IREN MEHN KASUKUHL 59
Ke Kak Lelepekte Pahn Kalokolok
Kristian kan koaros pahn lelohng uhwong oh pil kalokolok ni ahnsou keren de mwuhr. Ia duwe, kitail anahne pwunodki met?
1. Dahme kahrehda kitail kasik me kitail pahn lelohng kalokolok?
Paipel mahsanih ni sansal: “Irail koaros me men mourki poadidiong Koht ni arail kin miniminiong Krais Sises pil pahn lelohng kalokolok.” (2 Timoty 3:12) Sises ketin ale kalokolok pwehki eh sohte wia kisehn en Sehdan sampah. Kitail pil sohte wia kisehn sampah, kahrehda kitail sohte kin pwuriamweiki ni koperment kan oh pwihnen pelien lamalam kan ar kin kalokei kitail.—Sohn 15:18, 19.
2. Dahme kitail kak wia pwehn kaunopada ong kalokolok?
Kitail anahne kakehlaka atail likih Siohwa ni ahnsou wet. Koasoanehdi ahnsou en kin kapakapohng ih oh wadek sapwellime Mahsen rahn koaros. Kaukaule iang towehda mihting en mwomwohdiso kan. Soahng pwukat pahn kin kakehleiukada pwe ken kak eimah kolokol omw lelepek pahn kalokolok, mehnda ma met kin kohsang rehn omw peneinei. Wahnpoaron Pohl, me kin kalapw lelohng kalokolok, ntingihedi: “Siohwa iei sawasepei; I sohte pahn masak.”—Ipru 13:6.
Kitail pil kak kalaudehla atail eimah sang ni atail kin kaukaule kalohk. Ni atail kin kalohk, kitail kin kalaudehla atail likih Siohwa oh powehdi atail masak aramas. (Lepin Padahk 29:25) Ma ke kin eimah kalohk ni ahnsou wet, ke pahn kak onopada en pousehlahte kalohk mehnda ma koperment keinapwihdi atail doadoahk.—1 Deselonika 2:2.
3. Ia kamwahupen atail kin lelepekte pahn kalokolok?
Mehlel, kitail sohte kin perenki ni atail kin ale kalokolok, ahpw ni atail kin lelepekte pahn kalokolok, atail pwoson kin kehlailla. Kitail kin karanihala Siohwa pwehki atail kin alehdi sapwellime sawas ni atail pehm me sohla atail kehl en lelepekte. (Wadek Seims 1:2-4.) Siohwa kin ketin kupwurtoutoukihla ni eh mahsanih atail kin lokolok, ahpw e kin ketin kupwurperenkihda ni eh mahsanih atail kin nantihong lelepek. Paipel mahsanih: “Ma kumwail dadaur pahn lokolok pwehki amwail wia me mwahu, Koht pahn ketin kupwurperenki met.” (1 Piter 2:20) Ma kitail lelepekte, Siohwa pahn ketin katingihkin kitail mour soutuk nan sampah kapwo. Koaros me kousoan wasao pahn papah Siohwa oh sohte me pahn uhwong irail.—Madiu 24:13.
KALAUDEHLA OMW ESE MET
Sukuhlki dahme kahrehda kitail kak lelepekohngete Siohwa mehnda ma aramas kalokei kitail, oh ia duwen eh pahn ketin katingih kitail.
4. Ke kak lelepekte pahn uhwong sang peneinei
Sises uhdahn ketin mwahngih me ekei nan atail peneinei kakete sohte perenki kitail en papah Siohwa. Wadek Madiu 10:34-36, oh mwuri koasoiapene peidek wet:
Dahme kakete wiawi ma emen tohnpeneinei pilada en papah Siohwa?
Pwehn kilang ehu karasepen met, kilang KISIN KASDO, oh mwuri koasoiapene peidek wet.
Dahme ke pahn wia ma emen kisehmw de kompoakepahmw song en kauhiukedihsang papah Siohwa?
Wadek Melkahka 27:10 oh Mark 10:29, 30. Mwurin omw wadek ehuehu iren Paipel, koasoiapene peidek wet:
Ia duwen inou wet eh kak seweseiuk ma kisehmw kan de kompoakepahmw kan pahn uhwong uhk?
5. Pousehlahte kaudokiong Siohwa mendahki kalokolok
Kitail anahne eimah ni meteikan ar kin song kauhkitaildihsang papah Siohwa. Kilang KISIN KASDO, oh mwuri koasoiapene peidek wet.
Mehn kahlemeng dah kan nan kisin kasdou me kakehleiukada?
Wadek Wiewia 5:27-29 oh Ipru 10:24, 25. Mwurin omw wadek ehuehu iren Paipel, koasoiapene peidek wet:
Dahme kahrehda e kesempwal kitail en pousehlahte kaudokiong Siohwa mehnda ma koperment keinapwihdi atail doadoahk en kalohk de mihting?
6. Siohwa pahn ketin seweseiuk ken lelepek
Sounkadehdehn Siohwa kan, me mah oh me pwulopwul sang nan sampah pwon, kin loalopwoat papah Siohwa mehnda ma re kin kalokolok. Pwe ken kilang dahme sewese irail, kilang KISIN KASDO. Mwuri koasoiapene peidek wet.
Dahme sewese Sounkadehdehn Siohwa ko ren lelepekte?
Wadek Rom 8:35, 37-39 oh Pilipai 4:13. Mwurin omw wadek ehuehu iren Paipel, koasoiapene peidek wet:
Ia duwen iren Paipel wet eh kamehlelehiong uhk me ke kak lelepekte pahn soangsoangen kahpwal kan?
Wadek Madiu 5:10-12, oh mwuri koasoiapene peidek wet:
Dahme kahrehda ke kak peren mendahki ke kin kalokolok?
Sounkadehdehn Siohwa rar kei kin lelepekte pahn uhwong kan. Ke pil kak wia met!
EKEI ARAMAS KIN NDA: “I sohte kamehlele me I kak lelepekte pahn kalokolok.”
Iren Paipel dah kan me kak kihong irail koapworopwor?
DAHME KE SUKUHLKIER
Siohwa kin ketin kesempwalki atail kin nannanti papah ih mendahki kalokolok. Sang ni sapwellime sawas, kitail kak lelepekte!
Kousapahl
Dahme kahrehda Kristian kan en kasik me re pahn lelohng kalokolok?
Dahme ke kak wia ahnsou wet pwehn kaunopada ni ahnsou me kalokolok pahn wiawi?
Dahme kak seweseiuk en kamehlele me ke kak papah Siohwa mendahki soangsoangen kahpwal kan?
PIL TEHK
Kilang duwen brother pwulopwul men me kawehwehda ia duwen Siohwa eh ketin sewese ih en lelepekte ni ahnsou me e selidi pwehki eh soupoupali.
Tehk dahme sewese pwopwoud ehu ren papah Siohwa ni lelepek erein sounpar tohto mendahki uhwong.
Sukuhlki ia duwen omw kak eimah ni omw lelohng kalokolok.
Ia duwen atail pahn kilangwohng uhwong kan sang peneinei, oh dahme kitail kak wia pwehn kolokolete popohl oh lelepekohngete Siohwa?
“Padahk Mehlel Kin Wahdo ‘Kaidehkin Meleilei . . . Pwe Kedlahs’” (Kahn Iroir, October 2017)