Irelaud 9
Ahl Kan Ong Kalohki Rongamwahu
SISES KRAIS kin uhdahn kesempwalki sapwellime doadoahk nin duwen emen me Siohwa ketin kadarodo. Nin duwen soun pakair ngoang men en rongamwahu en wehin Koht, e wia mehn kahlemeng mwahu ong sapwellime tohnpadahk kan. E kin tiengla mwowe en kohla nanpwungen aramas akan, koasoakoasoi oh padapadahk nan imwarail kan oh wasahn wehi pokon kan. (Madiu 9:35; Luk 8:1) Sises kin koasoiong emen emen aramas, padahkiong sapwellime tohnpadahk kan ni ahnsou me irail kelehpwla, oh koasoiong pwihn kan en aramas kid kei. (Madiu 13:36; Mark 4:10-13; 6:35-44; Sohn 3:2-21) E kin isaneki ahnsou mwahu kan koaros pwehn kihda mahsen kangoang kan oh koapworopwor. (Luk 4:16-19) E isaneki ahnsou mwahu kan koaros en kalohk, pil ahnsou kan me e anahne kommoal. (Mark 6:30-34; Sohn 4:4-34) Ni ahnsou me kitail wadek poadoapoad kan duwen Sapwellimen Sises kalohk, kitail soh mwekidki en kahlemengih sapwellime mehn kahlemeng mwahu kan? Kitail uhdahn men wia met, duwehte wahnpoaron akan pil kin wia.—Madiu 4:19, 20; Luk 5:27, 28; Sohn 1:43-45.
Medewehla ahnsou mwahu kan me kohieng Kristian akan rahnwet pwehn iang doadoahko me Sises Krais tepidahr kereniong sounpahr 2,000 samwalahr.
KALOHK SANG IHMW LEL IHMW
Sounkadehdehn Siohwa kan en atail ahnsou kin pohnese kesempwalpen kalohkiseli rongamwahu ni soandi mwahu sang ihmw lel ihmw. Irail kin uhdahn doadoahngki ahl wet en lel aramas akan ki padahk en Wehio oh met wiahla kilelparail. Imwila mwahu kan en doadoahk wet kin wia mehn kadehdehn sapwellimen Siohwa kupwurperen oh kapai. Oh pil, erpit en doadoahngki ahl wet en mwadang lel aramas rar kei nan erein ahnsou mwotomwot kin sansalda sang imwila mwahu kan. (Madiu 11:19; 24:14) Doadoahk wet kin sansalda nin duwen ahl mwahu ong kitail pwehn kasalehda limpoak ong Siohwa oh mehn mpatail kan.—Madiu 22:34-40.
Kalohk en ihmw lel ihmw kaidehn mehkot kapw me Sounkadehdehn Siohwa kan wiahda nan atail ahnsou. Doadoahk wet wiawihdahr nan ahnsoun wahnpoaron kan. Ni mehlel, wahnpoaron Pohl ntingihdi duwen ah padahk nan imwen aramas akan. Ni ah koasoia duwen ah kalohk ong sounapwalih kan nan Episos, e koasoia, “Sang ni tepin rahn me I pwarodohng kumwail nan wehin Eisia . . . I sohte kin ekihsang kumwail mehkot me I dehdehki me pahn sewese kumwail ni ei padahk oh panawih kumwail nan wasahn kapokon kan oh nan imwarail kan [‘sang ihmw lel ihmw,’ NW].” Ni ahl wet oh ni ahl teikan, e kin “panawih mehn Suhs kan oh pil mehn liki kan, pwe irail en weksang diparail kan, oh wekidekiong Koht oh pil pwoson mwaren Kaun Sises.” (Wiewia 20:18, 20, 21) Ni ahnsowo, mie anahn karuwaru en lel aramas koaros ki rongamwahuo, pwe Kaunen wehin Rom kan kin kangoange aramas akan en iang kaudok en dikedik kan oh me tohto kin “inenen poadidi ni soangen lamalam koaros.” Mie anahn karuwaru en rapahki “Koht me ketin kapikada sampah oh audepe kan koaros,” Meno me kin ketin padahkiong “aramas koaros wasa koaros en weksang arail suwed akan.”—Wiewia 17:22-31.
