Irelaud Duwau
Peneinei me Pahpa de Nohno Kin Kelehpw Kak Pweida!
1-3. Dahme kahrehda peneinei me pahpa de nohno kin kelehpw kin wie tohtohla, oh ia duwen met eh kin kamwakid irail?
PENEINEI kan me pahpa de nohno kelehpw kin uhdahn tohtohla nan sampah pwon. Pahpa nohno oh seri rar rar kei nan wasa tohto kin mihla nan irair wet pwehki tohtohlahn mweipeseng, pahpa de nohno kesehla peneinei, tohrohrpeseng, de neitik en kiripw.
2 Nohno men ntingihedi: “Ngehi liohdi men me sounpar 28 oh I naineki seri riemen. I kin uhdahn nsensuwed pwe I sohte men kakairada nei seri ko ahpw sohte arail pahpa. E mwomwen me sohte aramas kin nsenohkin ie. Nei seri ko kin kilang ei kalapw sengiseng oh e sohte mwahu ong irail.” Pali laud en pahpa de nohno me kiripw kin song en powehdi ar lingeringer, pehm me re dipada, oh loaleid. Patehng met akan, re kin apwalki kapatahpene doadoahk en mwohni oh doadoahk en nan ihmw. Emen lih nda me wia nohno kiripw men kin apwal. Mwurin eh kin nannanti laud, e kakehr wiahda eh pwukoa kan. Ahpw ahnsou me e ahnla wia soahng pwukat, ekei pil kapatapatohng.
3 Seri kan nan soangen peneinei wet kin kalapw mie arail kahpwal. Mwein re kin nantihong powehdi soangen pepehm kan me kohsang arail pahpa de nohno eh kohkohla de mehla. Me pwulopwul tohto kin uhdahn medengkihla arail pahpa de nohno eh sohla mie.
4. Ia duwen atail kin ese me Siohwa kin ketin nsenohki peneinei me pahpa de nohno kin kelehpw?
4 Peneinei me pahpa de nohno kelehpw pil kin mie mahs. Paipel kin pwurepwurehng koasoia duwen “me sepwoupwou kan” oh “liohdi kan.” (Eksodus 22:22; Deuderonomi 24:19-21; Sohp 31:16-22) Siohwa Koht sohte kin ketin pohnsehsehla arail kahpwal kan. Sounmelkahka men nda me Koht iei semen “me sepwoupwou kan oh ketin sinsile liohdi kan.” (Melkahka 68:5) Rahnpwukat, Siohwa pil kin ketin nsenohki peneinei me pahpa de nohno kin kelehpw. Ni mehlel, sapwellime Mahsen kin kihda kaweid kan me kak sewese irail en pweida.
ESEHLA DOADOAHK EN NAN IHMW
5. Soangen kahpwal dah me ekei pahpa de nohno kin ahneki nin tapio?
5 Medewehla doadoahk en katanga ihmw ehu. Pak tohto ke kin anahne emen ohl. Duwehte ahnsou me imwomwo kin anahne kamwahula ahpw ke sehse dahme ke pahn wia. Ohl akan me arail pwoud ahpwtehn mweisang de mehsang irail pil kin pwunodki soangsoangen doadoahk kan me irail anahne wia. Ong seri kan, ihmw me sohte soandi mwahu kin kalaudehla arail pepehm en pwunod.
6, 7. (a) Soangen mehn kahlemeng dah me “lih pwopwoud me keieu koahiek” nan Lepin Padahk kin kasalehda? (b) Ia duwen pwerisek en wia pwukoahn nan ihmw eh kin sewese peneinei me pahpa de nohno kelehpw?
6 Dahme kak sawas? Tehk mehn kahlemeng en “lih pwopwoud me keieu koahiek” me kileldi nan Lepin Padahk 31:10-31. Uwen tohtohn doadoahk me e kin wiahda uhdahn kapwuriamwei. E kin pwainda oh netiki kepwe, deidei, wia mwenge, pesineski sapwe, mwetuwel oh katanga pesines. Dahme e pweikihda? E kin pwerisek doadoahk lao lel nipwong oh pil mwadang pirida pwe en tepida doadoahk. E kin wiahda koasoandi mwahu oh kin kihong meteikan ekei doadoahk oh ih ekei. Sohte kapwuriamwei aramas ar kin kapinga ih!
