Kalohk ong Aramas Koaros Me Ke Kak Tuhwong
1. Dahme tepin Kristian akan wia pwehn kalohk ong aramas tohto?
1 Sapwellimen Sises tohnpadahk kan en mahs kin nantihong ehukihong aramas koaros Rongamwahu duwen Wehio. Irail doadoahngki soangen ahl koaros me irail kak en wia pwehn kak kalohki Rongamwahuo. Kristian kan ntingihdi Paipel ni lokaiahn Krihk pwehki ih lokaia me aramas kin doadoahngki ni mwehin Rom ahnsowo. Oh pil, sounkalohk ngoang kei me memour nan senturi keriau oh kesiluh C.E. mwein tepida wiahda Pwuhk Sarawi ni mwomwen pwuhk, oh met mengei sang doadoahngki doaropwe limilim kan ong diarada ire kan nan Paipel.
2, 3. (a) Iaduwen Aiseia 60:16 wie pweipweida nan atail ahnsou? (b) Iaduwen Sounkadehde kan kin doadoahngki misihn kan en rahnwet (technology) en sewese kaudok mehlel en kohpeseng wasa koaros nan sampah?
2 Doadoahngki Kekeiradahn Dipwisou en Doadoahk: Siohwa doadoahngki soukohp Aiseia ni e kohpada: “Wehi kan oh nanmwarki kan pahn kupwurokin uhk, rasehng nohno men me kin nsenohki kadihdi nah seri.” (Aiseia 60:16, NW) Nan atail ahnsou, pweidahn kokohp wet kin wiawi ni ahnsou me sapwellimen Siohwa ladu kan kin doadoahngki dipwisou kan en kalaudehla doadoahk en kalohk. Karasepe, nan pahr 1914, pahr kei mwohn kilel mwekid kan (kasdo) wialahr mehkot me aramas kin kalap wiahda, “Bible Students” tepida kasalehda “Photo-Drama of Creation.” Kasdo wet me kasalehda kilel mwekid kan—ni color oh mie ngile—kin reireiki awa 8, oh kasdo wet kin kalohk mwahu ong aramas rar rar kei.
3 Rahnwet, sapwellimen Koht aramas akan kin doadoahngki misihn kan en wiahda pwuhk kan (high-speed printing presses) oh pil mehn doadoahk me kin doadoahngki computer kan (computerized tools) pwehn wiahda Paipel kan oh sawaspen Paipel kan ni soangsoangen lokaia daulih 100. Weren nansapw akan kin kahrehiong Paipel kan oh sawaspen Paipel kan kin mwadangete lel wasa doh kan nan sampah, oh met pwuhk pwukat kin lel sahpw 235. Siohwa kin doadoahngki sapwellime ngehn sarawi en kamwekid sapwellime ladu kan en doadoahngki misihn kan nan atail ahnsou, oh pwehki met, aramas tohto kin kak sukuhliki padahk mehlel sang nan Paipel.
4. Soangen wekidala dah kan ekei sounkalohk kan kin wia pwehn kalaudehla arail ahnsoun kalohk oh nantihong kalohk ong aramas tohto?
4 Kamwahuwihala Pein Ahmw Koasoandi Nan Ahmw Mour: Tohnkaudok mehlel kan kin mwekidki oh wiahda wekidekla kan me anahn pwehn kak kalohk ong aramas koaros duwen Rongamwahu. Sounkalohk tohto kin kihsang nan arail mour soahng soh-katepe kan oh met kin sewese irail en kalaudehla arail ahnsoun kalohk. Ekei kin kosoula nan wasa kan me anahne sounkalohk kan. Pil ekei kin kalaudehla arail kalohk ni arail kin sukuhliki ehu lokaia kapw.
5, 6. Dahme ke kak wia pwehn kalohk ong aramas tohto nan ahmw wasahn kalohk?
5 Oh pil, kitail kak tuhwong aramas tohto ma kitail pahn kalohk ni ahnsou kan me aramas kin mihmi nan imwarail oh pil wasa kan me aramas kin mie. Ma aramas sohte mihmi nan imwarail ni rahn, ke lemeleme ke kak wekidala ahmw koasoandi pwehn kalohk ni soutik kan? Ke lemeleme ke kak kalohk nan wasa kan me wehi pokon kin kohpene ie? Ke song wia kalohk ni ahmw doadoahngki telephone de kalohk nan wasahn pisnis kan? Ke kin rapahki ahnsou mwahu kan pwehn kalohk ni ahnsou sohte lipilipil?
6 Kitail koaros ahneki kapai kaselel en iang doadoahk en kalohk oh pakairki mwaren Siohwa oh sapwellime Wehi! Kitail en wia uwen atail kak en ehukiong aramas tohto padahk mehlel sang Mahsen en Koht.—Madiu 28:19, 20.