Irelaud 8
Organized to Do Jehovah’s Will
RIPOHTKI KEKEIRADAHN DOADOAHK EN KALOHK
Ripoht me kin kasalehda kekeiradahn kaudok min nin sampah pwon kin wia utupen kangoang mehlel ong sapwellimen Siohwa aramas akan erein sounpahr tohto. Sangete ni ahnsou me Sises padahkiong sapwellime tohnpadahk kan me rongamwahu pahn lohkiseli wasa koaros nin sampah, Kristian mehlel kan kin uhdahn nsenohki ese iaduwen met kak wiawi.—Madiu 28:19, 20; Mark 13:10; Wiewia 1:8.
Tepin sapwellimen Sises Krais tohnpadahk kan kin nsenohki ripoht kan en kekeiradahn doadoahk en kalohk. (Mark 6:30) Pwuhken Wiewia kan kin kasalehiong kitail me mpen aramas 120 mie ni ahnsou me ngehn sarawi widekdihong pohn tohnpadahk pwukat ni rahn en Pendekos. Mwurin ahnsoukiste, nempe en tohnpadahk kan tohtohla oh lel 3,000 oh mwuri, 5,000. Ripoht kangoang ieu me wiawihda me kasalehda me “ni rahn koaros Siohwa kin ketin kapatahiong pwihn wet irail kan me pahn ale komourparail” oh “me tohto rehn samworo ko me pil iang pwosonla.” (Wiewia 1:15; 2:5-11, 41, 47; 4:4; 6:7) Rohng wet en tohtohlahn aramas akan kin kihong tohnpadahk pwukat kangoang laud! Ia uwen ripoht kapwuriamwei pwukat kin kamwekid irail en nantihweite kapwaiada arail doadoahk me Koht ketikihong irail, mendahki re kin lelong kalokolok laud me kohsang rehn kaunen pelien lamalam en mehn Suhs akan.
Mpen nan pahr 60-61 C.E., Pohl ripohtki nan sapwellime kisin likou ong mehn Kolose kan me rongamwahu kin “wahdo kapai kan, oh e kin lolohkseli wasa koaros nin sampah” (Kolose 1:5, 6, 23) Irail tepin Kristian akan kin peikiong Mahseno, oh ngehn sarawi kin kakehle irail pwehn kapwaiada doadoahk en kalohk nan wasa koaros nin sampah mwohn imwin koasoandi en mehn Suhs akan me pahn wiawi nan pahr 70 C.E. Doadoahk ieu me mwomwen sohte kak wiawi wiawiher. Met inenen kangoang laud ong irail tohndoadoahk Kristian lelepek kan me rong ripoht kan me kin kasalehda dahme wiawiher!
Duwehte met, Sapwellimen Siohwa pwihn en atail ahnsou pil kin kolokol rekord mwahu en doadoahk me kin kasalehda pweidahn Madiu 24:14, me mahsanih: “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros—a mwuri, imwin sampah ahpw pahn kohdo.” Nin duwen ladu kan en Koht me inoukihdahr atail mour, kitail anahne wia doadoahk karuwaru ieu. Kitail anahne pein nsenohki kilang me doadoahk en kalohk wet en uhdahn pweida mwohn imwio pahn kohdo. Siohwa pahn nek ketin tehk ong me doadoahk wet en uhdahn pahn nekla, oh ma kitail kin iang doadoahko, kitail pahn kenikenla rehn Siohwa.
PEIN NOUMW RIPOHT EN KALOHK
Dahme kitail uhdahn anahne ripohtki? Doaropwe en Field Service Report me sapwellimen Siohwa pwihn wiahdahr kin kasalehda dahme kin pidada, ahpw mwein ekei kaweid kan me kileledi pah oh kaweid kan me Atail Doadoahk Ong Wehio kin kihda ekei ahnsou pahn sewese kitail.
Nan kisin koakon me nda, “Books,” “Booklets & Brochures,” oh “Individual Magazines,” ntingihdi nempe en soangen pwuhk pwukat me ke kihong aramas kan me kaidehn Sounkadehde kan me inoudahr oh papidaislahr.