Rahnwet, anahn en mwadang lel aramas akan ki rongamwahu inenen laud sang mahs. Imwin koasoandi suwed wet kin mwadang kohkohdo. Mour en tohnsampah pwon kin mihmi nan irair en keper. Eri, mie anahn en kalaudehla atail nanti ni ahnsou wet, mwohn imwio pahn leledo. Ni atail kilang anahn wet, kitail kin mwekidki oh men kalaudehla atail nanti en wia kalohk en ihmw lel ihmw, pwe kitail wehwehki me sohte ehu ahl me dierekda me mwahu sang ahl wet me sansalda nan erein ahnsou reirei me iei ahl me keieu mwahu en diarada irail akan me kin duhpek en padahk mehlel. E kin pweida mwahu rahnwet duwehte ahnsoun Sises oh wahnpoaron kan. E wia ahl kaperen ong kitail en iang doadoahk en kalohk.—Mark 13:10.
Nin duwen pein ahmw irair akan, ke kin wia uwen ahmw kak en iang kalohk en ihmw lel ihmw? Ma ke kin isaneki ahnsou mwahu kan koaros en wia met, se ese me ke kin ale kapai laud en peren oh nsenamwahu nan ahmw papah Koht. (Esekiel 9:11; Wiewia 20:35) Mwein kalohk en ihmw lel ihmw sohte mengei ong komwi. Mwein mie ahmw kahpwal en paliwar, de mwein ele ke pahn ale pwukoa en wia doadoahk en kalohk nan wasa me aramas tohto sohte perenki rong. Mwein mie kahpwal kan me ke anahne powehdi pwehki koperment kin keinapwihsang doadoahk wet. Pwehki ahmw irair kan me ke ahneki, mwein ele ke pahn diarada me e inenen apwal en tepida koasoi ong aramas akan me ke sehse oh kahrehda ke anahne powehdi ahmw kapwunod kan ahnsou koaros ke iang kalohk en ihmw lel ihmw. Ke dehr mworuskihla. (Eksodus 4:10-12) Ahmw irair kan duwehte irair kan me riomw brother kan nan sahpw tohto teikan kin mihmi loale.
Sises inoukihong sapwellime tohnpadahk ko me e pahn ieiang irail “ahnsou koaros lel ni imwin kawa.” (Madiu 28:20) Inouo kin kangoange sapwellime tohnpadahk kan rahnwet oh kakehle irail nan doadoahk en katohnpadahk. Kitail anahne eimah oh ahneki pwoson duwehte Pohl kasalehda, me dierek nan Pilipai 4:13. E koasoia: “I kakohng mehkoaros sang ni manamano me [e] kin ketikihong ie.” Isaneki koasoandi en mwomwohdiso kan koaros ehu ehu wihk pwehn iang kalohk en ihmw lel ihmw. Ni ahmw kin iang meteikan doadoahk en kalohk, ke pahn ale kangoang oh sawas pwe ken koasoiong aramas akan ni koahiek oh kihla sawaspen Paipel kan. Kapakapki pwoson en laudla pwehn powehdi mehn kerempwa soh lipilipil kan me ke kak lelong, oh wia uwen me ke kak nin duwen sounkalohk men en rongamwahu.—Luk 17:5.
Ni ahmw kin koasoiong meteikan duwen rongamwahu, ke pahn ahneki ahnsou mwahu kan en kawehwehiong irail ahmw koapworopwor, oh ahmw koapworopwor pahn kehlailda. (1 Piter 3:15) Ke pahn kilang wekpeseng laud nanpwungen aramas akan me ahneki koapworopwor en Wehio oh irail akan me sohte ahneki koapworopwor. En diarada aramas akan me warohng padahk en Wehio oh pil kilang mwekid kan en irail kan me sohte warohng pahn kahrehiong iuk en pein diarada mehlelpen dahme Sises mahsanih ong sapwellime tohnpadahk kan, me kileldi nan Madiu 10:11-14. Ke pahn ahneki nsenamwahu ni ahmw kin ese me ke kin peikiong sapwellimen Sises kehkehlik en “amwail marain en sansal mwohn aramas akan,” oh mwein ele ke pahn ahneki pwais en sewese meteikan en ale loalokong en padahk mehlel me pahn kahluwalahng mour soutuk.—Madiu 5:16; Sohn 17:3; 1 Timoty 4:16.
