Iren Sawas kan ong Doaropwehn Kasukuhl ong Mihting en Mour oh Kalohk
December 4-10
SOAHNG KESEMPWAL KAN SANG MAHSEN EN KOHT | SEPANAIA 1–AKKAI 2
“Rapahki Siohwa Mwohn Sapwellime Rahnen Engieng”
Sohpeiong Siohwa Mwohn Rahn En Sapwellime Engieng
5 Ele mwein ke pahn nda: ‘I inoukihong Koht ahi mour oh papidaisla nin duwen laduhn Koht men, oh I kin wia emen Sounkadehdehn Siohwa kan. I soh kapwaiadahr dahme I anahne wia?’ Ahpw, ni mehlel, atail kin inoukihong Siohwa atail mour kin wehwehki laudsang met. Wehin Israel wia ehu wehi me inoukihong Koht ahr mour, ahpw ni mwehin Sepanaia, aramas en nan wehin Suda sohte kin kapwaiada ahr inou. Ihme kahrehda, Koht kesehla wehiet. Rahnwet, ‘sohpeiong Siohwa’ kin wehwehki me emen pahn kekeirada oh kolokolete eh nanpwung mwahu rehn Koht oh miniminiong sapwellime pwihn sansal nan sampah. E pil kin wehwehki me emen pahn esehla kupwuren Koht ong iaduwen e kin kilangwong mehkan oh tehk duwen sapwellime pepehm akan. Kitail kin sohpeiong Siohwa ni ahnsou me kitail kin wadek kanahieng sapwellime Mahsen, doudouloale, oh kapwaiada kaweid pwukat nan atail mour. Ni ahnsou me kitail pahn sohpeiong Siohwa ni kapakap ngidingid oh mweidong sapwellime ngehn sarawi en kahre kitail, atail nanpwung mwahu rehn Koht pahn kehlailda oh met pahn kamwekid kitail en papah Ih ‘sang mohngiongatail unsek, ni mour unsek, oh ni aht kehl koaros.’—Deuderonomi 6:5; Kalesia 5:22-25; Pilipai 4:6, 7; Kaudiahl 4:11.
6 Ire kesempwal keriau me kileledi nan Sepanaia 2:3 iei en “wiahda dahme pwung.” Pali laud en kitail me wekidala atail mour pwe kitail en kak papidais nin duwen Kristian, ahpw kitail anahne pousehla kapwaiada sapwellimen Koht kosonned pwung kan erein atail mour. Ekei kin tepida wia mwahu, ahpw mwuhr re kin mweidong sampah wet en kasaminehla irail. E sohte mengei en wiahda dahme pwung, pwe aramas akan me kin kapilpene kitail kin kilangwong dipen nenek, likamw, oh dihp teikan nin duwen mehkan me pwung. Ahpw, ma emen kin ahneki ineng kehlail en kaperenda Siohwa, met pahn kak sewese ih en powehdi ineng en men kisehn sampah oh miniminiong sampah wet. Suda sohlahr kenikenla rehn Koht pwehki irail kin alasang wehi kan me sohte kin papah Koht. Kitail en dehr kahlemengih sampah, kitail en “kahlemengih Koht,” oh “onehda sapahl pein kitail ong ni aramas kapw me wiawihda rasehng Koht, oh me kin kasalehda pein ih ni mour mehlel en pwung oh sarawi.”—Episos 4:24; 5:1.
7 Ire kesempwal kasiluh me kileledi nan Sepanaia 2:3 iei met: ma kitail men pitsang rahnen sapwellimen Siohwa engieng, kitail anahne ahneki lamalam en “aktikitik.” Ehu ehu rahn, kitail kin tuhwong ohl, lih, oh me pwulopwul akan me sohte kin kasalehda aktikitik. Ong irail, en ahneki lamalam en aktikitik kin wia irair luwet ehu. Irail lemeleme me aramas akan me kin uhpaiong meteikan: irail aramas luwet kei. Re kin lemei, roporop, oh akpwung, oh irail kin kamehlele me pein ahr “pwung kan” oh pilipil kan pahn anahne pweida mehnda ma met pahn kerempwa meteikan. E kin inenen kansensuwed ma kitail pahn pil alehdi soangen madamadau pwukat! Met iei ahnsou en ahneki madamadau en “aktikitik.” Iaduwen kitail kak wia met? Sang ni atail kin uhpaiong Koht oh ni lamalam aktikitik, kitail en mwekidki kaiahn me kohsang reh oh kapwaiada sapwellime kupwur kan.