Ni ahmw ripohtki “Return Visits,” wadek pak depe ke pwurehng pwurala rehn aramas me kaidehn emen Sounkadehde me inoudahr oh papidaislahr pwehn kalaudehla ah men rong me e kasalehda mwowe. Pwehn wadek ehu return visit, ke anahne tuhwong uhdahn aramasohte me kasalehda ah men rong mwowe. Ni ahnsou me ke wia onop en Paipel rehn emen brother de sister me wereila sohte kin iang kalohk (inactive) pwehki emen elder en Congregation Service Committee padahkiong iuk en wia, ke anahne ripohtki ehu return visit. Mwein ke pil kak ripohtki ehu return visit ni ahnsou me ke wia onop rehn emen me ahpwtehn papidaisla oh anahne sawas erein ahnsou mwotomwot. Kitail kak wia return visit kaidehn ihte ahnsou me kitail pahn tuhwong emen ni imweo, ahpw kitail pil kak wia ni atail pahn ntingihdi kisin likou, koasoi ni telephone, wahla ekei pwuhk kan, duwehte makasihn kapw kan. Ehu ehu ahnsou me kitail wia onop en Paipel rehrail, kitail anahne wadek ehu return visit.
Mendahki onop en Paipel kin wiawi pak ehu de tohto sang nan ehu wihk, kitail pahn ripohtki pak ehu nan ehu sounpwong. Nan sahpw kan me re kin doadoahngki doaropwe en Study Report, sounkalohk kan anahne ripohtki ehuehu onop en Paipel me wiawi nan sounpwong ehu rehn aramas kan me kaidehn Sounkadehde kan me inoudahr oh papidaislahr de rehn aramas teikan me kileledi nan parakrap en mwuri. Mwurin ahmw audehda ehuehu doaropwe ni pwung, ntingihdi aramas depe me ke onop reh nan kisin koakon me mih pah oh palimaun en doaropwe en Field Service Report. Nempe me ke pahn ntingihdi pohn doaropwe en Field Service Report oh nempe en doaropwe en Study Report me ke pahn kapidelong anahne duwepenehte.
E kesempwal en ntingihdi ripoht en “Hours of Field Service” ni pwung. Ni oaralap, met iei awa kan me ke doadoahngki pwehn wia kalohk en ihmw lel ihmw, kalohk nanial, return visit kan, onop en Paipel kan, de kalohk ni ahnsou soulipilipil, de kalohk ni wasahn wehipokon ong aramas akan me kaidehn Sounkadehde kan me inoudahr oh papidaislahr. Ke pil pahn wadek ehu Bible study ni ahnsou me ke wia onop rehn emen brother de sister me wereila sohte kin iang kalohk (inactive) pwehki emen elder en Congregation Service Committee padahkiong iuk en wia. Kapatahiong mepwukat, mwein ke pil kak pousehla ripohtki awa kan oh Bible study ni ahmw kin wia onop rehn emen me ahpwtehn papidaisla oh anahne sawas erein ahnsou mwotomwot. Ma emen sounkalohk wia kalohk nan wasa kan de irair kan me sohte konehng en kelehpwla, kahrehda pil emen sounkalohk anahne iang ih, ira koaros pahn wadek awa kan ma ira koaros iang koasoi nan kalohk. Mie wiewia kesempwal kan me kitail sohte kak kapataiong awa kan en kalohk, duwehte ahnsou me kitail doadoahngki ong kaunopada ong kalohk, ong iang mihding en kalohk, oh ong kohlahng wasahn kalohk oh pwurodohsang wasahn kalohk.