Koasoandi kan kin wiawihda ong kalohk en ihmw lel ihmw ni imwin wihk kan oh pil nan erein wihk. Nan wasa kan me e inenen apwal en diarada aramas akan ni imwarail ni rahn, ekei mwomwohdiso kan kin koasoanehdi en kalohk ni soutik. Irail kin diarada me aramas akan kin perenki aramas akan me pahn mwemweit rehrail ni kaimwiseklahn mwurin souwas de tepin ni soutik sang ni menseng. Oh pil, mie elen kalohk teikan me mwein ele pahn pweida nan ahmw wasa.
RAPARAPAHKI ARAMAS AKAN ME WAROHNG
Sises padahkiong sapwellime tohnpadahk kan en “rapahki” aramas akan me warohng. (Madiu 10:11) Ah rapahki aramas akan me pahn perenki rong kin wiawi kaidehn ni ahnsoun kalohk en ihmw lel ihmwte. Ni mehlel, e kin kalohk ni ahnsou soh lipilipil. (Luk 8:1; Sohn 4:7-15) Wahnpoaron kan pil kin kalohk ong aramas akan ni soahng soangen wasa kan.—Wiewia 17:17; 28:16, 23, 30, 31.
Duwehte rahnwet, atail mehn akadei iei en lel aramas koaros ni uwen me atail kak ki padahk en Wehio. Met wehwehki en kahlemengih Sises oh sapwellime tohnpadahk kan duwen arail elen doadoahk en katohnpadahk oh pil pehmitikiong wekideklahn ahnsou oh soahng soangen irair kan en aramas akan nan atail wasahn kalohk.—1 Korint 7:31.
Kapataiong kalohk en ihmw lel ihmw, kitail anahne rapahki aramas akan nan wasa teikan. Sounkalohk kan kin pweida mwahu ni arail kin tuhwong aramas akan ni wasahn doadoahk kan. Kalohk nanial pil kin pweida mwahu nan wehi tohto, oh pil kalohk nan park kan, wasahn peidi sidohsa kan, nan mehn peidaid en wehi pokon kan, de sohte lipilipil wasa kan me aramas akan kak dierek. Imwilahn met, aramas akan me sohte mih nan imwarail ni ahnsou me sounkalohk kan kohla pil kak rong rongamwahu.
En kihla Watchtower oh Awake! kin wia ahl me kin pweida mwahu en kalohk ong aramas akan. Met kak wiawi ni elen kadek oh kamantik ni atail kin koasoiong aramas akan duwen ehu oaralap konehng me mihmi nan makisihn kan. Pwuhk teikan pil pahn kak kohwong aramas akan me perenki rong, oh koasoandi kan kak wiawihda pwehn pwurehng pwurala rehrail ni imwarail. Ekei pak, Atail Doadoahk Ong Wehio kin kihda sawas kan me pid duwen ire wet, kangoange kitail en iang soahng soangen elen kalohk. Mwein ele ke pahn diarada me kalohk ong aramas akan ni wasahn wehi pokon kan iei ahl kaperen ieu pwehn kalaudehla ahmw kalohk.
Ahpw, kaidehn ihte kehsehki peneu oh pakairki rongamwahu kin wia doadoahk me Kristian akan rahnwet kin pwukoahki wia. Ma ke men pweida en sewese meteikan en ale padahk mehlel me kak kahluwalahng mour, ke anahne pwurepwurehng pwurala rehn aramas akan me perenki rong pwe irail en kak kekeirada pwehn wiahla Kristian mahlahr akan ni pali ngehn.
WIA RETURN VISIT KAN
Sises mahsanih ong sapwellime tohnpadahk kan: “Kumwail pahn kadehde ie . . . oh lelohng ni irepen sampah.” (Wiewia 1:8) Ahpw e pil mahsanihong irail: “Kohwei wasa koaros oh padahkiong tohn wehi kan koaros; pwe re en wiahla nei tohnpadahk, . . . kehkehlingkihong irail re en peikiong mehkoaros me I koasoanediong kumwail.” (Madiu 28:19, 20) Wia return visit kan kak wia utupen peren nan sapwellimen Siohwa doadoahk. Aramas akan me kin kasalehda arail perenki rong rongamwahu ni ahnsou me ke tepin tuhwong pahn perenki ahmw pwurehng pwurala rehrail. Ni ahmw kin pwurehng ehukihong irail padahk en Paipel kan, ke pahn mwein ele kak kakehlail arail pwoson Koht oh sewese irail en wehwehki arail anahn en pali ngehn. (Madiu 5:3) Ma ke kin koasoanehdi en wia return visit ni ahnsou mwahu oh kaunopada mwahu, mwein ele ke pahn tepida ehu Paipel study. Met kin wia ahmw mehn akadei ni ahmw kin wia riturn visit kan. Kitail sohte kin ‘kamwarakte’ kisin werentuhke en padahk mehlel ahpw kitail kin pil ‘kalamwurehki pihl.’—1 Korint 3:6.
