Iren Sawas kan ong Doaropwehn Kasukuhl ong Mihting en Mour oh Kalohk
March 6-12
SOAHNG KESEMPWAL KAN SANG MAHSEN EN KOHT | SEREMAIA 1-4
“I Pahn Kin Ieiang Uhk oh Sinsileiuk”
Mwasamwasahn Duwehte Seremaia
4 Ele Seremaia kereniong lel sounpar 25 ni ahnsou me e alehdi sang Siohwa pwukoahn sounsilasil. (Ser. 1:1, 2) Ahpw e pehm me e pwulopwulte oh sohte warohng en koasoiong me mah kan nan wehio. Ohl pwukat mahlahr oh ahneki manaman wasao. (Ser. 1:6) E anahne kedipa oh kadeik aramas akan ahpw mehlel samworo kan, soukohp likamw akan, kaun akan pil iangahki irail koaros me kin “wenlahte wiewia nsene” oh ‘sohpeisang’ Koht. (Ser. 6:13; 8:5, 6) Tehnpas sarawi en Nanmwarki Solomon me kin wia wasahn kaudok mehlel erein sounpar 400 kei, pahn kamwomwmwomwla. Serusalem oh Suda pahn tehnla oh towe kan pahn kalipilipala. E kin sansal me rohng me Seremaia pwukoahki kalohki kin uhdahn karuwaru!
Ihs me Ke Kin Peikiong—Koht de Aramas?
18 Koht padahkihong soukohp Seremaia: “I pahn kin ieiang uhk oh I pahn doareiukala.” (Seremaia 1:8) Ia duwen Siohwa pahn kapit kitail sang kalokolok oh uhwong rahnwet? Mwein e pahn kamwakid aramas marain men duwehte sounkopwung Kamaliel en sewese kitail. De mwein e pahn wiliandi irail kaun akan me kin uhwong oh mwersuwed ong irail akan me mwahu. Ahpw, ekei pak, Siohwa pahn mweidala kalokolok akan en lel kitail. (2 Timoty 3:12) Ma Koht pahn mweidohng kalokolok en lel kitail, e pahn ahnsou koaros kihong kitail kehl pwe kitail en kak dadaur. (1 Korint 10:13) Ahpw, sohte lipilipil dahme Koht kin mweidala en wiawi, kitail wehwehki duwen imwilahn met: Irail akan me kin uhwong sapwellimen Koht aramas akan kin uhwong Koht, oh irail akan me kin uhwong Koht sohte kak pweida.
jr-E 88 par. 14-15
“I Pahn Kakehlakahda me Pwangadahr kan”
KE PAHN KAKEHLAKAHDA ME PWANGADAHR KAN?
14 E mwahu kitail en tehk ia duwen Seremaia eh ale kangoang oh pil ia duwen eh kangoange meteikan me “pwangadahr.” (Ser. 31:25) Soukohpo ale kangoang sang rehn Siohwa. Medewehla uwen omw pahn kehlailda ni omw rong Siohwa eh ketin mahsanihong uhk: “Rahnwet I pahn kakehleiukada pwe ke en pelian irail. . . . Re sohte pahn kaloweiukedi, pwe I pahn kin ieiang uhk oh sinsileiuk. Ngehi, Kaun-o, me mahmahsen.” (Ser. 1:18, 19) Eri Seremaia ahneki kahrepe mwahu en ndahki Siohwa: “Komwi me kin ketin apwahpwalih ie oh kin kakehleiehda; komw kin ketin sewese ie ni ahnsou apwal.”—Ser. 16:19.
15 E kesempwal en tehk me Siohwa mahsanihong Seremaia: “I pahn kin ieiang uhk.” Ke kak diarada soahng ehu nan ire wet me ke kak wia ni emen me ke ese anahne kangoang? Ke kak tehkada me riomw Kristian men de kisehmw men anahne kangoang, ahpw omw pahn kihda sawas mwahu weksang met. Pali laud en ahnsou, elen sawas me keieu mwahu iei en wia dahme Koht ketin wiahiong Seremaia, me iei en ieiangete me luwetalao. Eri mwuhr, kihda lokaiahn kangoang, ahpw kaidehn en lokolokaia tohto. Lokaia keite pahn wia kamwahu laud ma ke pilada omw lokaia ko en kangoange oh kakehlakahda me luweto. Ke anahne lokaia maledek. Doadoahngki lokaia mengei me pahn kasalehda omw nsenohki oh poakohng nin duwen Kristian men. Lokaia ni ahl wet kak wia kamwahu laud.—Wadek Lepin Padahk 25:11.
