Iren Mehn Kasukuhl 13

Iaduwen Komw kak Diarada Kaudok Mehlelo?

Koht kin kupwurki pelien lamalam koaros, de ehute? (1)

Dahme kahrehda pelien lamalam tohto dene irail Kristian akan? (2)

Iaduwen omw kak esehki ma irail Kristian mehlel akan? (3-7)

1. Sises tepida pelien lamalam mehlel ehute. Kahrehda, rahnwet, uhdahn pahn pil mie pwihn tehieu me pahn wia tohnkaudok mehlel kan en Siohwa Koht. (Sohn 4:23, 24; Episos 4:4, 5) Paipel padahkiong kitail me aramas malaulaute me kin kekeid nan ahl tehtik en mour.—Madiu 7:13, 14.

2. Paipelo kohpadahr me mwurin mehlahn wahnpoaron ko, padahk likamw akan oh wiewiahn mehn liki kan pahn ekis ekis pidelong nan mwomwohdiso en Kristian. Aramas pahn kahluwalahng irail me pwoson kan en idawehnla irail oh sohte idawehnla Krais. (Madiu 7:15, 21-23; Wiewia 20:29, 30) Ih kahrepen mie soahngen pelien lamalam tohto me kose me irail me Kristian mehlel. Iaduwen kitail kak esehki ihs irail Kristian mehlel akan?

3. Kasansalpe keieu kesempwal en Kristian mehlel akan iei me irail pahn limpoak mehlel nanpwungarail. (Sohn 13:34, 35) Irail sohte ale kaweid me irail kin mwahusang aramas me kin kohsang keinek teikan. Re sohte kin sukuhliki en kailongki aramas me kin kohsang wehi teikan. (Wiewia 10:34, 35) Re sohte kin iang mahwin kan. Kristian mehlel kan kin miniminpene nin duwen pirien ehu, brother oh sister kan.—1 Sohn 4:20, 21.

4. Pil ehu ire kesempwal en kaudok mehlelo iei me towe kan kin wauneki Paipelo. Irail kin kamehlele me Paipel kohsang rehn Koht oh pil kamehlele audepe kan. (Sohn 17:17; 2 Timoty 3:16, 17) Re kin kesempwaliki Mahsen en Koht laudsang lamalam en aramas de tiahk kan. (Madiu 15:1-3, 7-9) Re kin song en kapwaiada Paipelo ni ehu ehu rahn en arail mour. Eri, irail sohte kin padahkiong aramas teikan mehkot, ahpw irail uhd wia mehkot tohrohr.—Taitus 1:15, 16.

5. Kaudok mehlelo uhdahn pahn kawauwih mwaren Koht. (Madiu 6:9) Sises ketin kasansalehdahr mwaren Koht, Siohwa ong mehteikan. Kristian mehlel akan anahne alasang ih. (Sohn 17:6, 26; Rom 10:13, 14) Ihs irail akan nan omw kousoan kin padahkiong mehteikan duwen mwaren Koht?

6. Kristian mehlel akan anahne kalohki Wehin Koht. Sises kin wia met. E kin ahnsou koaros kalohki duwen Wehio. (Luk 8:⁠1) E kekehlikiong sapwellime tohnpadahk kan en kalohki rongohte nin sampah pwon. (Madiu 24:14; 28:19, 20) Kristian mehlel akan kin kamehlele me ihte Wehin Koht me pahn kak wahdohng sampah wet popohl oh meleilei.—Melkahka 146:3-5.

7. Sapwellimen Sises tohnpadahk kan anahne en katohre ihr sang sampah suwed wet. (Sohn 17:16) Irail sohte kin men iang pidada politik en sampah wet oh akamai kan me pid irairen mouren aramas akan. Re kin liksang tiahk suwed kan, wiewia kan, oh lamalam kan en sampah wet. (Seims 1:27; 4:4) Komw kak tehk oh kilang pelien lamalam ehu nan omw kousoan me ahneki kilelepen Kristian mehlel?

[Kilel kan nan pali 26, 27]

Kristian mehlel akan kin limpoakpene, wauneki Paipelo, oh kalohki Wehin Koht