Wia return visit kan kin apwal ong ekei. Mwein ke koahiekla en wia padahk mwotomwot en rongamwahu ni ihmw lel ihmw, oh ke kin perenki elen kalohk wet. Ahpw ni ahnsou me ke medemedewe duwen pwurehng pwurala rehn tohnihmw pwehn koasoipene duwen oaritik kan en Paipel, mwein met pahn mwomwen nohk apwal. Ke sohte anahne en ahneki soangen pepehm wet. Mwein ni ahnsou me ke tepin tuhwong aramaso, ke kihla sawaspen Paipel reh. Ke sou koasoia duwen ire kan me mih nan pwuhko? Ke kak kaunopada mwowe. Ma ke lemeleme me ke sohte kakohng, koasoanehdi emen sounkalohk koahiek men en iang oh sewese iuk.
Sapwellimen Siohwa pwihn kin kihda sawas kan me ke anahne pwehn koahiekla ni wia return visit kan. Tehk mwahu pwe ke en isaneki ahnsou mwahu kan koaros pwehn kekeirada ahmw loalokong oh wehwehki duwen Pwuhk Sarawi. Likih Siohwa, oh ale sawas kan koaros sang rehn brother kan oh sister kan me ahneki ekspiriens laud. Ma ke pahn wia met, ke pahn kamwahuiala ahmw koahiek en wia return visit kan me pahn pweida mwahu, oh ahmw peren nan kalohk pahn laudla.
WIA PAIPEL STUDY KAN
Ni ahnsou me e koasoiong emen ohl me perenki rong padahk en Mahsen en Koht, sounkalohk Pilip idek reh: “Ia duwe, komw wehwehki dahme komw wadewadeken?” Ohlo sapengki: “Ia duwen ei pahn kak wehwehki, ma sohte me pahn kawehwehiong ie?” Poadoapoad en Paipel en Wiewia irelaud 8 kin kasalehiong kitail me tepikihdahte iren Paipel kan me ohlo wadewadek, Pilip “koasoia ong ohlo duwen rongamwahu en Sises.” (Wiewia 8:26-36) Kitail sehse ia uwen werei me Pilip doadoahngki ong ohlo, ahpw Pilip kawehwehda duwen rongamwahu ni uwe ehu me kahrehiong ohlo en wiahla me pwoson men oh peki en papidaisla nan pihl. E wiahla sapwellimen Sises tohnpadahk men.
Aramas men me kitail kin diarada rahnwet mwein sohte nohk ese Paipel, kahrehda kitail anahne pwurepwurehng pwurala reh pak tohto oh wia onop oaritik kan en Paipel erein wihk kei, sounpwong kei, de mwein sounpahr ehu de reireisang mwohn e pahn kasalehda pwoson oh kakehr papidaisla. Ahpw ahmw kanengamah oh limpoak en sewese aramas akan me ahneki mohngiong mehlel en wiahla tohnpadahk kan pahn wia ketingpomw, duwehte me Sises mahsanih: “Kihwei kaperen sang ale.”—Wiewia 20:35.
Ke pahn diarada me e pahn mengei en wia Paipel study ni ahmw kin doadoahngki ehu pwuhk en Sounkadehdehn Siohwa kan me wiawihda ong kahrepe wet. Ni ahmw kin idawehnla mehn kahlemeng en emen me kin onop rehmw de ni ahmw kin ale sawas sang rehn sounkalohk koahiek teikan nan mwomwohdiso, mwein ke pahn kak kamwahuiala ahmw koahiek en wia onop kan me pahn pweida mwahu, sewese meteikan en wiahla tohnpadahk kan en Sises Krais.