Raparapahki Soahng Kesempwal kan Sang Mahsen en Koht
Ire Kesempwal akan Sang nan Pwuhken Seremaia
2:13, 18. Mehn Israel salelepek kan wiahdahr sohng riau me suwed. Irail kesehla Siohwa me iei utupen elen kapai, kaweid,oh perepe mehlel. Oh irail wiahiong pein irail arail wasahn nahk pihl, ni karasaras, ni arail rapahki pwe irail en miniminiong pelien sounpei en wehin Isip oh Asiria. Nan atail ahnsou, en kesehla Koht mehlel pwe kitail en pwerikihla ahn aramas elen madamadau ki loalokong kan oh palien politik en sampah kan, e kin duwehte wiliankihdi “utupen pilen komour” ki “wasahn nahk pihl ohla kan.”
Ire Kesempwal akan Sang nan Pwuhken Seremaia
4:10; 15:18—Soangen ahl dah me Siohwa ketin liepedier sapwellime aramas kan me kesehla ih? Nan mwehin Seremaia, mie soukohp akan me kin wiewia ‘kokohp likamw.’ (Seremaia 5:31; 20:6; 23:16, 17, 25-28, 32) Siohwa sohte ketin irehdi irail sang kalokalohkih rohng sapwung pwukat.
March 13-19
SOAHNG KESEMPWAL KAN SANG MAHSEN EN KOHT | SEREMAIA 5-7
“Re Tokedihsang Wiewia Kupwuren Koht”
w88-E 4/1 11-12 par. 7-8
Seremaia—Soukohp Soh Ndand Men me Kin Kohpada Duwen Sapwellimen Koht Kadeik
7 Siohwa ketin katamankihong ih: “Koaros tohn sahpwet . . . pahn uhwong uhk. Ahpw rahnwet I pahn kakehleiukada pwe ke en pelian irail.” (Seremaia 1:19) Dahme kahrehda mehn Suhs ko oh arail kaun kan uhwongada soukohp menet? Pwehki dahme e ndao kin uhwong mwomwen arail kin kaudok. Seremaia sohte pweiek oh nda: “Re kin kouruhrki sapwellimomwi mahsen me I kin patohwanohng irail. Aramas koaros, me tikitik oh lapalap, kin songosong en kepwehpwehla ni tiahk en mwersuwed; pil soukohp oh samworo kan kin pitih aramas akan.”—Seremaia 6:10, 13.
8 Ei mehlel, re kin kamwakid wehio en wia meirong kan. Re kin pwakpwakihte koasoandi en kaudok mehlel, ahpw re sohte kin wia met ni mohngiong unsek. Re kin kesempwalki wia tiahk sang arail en wia dahme pwung. Ni ahnsowohte, kaun en pelien lamalam en mehn Suhs kan kin pitih wehio ren medewe me re sohte anahne perki mehkot ni arail nda, “Mehkoaros me mwahu” ni mehkoaros eh sohte mwahu. (Seremaia 6:14; 8:11) Ei, re pitih aramas ako en kamehlele me soahng koaros mwahu rehn Koht. Re medewe me re sohte anahne pwunodki mehkot pwehki re wia sapwellimen Siohwa me komourlahr kei me ahneki kahnimw sarawio oh pil tehnpas sarawio. Ahpw ia duwe, ih mwomwen Siohwa eh ketin kilangwohng irairo?
w88-E 4/1 12 par. 9-10
Seremaia—Soukohp Soh Ndand Men me Kin Kohpada Duwen Sapwellimen Koht Kadeik
9 Siohwa ketin mahsanihong Seremaia en kesihnen mwohn wehipokon ni ewen kelen tehnpas sarawio oh padahkihong sapwellimen Koht tohnkaudok kan me kin pedolong wasao duwen dahme Koht mahsanih. E anahne ndaiong irail: “Kumwail dehr kamehlele lokaia likamw pwukat, ‘Kitail sohte mi nan apwal! Ih Tehnpas en Kaun-o met, ih Tehnpas en Kaun-o met, ih Tehnpas en Kaun-o met!’ . . . ‘Kumwail kin koapworopworki lokaia likamw akan.’” Mehn Suhs ko kin weweidki marain en paliwar a kaidehn ni pwoson, ni arail kin suhsuwei nan tehnpas sarawio. Re manokehlahr dahme Siohwa ketin kehkehlikihong irail: “Nanleng iei mwoalei, oh sampah iei utupen aluweluwei kat. Eri, ia soangen tehnpas me kumwail kak kauwadahng ie, ia mwomwen wasa me I pahn kousoan ie?” Siohwa, Kaun Wasa Lapalahpie en sampah oh lahng, uhdahn sohte kak ketin kousoan nan arail tehnpas sarawio, sohte lipilipil ia uwen lingan en wasao!—Seremaia 7:1-8; Aiseia 66:1.