Ahmw ahnsoun kalohk kin tepida sang ahnsou me ke tepida doadoahk en kalohk oh e kin imwisekla ni ahnsou me ke kanekehla kaimwiseklahn ihmw erein ehu ahnsoun kalohk. Ahnsou kan me ke doadoahngki ong mwenge sohte pahn iang wad ong awa en kalohk. Mie uwen awa kan me auxiliary, regular, oh special pioneer kan oh pil missionary kan kin anahne wiahda. Mehn kangoang kin kohwong sounkalohk kan en pil mwohnki mehkan me pid Wehio oh nannanti nan kalohk pwehn wia uwen me irail kak nan doadoahk en kalohk nin duwen arail irair kak mweidong irail. Sapwellimen Siohwa ladu kan koaros me wiahdahr arail inou kin doadoahk laud pwehn wia doadoahk en kalohk sang nan mohngiong unsek. (Kolose 3:23) Irail akan me wia kapahrek kan en wehi pokon kak wadek awa kan me re doadoahngki ni ahnsou re wia kapahrek kan, oh pahpa men de nohno men kak wadek awa ehu de mwotomwot sang nan ehu wihk ni ahnsou me e wia onop rehn nah seri kan me saikinte wiahda inou.
Kitail anahne ripohtki ahnsou kan me kitail doadoahngki ong kalohk nin duwen awa kan. Ahpw mie soangen irair tohrohr kan duwehte ma emen sounkalohk kin apwaliki wiahda awa en kalohk, pwehki ah mahlahr, e kin mihmi nan imwen wini, de e sohte kak mwekid pwehki kahpwal teikan. Soangen sounkalohk menet pahn kak ripohtki minit 15, 30, de 45, ah kaidehn awa kan. Mendahki e wiahda minit 15te ong kalohk nan erein sounpwong ehu, e anahne ripohtki ah ahnsouwet pwehn kak iang wia sounkalohk en Wehio men me kin kaukaule iang kalohk. Koasoandi wet pil kak wiawi ong sounkalohk men me sohte kak wiahda awa kan nan erein ahnsou mwotomwot, mwein pwehki e sohte kak mwekidseli nan erein sounpwong ehu samwa pwehki ah soumwahu laud de ohlahn paliwere. Ahpw koasoandi wet kak wiawi ongete irail kan me uhdahn apwaliki wia arail doadoahk. Congregation Service Committee pahn koasoanehdi ma emen pahn kak doadoahngki koasoandi wet.
DOAROPWE EN CONGREGATION’S PUBLISHER RECORD
Pein noumw ripoht en kalohk ong ehuehu sounpwong pahn kileledi nan doaropwe en Congregation’s Publisher Record, oh doaropwe wet pahn mihmi nan rekord kan en mwomwohdiso. Doaropwe pwukat kaidehn pein nein sounkalohk kan. Ma ke pahn kosoula nan ehu mwomwohdiso tohrohr, menlau padahkiong elder kan. Secretary en mwomwohdiso me ke ahpwtehn tepida iang pahn peki noumw doaropwe en Congregation’s Publisher Record en pekederdo reh. Ma secretary en mwomwohdiso me ke kin iang mahs ese eden mwomwohdiso me ke iang met, e kak tiengla mwowe en kadarala rekord kan iangahki kisin likou ieu duwen iuk. Eri, ihme elder kan en mwomwohdiso me ke tepidahr iang pahn kak kihong iuk sawas en pali ngehn me ke anahne. Ma ke pahn kohla nan ehu wasa me likin wasahn kalohk en ahmw mwomwohdiso nan erein ahnsou mwotomwot sang sounpwong siluh, menlau pousehlahte oh kaukaule kadarala noumw ripoht en kalohk ong ahmw mwomwohdiso me ke kin iang.
DAHME KAHREHDA KITAIL KIN RIPOHTKI ATAIL DOADOAHK EN KALOHK
Ke kin ekei pak manokehla en kapidelong noumw ripoht en kalohk? E sansal me kitail koaros anahne mehn kataman kan ekei ahnsou. Ahpw ma kitail pahn kekeirada lamalam pwung duwen ripohtki atail doadoahk en kalohk oh ma kitail wehwehki dahme kahrehda atail kin wia met me inenen kesempwal, mwein e pahn mengei ong kitail en tamanda en ripohtki atail doadoahk en kalohk ni pwung.
