Koakon En Peidek

◼ E konehng Sounkadehdehn Siohwa kan en kihseli tape en padahk kan de padahk kan me ntingdi?

Kitail kin kehlailkihda oh ale kangoang sang padahk en Paipel kan. (Wiewia 15:32) Kahrehda, kitail kin men ehukihong irail kan me sohte iang towehda mihtingo ire kan me kitail perenki. Pwehki mie soangen dipwisou tohto en rekord, e mengei en rekordih padahk kan oh kihpeseng. Ekei kin kolokol padahk kan iangahki padahk kan me wiawi sounpar tohto samwalahro oh kin kihong kompoakparail kan pwehki re men sewese irail. Ekei kin wiahda Web site kan oh kihong padahk kan loale pwe koaros en kak ale.

E sohte sapwung ma kitail rekordih padahk kan ong pein kitail de tohn atail peneinei. Patehng met, elder kan ele pahn koasoanehdi pwe padahk kan en rekordih ong tohnmwomwohdiso me soumwahu oh sohte kak iang towehda mihting kan. Ahpw, mie kahrepe mwahu kan ong kitail en dehr kihseli padahk kan.

Pwehki padahk kan kin kalapw pid anahn en ehuehu sahpw, e mengei kitail en kasapwungehla ekei ire kan nan padahk ehu me kohseli pwehki kitail sohte wehwehki anahn en sahpwo me padahko wiawi ie. Patehng met, e pahn apwal ong kitail en ese ihs me wia padahko oh iahd me eh wiawi pwe kitail en kak ese me ire kan nan padahko me pwung oh pahrekiong dahme kitail wehwehki met. (Luk 1:1-4) Pil ehu, padahk kan me kohseli kakete kahrehiong ekei en kapinga emen nohn daulihla de kahrehiong emen me wia padahko en pwungki ale soangen kaping wet.—1 Kor. 3:5-7.

Ladu lelepek oh loalokong kin doadoahk laud pwehn kihda padahk mehlel kan en Paipel me rasehng tungoal ni uwe me konehng oh “ni ahnsou me konehng.” (Luk 12:42) Met kin pil pid koasoandi en padahk kan me kin wiawi nan ehuehu mwomwohdisohn Sounkadehdehn Siohwa kan oh padahk kan me kitail kak alehdi sang nan Web site en jw.org. Kitail kak likih me ladu lelepek oh loalokong oh nah Pwihn me kin apwalih mwomwohdiso nan sampah pwon pahn kihda dahme kitail anahne pwe kitail en kehlail nan atail pwoson.—Wiewia 16:4, 5.