Mehn Rong Ngilen Wadawad kan—Ia Duwen Omw Pahn Doadoahngki
1. Pil patehngete neitail sawaspen Paipel kan, sawas dah me pil kohda ong kitail me kitail kak paiekihda?
1 Me tohto kin perenki kohla nan jw.org pwehn wadek koasoi kansenamwahu oh mahsen kan me mehlel. (Ekl. 12:10) Ahpw, ia duwe, ke kin iang doadoahngki mehn rong ngilen wadawad kan? Met kahrehda e mengei en rong pali laud en ire kan me mi nan neitail website. Ia duwen atail kak paiekihda mehn rong ngilen wadawad pwukat?
2. Ia duwen atail pahn doadoahngki mehn rong ngilen wadawad kan ong pein atail onop de onop en peneinei?
2 Ong Pein Atail Onop de Onop en Peneinei: Rongorong ngilen wadawad kan sang nan Paipel, makasihn kan, de ehu sawaspen Paipel ni atail seiseiloak de soupisengki atail doadoahk en ehuehu rahn kak sewese kitail en isaneki mwahu en doadoahngki atail ahnsou. (Ep. 5:15, 16) Kitail kak kapataiong soangsoangen wiepe kan nan atail kaudok en peneinei sang ni atail pahn rongorong wadawad en pwuhk ehu ni atail ideidawehn nan pein neitail pwuhk. Doadoahngki mehn rong ngilen wadawad kan erein atail pein onop me pahn keieu sewese kitail ma kitail songosong en kamwahwihala atail wadawad de sukusukuhlki ehu lokaia tohrohr.
3. Soangen aramas dah kan nan atail wasahn kalohk me ele pahn paiekihda mehn rong ngilen wadawad kan?
3 Ong Doadoahk en Kalohk: Aramas akan nan atail wasahn kalohk me kin pehm me re nohn kedirepw en wadek mehkot ele pahn perenki rong mehn rong ngilen wadawad kan. De ele kitail pahn tuhwong irail kan me kin lokaiahki ehu lokaia tohrohr oh ele pahn mwekidki rong rohng en Wehio ni pein ‘lokaiahn sapwarail.’ (Wiewia 2:6-8) Nan ekei sahpw kan, en rongorong wia kisehn arail tiahk me kesempwal. Karasepe, tiahk en mehn Hmong, aramas en wasao kin peusehiong dih kapw kan en arail poadopoad sang ar kin soaiong irail oh re kin koahiek en tamatamante poadopoad kan me re rong. Tohto tiahk en mehn Aperika kan kin perenki sukuhlki soahng sang rongorong soai.
4. Soangen peidek dah kan me ele kitail kak pein idek rehtail duwen sewese aramas akan nan atail wasahn kalohk?
4 Ia duwe, nan omw wasahn kalohk e pahn mwahu en kihda ehu ngilen wadawad ni lokaia me tohnihmwo kin lokaiahki? Ia duwe, pahn ele mie emen me pahn kak paiekihda sang mehn rong ngilen wadawad kan sang neitail sawaspen Paipel me kitail pahn e-mail ong? Ia duwe, kitail kak download mehn rong ngilen wadawad ong nan CD oh kihong tohnihmw me perenki rong, pil iangahki pwuhko? Kitail kak kilelehdi nan neitail ripoht en kalohk soahng koaros me kitail download de kadar nan e-mail ma pwuhk, kisin pwuhk, makasihn, de kisin doaropwe ong irail akan me kitail tuhwong nan doadoahk en kalohk. Mehn rong ngilen wadawad kan wiawihda ong kitail en doadoahngki nan pein atail onop oh pil padokedi weren padahk mehlel en Wehio.—1 Kor. 3:6.