7 Ma kowe pahpa de nohno me kelehpwiki omw peneinei, apwalih mwahu omw pwukoahn nan ihmw. Perenki wia soangen doadoahk pwukat pwe met pahn kalaudehla nsenamwahu en noumw seri kan. Wiahda koasoandi mwahu kin kesempwal. Paipel mahsanih: “Wiahda omw koasoandi ni keneinei, ke ahpw pahn ahneki dipwisou tohto.” (Lepin Padahk 21:5) Emen pahpa nda: “I sohte kin medewe mwenge lao I kin men mwengehda.” Ahpw mwenge me kin kaunopada mwahu kin mwahu ong paliwar oh e iou sang mwenge kan me kin wiawihda ni karuwaru. Mwein ke pil kin anahne sukuhlki wiepe kapw kan ong doadoahk en nan ihmw. Sang ni nohno men eh kin ale kaweid sang kompoakepah kan de meteikan, ele e pahn kakehr wia doadoahk kan en kamwahwihala ihmwe de esehla pwainda dipwisou en ihmw.
8. Ia duwen seri kan me arail pahpa de nohno kelehpwikin irail ar kak iang sawas?
8 E konehng en kin peki ahn seri ko sawas? Emen nohno nda: “I sohte men katoutouwih nei seri ko pwehki arail pahpao sohla mie.” Mwein met mehlel, ahpw kaidehn ih me pahn keieu mwahu ong serio. Doadoahk kin kohwong me pwulopwul kan me kin lemmwin Koht mahso. (Senesis 37:2; Melkahkahn Melkahka kan en Solomon 1:6) Mendahki omw kin kanahieng ken dehr katoutouwih noumw seri kan, e pahn mwahu ken kihong irail pwukoa me duwehte widen dahl oh kamwakele arail pere. Kumwail sou wiapene ekei doadoahk? Met pahn kaperen.
APWAL EN MWOHNI
9. Dahme kahrehda nohno kiripw kan kin kalapw lelohng kahpwal en mwohni?
9 Pali laud en pahpa de nohno me kiripw kin apwalki diar mwohni ong epwelpen peneinei. Nohno pwulopwul kan me sohte pwopwoud me kin keieu lelohng apwal.a Nan sahpw akan me sawas kin kohsang koperment, ele e pahn mwahu pahpa de nohno kan en ale sawas pwukat lao irail kak diar arail doadoahk. Paipel kin mweidohng Kristian kan ren doadoahngki sawas pwukat ma irail anahne. (Rom 13:1, 6) Liohdi oh lih akan me mweisang ar pwoud pil kin lelohng soangen kahpwal pwukat. Me tohto me kin anahne pwurehng doadoahk mwurin arail kin wia doadoahk nan ihmw sounpar tohto kin kalapw alehdihte doadoahk me pweitikitik. Ekei kin kamwahwihala met ni arail kin iang kasukuhl en doadoahk de iang sukuhl lepin ahnsou.
10. Ia duwen nohno kiripw men eh kak kawehwehiong nah seri kan kahrepen eh anahne rapahkihda eh doadoahk en mwohni?
10 Dehr pwuriamwei ma noumw seri kan sohte kin perenki omw repen doadoahk oh dehr suwedki met. Ahpw kawehwehiong irail kahrepen omw anahne doadoahk oh sewese irail ren wehwehki me Siohwa ketin kupwurki ken kihong irail arail anahn. (1 Timoty 5:8) Mwuhr pali laud en seri kan pahn ahnla. Ahpw mehnda ma ke kedirepw, nantihong mi rehrail ni uwen omw kak. Met pil kak sewese katikala kahpwal kan me peneinei kak loiong pwehki sohte itar mwohni.—Lepin Padahk 15:16, 17.
IHS ME PAHN APWALIH?
11, 12. Dahme pahpa de nohno kiripw anahne kanahieng, oh ia duwen eh kak wia met?
11 Pahpa de nohno kiripw kin karanih neirail seri kan, ahpw e anahne kanahieng pwe e de daulihla dahme Koht ketin koasoanehdi nanpwungen pahpa nohno oh seri kan. Karasepe, kahpwal laud kak pwarada ma nohno kiripw men kin kasik nah pwutak en wia pwukoahn ohl nan peneinei. De e wiahki nah serepein kompoakepah keren men me e kin kak ndaiong eh kahpwal koaros, pwe met kak katoutouwihala serio. E sohte mwahu en wia met pwe me kapwunod oh mwein e kak kapingada serio.
