu me inenen kesempwal ong sapwellime tohnpadahk kan en ahneki, ihme kahrehda nan kaimwiseklahn ah mahsen ong sapwellime wahnpoaron ko, sansalda nan Rongamwahu en Sohn, Sises kaweidki pak riau: “Idawehniehte.” (Sohn 21:19, 22) Irail tepin Kristian tohto me wia met. (2 Sohn 4) Dahme sewese irail en dadaurete?

4. Dahme kin kahrehda irail tepin Kristian ako en kak dadaurete?

⁴ Wahnpoaron Sohn, emen tohnpadahk lelepek en Krais, erein sounpahr isihsek, kin kasalehda ire kesempwal ehu. E kin kapinga irail Kristian lelepek kan oh mahsanih: “Kumwail kehlail oh Mahsen en Koht kin ketiket loalamwail, oh kumwail kalowedier Me Suwedo.” Irail tohnpadahk en Krais kin dadaurete, oh kin mihmihte de kolokolete Mahsen en Koht pwehki Mahsen en Koht kin mihmihte rehrail. Irail inenen kin kalahnganki oh kesempwaliki Mahsen en Koht. (1 Sohn 2:14, 24) Duwehte rahnwet, ma kitail men ‘dadaurete lel ni imwi,’ kitail anahne tehk mwahu ma Mahsen en Koht kin mihmi rehtail. (Madiu 24:13) Iaduwen atail kak wia met? Sises ketikihda karasaras pwehn sapengla peidek wet.

“Rong Mahseno”

5. (a) Soangen pwehl dah kan me Sises kasalehda nan ehu sapwellime karasaras ko? (b) Ia wehwehn werentuhkeo oh pwehlo nan sapwellimen Sises karasaras?

⁵ Sises kasalehda karasaras en sounkamwarak emen me kin kamwerehdi werentuhke, oh met kileledi nan pwuhk kan en Rongamwahu en Madiu, Mark, oh Luk. (Madiu 13:1-9, 18-​23; Mark 4:1-9, 14-​20; Luk 8:4-8, 11-​15) Ni omw pahn wadek ire pwukat, ke pahn diarada me ire kesempwal nan karasaras wet iei me soangen werentuhke teieu me pwupwudi nan soangsoangen pwehl oh wah kan pil wekpeseng. Tepin soangen pwehl me kekeluwak, me keriauo me pedeped, oh me kesiluhwo me diren dihpw tekatek wosada ie. Pwehl kapahieuo weksang pwehl siluh teiko pwe e wia “pwehl mwahu.” Sises pein kawehwehda me werentuhkeo iei Rongamwahu en Wehio me diarekda nan Mahsen en Koht, oh pwehl ko iei aramas me audepen mongiongarail kin wekpeseng. Mendahki irail aramas akan me kin rasehng pwehl wekpeseng kei kin duwepene ni ekei ahl akan, ahpw irail me rasehng pwehl mwahu kin ahneki irair ehu me kahrehong re en weksang meteiko koaros.

6. (a) Iaduwen pwehl kapahieuo eh weksang pwehl siluh teiko, oh ia wehwehn met? (b) Dahme kesempwal pwe emen en kak dadaurete nin duwen sapwellimen Krais tohnpadahk?

⁶ Nan Luk 8:12-​15, e kin kasalehda me nan irair pahieu pwukat koaros, aramas ako ‘rong mahseno.’ Ahpw, irail me ahneki “mohngiong mwahu” kin wia laudsang “rongorong mahseno.” Re kin “koledi oh kasalehda wah kan ni arail kin dadaurete.” Pwehl mwahu wet me mwuterek oh loal oh e kin mweidohng kalowen tuhke pwulopwulo en kihrla oh katengtengdi, oh imwilahn met, tuhkeo pahn masalpeseng oh wah. (Luk 8:8) Pil duwehte met, irail akan me kin ahneki mohngiong mwahu kin wehwehki, kesempwaliki oh alehda Mahsen en Koht. (Rom 10:10; 2 Timoty 2:7) Mahsen en Koht kin mihmihte nan loalerail. Imwilahn met: irail kin kasalehda wah kan ki kanengamah oh dadaurete. En kalahnganki oh kesempwaliki Mahsen en Koht kin kesempwal ni emen eh pahn dadaurete nin duwen tohnpadahk en Krais. (1 Timoty 4:15) Ahpw, iaduwen kitail kak kakairada atail kalahnganki oh kesempwaliki Mahsen en Koht?

Irair en Mohngiong oh Doudouloale Ni Kanahieng

7. Soangen mwekid dah me kin kohsang ahneki mohngiong mwahu?

⁷ Tehk soangen wiewia dah kan me Paipel kin pwurpwurehng karasaiong mohngiong ehu me mwahu. “Aramas pwung men kin doudouloale nan eh mohngiong pwehn kak sapeng ni ahl me konehng.” (Lepin Padahk 15:28, New World Translation) “Maing Siohwa, komw ketin kupwurehla ei pato oh ei doudouloale nan mohngiongi.” (Melkahka 19:14, NW) “Ei doudouloale nan mohngiongi pahn wia mehkan me wehwe oh loalokong.”​—Melkahka 49:3.

8. (a) Ni ahnsou me kitail kin wadek Paipel, dahme kitail anahne liksang oh dahme kitail anahne wia? (b) Soangen kapai dah kan kitail kak alehdi sang atail kin doudouloale ni kapakap Mahsen en Koht? (Pil koasoia duwen koakon me oaralap koasoia “Tengedi Kehlail nan Padahk Mehlel.”)

⁸ Duwehte irail soun nting en Paipel pwukat, kitail anahne en doudouloale Mahsen en Koht oh sapwellimen Koht doadoahk ni peren oh poaden kapakap. Ni atail pahn kin wadek Paipel de sawaspen Paipel kan, kitail dehr wia met ni mwomwen tourist men me karuwaru oh kin mwadangasang ni ehu wasa kohlang ni pil ehu wasa pwe en kak kilelehdihte soahng koaros oh kilangdihte ekis. Ahpw, ni atail pahn kin onopki Paipel, kitail en kiheng atail ahnsou oh uhdi oh perenki dahme kitail kilikilango.b Ni atail pahn kin, ni meleilei,