Raparapahki Soahng Kesempwal kan Sang Mahsen en Koht
Ire Kesempwal akan Sang nan Pwuhken Nahum, Apakuk, oh Sepanaia
1:8. E sansal me ekei nan mwehin Sepanaia kin song en kompoakepahnki wehi kan me kin kapilirailpene sang ni arail kin “wiewia tiahk en mehn liki kan.” E inenen pweipwei ong sapwellimen Siohwa tohnkaudok kan en rahnwet en song en alasang sampah suwed wet ni ahlohte!
Ire Kesempwal akan Sang nan Pwuhken Akkai oh Sekaraia
2:9—Ni soangen ahl dah me ‘Tehnpas Sarawi kapwo pahn lingan sang mehn mahso’? Met pahn wiawi ni ahl siluh: erein pahr tohto kan me tehnpaso mihmihki, Sounpadahk lapalap men kin padapadahk wasao, oh aramas tohto kan kin pokopokon wasao pwehn kaudok ong Siohwa. Edetehn tehnpas lingano me Solomon kauwada mihmikiher sounpar 420, sangehr nan pahr 1027 B.C.E. lel pahr 607 B.C.E., “Tehnpas Sarawi kapwo” mihmihki sounpar 580, sangehr 515 B.C.E. lel ahnsou me e ohla nan pahr 70 C.E. Pil laudsang met, Mesaia—Sises Krais—wia sapwellime padahk kan nan “Tehnpas Sarawi kapwo,” oh aramas tohtohsang me kin kohdohng met sang aramas me kin kohlahng “mehn mahso” pwehn kaudokiong Koht.—Wiewia 2:1-11.
December 11-17
SOAHNG KESEMPWAL KAN SANG MAHSEN EN KOHT | SEKARAIA 1-8
“Koledi Teng en Mehn Suhs men Eh Likou”
Met Kumwail Wialahr Sapwellimen Koht Aramas akan
14 Mahso, soukohp kan kohpada me me tohto pahn iangala sapwellimen Siohwa aramas akan kaudok ong ih ni imwin rahnpwukat. Aiseia kohpada: “Wehi tohto . . . pahn kin nda, ‘Nna, kitail kohdalahng pohn dohlen KAUN-O, nan Tehnpas Sarawien Koht en Israel. E ahpw pahn ketin kasalehiong kitail kupwure, pwe kitail en keid nan sapwellime ahl akan. Pwe sapwellimen KAUN-O padahk kin kohsang Serusalem, oh e kin ketin mahseniong sapwellime aramas akan sang Saion.’” (Ais. 2:2, 3) Sekaraia kohpada me “aramas tohto oh wehi kehlail tohto pahn kohdo oh rapahki Siohwa Kaun en karis akan nan Serusalem oh peki sapwellimen Siohwa kupwuramwahu.” Pwihn wet pahn kohsang “ni lokaia koaros en wehi kan.” Re pahn iang Israel en Koht kaudokiong Koht oh ndinda: “Se men iang kumwailla, pwe se rong me Koht kin ketin ieiang kumwail.”—Sek. 8:20-23, NW.
“Se Men Iang Kumwailla”
4 Ma sihpw teikan sohte kak ese eden me keidi kan koaros nin sampah rahnwet, ia duwen arail kak “iang” irail? Paipel mahsanih me aramas ehk ko pahn “koledi teng en mehn Suhs men eh likowo, ndinda: ‘Se men iang kumwailla, pwe se rong me Koht kin ketin ieiang kumwail.’” Mendahki iren Paipelo mahsanih duwen mehn Suhs men, e kin dokedoke aramas tohtohsang emen. Met wehwehki me mehn Suhso kin dokedoke pwihn ehu pwon en me keidi kan ahpw kaidehn aramas tehmen. Sihpw teikan ese duwen met oh re kin iang pwihn wet papah Siohwa. Irail sohte anahne ese eden koaros nan pwihno oh idawehn emenemen irail. Sises iei atail Kaun oh Paipel mahsanihong kitail me kitail en idawehn ih kelehpw.—Mad. 23:10.
