Ke Dehr Luwetkihla Pwunod
“ERI, kumwail dehr kin pwunodki dahme pahn wiawi lakapw; pwe lakapw pahn pwukoahki pein eh pwunod. E sohte konehng kumwail en kin katohtowehla kahpwal akan me rahn akan kin wadohng kumwail.” (Madiu 6:34) Kaweid wet me kohsang rehn Sises Krais kin uhdahn katapan ong kitail koaros me momour nan koasoandi wet me kin mwekimwekid mwadang oh diren kapwunod.
Ahpw, ni mehlel, kitail kak sohte pahn pwunodki atail kahpwal akan, pilipil kan, oh pwukoa kan? Aramas rar kei kin pwunod, nsensuwed, oh toutoula. Ihme karehda wini en kihsang pwunod oh wini en kameleilei kin wialahr pisines ehu me kin koledi tala rar rar kei.
En Ese Wekpeseng en Pilahn Mehlel oh Pwunod Ni Soh Kahrepe
Kitail anahne pilahni oh kaunopada ong atail pwukoa kan, oh pwais kan, oh pilipil kan, oh kahpwal akan—mendahki ma re karuaru de soh. Paipel kangoangehkin kitail en “mwohndi mahs oh medemedewe uwen pweine” mwohn atail pahn wiahda doadoahk ehu me laud. (Luk 14:28-30) Met kin oarepene tenekih mahs omw pilipil kan, kasawihada lipwen imwin met, oh kapatahda ia uwen ahnsou, kehl oh mwohni me ke pahn doadoahngkihong.
Nindoken emen anahne en tehk ni keneinei dahme ele kak pwarada, kitail sohte kak medewehda soahng koaros me pahn wiawi. Karasepe ehu, me pid peresang omw peneinei keper kan, ke pahn medemedewe dahme ke pahn wia ma kisiniei lulda nan imwomw. Komw pahn pwainda oh kihong nan imwomw dipwisoun kasawihada ediniei oh dipwisoun kakunla kisiniei. Komw pahn pilahnih oh kamwomwada iaduwen komwi oh omw peneinei pahn tangasang kisinieio mendahki iawasa me emenemen kumwail mie nan ihmwo ahnsou me kisinieio lulda nan ihmwo. Ahpw ia wekpeseng en pilahn katapan oh pwunod daulihla ni soh kahrepe? Soahngen pwunod wet kin tepida ni ahnsou me ke kin medemedewe laud irair tohto kan me sohte poahsoanpe, pali tohtohn irair pwukat kohsang ni pein omw madamadau. Madamadau kapwunod kan kak poweiukedi, ele ke pahn kamehlele me mie mehkot me ke manokehla de dahme ke wiadahr sohte itar en pere omw peneinei. Soahngen pwunod wet me pein uhk wiahiong uhk kak katoutouwiala omw madamadau me kahrehda ken sohte kak meir.
Moses Mwohn Parao
Siohwa Koht ketikihong sapwellime soukohp Moses pwais apwal ehu. Keieu, Moses pahn pwarala mwohn mehn Israel kan oh kamehleleiong irail me Siohwa ketin idihada ih en kahluwa irail sang nan Isip. Mwuri, Moses anahne pwarala mwohn Parao oh pekih en kadarewei mehn Israel kan. Mwuri, Moses anahne en kahluwa nan sapwtehn pokon kalaimwun en aramas rar kei ong nan sahpw ehu me audaudki aramas lemei kan. (Eksodus 3:1-10) Mepwukat koaros kak kamasepwehk, ahpw Moses mweidohng pwukoah wet en kapwunodada ih?
E sansal me, Moses kin nsenohki ire tohto. E kalelapak rehn Siohwa: “Ni ei pahn patohla rehn mehn Israel ko oh patohwanohng irail, ‘Koht en samamwail ko ketin poareneiedohng kumwail,’ a ma re patohwan idek rehi, ‘Ia mwaren Koht menet?’ Eri dahme I pahn sapengkin irail?” Siohwa ketikihong ih pasepengo. (Eksodus 3:13, 14) Moses pil nsenohki duwen dahme pahn wiawi ma Parao sohte men kamehlele ih. Pil pwurehng Siohwa sapengla soukohpo. Kaimwiseklahn en Moses pwunod—iei ah wehkada me “e soakoahiek en pato.” Iaduwen met kapwungpwungla? Siohwa ketikihda Aaron pwehn koasoiki Moses.—Eksodus 4:1-5, 10-16.