Ekei kin idek: “Pwehki Siohwa mwahngih dahme I kin wia nan sapwellime doadoahk, dahme kahrehda I anahne kapidelong ripoht ong mwomwohdiso?” Mehlel, Siohwa mwahngih dahme kitail kin wia, oh e kak kadeikada ma atail doadoahk kin kohsang nan mohngiong unsek de tikitiksang uwen laud me kitail kak wia. Ahpw, tamataman, me Siohwa ketin kilelehdi rekord en rahn depe me Noha mihmihki nan warihmwo oh sounpahr depe mehn Israel kan wia seiseiloak ki nan sapwtehn. Koht ketin kolokol rekord en aramas depe kin lelepek oh aramas depe me sapeik. E ketin wiahda rekord en sahpw en Kenan kan me mehn Israel kan ekis ekis kalowehdi oh dahme sounkopwung lelepek en Israel kan wiahdahr. Ehi, e ketin wiahda rekord en oaritik tohto duwen wiewia kan me sapwellime ladu kan wiahdahr. E ketin kamwekid sounnting kan en wiahda rekord wet duwen dahme wiawiher, oh met kin kasalehiong kitail ni sansal sapwellime madamadau duwen kolokol rekord pwung.
Poadoapoad kan me kileledi nan Paipel kin kasalehda me ripoht kan oh rekord kan me aramas akan me wiliandi mwaren Siohwa kin wiahda kin uhdahn wiawihda pwung. Pali laud en ahnsou, uwen kesempwalpen wiewia kan me kileledi nan Paipel sohte kak sansalda mwahu ma sohte kileledi nempe kan. Medewehla duwen karasepe pwukat: Senesis 46:27 oh Eksodus 12:37; Sounkopwung 7:7; 2 Nanmwarki 19:35; 2 Kronikel 14:9-13; Sohn 6:10; 21:11; Wiewia 2:41; 19:19.
Tohto kahrepen atail kin ripohtki doadoahk en kalohk rahnwet. Mendahki ripoht pwukat sohte kin kasalehda soahng koaros me kitail kin wia pwehn papah Siohwa, dahme mihmi nan ripoht kak kadoadoahk pwehn sewese koaros me mihmi nan sapwellime pwihn, iangahki elder kan nan mwomwohdiso.
Ekei pak, ripoht kan kak kasalehda me mie anahn en sawas ong ekei wiewia kan en atail doadoahk en kalohk. Mwein nempe kan pahn kasalehda me mie kekeiradahn ekei wiewia kan ahpw tohtohlahn sounkalohk kan de kekeiradahn irair teikan kohdier. Mwein mie anahn en mehn kangoang kan de mie kahpwal kan me anahne kapwungpwungla. Sounapwalih kan pahn tehk ripoht kan oh song en kamwahuiala irair soulipilipil me kin irehsang kekeiradahn emenemen de mwomwohdiso pwon.
Oh pil, ripoht kan kin wia sawas ong sapwellimen Siohwa pwihn en koasoanehdi ni pwung iawasa anahn laud en sounkalohk kan mie. Mehnia sahpw kan me kin kekeirada mwahu? Iawasa me kekeirada tikitik kin wiawi? Mehnia pwuhk kan me anahn pwehn sewese aramas akan en esehla padahk mehlel? Ripoht kan kin sewese sapwellime pwihn en pilahn mwahu ong anahn en pwuhk kan ong soahng soangen sahpw kan nin sampah oh uhd kaunopada mwahu pwehn itar Paipel kan oh sawaspen Paipel kan me pahn kadoadoahk ong nan kalohk.
Ong pali laud en kitail, ripoht kan kin wia mehn kangoang. Kitail soh kin perenki ni ahnsou me kitail rong duwen doadoahk me riatail brother kan kin wia pwehn kalohkiseli rongamwahu nin sampah pwon? Ripoht kan en tohtohlahn nempe en sounkalohk kan kin sewese kitail en wehwehki kekeiradahn sapwellimen Siohwa pwihn en sampah pwon. Ekspiriens kan kin kangoange kitail oh kalaudehla atail ngoang, kahrehda kamwekid kitail en kalaudehla atail kin iang doadoahk en kalohk. (Wiewia 15:3) Ihme Kahrehda atail utuht ong mwomwohdiso ni atail kin kapidelong ripoht en kalohk me kesempwal oh met kin kasalehda atail kin nsenohki brother kan me mihmi wasa koaros. Ni ahl wet, kitail kin kasalehda atail utuht ong koasoandi en sapwellimen Siohwa pwihn.—Madiu 24:45-47.