Re “Kin Idawehn Sihmpwulo”
14 Sises Krais mahsanih me ni ahnsou kitail kin utung rie me keidi kan, met duwehte kitail kin utung ih. (Wadek Madiu 25:40.) Eri ni ahl dahieu irail me ahneki koapworopwor en mour pohn sampah kin utung rien Krais me keidi kan? Keieu iei sang arail kin sewese doadoahk en kalohki Wehio. (Mad. 24:14; Sohn 14:12) Ni en me keidi kan pohn sampah kin wie malaulaula, irail sihpw teikan kin wie tohtohla. Irail kin iang wia doadoahk en kalohk, ekei nin duwen pioneer kan, oh irail kin utung me keidi kan en kapwaiada pwukoahn katohnpadahk. (Mad. 28:19, 20) Kitail en dehr manokehla me ekei elen utuht kan iei en toukihda sawas en mwohni ni soangsoangen ahl akan.
Raparapahki Soahng Kesempwal kan Sang Mahsen en Koht
Kaudiahl kan en Sekaraia—Ia Duwen Ar Kamwakid Uhk
18 Kaudiahlo pil katamankihong mehn Suhs ko me irail pil pwukoahki en kolokolete arail kaudok en mwakelekel. Tiahk suwed sohte kak oh sohte pahn mweimwei en wiawi nanpwungen sapwellimen Koht aramas akan. Rahnwet, Siohwa ketikihkitailpeneier nan sapwellime pwihn mwakelekel, wasa me kitail kin pehm sapwellime limpoak oh perepatail. Emenemen kitail pwukoahki en sewese kolokolete pwihn wet en mwakelekel. Tiahk suwed en dehr mi nanpwungen sapwellimen Siohwa aramas akan.
Werennansapw kan oh Nihn Ehu Wia Perepomw
7 Nan Paipel, nahna kan kin kak karasaraskihong wehi kan de koperment kan. Nahna ko me Sekaraia kilangadao kin rasehng nahna riau ko me kitail wadek nan kokohp en Daniel. Ehu nahna ko kin karasaraskihong sapwellimen Siohwa kaunda nanleng oh sampah me poatopoat. Oh meteio kin karasaraskihong Wehin Mesaiao me Sises iei Nanmwarki. (Dan. 2:35, 45) Sangete pahr 1914, ni Sises eh ketin nanmwarkihla, nahna riau pwukat mieier oh ahneki pwukoa tohrohr ehu en kapwaiada kupwuren Koht ong sampah wet.
8 Dahme kahrehda nahna ko wiawihkihda prons? Prons iei soangen mete ehu me uhdahn pweilaud oh melengileng. Ni mehlel, Siohwa ketin mahsanihong mehn Israel ko ren doadoahngki prons ni arail kauwada impwal sarawio oh mwuhr tehnpas sarawio nan Serusalem. (Eks. 27:1-3; 1 Nan. 7:13-16) Nahna ko ar wiawihkihda prons kin kasalehda laud uwen mwahu en sapwellimen Siohwa kaunda nanleng oh sampah oh pil kaundahn Wehin Mesaiao, me pahn kahrehda aramas akan ar sohte pahn perki mehkot oh pahn ahneki kapai tohto.
December 18-24
SOAHNG KESEMPWAL KAN SANG MAHSEN EN KOHT | SEKARAIA 9-14
“Mihmihte nan Wahu en Nahna kan”
Mi nan Wahu en Poadoandoar me Siohwa Ketikihda
10 Nin duwen me kokohpo kasalehda, ahnsou me Nahnahn Olipo pwalpeseng, apali pahn tohreklahng paliepeng oh apali ong palieir, aluweluwen Siohwa kan pahn ketiket pohn nahna pwukat. Pwalpeseng wet wiahda “wahu kalaimwun ehu” pahn aluweluwen Siohwa kan. Wahu dahieu met? Wahu wet kin karasahiong wasahn poadoandoar me Koht ketikihda. Duwehte aramas akan ar kin rukula nan wahu ehu nanpwungen nahna riau, ih duwen sapwellimen Siohwa ladu kan pahn poadoandoarla pahn sapwellime kaunda oh kaundahn sapwellime Ohl. Siohwa sohte pahn ketin mweidohng kaudok mwakelekel en sohrala. Iahd me Nahnahn Olipo pwalpeseng? E wiawi nan pahr 1914, ahnsou me Sises ketin tepida kaunda nanleng. Kokohpo pil koasoia me sapwellimen Siohwa aramas akan pahn tangalahng nan “wahu kalaimwun” wet. Iahd me met tepida?
