Kamakam en Pelien Lamalam Dahme Kahrehda?
KE IANG kamehlele me aramas akan uhdahn konehng kamakam pwehki arail pelien sarawi? Mwein soh—ahpw, ni mehlel, ma re sohte kedirepwehda pwung en meteikan me ahneki ehu pelien lamalam tohrohr. Weksang met, kamakam en pelien lamalam wiewiawihkihier ahnsou reirei oh pil mihmihte nan atail ahnsou. Karasepe, tohto en irail Sounkadehdehn Siohwa kan nan Europe oh wasa teikan nan sampah arail pwung kin kalap kohsang irail oh wiewia lemei kin wiawihiong irail nan erein senturi 20.
Nan erein ahnsowo, Sounkadehdehn Siohwa kan kin lelohng kamakam suwed oh reirei pahn Communist oh pil kaunda lemei teikan wasao. Dahme irair me re lelohng kan kin padahkiong kitail duwen kamakam en pelien sarawi? Oh dahme kitail kak sukuhliki sang arail wiewia kan ni ahnsou me irail kin lelohng kalokolok?
“Sohte Kisehn Sampah”
Sounkadehdehn Siohwa kan kin nannanti pwe irail en kin kapwaiada kosonned en wehi oh wia aramas meleilei, oh pil kin tiahk mwakelekel. Irail sohte kin pelianda koperment de pil kin rapahki elen kasowe irail, oh irail sohte kin rapahki ren kahrehda kamakam me likamwete irail men kamakamala. Irail Kristian pwukat sohte kin uhki wehi en sampah. Met kin pahrekiong mahsen en Sises oko: “Duwehte ngehi me kaidehn kisehn sampah, pil ih duwen irail [sapwellimen Sises tohnpadahk kan], kaidehn irail kisehn sampah.” (Sohn 17:16) Pali tohtohn koperment akan pohnese me Sounkadehdehn Siohwa kan sohte kin uhki ehu wehi. Ahpw, irail kaun lemei kan sohte kin kesempwaliki koasoandi en Paipel me Kristian sohte pahn wia kisehn sampah.
Kahrepen met, kawehwe mie me pwarada nan mihding lap nan University of Heidelberg, Germany, nan November 2000. Oaralap en mihding wet: “Repression and Self-Assertion: Jehovah’s Witnesses Under the National Socialist and Communist Dictatorships” (“Kanaudok oh Roporop: Sounkadehdehn Siohwa kan Mih Pahn Kaunda Lemei en Socialist oh Communist”). Dr. Clemens Vollnhals en Hannah-Arendt-Institute for Research Into Totalitarianism koasoia: “Kaundahn palien totalitarian kan sohte kin irehdi arail wiewia kan ongete palien politik. Irail kin kaunla mour en aramaso unsek.”
Kristian mehlel akan sohte kak kihong “mourarail unsek” ong koperment en aramas ehu, pwehki irail inoukihdahr arail lelepek unsek ong Siohwa Koht kelepw. Sounkadehde kan me kin mihla pahn kaunda idihd en totalitarian kin lelohng irair me kosonned en wehi oh koasoandi kan en arail pelien lamalam kin uhpene. Eri, dahme re kin wia ni ahnsou me soangen irair wet kin pwarada? Pak tohto mahs, Sounkadehdehn Siohwa kan kin doadoahngki nan arail mour kaweid me sapwellimen Sises Krais tohnpadahk kan kasalehda: “Se uhdahn pahn peikiong Koht, a kaidehn aramas.”—Wiewia 5:29.
Sounkadehde kid kei kin kolokol arail lelepek oh sohte kin uhki wehi en sampah, mendahte ma re kin lelohng kalokolok me keieu suwed. Dahme wiahiong irail en kak lelepek oh dadaurete? Irail kin doadoahngki kaweid en Paipel: “Dehr mweidohng me suwed en poweiukedi, ahpw omw mwahu en powehdi me suwed.” (Rom 12:21) Ei, mwahu uhdahn pahn powehdi suwed.
[Blurb on Page 4]
Sounkadehdehn Siohwa kan nan Germany lelohng kamakam oh kalokolok laud oh werei ni ahnsou me irail mihmi pahn kaunda lemei en totalitarian kan
[Blurb on Page 4]
“Kaundahn palien totalitarian kan sohte kin irehdi arail wiewia kan ongete palien politik. Irail kin kaunla mour en aramaso unsek.” Dr. Clemens Vollnhals
[Kilel nan Pali 4]
Irail kihsang saledek en peneinei en Kusserow pwehki peneineio sohte men kesehla arail pwoson
[Kilel nan Pali 4]
Irail kemehla Johannes Harms nan imweteng en Nazi pwehki e sohte men kesehla ah pwoson