10 Seremaia pousehlahte eh koasoio: “Kumwail kin pirap, kamaramas, kamwahl, kahula likamw, wia meirong ong Paal, oh pwongih koht kan me kumwail sohte mwahn kin ese mahs. Kumwail kin wia mepwukat me I kin kalahdeki, kumwail ahpw kin . . . patohwan, ‘Se sohte mi nan apwal!’” Mehn Suhs ko, me wia sapwellimen Koht “aramas kesempwal” kei, medewe me Koht pahn ketin pwungki arail wiewia kan koaros ma re pahn kin wiahda meirong ong tehnpas sarawio. Ahpw, ma re medewehkihong Koht nin duwen pahpa men me kin mweidohng nsen en nah iehros ketihwo, re pahn pwuriamweila.—Seremaia 7:9, 10; Eksodus 19:5, 6.
jr-E 21 par. 12
Papah ni “Ahnsou kan me Pahn Kohdo”
12 Ni ahnsou me Sehoiakim tepida kaunda, Siohwa mahsanihong Seremaia en kohla ni tehnpas sarawio oh kadeikada mehn Suda ko pwehki arail tiahk suwed kan. Re medewe me sapwellimen Siohwa tehnpas sarawio wia mehn silasil manaman ehu me pahn pere irail. Ahpw, re sohte kesehla arail wiewiahn ‘pirap, kamaramas, kamwahl, kahula likamw, wia meirong ong Paal, oh pwongih koht kan me re sohte mwahn kin ese mahs.’ Siohwa pahn ketin kasarehla tehnpas sarawio. Oh e pahn pil ketin wia soahngohte ong me mwalaun kan me kin kaudok nan tehnpaso, duwehte me e ketin wia ong impwal sarawio nan Sailo ni mwehin Samworo Lapalap Ilai. Sapwen Suda pahn “wiahla sapwtehn.” (Ser. 7:1-15, 34; 26:1-6) Medewehla uwen eimah me Seremaia anahne pwehn nda mepwukat! Ele e wia met nan pokon ehu mwohn aramas ndand oh lapalap kei. Ekei riatail Kristian kan rahnwet ele pehm me re anahne soangen eimahohte pwehn kalohk nanial de koasoiong aramas kepwehpwe de lapalap kan. Ahpw kitail kak kamehlele met: Koht uhdahn pahn ketin sewese kitail, duwehte me wiawihong Seremaia.—Ipru 10:39; 13:6.
Raparapahki Soahng Kesempwal kan Sang Mahsen en Koht
Ke Pahn Iang Koht Kekeidwei?
11 Eri ia duwen, kitail kin uhdahn mweidala Mahsen en Koht en kaweid kitail? Ekei pak, e kin konehng kitail en uhdi oh pein kasawih kitail ni mehlel. Kitail tehkpene ehu ire me pahn sewese kitail en wia me: “Kauno ketin mahsanih ong sapwellime aramas akan, ‘Kumwail kesihnenda wasa me ahl akan wetpeseng ie oh kilengwei. Kumwail kalelapak duwen elen kawa ko oh mehnia ahl me keieu mwahu. Kumwail eri keidwei ie, kumwail ahpw pahn diar popohl.’” (Seremaia 6:16) Mahsen pwukat ele kin katamankihong kitail duwen emen me seiseiloak kohwei oh uhdi limwahn ahl apwoat me wetpeseng pwehn peki kaweid. Ni ahlohte, sapwellimen Siohwa aramas sapeik kan nan Israel anahne ale kaweid ong ahr anahn en pali ngehn. Irail anahne rapahkihda elerail nan “elen kawa ko.” “Ahl me keieu mwahu” me ahlo me ahr pahpa kahlap lelepek ako kin keid ie, ahl me wehio salongasangehr ie. E kansensuwed pwe Israel sapeikiong iren kataman wet me Siohwa ketin katamankinirail pwehki ah limpoak. Ire wet pil pousehla: “Re ahpw nda, ‘Soh, se sohte pahn wia met!’” Ahpw, nan atail ahnsou, sapwellimen Koht aramas akan kin mwekidki mahsen pwukat weksang mwomwen en mehn mahs ako ahr mwekidki met.