Ki pasepeng kan me Koht sapengkihla ah peidek kan oh ah pwoson Koht, Moses wiahda soahng kan me Siohwa kehkehlingkiohng. Moses sohte kapwunodeki pein ih madamadau kamasepwehk kan en dahme kak wiawi ni ahnsou me e pahn pwarala mwohn Parao, e “kapwaiada dahme Kauno ketin mahsanih.” (Eksodus 7:6) Ma e pahn mweidohng kapwunod kan en powehdi ih, eri kapwunod pwukat kak kaluwetehla ah pwoson oh eimah me anahn en kapwaiada ah pwais.
En Moses apwaliala ah pwais ni elen touparek kin wia karasepen dahme wahnpoaron Pohl kahdaneki “kakaun atail ineng kan.” (2 Timoty 1:7; Taitus 2:2-6) Ma Moses sohte kasalehda ese kaunda ah ineng kan, e pahn mengei en pwunodkihda toutou en ah pwais me ele pahn kahrehong en sohte men ale pwukoah wet.
Ese Kaunda Omw Madamadau kan
Dahme ke kin medemedewe ni ahnsou me kasongpen omw pwoson de kasongosong kin lelohng omw mour en ehuehu rahn? Ke kin salohda ni omw kin medemedewe mehn kerempwa kan oh kahpwal akan me mihmi mwohmw? De ke kin kilangwohng mepwukat ni elen touparek? Nin duwen me ekei kin nda, ‘Dehr kotehla piris lao ke lel ni piriso.’ Ele mwein ke sohte anahne kotehla piriso douluhl! Eri, ia kahrepen ken pwunodiki mehkot me sohte pahn wiawi? Paipel mahsanih: “Pwunod pahn kak adihasang omw peren.” (Lepin Padahk 12:25) Imwilahn met iei me aramas kin kalap pwapwand en wiahda arail pilipil kan, ni arail kin kihkiheng ahnsoun soahng kan lao e pwandala.
Me toutou sang met iei ohlahn pali ngehn me pwunod ni soh kahrepe kin kahrehda. Sises Krais kasalehda me manaman widingek en kepwehpwe oh “pwunod kan en koasoandi wet” kak kasokehla kalahnganki “mahsen duwen Wehio.” (Madiu 13:19,20) Duwehte tuhke tekatek ah kin irehdi kisin war akan en dehr keirada mahla oh wah, ih duwen pwunod ni soh kahrepe kak irehdi kitail sang kekeirada ni pali ngehn oh kapwarehda wah kan ong kapingpen Koht. Kapwunod kan me pein aramas kin wiahiong irail kin pil kak irehdi irail en dehr inoukihong Siohwa pein irail. Re kin pwunodiki, ‘Iaduwen ma I sohte kapwaiada dahme I inoukihda?’
Wahnpoaron Pohl padahkihong kitail me nan atail mahwen en pali ngehn, kitail kin nantiong en “salihedi soangen lamalam koaros pwe en peikiong Krais.” (2 Korint 10:5) Atail imwintihti lapalap, Sehdan me Tepil, kin perenki isanekihla atail pwunod kan pwehn kamworuskitailla oh en kaluwetekitailla ni pali war, pali en pepehm, oh pali ngehn. E samanih doadoahngki peikasal kan pwehn lidipih irail kan me sohte kin kanahieng. Ihme kahrehda, Pohl pil kaweidki Kristian kan en dehr “kihong Tepil eh ahnsou mwahu.” (Episos 4:27) Nin duwen “koht en koasoandi wet,” Sehdan kin pweida ni ah “karotongehla lamalam en me seupwoson kan.” (2 Korint 4:4) Kitail en dehpa mweidohng ih en kaunda atail lamalam!
