Sukuhlki Sang Mahsen en Koht

Dahme Kahrehda Kitail en Doadoahngki Mwaren Koht?

Ire wet pahn koasoia peidek kan me ke kak ahneki oh e pahn kasalehda ia wasa nan Paipel me ke kak diarada pasapeng kan. Sounkadehdehn Siohwa kan pahn perenki iang uhk koasoiapene pasapeng pwukat.

1. Dahme kahrehda mie mwaren Koht?

Uhdahn ke pahn mwahuki aramas en ekerkin uhk pein edomw a kaidehn ndahte “ohl” de “lih.” Ahd kin sewese kasalehda wekpeseng en kowe oh meteikan. Koht ketin sapwellimanki lengileng kan duwehte “KAUN, Wasa Lapalap,” “Koht, Wasa Lapalap” oh “Sounwiepomw.” (Senesis 15:2; 17:1; Eklesiasdes 12:1) Ahpw e ketikihong ih pein mware pwehn sewese kitail en ahneki nanpwungmwahu reh. Mwaren Koht iei Siohwa de Iahweh nin duwen ekei kawehwehn Paipel kin nda.​—Wadek Eksodus 6:3.a

Mendahki soun kawehwehn Paipel tohto kin wiliankihdi mwaren Koht lengileng kan me duwehte “Koht” oh “KAUN-O” de “Kaun-o,” mwareo kin pwarada mpen pak 7,000 nan doaropwehn mahs en Paipel ni lokaiahn Ipru. Eri, e sansal me Koht ketin kupwurki aramas akan ren esehla mwareo.​—Wadek Melkahka 148:13.

2. Dahme kahrehda esehla mwaren Koht kesempwal?

Omw ese mwaren Koht pidada laudsang en esehte ia duwen omw pahn nda. En ese mwaren Koht kin wehwehki en ahneki nanpwungmwahu reh. Wehwehn mwaren Siohwa iei “E Kahrehiong en Wiahla.” Wehwehn mwaren Siohwa kin kamehlelehiong kitail me e pahn ketin wiahla soahng koaros me anahn pwehn kapwaiada kupwure. Eri esehla mwaren Koht kin wehwehki me kitail kamehlele me Koht pahn ketin kapwaiada sapwellime inou kan. (Melkahka 9:10) Pwoson en irail kan me ese oh kin doadoahngki mwaren Koht kin kamwakid ren likih Siohwa oh mwohneki nan arail mour. Siohwa Koht pahn ketin pere soangen aramas pwukat.​—Wadek Melkahka 91:14.

3. Dahme kahrehda Koht ketin kupwurki aramas en esehla mwareo?

Koht ketin kupwurki aramas en esehla mwareo pwehki e kin wia kamwahuparail. E kin sewese irail en wiahla kompoakepahn Koht oh ahneki koapworopwor en mour kohkohlahte. Ihme kahrehda, Siohwa ketin kupwurki kitail en kasansalehda mwareo.​—Wadek Sohn 17:2, 3; Rom 10:13, 14.

Sises ketin kasansalehda mwaren Koht sang ni eh ketin padahkihong aramas kan duwen sapwellimen Koht ahl akan, Sapwellime kosonned akan oh Sapwellime inou kan. Sapwellimen Sises tohnpadahk kan rahnwet kin pousehlahte wia doadoahk en kasansalehda mwaren Koht nan wehi koaros. Re kin wia met nin duwen sapwellimen Koht aramas minimin kei.​—Wadek Wiewia 15:14; Sohn 17:26.

4. Ia duwen Koht eh pahn ketin kalinganahla mwareo?

Siohwa Koht ketin kupwurki kalinganahla mwareo pwehki mie me kin kauwe. Karasepe, ekei aramas kin nda me e sohte ketin kapikada mour oh kitail sohte anahne peikiong. Ekei kin nda me e sohte ketin nsenohkin kitail oh kin kapwukoahnki ih lokolok kan. Soangen aramas pwukat kin kauwe mwaren Koht. Ahpw re sohte pahn wia met kohkohlahte. Koht pahn ketin kasohrehla irail me kin kasohwauwi mwareo.​—Wadek Melkahka 83:17, 18.

Siohwa pahn ketin kalinganahla mwareo ahnsou me sapwellime Wehio pahn kasohrehla kaunda koaros en aramas oh kapwurehdo popohl oh meleilei ong aramas. (Daniel 2:44) Ahnsou keren, koaros pahn esehla me Siohwa iei Koht mehlelo.​—Wadek Esekiel 36:23; Madiu 6:9.

Dahme ke anahne wia? Ke anahne karanihala Koht sang ni omw pahn onopki sapwellime Mahsen oh werekiong aramas akan me kin poakohng ih. Ahnsou me Siohwa pahn ketin kalinganahla mwareo, e pahn ketin tamataman sapwellime ladu lelepek kan.​—Malakai 3:16.

[Nting tikitik me kileldi pah]

Pwehn kalaudehla omw wehwehki met, menlau kilang irelaud 1 en pwuhk wet, Dahme Paipel Uhdahn Padahngki?, me Sounkadehdehn Siohwa kan wiahda.

[Kilel nan pali 10]

Mwaren Koht nan doaropwehn Ipru en mahs