Koaros Kak Iang Ahneki Pwais en Padahki Tohnpadahk Kapw kan
1 Tohnpadahk kapw men sohte kin miehla pwehki sang ni doadoahk laud en emente aramas. Siohwa kak doadoahngki sapwellime “tohndoadoahk kei” pwehn sewese tohnsukuhl en Paipel kan en kekeirada ni pali ngehn. (1 Korint 3:6-9) Emen emen kitail kin sewese irail me kapw kan kaidehn sangete atail pasapeng nan mihding kan me kin uhdahn kohsang nan atail mohngiong ahpw pil sang atail wiewia mwahu kan me kin kihda kadehde sansal me sapwellimen Koht ngehn sarawi kin wie doadoahk nan atail mour. (Sohn 13:35; Kalesia 5:22, 23; Episos 4:22, 23) Dahme pil kak wiawi pwehn sewese me kapw kan?
2 Nin Duwen Mwomwohdiso ehu: Kitail koaros kak kasalehda nsenoh ong irail kan me tepida towehda mihding kan sang ni atail pahn tiengla mwomwe oh kasamwo irail oh pil koasoi ong irail mwohn tepidahn mihding de mwurin mihding kan. Ohl emen kin tamanda tepin ah kohdo nan mwomwohdiso koasoia: “Nan rahn ehute, I tuhwong aramas me kin inenen kasalehda limpoak mehlel mehnda ma irail sehse ie, tohto sang irail kan me I kin tuhwong nan imwen Sarawi me I tikida ie. E uhdahn sansal me I diaradahr padahk mehlel.” Ohl menet papidaisla sounpwong isuhte mwurin e tepida iang mihding.
3 Kin kihong kaping mehlel ong tohnsukuhl en Paipel men ni ah wie kekeirada ni pali ngehn. E kin dadaurete nan irair en uhwong sang meteikan? E kin kaukaule towehda mihding kan? E kin nannanti en sohla saloh ahnsou e kin pasapeng? E iang kileldier pwehn towehda Theocratic Ministry Sukuhl de e iangehr kalohk? Kitail anahne kapinga ih ki kekeirada kan me e wiadahr. Met pahn kansenamwahu ong ih oh kakehle ah madamadau en pweida.—Lepin Padahk 25:11.
4 Nin Duwen Soun Kaweid en Onop Paipel: Ekei sounkalohk kan kin kak sewese arail tohnsukuhl en Paipel en esehla emen emen tohn mwomwohdiso ni arail kin peki sounkalohk teikan en iang irail ong ni arail onop Paipel kan. Ma kakehr, a en mwadang lukehdo tohnsukuhlo ni mihding en Kristian kan. Ahnsou me e tepidahr towehda mihding kan, kin nantiong en kapehse ih ong meteikan. Iaduwen, e kin nannanti en powehdi tiahk samin kan me e ahnlahr, duwehte simoak ape? Kin mie emen sang nan tohn imwe me kin uhwong ah kin onop? E kakete paiekihda sang ah pahn koasoi ohng sounkalohk men me lelohngehr soangen kahpwalohte.—1 Piter 5:9.
5 Irail me kapw kan anahne sawas en pali ngehn sang mwomwohdiso. Koaros kak sewese irail pwukat en kekeirada ni atail pahn kasalehda atail nsenohki mehlel irail.