12 Kasalehiong noumw seri kan me nin duwen pahpa de nohno, kowe me pahn apwalih irail, a kaidehn irail me pahn apwalih iuk. (Pil kilang 2 Korint 12:14.) Mwein ekei pak ke pahn anahne kaweid de sawas. Rapahki sawas sang rehn elder kan de lih Kristian koahiek kan, a kaidehn sang rehn noumw seri kan.—Taitus 2:3.
KIHDA PENEU
13. Kahpwal dah me pid peneu me nohno kiripw men kin kak lelohng?
13 Mwein e sohte kin apwal ong ohl emen en kin kihda peneu, ahpw mwein e kin apwal ong lih emen. Emen nohno kiripw nda: “Paliweren oh ngilen nei pwutak ko duwelahr ohl. Ekei pak I kin apwalki wiahiong ei lokaia en mie mene oh sohte luwet.” Patehng met, mwein ke kin nsensuwedkihte mehlahn omw pwoud, de mwein ke kin pehm me ke sapwung, de ke kin lingeringerki amwa mweipeseng. Ma kumwa koaros kin ahneki pwuhng en apwalih noumwa seri ko, ele ke kin pwunod pwe seri ko mwahuki mi rehn omw pwoudo. Soangen irair pwukat kin kak kahrehda e apwal en kihda peneu toupahrek.
14. Ia duwen pahpa de nohno kiripw kan ar kak ahneki madamadau toupahrek ong kihda peneu?
14 Paipel mahsanih me “ma seri men pahn mweimweiong pein nsene, e pahn kanamenekihala ine.” (Lepin Padahk 29:15) Siohwa kin ketin utung omw pahn wiahda oh kapwaiada koasoandi en peneinei. Eri mehnda ma ke kin pehm me ke sapwung de ke suwed de ke masepwehk, dehr mweidohng pepehm wet en poweiukedi. (Lepin Padahk 1:8) Dehr wekidala kaweid en Paipel. (Lepin Padahk 13:24) Nantihong toupahrek oh tengediong omw koasoandi kan ahnsou koaros. Mwuhr pali laud en seri kan pahn peikiong. Ahpw ke anahne nsenohki pepehm en noumw seri kan. Emen pahpa kiripw nda: “I anahne kamantik ni ei kin kihda peneu pwehki seri ko kin nsensuwedki arail nohno eh solahr mie. I kin nantihong koasoiong irail ahnsou koaros. Ni at kin kaunopada mwengehn ni soutuk, ih ahnsou me irail kin uhdahn koasoiaiong ie soahng koaros.”
15. Dahme ohl emen de lih emen me mweisang eh pwoud sohte pahn wia?
15 Ma ke mweisang omw pwoud, e sohte mwahu ken kihsang wahu en omw pwoudo. Ahn pahpa oh nohno ara kin akamai kin kamedekihala seri kan oh e pahn katikala arail wauneki ira. Kahrehda, kumwa dehr kin nda lokaia kamedek pwukat: “Ke duwehte omw pahpao!” Sohte lipilipil dahme omw pwoudo wia me kin kamedekeiukala, ahpw e wiahte ahn serio pahpa de nohno. Serio kin anahne pahpa oh nohno en kin poakohng, nsenohki oh panawih.b
16. Koasoandi en kaudok dahieu me pahpa de nohno kiripw anahne wia ahnsou koaros?
16 Nin duwen atail koasoiapenehr nan irelaud en mwowe ko, peneu kin pid kaiahn oh kaweid a kaidehn kalokolokte. Ma mie koasoandi mwahu en kaudok nan peneinei, e kak irehdi kahpwal tohto. (Pilipai 3:16) Iang towehda mihting kan ahnsou koaros kin kesempwal. (Ipru 10:24, 25) E pil kin kesempwal en wia Kaudok en Peneinei wihk koaros. Met sohte kin mengei. Emen nohno nda: “I kin uhdahn men kommoal mwurin doadoahk. Ahpw I kin kaunopada ei madamadau pwe I en onop rehn nei serepeino, pwehki I ese me I anahne wia met. E kin uhdahn perenki at Kaudok en Peneinei!”
17. Dahme kitail kak sukuhlki sang kaiahn mwahu me kohwong Timoty, iengen Pohlo?
17 Timoty, iengen wahnpoaron Pohl, kin ale kasukuhl me poahsoankihda kaweid en Paipel sang rehn eh nohno oh nohno kahlap, a kaidehn sang rehn eh pahpa. Ahpw e wiahla Kristian men me uhdahn mwahu! (Wiewia 16:1, 2; 2 Timoty 1:5; 3:14, 15) Ke pil kak koapworopworki imwila mwahu sang omw kin nannanti en kakairada noumw seri kan “ni kaiahn oh madamadau en Siohwa.”—Episos 6:4, NW.
