17. Soangen irair apwal dahieu me tohnsampah kin lelohng? Ni ahnsou keren, mahsen dah kei me kitail pahn tamanda?

¹⁷ Kitail ese me tohn uhwong kan pahn pousehlahte kaloke kitail. Oh kitail pahn pousehlahte kalohki rongamwahu wet—mehnda ma pil ong irail tohn uhwong kan. (Mad. 24:14, 21) Ahpw, ahnsou ong tohn uhwong kan en koluhla oh ale mour soutuk pahn kereniong imwisekla. Kasarawihlahn mwaren Siohwa kin kesempwal sang komourla en aramas. (Wadek Esekiel 38:23.) Ni ahnsou me wehi kan koaros en sampah pahn pokonpene pwehn song en kamwomwala sapwellimen Koht aramas akan, kitail pahn tamanda mahsen pwukat nan en sounmelkahkao kapakapo: “Re en lohdi oh masepwehkala kohkohlahte; oh re en sohrala nan paisuwed douluhl.”—Mel. 83:17.

18, 19. (a) Dahme pahn wiawi ong soun uhwong kan en sapwellimen Siohwa kaunda? (b) Iaduwen pwunglahn sapwellimen Siohwa pwung en kaunda me pahn wiawi kin kamwakid uhk?

¹⁸ Imwila kanamenek ehu pahn lelohng imwintihti pwukat me kin koasoanehdi en uhwong sapwellimen Siohwa pwung en kaunda. Sapwellimen Koht Mahsen kin kasalehda me irail akan “me sohte kin peikiong Rongamwahu”—oh pwehki kahrepe wet pahn kamakamla nan Armakedon—re pahn lelohng “mehla soutuk.” (2 Des. 1:7-9) Arail kasohrala oh pil komourala en irail akan me kin kaudokiong Siohwa pahn kadehdehda me Siohwa iei ihte kelehpw me Koht mehlel. Nan sampah kapw, kana wet sohte pahn manokonokla. Irail akan me pahn pwuredo nan “iasada” en “me mwahu oh suwed” pahn sukuhliki duwen sapwellimen Siohwa wiewia kapwuriamwei kan. (Wiewia 24:15) Nan sampah kapw wet, irail pahn kilang duwen mehlelpen erpit en mih pahn sapwellimen Siohwa kaunda. Oh me mpahi kan nanpwungarail pahn mwadang en kamehlele me Siohwa iei ih kelehpw me Koht mehlel.

“Met Iei Uhdahn Mwaren Koht me Keieu Sarawi oh Lapalap”

Nicholas mehn Cusa wia koasoi wet nan eh kapahrek nan pahr 1430.a Ohl menet perenki onopki soahng tohto, karasepe, e sukuhliki lokaiahn Krihk, lokaiahn Ipru, madamadau en aramas loalokong en sampah, padahk kan en pelien lamalam, wahntuhke, oh mwekid en usu kan. Ni eh sounpar 22, e wiahla emen samanih en kosonned en pelien lamalam en Roman Kadolik. Nan pahr 1448 e idihdda ong ehu pwukoa me uhdahn laud nan pelien lamalam en Roman Kadolik.

Mpen sounpar 550 samwalahro, Nicholas mehn Cusa kauwada imwen me mah kan nan Kues, me ahnsou wet kahdaneki Bernkastel-Kues, kahnimw ehu me dohsang mwail 80 palikapi en kahnimw en Bonn, nan Sehmen. Ahnsou wet ihmwet wiahla library en Cusa. Nan library wet mie doaropwe daulih 300 me aramas kin pwurehng ntingihda padahk de nting en meteikan mahs. Ehu doaropwe pwukat adaneki Cusanus 220 me ntingihsang ahn Cusa kapahrek nan pahr 1430. Nan kapahreko, me oaralap koasoia In principio erat verbum (Mahseno ketiketier mwohn tepin kawa), Nicholaus mehn Cusa kin doadoahngki nting en lokaiahn Latin Iehoua ong Siohwa.b Pali 56 audaudki lokaia pwukat me pid duwen mwaren Koht: “Met Koht me ketikihda. Mwareo me wiawihkihda mesen nting pahieu en lokaiahn Ipru. . . . Met iei uhdahn Mwaren Koht me keieu sarawi oh lapalap.” Ahn Nicholas mehn Cusa padahk pwungki me mehlel mwaren Koht pwarada nan Palien Pwuhk Sarawi ni Lokaiahn Ipru mahs.

Doaropwe wet me ntingda nan tepin pahr kan en 1400 samwa oh me iang keieun mering nanpwungen doaropwe kan me mie mesen nting pahieu en lokaiahn Ipru me kasalehda “Iehoua.” Nting pwukat me kileldi kin kadehdehda me mwaren Koht “Siohwa” kin kalapw doadoahngki ni lokaia tohto oh erein sounpar tohto.