w88-E 4/1 13 par. 15
Seremaia—Soukohp Soh Ndand Men me Kin Kohpada Duwen Sapwellimen Koht Kadeik
Suda Ale Kalokeparail
15 Ni mpen pahr 632 mwohn Krais, mehn Papilon oh Media kan kalowedier mehn Asiria ko, oh Isip solahr ahneki manaman laud oh mihla palieir en Suda. Kahpwal laud me Suda ahneki pahn kohsang wehi kan sang paliepeng. Kahrehda, Seremaia anahne ndaiong ienge mehn Suhs ko rohng suwed! E nda: “Aramas ekei pahn kohdo sang nan wehi ehu ni paliepeng; . . . re me lemei oh sehse mahk. . . . Re onopadahr en mahweniong Serusalem.” Wehi me kakaun ahnsowo iei Papilon. Wehi wet iei me Koht pahn ketin doadoahngki pwehn kaloke mehn Suda salelepek ko.—Seremaia 6:22, 23; 25:8, 9.
March 20-26
SOAHNG KESEMPWAL KAN SANG MAHSEN EN KOHT | SEREMAIA 8-11
“Aramas akan Kak Pweida Ihte Pwehki Sapwellimen Siohwa Kaweid”
it-1-E 555
Kiuhri
Uhr, lepin tuhke, de soahng teikan pil kin kohdiong nan mwaht kan pwehn karawan mahn akan, oh soahng pwukat me wiawihda rasehng mwomwen aramas iei me soukohp Seremaia kapahrekihong dikedik kan me wehin Suda kin wiahda oh kaudokiong.—Ser 10:5.
Ihs me Kin Kalinganahda Koht Rahnwet?
10 E sohte lipilipil ma ke kilangdahng pahn pwetenleng de kilangseli nan sampah oh kilang kepikipik kan, kasalepen me mie Sounkapikada me sansal mwahu. (Seremaia 10:12) Kitail en kamehlele dahme audepen lahng kan wie ngisingiski ndinda: “Maing at Kaun oh at Koht! Komwi me uhdahn warohng sapwellimanki lingan, wahu, oh roson. Pwe komwi me ketin wiadahr mehkoaros, oh pwehki kupwuromwien, me mehkoaros mihmiehki oh momourki.” (Kaudiahl 4:11) Ahpw, saintis tohto sohte kin pohnese mehn kadehdepen Sounkapikada ki ‘mesen arail mohngiong kan,’ mendahte arail kin pwurpwuriamweiki wiawihdahn mehkan me re kin kilangki meserail akan. (Episos 1:18) Kitail kak karasa irair wet duwe met: En kapinga lingan oh soandi mwahu en audepen sampah oh nan wehwe ahpw kelikemwe me mie Sounkapikpik Lapalapo e sapwung duwehte atail pahn kapikapinga mahlen kaselel ehu ahpw kelikemwe me mie soun mahlen emen me wiahda doaropweo en wiahla mehkot lingan. Ihme kahrehda e sohte kapwuriamwei me irail oko me sohte men kamehlele Koht kin adaneki “pweipwei”!
w15-E 9/1 15 par. 1
Ke Nsensuwed Pahn Koht?
Irair suwed kan nin sampah rahnwet kin wia mehn kadehde sansal me kaundahn aramas uhdahn sohte pweida. Kaidehn ihte re sohte kin wahdo popohl, onepek mwahu, oh nsenamwahu ahpw re pil kahrehiongehr sampah en kereniong ohla. Met kalaudehla mehlelpen dahme Paipel mahsanih: “Sohte mehmen me kaunda pein imwilahn eh mour; sohte aramas emen me kaunda pein eh mour.” (Seremaia 10:23) Ihte sapwellimen Koht elen kaunda me kak wahdo popohl, nsenamwahu, oh paiamwahu me sohte imwi ong tohnsampah, pwehki met iei kupwuren Koht.—Aiseia 45:18.