POWEHDI LOALEID
18, 19. (a) Ia duwen loaleid eh kak kamwakid pahpa de nohno kiripw kan? (b) Kaweid dah me kohda pwe en sewese powehdi ineng en uduk?
18 Emen nohno kiripw nda: “Ni ei pwurodo ni ihmwo oh kelehpwla, mehlel ni ahnsou me seri ko meirlahr, loaleid kin kipeiehdi.” Mehlel, loaleid kin kalapw wia kahpwal me keieu laud ong pahpa oh nohno me kelehpw. Re kin men ahneki nanpwungmwahu oh ehupene me kin mi nan pwopwoud ehu. Ahpw ia duwe, emen anahne kamwahwihala kahpwal wet ni eh pahn wia soahng sohte lipilipil? Ni mwehin wahnpoaron Pohl, ekei liohdi pwulopwul kan ni arail kin “inangihada pwopwoud, irail kin sohpeisang Krais.” (1 Timoty 5:11, 12) Ma irail mweidala ineng en uduk en kaluwetehla arail nanpwungmwahu rehn Koht, e pahn kak kauweirailla.—1 Timoty 5:6.
19 Ohl Kristian men nda: “Ineng en wia nsenen pwopwoud kin uhdahn kehlail ahpw ke kak powehdi. Ni ahnsou me ke kin medewehda soahng wet, ke dehr kolokol. Ke anahne kesehsang nan omw madamadau. E pil pahn sawas ma ke kin medewe noumw seri kan.” Mahsen en Koht kaweidki: “Kumwail uhdahn pahn kemehla ineng kan en sampah me kin wie doadoahk loalamwail, eri, iet akan; kamwahl, sarsuwed, ineng suwed.” (Kolose 3:5) Kemehla ineng suwed pahn wehwehki liksang kilang kilel suwed de pil werekiong aramas me kin kalapw koasoia duwen soahng kan me pid wia nsenen pwopwoud.
20. (a) Keper dah me mie ong irail me kin ahnekihda emen me sohte mi nan padahk mehlel? (b) Dahme irail me kiripw kan mahso oh pil ahnsou wet kin wia pwe en powehdi arail loaleid?
20 Ekei Kristian kin ahnekihda emen me sohte iang padahk mehlel. (1 Korint 7:39) Met kak kamwahwihala arail kahpwal? Soh. Lih Kristian men me mweisang eh pwoud nda: “Mie mehkot me uhdahn suwedsang kiripw. Iei pwoudikihda emen me sohte konehng!” Liohdi Kristian kan ni mwehin wahnpoaron ko pil kin loaleid, ahpw irail me loalokong ko wia liohdi kei me kin kedirepwki ‘kasamwo mehn keiru kan ong nan imwarail, widen nehn sapwellimen Koht aramas akan, sewese aramas akan nan ar apwal akan.’ (1 Timoty 5:10) Rahnwet, Kristian lelepek kan me kin kiripw erein sounpar tohto pwe ren kak diar arail pwoud me kin lemmwin Koht pil kin kedikedirepw. Liohdi Kristian men me sounpar 68 tepida kohla mwemweit rehn liohdi teikan ma e kin loaleid. E koasoia: “I kin diar me ni ei kin kohla mwemweit, wia ei doadoahk en nan ihmw oh wia soahng kan me kin kolokol ei nanpwungmwahu rehn Koht, mepwukat kin kihsang ahnsoun ei wie loalloaleid.” Padahkihong meteikan duwen Wehin Koht iei doadoahk me keieu katapan.—Madiu 28:19, 20.
21. Ia duwen kapakap oh werek mwahu eh kak sewese emen en powehdi eh loaleid?
21 Ni mehlel sohte mehkot kak kihsang loaleid ahnsowohte. Ahpw kitail kak dadaurete pwehki kehl me kohsang rehn Siohwa. Met kak wiawi ma Kristian men kin “poaden kapakap oh peki Koht en ketin sewese nipwong oh nin rahn.” (1 Timoty 5:5) Kristian men anahne peki sawas ni ngidingid oh mwein ekei pak ni ngihl laud oh pil sengiseng. (Pil kilang Ipru 5:7.) Kasalehiong Siohwa audepen omw mohngiong “nipwong oh nin rahn” pahn uhdahn kak sawas. Patehng met, werek mwahu pil kak kihsang loaleid. Ni omw kin wia met, ke kak ale “lokaia kadek,” me iei mehn kangoang me kawehwehdi nan Lepin Padahk 12:25.