WIAHDA PEIN MEHN AKADEI KAN
Sohte kahrepen kapahrekiong atail doadoahk en kalohk ohng en meteikan arail doadoahk en kalohk. (Kalesia 5:26; 6:4) Irair me emenemen mihmi loale wekpeseng, kahrehda sohte konehng en kapahrekpene. Ni pali teio, kitail kak paiekihda atail wiahda pein atail mehn akadei kan me kitail kakohng. Mehn akadei pwukat kak kihong kitail mehn sosohng ong pein atail kekeirada nan kalohk. Oh pil, ma kitail wiahda pein atail mehn akadei kan me pwungiong atail irair kan, atail kin kakohng mehn akadei pwukat kak kihong kitail nsenamwahu me kohsang atail kapwaiada dahme kitail koasoanehdi.
IANG KAIMWISEKLAHN RIPOHT
Me pid duwen doadoahk en karasaras ieu me kohpadahr duwen atail doadoahk en kalohk me kitail kin wiewia rahnwet, kitail wehwehki me ripoht ehu wiawihdahr ni ahnsou me doadoahko imwiseklahr. Nan kasansal en kokohp, Esekiel kilangada ohl wenemen me weuwa tehtehn pei nan pehrail oh kohkohdo pwehn wia kadeik ong Serusalem me salelepek. Ahpw e pil kilangada kaisimen en ohl me kohkohdo. Ohl menet weuwa dahl en ingk en secretary, oh e ale kaweid wet: “Kohwei nan kahnimw en Serusalem pwon oh kihdiong kilel ehu ni temwen aramas koaros me pahtoulahr oh milahr nan apwal pwehki soahng saut akan me wiewiawi nan kahnimwet.” Mwurin e kanekehla ah doadoahk en kihdi kilel pohn irail akan me pahn pitsang kamakam sang rehn ohl wenemeno me weuwa tehtehn pei ko, ohlo me weuwa dahl en ingk en secretary pwurala pwehn wia ripoht, oh nda: “I kapwaiadahr sapwellimomwi koasoandi.”—Esekiel 9:1-11.
Kitail sehse soangen kaimwiseklahn ripoht dahieu Siohwa pahn padahkiong kitail en wiahda me pid duwen doadoahk laud en kalohk me wiawiher nin duwen pweidahn Madiu 24:14. Ahpw, kitail kak kasalehda atail kalahnganki atail kin ale mweimwei en iang doadoahk en kalohk ni atail kin kaukaule ripohtki atail doadoahk en kalohk ni keneinei sounpwong koaros. Sounkalohk kan en rongamwahu koaros anahne mwadang ong wiahda neirail ripoht en doadoahk en kalohk ni imwin ehuehu sounpwong. Brother kan me ahneki pwukoa en kihpene ripoht en doadoahk en kalohk en mwomwohdiso pwehn kadaralahng branch office pahn uhdahn kalahnganki atail kin wia met.
E sansal me ni ahnsouwet, Siohwa kin ketin kamwadangahla kihpenehn aramas akan me e pahn ketin perehsang “kahn kamakam kowahlap.” Kitail kin momour nan ahnsou me kokohp en Aiseia kin pweida duwen met: “Peneinei ehu me keieu tikitik oh sohte wede rehmwail pahn lapalapala rasehng wehi lapalap ehu. Ngehi, Siohwa, pahn koasoanehdi pwe irair wet en kak pweida mwadang, ni ahnsawi eh pahn leledo.” (Kaudiahl 7:9, 14; Aiseia 60:22) Nin duwen kisehn pwihn en miniminpene en sampah pwon en irail akan me kin ale pwukoa en kalohk, kitail men kak ripohtki, duwehte ohl men nan kasansal en Esekiel me weuwa dahl en ingk en secretary wia: “I kapwaiadahr sapwellimomwi koasoandi.”