Iren Mehn Kasukuhl 5

Ia Kupwuren Koht ong Sampah?

Dahme kahrehda Siohwa kapikada sampah? (1, 2)

Dahme kahrehda sampah wet sohte wiahki paradais? (3)

Dahme pahn wiaiong aramas suwed akan? (4)

Ni ahnsou keren, dahme Sises pahn wia ong me soumwahu kan? me mah kan? me mehlahr akan? (5, 6)

Pwen iang paiekihda pai en ni ahnsou kohkohdo, dahme ke anahne wia? (7)

1. Siohwa kapikada sampah wet pwe aramas akan en kak paiekihda mour kohkohlahte. E kupwurki sampah wet en direhkihla aramas pwung oh peren kan. (Melkahka 115:16; Aiseia 45:18) Sampah sohte pahn sohrala; e pahn mihmih kohkohlahte.—Melkahka 104:5; Eklesiasdes 1:4.

2. Mwohn Koht a ketin wiahda aramas, E ketin pilada kisin wasakis nin sampah, oh wiahda paradais kaselel ieu. E kahdaneki met, mwetuwel en Iden. Iei wasaht me e kihdi ie tepin ohl oh lih, Adam oh Ihp. Koht kupwureki ira en nainekihda seri kan oh kadirehla sampah pwon. Ekis ekis, re pahn kaparadaisiela sampah pwon.—Senesis 1:28; 2:8, 15.

3. Adam oh Ihp eri wiahda dihp ni ira kawehla sapwellimen Koht kosonned. Eri Siohwa kausesang ira sang nan mwetuwel en Ihden. Eri paradais salongalahr. (Senesis 3:1-6, 23) Ahpw Siohwa sohte likidmeliela sapwellime kupwur kan ong sampah wet. E ketin inoukihda en kaparadaisla sampah wet, wasa me aramas akan pahn mour kohkohlahte. Iaduwen e pahn ketin wia met?—Melkahka 37:29.

4. Mwohn sampah wet kak wiahla paradais, aramas suwed akan pahn anahne kohsang. (Melkahka 37:38) Met pahn wiawi nan Armakedon, iei mahwen en Koht ehu me pahn kauhdi mwersuwed. Mwuri, Sehdan pahn seldi erein sounpar 1,000. Met wehwehki me sohte aramas suwed kan me pahn mihmihte nin sampah oh kasaminehla. Ihte sapwellimen Koht aramas akan me pahn pitila.—Kaudiahl 16:14, 16; 20:1-3.

5. Mwuri, Sises Krais pahn kaunda sampah wet ni ah pahn wia Nanmwarki men erein sounpar 1,000. (Kaudiahl 20:6) E pahn ekis ekis kihsang dihp sang atail madamadau kan oh paliwar akan. Kitail pahn wiahla aramas unsek kei duwehte Adam oh Ihp mwohn ara wiahda dihp. Eri, solahr soumwahu, mahla oh mehla pahn wiawi. Aramas soumwahu kan pahn kehlailda, oh aramas mah kan pahn pwurehng pwulopwula.—Sohp 33:25; Aiseia 33:24; Kaudiahl 21:3, 4.

6. Nan erein Kaundahn Sises Ni Pahr Kido, aramas lelepek kan pahn nantiong en kaparadaisla sampah pwon. (Luk 23:43) Oh pil, aramas rar kei pahn iasadahn mour nin sampah. (Wiewia 24:15) Ma re kin kapwaiada dahme Koht kupwurki irail en wia, re pahn kak mour nin sampah kohkohlahte. Ma soh, re pahn mehla soutuk.—Sohn 5:28, 29; Kaudiahl 20:11-15.

7. Kupwuren Koht ong sampah sang nin tepio pahn pweida. Ke men iang paiekihda kapai pwukat me pahn wiawi ni ahnsou kohkohdo? Ma ehi, ah ke anahne kaukaule sukuhliki duwen Siohwa oh kapwaiada sapwellime kosonned akan. Kaukaule iang towehda mihding kan nan Kingdom Hall en Sounkadedehn Siohwa kan pahn sewese iuk en wia met.—Aiseia 11:9; Ipru 10:24, 25.

[Kilel nan pali 10]

Paradais salongala

[Kilel kan nan pali 11]

Mwurin Armakedon, sampah pahn wiahla paradais