Iren Mehn Kasukuhl 12
Kasalehda Wahu ong Mour oh Nta
Ia atail madamadau ong mour? (1) kaiohla? (1)
Iaduwen Kristian kan kin kasalehda me re kin tehk mwahu irair
keper kan? (2)
E sapwung en kemehla mahn akan? (3)
Ia ekei wiewia kan me sohte kin kasalehda wahuneki mour? (4)
Dahme kosonned en Koht mahsanih duwen nta? (5)
Met kin pidada dok en nta? (6)
1. Siohwa iei Utupen Mour. Soang koaros me momour pweipwandikihier Koht arail mour. (Melkahka 36:9) Mour kin kesempwal ong Koht. Mouren seri me saikinte ipwidi, mih nan kapehd en eh nohno pil kesempwal ong Siohwa. Pilahn en kemehla seri men me wia kekeirada nan kapehd en eh nohno iei mehkot sapwung mwohn silangin Koht.—Eksodus 21:22, 23; Melkahka 127:3.
2. Kristian mehlel kan kin tehk mwahu irair keper kan. Irail kin tehk kanaiong pwe pein wararail sihdosa kan oh ihmwarail kan en dehr kahrehda emen en aksident. (Deuderonomi 22:8) Sapwellimen Koht ladu kan sohte kin iang wia mehkot me sohte katepe ahpw keper ohng mourerail pwe dene en wiahki mehn kamweit de mehkot kaperen. Eri, re sohte kin iang mwadong keper kan me kin kamedekla aramas teikan. Re pil sohte iang wia soangen mehn kamweit kan me kin kahrehda aramas en pei.—Melkahka 11:5; Sohn 13:35.
3. Mour en mahn akan pil kesempwal ong Sounkapikadao. Kristian men kak kamehla mahn akan ong mehn mwenge oh wia likou de mehn pere pein ih sang soumwahu oh keper. (Senesis 3:21; 9:3; Eksodus 21:28) Ahpw e sapwung en wiakawe de kemehla mahn akan ong mehn mwadong.—Lepin Padahk 12:10.
4. Simwoak, kang pwuh, oh doadoahngki wini suwed ong mehn kaperenih pein kitail mehkot sapwung ong Kristian akan. Wiewia pwukat sapwung pwehki (1) re kin wiahkinkitailla arail lidu, (2) re kin kawehla pein paliwaratail kan, oh (3) re samin. (Rom 6:19; 12:1; 2 Korint 7:1) E pahn kak apwal en kasehla wiewia pwukat. Ahpw kitail anahne pwen kaperenda Siohwa.
5. Nta mehkot sarawi mwohn silangin Koht. Koht mahsanih me soul, de mour, mih nan nta. Eri, e sapwung en kang nta. E pil sapwung en kang uduk en mahn me nta sohte kohsang mwahu. Ma emen mahn me mwopwala de mehla nan lidip ehu, e sapwung en kangala. Ma emen pahn kaskihdi de doakoahdi mahno, anahne en mwadangete kihsang nta ma ke men kangala mahno.—Senesis 9:3, 4; Lipai 17:13, 14; Wiewia 15:28, 29.
6. E sapwung en ale dok en nta? Tamanda, Siohwa kupwurki kitail en liksang nta. Met wehwehki me kitail sohte pahn ale nta en aramas teikan de pil pein atail nta me nekinekla wasahkis. (Wiewia 21:25) Eri Kristian mehlel akan sohte pahn ale dok en nta. Irail kin ale sawas teikan en epwelpen wini, duwehte doken wini me sohte doal nta. Irail men memour, ahpw re sohte pahn songen doarehla ahr mour ahpw kawehla sapwellimen Koht kosonned akan.—Madiu 16:25.
[Kilel kan nan pali 25]
Pwen kaperenda Koht, kitail anahne liksang doken nta, wiewia samin kan, oh wiewia keper kan