Ma ke anahne sawas en tepida oh wia Paipel study, ke kak koasoiong emen sounapwalih ni saledek de emen Sounkadehde me kin koahiek en wia doadoahk en Paipel study. Ke kak ale sawas en doadoahngki sawas kan me kohda nan Atail Doadoahk Ong Wehio oh pil sang kamwomwada kan nan Service Mihding. Likih Siohwa oh kasalehda ahmw ineng kan nan kapakap pahn wahdo imwila mwahu. (1 Sohn 3:22) Eri, iang doadoahk en katohnpadahk, oh ma ke kak, akadeiong en kaukaule wia ehu Paipel study de tohtohsang kapataiong wia study me ke kin wia rehn ahmw peneinei. Ni ahmw kin kaukaule wia Paipel study kan, ke pahn kalaudehla ahmw peren nan kalohk.
KAHLUWA ARAMAS AKAN ME PERENKI RONG OHNG SAPWELLIMEN SIOHWA PWIHN
Ni ahnsou me kitail wia Paipel study kan oh sewese aramas akan en wiahla tohnpadahk kan en Sises Krais, irail pahn esehla duwen Siohwa oh pahn patehng mwomwohdiso. Mwomwohdiso kan kin koasoanedier nin duwen kaweid kan me kohsang rehn Siohwa pwehn kapwaiada kupwure. Irail Paipel study kan pahn kekeirada oh mahla ni pali ngehn ma kitail pahn sewese irail en pohnese sapwellimen Siohwa pwihn oh miniminiong ih. E kesempwal en padahkiong irail iaduwen re kak wia met.
Pwehn wia met, ke kak doadoahngki video kan oh brochure kan me wiawihdahr ong kahrepe wet. Ekei ire kan me dierek nan irelaud 4 en pwuhk wet mwein ele pahn wia sawas.
Sang ni tepin ahmw koasoipene rehn aramas akan me perenki rong, sewese irail en kilang me Siohwa kin ketin doadoahngki ehu pwihn pwehn kahrehiong doadoahk wet en wiawi pohn sampah rahnwet. Kawehwehda katepen sawaspen Paipel kan me Sounkadehdehn Siohwa kan kin doadoahngki, oh kawehwehda iaduwen pwuhk pwukat kin wiawihda oh kohpeseng nin sampah pwon sang doadoahk en tohndoadoahk kan me inoudahr ong Koht me toukihda pein irail. Luhke ahmw Paipel study kan en iang iuk towehda Pwuhk Study en Mwomwohdiso. Kahrehla irail en tuhwong brother oh sister kan wasao, oh kawehwehiong irail iaduwen mihding kan nan Kingdom Hall kin wiawi. Kangoange irail en iang towehda. Sewese irail en esehla Sounkadehde teikan ni ahnsoun kapokon en circuit kan oh kapokon en district kan. Ni soangen ahnsou pwukat oh ahnsou teikan, mweidong me kapw kan en pein tehk iaduwen sapwellimen Siohwa sounpapah kan kin kasalehda kilelepen Kristian mehlel kan, me iei limpoak. (Sohn 13:35) Ni aramas akan me perenki rong ahr kin kekeirada arail kalahnganki sapwellimen Siohwa pwihn, arail pahn esehla Siohwa pahn inenen laudla.
DOADOAHNGKI SAWASPEN PAIPEL
Tepin Kristian akan wiahla sounkalohk ngoang kan en Mahsen en Koht. Irail kin wiahda neirail doaropwe en Iren Paipel kan pwehn pein arail doadoahngki oh pil ong onop en mwomwohdiso. Irail kasalehda padahk mehlel en Mahsen en Koht ong meteikan. Neirail doaropwe kan me malaulau oh irail kin uhdahn kesempwaliki doaropwe pwukat. (Kolose 4:16; 2 Timoty 2:15; 3:14-17; 4:13; 1 Piter 1:1) Ni arail kin doadoahngki koahiek en wiahda pwuhk kan rahnwet, Sounkadehdehn Siohwa kan kin wiahda Paipel rar (million) kei oh sawaspen Paipel million epwiki kei—duwehte doaropwe kan, brochure kan, pwuhk kan, oh makisihn kan—ni lokaia tohto.
Ni ahmw kin ehukihong meteikan rongamwahu, tehk mwahu pwehn doadoahngki sawaspen Paipel tohto me “ladu lelepek oh loalokong” me wiahda. (Madiu 24:45) Atail Doadoahk Ong Wehio kin pakairki mehnia pwuhk kan pahn kadoadoahk nan ehu ehu sounpwong. Ke pil kin ahneki ahnsou mwahu en kaukaule kihla makisihn kan ni soahng soangen ahnsou kan nan ehu ehu sounpwong, iangahki rahn en kihla makisihn kan.
