Tepin Koasoi kan ong Kalohk

Kaweid: Soahng siluh me ke anahne tehk mwahu ni omw pahn pilada mehnia tepin koasoi me ke men doadoahngki nan kalohk: (1) Rohng me kitail pwukoahki kalohki iei “rongamwahu en Wehin Koht.” (Mad. 24:14) Mehnda ma kitail sohte kin koasoia duwen Wehio, kitail anahne tamataman en sewese aramas akan en kak kilang me re anahne Wehi wet, de kihsang mehn kerempwa kan me kin kahrehda re sohte men medewe duwen Wehio. (2) Duwehte Sises, atail nsenohki mehlel aramas pahn sewese kitail en kamwakid arail mohngiong. (Mark 6:34) Soangen nsenoh wet pahn sansalkihda pohkomwokomw, kadek, mwadang en rong mwahu arail kin koasoi oh wekid atail koasoi ong dahme re kin nsenohki, oh pil atail doadoahngki peidek kan me kin kangoange irail en kasalehda arail madamadau pwe kitail en kak wehwehki mwahu. 1 Korint 9:19-23 kasalehda me wahnpoaron Pohl kin wia eh padahk pwehn pahrekiong irair en aramas akan me e koasoiong. (3) Nan ekei wasa, mie soangen tiahk kan me kitail anahne wia mwohn atail pahn tepida koasoia kahrepen atail pwarek irail. Ahpw nan ekei wasa, irail kin kasik kitail en mwadang kawehwehda kahrepen atail kohla ni imwarail.—Kilang Luk 10:5.