22. Soangen madamadau dah me pahn sewese kitail ni atail kin loaleid ekei pak?
22 Ekei pak ke kin uhdahn loaleid, ahpw tamataman me aramas koaros kin ahneki kahpwal. Ni mehlel, riatail Kristian kan wasa koaros nin sampah kin mi nan soangsoangen lokolok kan. (1 Piter 5:9) Dehr medemedewe soahng kan me wiawiher mahs. (Eklesiasdes 7:10) Medewehla soahng mwahu kan me ke kin ahneki. Ahpw laudsang koaros, koasoanehdi ken kolokol omw lelepek oh kaperenda kupwuren Siohwa.—Lepin Padahk 27:11.
IA DUWEN METEIKAN AR KAK SAWAS?
23. Pwukoa dah me Kristian kan ahneki ong peneinei nan mwomwohdiso me pahpa de nohno kelehpw?
23 Utuht oh sawas me kin kohsang riatail Kristian kan uhdahn kesempwal. Seims 1:27 mahsanih: “Iet duwen poadidi ong papah Koht me uhdahn pwung oh unsek mehlelen, me Samatail Koht kin ketin kupwurki: apwalih me sepwoupwou kan oh liohdi kan nan ar apwal akan.” Ei, Kristian akan anahne sewese peneinei kan me pahpa de nohno kelehpw. Ia ekei sawas mwahu kan me kitail kak wia?
24. Ia duwen atail kak sewese peneinei me pahpa de nohno kin kelehpw?
24 Ke kak sawaski dipwisou. Paipel mahsanih: “Ma aramas kepwehpwe men me kilangada apwal en rie . . . ahpw ritingedihsang rie eh mohngiong, ia duwen eh pahn kak nda me e poakohng Koht nan eh mohngiong?” (1 Sohn 3:17) Lepin lokaiahn Krihk ong “kilangada” sohte wehwehki ikintangih mehkot ahpw e wehwehki kilang mwahu mehkot. Met kasalehda me Kristian men me kin kadek pahn tehk mahs irair oh anahn en peneineio. Mwein peneineio anahne mwohni. Ekei mwein pahn anahne kamwahulahn wasahkis nan imwarail. De mwein ekei, ihte ken luke irail en iang uhk mwenge de pil ong soahng teikan.
25. Ia duwen Kristian kan ar kin kasalehda limpoak ong pahpa de nohno me kiripw?
25 Patehng met, 1 Piter 3:8 mahsanih: “Kumwail en kin soangen lamalamteieu oh kupwurteieu; kumwail limpoakpene.” Emen nohno kiripw me naineki seri wenemen nda: “E kin apwal oh ekei pak I kin uhdahn pwangada. Ahpw, ekei pak brother kan oh sister kan kin ndaiong ie, ‘Joan, ke kin wiahda doadoahk mwahu. Imwilahn omw doadoahk pahn katep laud.’ En ese me meteikan kin medemedewe oh kin nsenohkin ie kin uhdahn sawas laud.” Ele lih Kristian mah kan me kak kihda sawas mwahu ong lih pwulopwul kan me wia nohno kiripw. Re kak rong arail kahpwal kan me re sohte men koasoiaiong ohl akan.
26. Ia duwen ohl Kristian koahiek kan ar kak sewese me sepwoupwou kan?
26 Ohl Kristian kan kak pil sawas ni ahl teikan. Ohl pwung Sohp nda: “I sewese me sepwoupwou kan me sohte sawasaparail.” (Sohp 29:12) Rahnpwukat, ekei ohl Kristian pil kin nsenohki seri me sohte arail pahpa oh kin kasalehda “limpoak me kin pwilisang ni mohngiong mwakelekel” oh sohte kin ahneki madamadau en isaneki irail. (1 Timoty 1:5) Ekei pak re kin koasoanehdi ren iang me pwulopwul pwukat nan doadoahk en kalohk de pil luke irail en iang arail kaudok en peneinei de iang irail mwadong, ahpw re sohte pahn soukautih pein arail peneinei. Soangen kadek wet pahn kak doarehsang me sepwoupwou men nan ahl sapwung.