Mendahki ‘ladu lelepek’ kin keieu nsenohki kaunopada mwengehn ngehn ni ahnsou konehng ong tohn peneinei en Koht, “laduo” kin kasalehda sapwellimen Siohwa Koht kadek sapan ni arail kin kaunopada diren mwengehn ngehn ong aramas soh lipilipil me kin duhpekkihla arail men loalokongkihla duwen ih. Pwehki ke kin ese ia uwen laud ke kin paiekihda ahmw kin wadek oh onop pwuhk kan en Sounkadehdehn Siohwa kan, ke pahn uhdahn men ehukihong meteikan ire kan me ke sukuhlikier. (Ipru 13:15, 16) Ni arail kin doadoahngki soangen pwuhk pwukat, me kapw kan pil kak pweida mwahu nan arail kalohkiseli rongamwahu.
KALOHK NI AHNSOU SOH LIPILIPIL
Sises mahsanihong irail akan me kin tehk kanahieng sapwellime mahsen: “Kumwail me kamarainpen sampah. . . . Ih pil duwen kumwail, amwail marain en sansal mwohn aramas akan pwe re en kilang amwail wiewia mwahu kan oh kapikapingahki Samamwail me ketiket nanleng.” (Madiu 5:14-16) Tohnpadahk pwukat anahne kasalehda sapwellimen Koht ahl akan sang ni arail kin kahlemengih Sises Krais, me pil mahsanih: “Ngehi me marain en sampah.” Sises wia mehn kahlemeng ong Kristian akan ni ah kin kahrehiong “marain en mour” en sansal ohng kamwahupen aramas koaros me pahn rong.—Sohn 8:12.
Wahnpoaron Pohl pil wia mehn kahlemeng mwahu ong kitail en idawehn. (1 Korint 4:16; 11:1) Ni ahnsou me e mihmi nan Adens, e kin kalohk rahn koaros nan wasahn netinet ong aramas akan me mihmi wasao. (Wiewia 17:17) Kristian akan nan Pilipai kin idawehn ah mehn kahlemeng, oh e koasoia me irail kin ‘lingalingki marain, nanpwungen aramas suwed oh dipan akan.’ (Pilipai 2:15) Kitail rahnwet pil kak kahrehiong padahk mehlel en Wehio en linganki marain sang ni atail lokaia kan oh wiewia kan ni ahnsou sohte lipilipil me mwahu ong kitail pwehn padahkiong meteikan duwen rongamwahu. Mehlel, atail mehn kahlemeng mwahu nin duwen aramas mehlel oh pwung kan kin kahrehiong aramas akan en kilang me kitail weksang pali laud en tohnsampah kan. Ahpw, ma kitail pahn koasoi duwen rongamwahu ong aramas akan me kin kilang atail mehn kahlemeng mwahu, re pahn ese dahme kahrehda kitail kin weksang meteikan.
Sounkadehdehn Siohwa kan tohto kin kasalehiong rongamwahu ong aramas akan me re kin tuhwong rahn koaros ni arail wasahn doadoahk, ni sukuhl, de ni ahnsou me re wia arail kedirepw kan nan mour. Ni ahnsoun seiloak, ele kitail pahn ahneki ahnsou mwahu en koasoiong aramas teikan me pil iang seiloak. Emen emen kitail anahne pehmitikiong ahnsou mwahu kan pwe atail koasoakoasoiapene pahn kak wiahla ahnsoun kalohk oh kin kaunopada mwahu pwehn koasoiong meteikan nan soangsoangen ahnsou konehng koaros.
Kitail pahn ale kangoang en ehukihong meteikan rongamwahu ma kitail kin tamatamante me ahnsou koaros kitail wia met, kitail kin kapinga Sounkapikpatail oh kawauwih mware. Ni ahnsowohte, kitail pahn mwein ele kak sewese aramas akan me ahneki mohngiong mehlel en esehla Siohwa pwe irail pil kak papah ih oh ahneki koapworopwor en mour me pahn kohdo sang ni arail pwoson Sises Krais. Soahng pwukat koaros iei doadoahk sarawi, oh e pahn kaperenda Koht.—Ipru 12:28; Kaudiahl 7:9, 10.