Iren Mehn Kasukuhl 8

Mouren Peneinei me kin Kaperenda Koht

Ia pwukoahn ohl pwopwoud nan peneinei? (1)

Iaduwen wiewia en ohl pwopwoud ohng eh pwoud? (2)

Pwukoa dah kan pahpa men ahneki? (3)

Ia pwukoa en lih pwopwoud nan eh peneinei? (4)

Dahme Koht kin kupwurki pahpa oh nohno kan oh pil seri kan en wia? (5)

Dahme Paipel kin mahsanih duwen lippeseng oh mweipeseng en pwopwoud? (6, 7)

1. Paipelo mahsanih ohl pwopwoud men iei tapwin eh peneinei. (1 Korint 11:3) Ohl pwopwoud men anahne pwoudiki lih tehmen. Ira anahne pwopwoud pwung nin duwen kosonned.—1 Timoty 3:2; Taitus 3:1.

2. Ohl pwopwoud men en uhdahn poakong eh pwoud duwehte e kin poakong pein ih. Eh wiewia kan ong ih en duwehte me Sises kin wiaiong sapwellime werek kan. (Episos 5:25, 28, 29) E sohte konehng en keme eh pwoud de pil mwamwaleki ih. Ahpw, e anahne wahuneki oh kahkahki eh werek lih.—Kolose 3:19; 1 Piter 3:7.

3. Pahpa men anahne doadoahk laud en apwalih pein eh peneinei. E anahne kihong eh pwoud oh nah seri kan kenarail mwenge, likou, oh wasahn pweidi. Pahpa men pil anahne kihong eh peneinei arail anahn akan en pali ngehn. (1 Timoty 5:8) E kin tiengala mwowe pwehn sewese eh peneinei en kin sukuhliki duwen Koht oh sapwellime kupwur kan.—Deuderonomi 6:4-9; Episos 6:4.

4. Lih pwopwoud men anahne wia sawas mwahu ong eh pwoud ohl. (Senesis 2:18) E anahne sewese eh pwoud ohl ong sukuhlih oh kaianihada neira seri kan. (Lepin Padahk 1:8) Siohwa kupwurki lih pwopwoud men en apwalih mwahu eh peneinei ni limpoak. (Lepin Padahk 31:10, 15, 26, 27; Taitus 2:4, 5) E anahne wauneki eh pwoud.—Episos 5:22, 23, 33.

5. Koht kupwurki seri kan en peikiong arail pahpa oh nohno kan. (Episos 6:1-3) E kupwurki pahpa oh nohno kan en kihong kaweid oh kapwungala neirail seri kan. Pahpa oh nohno kan anahne kihong ahnsou ohng neirail seri kan oh onop Paipel rehrail, apwalih mwahu arail anahn akan ni pali ngehn oh pil arail anahn en pepehmw kan. (Deuderonomi 11:18, 19; Lepin Padahk 22:6, 15) Sohte pwung pahpa oh nohno kan en kaiahne neirail seri kan ni elen lemei.—Kolose 3:21.

6. Ni ahnsou pwopwoud kan kin apwaliki miniminpene, irail anahne song en doadoahngki kaweid en Paipel kan. Paipelo kin kangoangkin kitail en kasalehda limpoak oh mahkpene. (Kolose 3:12-14) Sapwellimen Koht Mahsen sohte kin kangoange lippeseng en pwopwoud en wia ahl en kamwahuiala kahpwal tikitik kan. Ahpw lih pwopwoud men ele mwein pahn pilada en lippadahsang rehn eh pwoud ma (1) ohlo kahng apwalih eh peneinei, (2) ohlo kin kemei ih, oh wia keper ehu ong mour en lih pwopwoudo, de (3) ohlo kin uhweng laud oh sohte mweidong liho en iang kaudokiong Siohwa.—1 Korint 7:12, 13.

7. Ohl pwopwoud kan oh lih pwopwoud kan anahne en lelepak ong emenemen. Kamwahl iei dihp ong Koht oh ahn emen pwoud. (Ipru 13:4) Wia nsenen pwopwoud likin pwopwoud iei ihte poasonpen iren Paipel me mweidong pwopwoud en mweipeseng oh ira kak pwurehng pwoudkihda emen tohrohr. (Madiu 19:6-9; Rom 7:2, 3) Siohwa kin ketin kalahdeki aramas akan en kin mweipeseng ni ah sohte poahsoanda pohn iren Paipel kan oh ahpw uhd pwoudkihda emen tohrohr.—Malakai 2:14-16.

[Kilel kan nan pali 16, 17]

Koht kupwurki pahpa oh nohno kan en kaweid neirail seri kan oh kapwungala irail

[Kilel nan pali 17]

Pahpa limpoak men kin apwapwalih mwahu pein eh peneinei ni pali war oh ni pali ngehn