E Konehng Kristian akan en Doadoahngki Lohpwu nan Arail Kaudok?

ARAMAS rar kei kin kesempwalki oh wauneki lohpwu. Ehu dikseneri kahdaneki lohpwu “kilel me wia poahsoanpen pelien lamalam en Kristian.” (The Encyclopoedia Britannica) Ahpw, e konehng Kristian akan en doadoahngki lohpwu nan arail kaudok?

E kesempwal en tehk me Sises Krais sohte pwoula nin lohpwu. Lepin lokaiahn Krihk me kin kalapw kawehwehdiong ni lepin lokaia “lohpwu” iei stau·rosʹ. E kin uhdahn wehwehki “tuhke pwoat me poadada.” Ehu pwuhk me kawehwehda lepin lokaia kan en Paipel kasalehda: “[Stau·rosʹ] sohte pak me e kin wehwehki tuhke rioapwoat me poaspene oh uhpeseng . . . Sohte wasa nan lokaiahn Krihk nan [Kadehde Kapw] me koasoia duwen tuhke rioapwoat.”—The Companion Bible.

Paipel kin doadoahngki pil ehu lepin lokaia ong dipwisou me irail doadoahngki pwehn kemehla Sises. Met iei lepin lokaiahn Krihk xyʹlon. (Kalesia 3:13) Lepin lokaia wet kin wehwehki “tuhke pwoat.”

Pwuhk me adaneki Lohpwu oh Kalokolok me Hermann Fulda ntingihada kin kawehwehda dahme kahrehda tuhke pwoat me poadada iei me kin kalapw doadoahk ong kamakamalahn aramas, oh e nda: “Tuhke sohte kin kalapw mi wasa me pilipilda ong kamakamalahn aramas mwohn wehipokon. Eri tuhke pwoat kin poadada nanpwel oh inenda. Pehn aramas loallap akan kin uhdahla pohn moangerail, oh pehrail oh nehrail kin pirapiridi de poasdiong.”​—Das Kreuz und die Kreuzigung.

Ahpw mehn kadehde me keieu mehlel kohsang nan Mahsen en Koht. Wahnpoaron Pohl mahsanih: “Krais ketin kapitkitailsang ni keriapen Kosonnedo, ni eh ketin ale ong pein ih keriao. Nin duwen me Pwuhk Sarawi mahsanih, ‘Mehmen me langadahr nin tuhke, e pahn riahla.’” (Kalesia 3:13) Wasaht Pohl kapwurehda mahsen en Deuderonomi 21:22, 23 me koasoia duwen tuhke pwoat me uhda, a kaidehn lohpwu. Pwehki soangen kamalahn aramas wet kin wiahki aramaso “riahla,” e pahn sohte konehng Kristian akan en kapwatehki imwarail akan sansal en Krais ni lohpwu.

Erein tepin sounpar 300 mwurin pwoulahn Krais, sohte mehkot me kadehde me irail akan me nda irail Kristian akan kin doadoahngki lohpwu nan kaudok. Ahpw, nan pahr 300 samwa, emen Kaunen Rom me ede Constantine iangala ehu pelien lamalam me dene irail Kristian ahpw re kin kesehla oh uhwongda padahk en Kristian. Constantine uhd kangoangehda doadoahngki lohpwu en wiahla kilelepen Kristian. Sohte lipilipil ia kahrepen Constatine wiahki met, ahpw lohpwu sohte kin pid Sises Krais. Ni mehlel lohpwu tepisang pelien lamalam likamw. Ehu dikseneri en Kadolik kasalehda: “Lohpwu miehier nan tiahk kan mwohn Kristian akan oh pil wia tiahk en irail me sohte iang Kristian.” (The New Catholic Encyclopedia) Pil ekei aramas wadawad akan koasoia me lohpwu kin pid kaudok ong ketipin oh wiewiahn nsenen pwopwoud me kin wiawi nan kaudok likamw akan.

Eri dahme kahrehda irail kaun akan kin kangoangehki aramas en doadoahngki kilel en kaudok likamw wet? Met pwehki irail me kaidehn Kristian en mengeiong alehda soangen padahk kan me dene padahk en Kristian. Ahpw Paipel kin kasalehda ni sansal me e sapwung en doadoahngki kilel en kaudok likamw akan. (2 Korint 6:14-18) Paipel pil keinapwih soangen mwomwen wiepen kaudok en dikedik en eni koaros. (Eksodus 20:4, 5; 1 Korint 10:14) Kahrehda mie kahrepe mwahu me kahrehda Kristian mehlel akan sohte kin doadoahngki lohpwu nan arail kaudok.