Pilen Mesei nan Ehd Kilin Mahn

OHL pwulopwul men kin rukurukseli. E inenen tihwohla, pilen mese kerada, oh e likweriong Siohwa pwehn peki sapwellime kadek: “Komw ketin nekidala pilen mesei nan ehd kilin mahn.” (Melkahka 56:8, NW) Ohl menet iei Depit me wiahla nanmwarki en Israel. Ahpw dahkot ehd kilin mahn wet me Depit koasoakoasoia, oh ia duwen Koht kak ketin nekidala pilen mesetail nan ehdo?

Depit kin doadoahngki ehd kilin mahn. Aramas kin doadoahngki ehd wet en nekidala pihl, leh, wain, de pil pwete. Irail me kin kousoan nan impwal kan nan sapwtehn me adaneki Sahara, duwehte mehn Tuareg kan, kin doadoahngkihte soangen ehd wet me wiawihkihda kilin kuht de sihpw. Soangen ehd wet kak nekidala diren pihl. Aramas tohto kin ese me ehd kilin mahn kak kolokol pihl en kin lemwulemwur nan soangen wasa me uhdahn karakar. Mahs aramas kin doadoahngki dongki de kamel en wahda ehd pwukat. Rahnwet ke kak pil kilangada soangen ehd pwukat ni sidohsa!

Mahsen en Depit me pid ehd kilin mahn pil kak kamwakid kitail. Ia duwen? Paipel kin kawehwehda me Sehdan kin kaunda sampah oh e “inenen lingeringer kowahlap” nan atail ahnsou. Pwehki met, sampah wet kin direkihla kahpwal laud kan. (Kaudiahl 12:12) Ihme kahrehda duwehte Depit, aramas tohto kin ahneki pepehm en nsensuwed, kapwunod de kahpwal en soumwahu, ahpw mehlel irail kan me kin nantihong kaperenda Koht. Ke kin ahneki soangen kahpwal pwukat? Soangen aramas lelepek kan kin “sengiseng,” ahpw ni eimah irail kin kolokolete arail lelepek. (Melkahka 126:6) Irail kak kamehlele me Samarail nanleng kin mwahngih arail kahpwal kan oh pil dahme kahpwal pwukat kin wiahiong irail. E uhdahn mwahngih arail kahpwal kan oh e kin ketin tamataman pilen meserail oh arail lokolok kan. Ni ahl wet, e kin ketin nekidala pilen meserail nan ehd kilin mahn.