Raparapahki Soahng Kesempwal kan Sang Mahsen en Koht
Pousehlahte Keiong Mpen Siohwa
16 Kitail anahne suweiki atail wia Sounkadehdehn Siohwa kan. (Ser. 9:24) Pwehki met, kitail kin ahnsou koaros song en wiahda pilipil mwahu kan oh idawehn sapwellimen Koht koasoandi ileile kan. Ahpw kitail en kanahieng en dehr pohnmwahsohla oh medewe me kitail ese laudsang Siohwa, pwehki met kak katohreikitailsang ih.—Mel. 138:6; Rom 12:3.
Ire Kesempwal akan Sang nan Pwuhken Seremaia
3:11-22; 11:10-12, 17—Dahme kahrehda Seremaia kapatahkihiong keinek-eisek en palieiro nan lohk en kadeik me e wia, mendahte Sameria ohlahr nan pahr 740 B.C.E.? Met pwehki ohlahn Serusalem nan pahr 607 B.C.E. wia sapwellimen Siohwa wiepen kadeikpen wehin Israel pwon, kaidehn ong Suda kelehpw. (Esekiel 9:9, 10) Patehng met, kamwahu oh inou koaros en keinek eiseko mwurin ahr pwupwudier wie manamante nan Serusalem, pwehki soun kair en sapwellimen Koht soukohp akan kin pil kohsang rehn keinek eiseko.
March 27–April 2
SOAHNG KESEMPWAL KAN SANG MAHSEN EN KOHT | SEREMAIA 12-16
“Israel Manokehlahr Siohwa”
jr-E 51 par. 17
Kalekeiukasang Mohngiong Widing
17 Ahn Seremaia pwukoa kin pidada peikiong sapwellimen Koht kaweid. Ma kowe me Seremaia, ke pahn ale soangen kaweid koaros me kohwong uhk? Ehu pak, Siohwa mahsanihong Seremaia en pirehiong ni lukope mehn kateng likou ehu. Mwuhr, Koht eri mahsanihong en kohla Iupreitis. Ma ke pahn kilang nan map, ke pahn diarada me wasao dohki mpen mwail 300. Ni eh lella mwo, Seremaia anahne ekihla mehn katengo nan pwoaren paip ehu oh eri sapahlla Serusalem. Oh mwuhr Koht mahsanihong en pwurala oh ale mehn katengo. (Wadek Seremaia 13:1-9.) Ma patpene koaros, Seremaia ele pahn aluhki mpen mwail 1,200. Irail kan me kin koasoia de kauwe Paipel sohte kak kamehlele me Seremaia pahn alu soangen doh, alialuhki erein sounpwong kei. (Esra 7:9) Ahpw, iei met me Koht mahsanih oh ih me Seremaia wia.
jr-E 52 par. 18
Kalekeiukasang Mohngiong Widing
18 Nna medewehla soukohpo eh kotehla nahna kan en Suda oh ma anahn, pil nan sapwtehn kan kohkohlahng Iupreitis. E wia mepwukat koaros ihte pwehn ekihla mehn kateng ehu! Ele mehn mpe ko men ese dahme kahrehda re sohla kilang ih ahnsou werei. Ni eh pwurodo wasao, mehn katengo sohte mi reh. Koht eri mahsanihong ih en pil pwurehng wia seiloak reireio pwehn kapwurehdo mehn katengo me ohlahr oh “solahr mwahu.” Medewehla ia uwen mengei en medewe: ‘Met pil nohn daulihala. I sehse ia kahrepe.’ Ahpw, pwehki e ale kaiahn sang rehn Koht, e sohte medewe met. E sohte kaulim, ahpw e kapwaiada kaweido me e alehdi!
jr-E 52 par. 19-20
Kalekeiukasang Mohngiong Widing
19 Ihte mwurin keriaun eh seiloako me Koht ketin kawehwehiong ih ire kan. Dahme Seremaia wiahdao kaunopada ih en padahkihong aramas ako sapwellimen Koht mahsen kesempwal ko: “Aramas suwed pwukat sohte men peikiong ie. Ar keptakai oh suwed laud sang mahs, oh re kaudokiong oh papah koht teikan. Eri, re pahn duwehla lepin rausis pwukat [“mehn kateng,” NW] me ohlahr.” (Ser. 13:10) Ia uwen kehlail en sapwellimen Siohwa elen padahki sapwellime aramas ako! Seremaia eh peikiong Siohwa ni mohngiong unsek ong mehkot me mwomwen sohte kesempwal ele utungada en Siohwa eh ketin nannanti en sair mohngiong en aramas ako.—Ser. 13:11.