27. Sawas dah me pahpa de nohno kiripw kak koapworopworki?
27 Ni mehlel, pahpa de nohno kiripw kan me ‘pahn pein wa arail wisik,’ de pwukoa. (Kalesia 6:5) Ahpw, irail kak koapworopworki limpoak sang rehn riarail Kristian kan oh pil Siohwa Koht. Paipel mahsanihki duwen Siohwa: “E kin ketin sewese liohdi kan oh me sepwoupwou kan.” (Melkahka 146:9) Peneinei kan me pahpa de nohno kin kelehpw kak pweida sang ni sapwellime utuht limpoak.
[Nting tikitik me kileldi pahs]
a Ma Kristian pwulopwul men liseianda pwehki tiahk suwed, mwomwohdiso sohte kin pwungki eh tiahk. Ahpw ma e koluhla, elder kan oh meteikan nan mwomwohdiso ele pahn men sewese ih.
b Wasaht sohte koasoakoasoia irair me pid perehsang serio omw pwoudo pwehki e kin wiakauwe. Ma omw pwoudo pil song en katikala omw manaman, ni eh kin kadeke seri ko ren kohkohsang rehmw, e pahn mwahu ken peki kaweid sang rehn kompoakepahmw koahiek kan me duwehte elder kan nan mwomwohdiso ong dahme ke pahn kin wia nan soangen irair wet.
IA DUWEN IRE MEHLEL EN PAIPEL PWUKAT EH KAK SEWESE . . . PAHPA NOHNO OH SERI REN KAMWAHWIHALA KAHPWAL EN PENEINEI ME PAHPA DE NOHNO KELEHPW?
Siohwa Koht iei me “kin ketin apwalih me sepwoupwou kan oh ketin sinsile liohdi kan.”—Melkahka 68:5.
Pwe en pweida, e kesempwal en wiahda koasoandi mwahu.—Lepin Padahk 21:5.
Siohwa kin ketin utung ahn pahpa de nohno pwuhng en kihda kaweid.—Lepin Padahk 1:8.
Liohdi Kristian erpit kan kin soupisengki doadoahk mwahu oh poadidiong kapakap.—1 Timoty 5:5, 10.
Kasalehda nsenohki “me sepwoupwou kan oh liohdi kan” iei kisehn kaudok mehlel.—Seims 1:27.
[Koakon nan pali 131]
SOAHNG KAN ME ME PWULOPWUL KAN KAK WIA
Omw pahpa de nohno kiripw? Ma ei, dahme ke kak wia pwe ken sawas? Ehu iei ken kin peik. Mehnda ma kowe pwutak emen de ia uwen omw laud, e sohte kihong uhk pwuhng en sohte “rong kanahieng padahk en omw nohno.” (Lepin Padahk 1:8) Siohwa ketin kaweidkin uhk ken kin peik oh ma ke kin kapwaiada met, ke pahn nsenamwahu.—Lepin Padahk 23:22; Episos 6:1-3.
Kin tiengla mwowe oh kasalehda kalahngan. Tony nda: “Ei nohno kin doadoahk ni imwen wini ehu oh eh uniform kin anahne ain oh I kin ainihda. Met kin uhdahn sewese ei nohnou.” Emen nohno kiripw nda: “Ni ahnsou me I uhdahn nsensuwedla de mwakar pwehki kahpwal nan ei wasahn doadoahk, I kin kalapw diarada me ni ei kin pwurala ni ihmwo, nei serepeino kin koasoanehdier en kaunopada mwengehn soutik.”
Tamataman me omw sawas kin kesempwal. Mwurin doadoahk laud en rahn ehu, mwein e kin apwal ong pahpa de nohn en wia Kaudok en Peneinei. Ma ke sohte kin sawas, ke kin kalaudehla kahpwal kan. Song ken kin onopada mwohn eh lel ahnsou. Kaunopada dahme kumwail pahn kin sukuhlki. Sang ni omw kin peik, oh kasalehda kalahngan oh sawas, ke pahn kaperenda omw pahpa de nohno, ahpw me keieu kesempwal ke pahn kaperenda Koht.
[Kilel nan pali 125]
Mihmi rehn noumw seri kan ni uwen me ke kak
[Kilel nan pali 127]
Seri kan, sewese amwail pahpa de nohno me kiripw
[Kilel nan pali 128]
Mwomwohdiso sohte kin pohnsehsehla “liohdi kan” oh “me sepwoupwou kan”