Mie Sawas Kan
Ni ahnsou me kisin seri men kin lelohng kahpwal, e kin kohla rehn ah papah limpoak oh ale kaweid oh kamweit. Ni ahlohte, kitail kak pwarkihlahng Samatail nanleng, Siohwa, atail kahpwal akan. Ni mehlel, Siohwa kin ketin luke kitail en mweidohng ih atail katoutou kan oh kapwunod kan. (Melkahka 55:22) Duwehte kisin seri men me sohla kin pwunodiki ah kahpwal akan mwurin e ale kamweit sang rehn ah pahpa, ih duwen kitail sohte pahn ihte mweidohng Siohwa atail katoutou kan ahpw kitail en pwilikihdi katoutou pwukat reh.—Seims 1:6.
Iaduwen atail pahn mweidohng Siohwa atail kapwunod kan? Pilipai 4:6, 7 sapeng: “Kumwail dehr pwunodki mehkot, ahpw nan amwail kapakap akan kumwail en peki dahme kumwail kin anahne. Amwail kasapahlkalahngan en pil iang amwail kapakap ahnsou koaros. Eri, sapwellimen Koht popohl, me inenen laudsang uwen atail dehdehki, ahpw pahn nekinekid mohngiongimwail oh pil amwail lamalam rehn Krais Sises.” Ehi, ni ah kin ketin karonge atail kapakap ngidingid kan oh pekipek kan, Siohwa kak kihong loaletail meleilei me kak pere atail lamalam kan sang en nsensuwedkihla kapwunod kan me sohte poahsoanpe.—Seremaia 17:7, 8; Madiu 6:25-34.
Ahpw, pwehn kapwaiada dahme kitail kapakapki, kitail en dehr katohrehla pein kitail ni paliwar de lamalam. (Lepin Padahk 18:1) Ahpw, kitail en tehk mouren kosonned kan en Paipel oh kaweid kan me kin pid atail kahpwal akan, pwe kitail en liksang likihala pein atail loalokong. (Lepin Padahk 3:5, 6) Me pwulopwul oh me laud kan kak sohpeilahng Paipel oh pwuhk kan en Watch Tower pwehn ale sawas kan en wiahda pilipil kan oh powehdi kahpwal kan. Patohngete met, nan mwomwohdisohn Kristian, kitail kin paiekihda elder kan me erpit oh koahiek oh Kristian mah teikan me kin ahnsoun koaros men koasoiong kitail. (Lepin Padahk 11:14; 15:22) Irail ko me sohte kin pidada atail kahpwal akan oh ahneki madamadau en Koht ong ireo kin pak tohto kak sewese kitail en kilangwohng atail kahpwal ni ehu ahl tohrohr. Oh nindoken re sohte pahn wiahiong kitail atail pilipil kan, re kak kihda kangoang oh utuht.
“Koapworopworki Koht”
Sohte emen me kak kahmahmkihla me kapwunod kan en kahpwal kan me kitail uhdahn kin lelohng itarehr likin atail pahn pil pwunopwunodki kapwunod kan me sohte poahsoanpe. Ma pwunodiki dahme ele pahn wiawihiong kitail kin kahrehda kitail en masak oh saloh, eri kitail en sohpeila rehn Siohwa ni kapakap oh pekipek. Kilangwohng sapwellime Mahsen oh pwihn pwehn ketikihda kaweid, erpit, oh ese kaunda atail ineng kan. Kitail pahn diarada me mendahki soahngen irair dah kan me pahn pwarada, mie sawas me kak apwaliala kahpwalo.
Pwehki e toutoula oh nsensuwed, sounmelkahkao koulki: “Dahme I nohn nsensuwedkilahret? Dahme I nohn pwunodkidahr? Eri soh, I pahn koapworopworki Koht, oh I pahn pwurehng kapinga ei sounkomour oh ei Koht.” (Melkahka 42:11) Met en pil wia omw pepehm kan.
Ehi, pilahnih dahme uhdahn kak wiawi, oh mweidohng Siohwa soahng kan me ke sohte kasik pahn wiawi. “Kumwail mweidohng ih amwail pwunod koaros, pwehki eh kin ketin apwahpwalih kumwail.”—1 Piter 5:7.
[Kilel nan pali 20]
Komwi, me duwehte Depit, kin mweidohng Siohwa omw katoutou kan oh kapwunod kan?