20 Kristian kan rahnwet sohte ale pahngok en alu mwail epwiki kei pwehn wia kisehn kasukuhl ehu sang Koht. Ahpw ia duwe, elen Kristian me ke kin weweidki sou kakete kahrehiong mehn mpomw de iengomw kan en pwonopwonki de pil kauwe iuk? E kakete pidada mwomwen omw likou oh kapwat, omw pilipil duwen sukuhl, soangen doadoahk dah me ke mwahuki, de pil omw madamadau me pid sakau en wai. Ia duwe, ke pahn koasoanehdi teng en peikiong sapwellimen Koht kaweid kan duwehte Seremaia? Pwehki omw mweidohng Koht en ketin kaiahne omw mohngiong, omw pilipil kan kak kahrehiong uhk en kihda mehn kadehde mwahu. Sohte lipilipil soangen irair dah, omw peikiong sapwellimen Siohwa kaweid kan me dierek nan sapwellime Mahsen oh pil pwungki kaweid kan me ladu lelepeko kin kihda kin wia kamwahu ehu ong uhk. Kitail en dehr weweidki mohngiong widing ahpw kitail en duwehte Seremaia. Eri, kitail en koasoanehdi teng en mweidohng Koht en ketin kaiahne kitail pwehn wiahla, ni karasaras, sah kaselel ehu me e kak ketin doadoahngki.
it-1-E 1121 par. 2
Ni Pwone
Siohwa ketin mahsanihki wehin Israel oh Suda nin duwen mehn kateng ehu ni pwone, ih uwen eh ketin koliraildi teng, pwe irail en wiahla mehn kaping oh mehkot kaselel ehu ong ih. (Ser 13:11) Nin duwen kokohp, sapwellimen Sises Krais eh kin ketin kaunda ni pwung kin karasaraskihong mehn kateng ni pwone oh sapwellime lelepek nin duwen mehn kateng ni lukope. Met kakete dokedoke ire mehlelo me manaman koaros me Sises Krais sapwellimanki kin ahnsou koaros kadoadoahk ni pwung oh lelepek. Duwehte mehn kateng ehu, irair en pwung kin katengehdi de kakehlailihala eh wia Sounkopwung men me Siohwa ketin idihada.—Ais 11:1, 5.
Raparapahki Soahng Kesempwal kan Sang Mahsen en Koht
jr-E 118 par. 11
Ke Kin Idek Rahn Koaros, ‘Ia Siohwa?’
11 Seremaia idek peidek ehu ni eh kilang me suwed kan ar pweida. (Wadek Seremaia 12:1, 3.) Soukohpo sohte peidengki sapwellimen Siohwa irair en pwung, ahpw e men ese ia duwen Siohwa pahn ketin mwekidki eh iren kaulimo. Eh idek peideko ni inen kin kasalehda ni sansal me e ahneki nanpwungmwahu kehlail rehn Koht, duwehte seri men ong eh pahpa limpoako. E wia met pwehki e sohte wehwehki dahme kahrehda mehn Suhs tohto kin pweida mwahu mendahki arail suwed. Ia duwe, Seremaia ale pasapeng mwahu ong eh peideko? Siohwa ketin kamehlelehiong ih me e pahn ketikihsang aramas suwed kan. (Ser. 12:14) Ni Seremaia kilang pweidahn ire kan me e kapakapkihong Koht, eh kamehlele duwen sapwellimen Koht irair en pwung pahrek uhdahn laudla. Imwilahn met, Seremaia kalaudehla eh kin sohpeiong Koht ni kapakap oh kasalehiong Semeo duwen eh pepehm kan.
Kitail en Eimah Duwehte Seremaia
Kanahieng Ihs me Kitail Kin Werekiong
16 Seremaia kin koasoia duwen mehkot me kin sewese ih en eimah. E mahsanih: “I sohte iang aramas teikan kauwehla mwahl ei ahnsou, pereperenki peren mwahl akan oh kokouruhr mwahl. Pwe I en kapwaiada doadoahk me komwi ketikihong ie, I kin kelekelehpw nan ei lingeringer.” (Seremaia 15:17) Seremaia kin kelekelehpw pwe e sohte men patehng aramas suwed akan, e sohte men kauwehla ah tiahk mwahu kan. Rahnwet, kitail kin pil ahneki soangen madamadauohte. Kitail sohte kak manokehla kaweid en wahnpoaron Pohl, “werekiong aramas suwed kan kin kauwehla tiahk mwahu,” mendahki kitail kin tiahk mwahu erein sounpar tohto.—1 Korint 15:33.