Saken Soutik en Kauno​—Kataman Ehu me Kin Kawauwih Koht

KRISTIAN akan alehier kehkehlik me irail en kin wia katamanpen pwoulahn Krais. Kataman wet pil kin adaneki “Saken Soutik en Kauno.” (1 Korint 11:20, NW) Dahme met nohn kesempwalki? Iahd oh ia mwomwen kataman wet eh kin wiawi?

Sises Krais ketin tapihadahr kataman wet ni soutik en rahnen Pahsohpa en mehn Suhs akan nan pahr 33. Pahsohpa iei kataman ehu me kin wiawi pahn mehpak nan pahr ehu, ni kaeisek pahieu en sounpwong en Nisan nan kalendar en mehn Suhs akan. Sounpwong en Nisan kin tepida ni ahnsou me aramas kak kilang maram kapw mwurin tepin wihk en March. Mehn Suhs akan kin wadek rahn 14 sang ahnsowo pwehn wia Pahsohpa mwurin kihrlahn ketipin.

Sises ketin iang sapwellime tohnpadahk kan wia kasarawien Pahsohpa, ih eri ketin mweidala Sudas Iskariot en pedoila. Mwuhr ih eri ketin tapihada Saken Soutik en Kauno. Sakpene wet uhd wiliandiher ahn mehn Suhs akan Pahsohpa kahrehda e pahn uhd kin wiawi pak ehu nan pahr koaros.

Rongamwahu en Madiu mahsanih: “Sises ketikihda pilawa ieu oh kapingkalahnganki, pilitikihpeseng, e ahpw ketikihong sapwellime tohnpadahk ko, mahsanih, ‘Kumwail iang ale oh tungoale; iei werei met.’ E ahpw pil ketikihda delen wain ehu oh kapingkalahnganki, oh ketikihong sapwellime tohnpadahk ko, mahsanih, ‘Kumwail koaros iang tungoale; pwe ntahi met, ntahn inowo, me pahn kepwilipwildi pwe en lapwahda dipen aramas tohto.’”​—Madiu 26:26-28.

Ekei aramas kin kamehlele me Sises ketin kapikala pilawao en wiahla uhdahn uduke oh waino en wiahla sapwellime nta. Ahpw, paliweren Krais duweduwehte ni ahnsou me e ketikihda pilawa. Ia duwe, sapwellimen Sises wahnpoaron kan uhdahn tungoale uduken Krais oh nim sapwellime nta? Soh, pwe met pahn wehwehki me irail soun tungoal aramas ekei oh met pahn uhwong kosonned en Koht. (Senesis 9:3, 4; Lipai 17:10) Nin duwen Luk 22:20, Sises mahsanih: “Dahl wet iei delen sapwellimen Koht inou kapw me wiawihkidahr ntahi, me kepwilipwildier pwehki kumwail.” Ia duwe, dahlo uhdahn wiahla “inou kapw ehu”? Met sohte kak wiawi pwehki inou iei irair en pwungkipene mehkot, kaidehn dipwisou ehu me ke kak doahke.

Kahrehda, pilawa oh wain wiahte karasaras kei. Pilawao kin karasahiong paliweren Krais me unsek. Sises ketin doadoahngki lopwon en pilawa ehu me wia luhwen mwengehn Pahsohpao. Pilawao wiawihda oh sohte ihs doaloa. (Eksodus 12:8) Paipel kin kalapw doadoahngki ihs pwehn karasahiong dihp de ohla. Kahrehda pilawa kin weliwelian paliwar unsek en Sises me e ketin meirongkihla. Paliwere sohte dipe.​—Madiu 16:11, 12; 1 Korint 5:6, 7; 1 Piter 2:22; 1 Sohn 2:1, 2.

Wain weitahta kin weliwelian sapwellimen Sises nta. Ntao iei me kamanahla inou kapwo. Sises mahsanih me ntao kepwilipwildi “pwe en lapwahda dipen aramas tohto.” Eri aramas kakehr mwakelekel mwohn silangin Koht oh kakehr mihla pahn inou kapwo rehn Siohwa. (Ipru 9:14; 10:16, 17) Inowo kahrehiong irail Kristian lelepek 144,000 en kak kohdahla nanleng. Re pahn wia nanmwarki oh samworo kan pwe ren kak wahdo kapai ong tohnsampah koaros.​—Senesis 22:18; Seremaia 31:31-33; 1 Piter 2:9; Kaudiahl 5:9, 10; 14:1-3.

Ihs irail akan me pahn iang tungoale pilawa oh wain ni ahnsoun Katamano? Kitail kak ese me irail kante me mi pahn inou kapwo, me wehwehki, irail oko me ahneki koapworopwor en kohdahla nanleng, iei irail me pahn iang tungoale pilawa oh wain. Koht kin ketin doadoahngki sapwellime manaman pwehn kamehlelehiong irail pwukat me irail pilipildahng wia nanmwarki kan nanleng. (Rom 8:16) Irail pwukat pil iang mi pahn inou en Wehio rehn Sises.​—Luk 22:29.

A ia duwen irail oko me ahneki koapworopwor en mour soutuk nan Paradais pohn sampah? Irail kin peikiong sapwellimen Sises kehkehlik oh kin iang towehda Saken Soutik en Kauno. Re kin iangete towehda pwehn wauneki met ahpw re sohte kin tungoale pilawa oh nim wain. Pak ehu nan pahr ehu mwurin kihrlahn ketipin ni Nisan 14, Sounkadehdehn Siohwa kan kin wia katamanpen Saken Soutik en Kauno. Mendahte meh kid keite nan sampah pwon me ahneki koapworopwor en iang kohdahla nanleng, kataman wet kin inenen kesempwal ong Kristian koaros. E wia ahnsou ehu me koaros kak doudouloale duwen limpoak laud me Siohwa Koht oh Sises Krais ketin kasalehda.​—Sohn 3:16.