(Sekaraia 14:5, NW) Kumwail pahn tangala nan wahu en ei nahna kan, pwe wahu en nahna kan pahn kolahng Asel. Kumwail pahn anahne tang, duwehte amwail tangdoauier pwehki rerrer en sahpw ni rahnen Nanmwarkien Suda Usaia. Oh Siohwa ei Koht pahn ketido, oh irail koaros me sarawi pahn iang ih.
Mi nan Wahu en Poadoandoar me Siohwa Ketikihda
13 Ma kitail kin pousehlahte lelepek ong Siohwa, kitail kin mi nan wahu en poadoandoar me Siohwa ketikihda. Siohwa oh sapwellime Ohlo sohte pahn ketin mweidohng emen de mehkot en kihsang kitail mehn perepe wet. (Sohn 10:28, 29) Siohwa pahn ketikihong kitail sawas koaros me kitail anahne pwehn loalopwoat ong sapwellime kaunda oh kaundahn sapwellime Ohl. Kitail pahn anahne sapwellimen Koht sawas laudsang mahs nan kahn kamakam kowahlap me pahn kereniong wiawi. Kahrehda met e uhdahn kesempwal sang mahs kitail en mi nan wahu en poadoandoar me Siohwa ketikihda.
Mi nan Wahu en Poadoandoar me Siohwa Ketikihda
15 Ni rahno me Siohwa ketin peiong sapwellime imwintihti kan, dahme pahn wiawihong irail kan me sohte pereparail sang rehn Koht? Kokohpo koasoia me sohte pahn mie “marain kesempwal” ong irail. Met wehwehki me re sohte pahn ahneki sapwellimen Koht kupwuramwahu. Kokohpo pil pousehlahte koasoia me “oahs kan, kou kan, kamel kan, oh ahs akan—pohn mahn koaros” pahn “tenla.” Met wehwehki me dipwisou en mahwen oh misihn kan me re kin doadoahngki ong mahwen pahn sohla katepe. Sekaraia koasoia me Siohwa pahn ketin kalokehki sapwellime imwintihti kan “soumwahu suwed ehu.” Pwoaren masarail kan oh lowerail kan “pahn matasang.” Kitail sehse ma soumwahu wet uhdahn soumwahu ehu. Ahpw kitail ese me re sohte pahn kak kauweikitailla de pelian Koht. (Sek. 14:6, 7, 12, 15, NW) “Nanmwarki kan en sampah oh sapwellimarail karis en sounpei kan” koaros pahn uhpalih Sehdan. Ahpw sohte lipilipil ia wasa re mi ie nin sampah, re pahn sohrala. (Kaud. 19:19-21) “Ni rahno paliweren irail kan me KAUN-O ketin kemelahr pahn mwarahkseli sang apali sampah lel apali.”—Ser. 25:32, 33.
Raparapahki Soahng Kesempwal kan Sang Mahsen en Koht
Sohte Tehtehn Mahwen Ehu Pahn Kak Kauweiukala
9 Kokohp en Sekaraia kin kasalehda dahme kahrehda wehi kan kin uhwong Kristian mehlel kan. Tehk dahme Sekaraia 12:3 mahsanih: “Ni ahnsowo eh pahn leledo, I pahn wiahkihla Serusalem duwehte takai toutou ehu.” Mehnia Serusalem me kokohp wet kin koasoia duwe? Kokohp en Sekaraia me pid duwen Serusalem kin doakedoake “Serusalem en nanleng,” iei Wehin nanleng me Kristian me keidi kan pahn iang. (Ipru 12:22) Kisin pwihn ehu me wia luwen irail akan me pahn sohsohki Wehin Mesaia mihmihte sampah ni ahnsouwet. Irail oh iangarail “sihpw teikan” kin kangoange aramas akan en iangala irail me kin mih pahn kaundahn Wehin Koht isaneki eh mih miehte ahnsou. (Sohn 10:16, NW; Kaudiahl 11:15) Iaduwen wehi kan mwekidki luhk wet? Soangen utuht dahieu Siohwa kin ketikihong tohnkaudok mehlel kan nan atail ahnsou? Kitail pahn tehkpene ire wet sang ni atail pahn kasawih mouren Sekaraia irelaud 12. Met pahn kak kihong kitail mehn kamehlel ong me ‘sohte tehtehn mahwen ehu pahn kauwehla’ sapwellimen Koht aramas me keidi kan oh iengerail me inouda kan.
10 Sekaraia 12:3 kin kasalehda me wehi kan pahn “ohla.” Iaduwen met wiawi? Koht ketin koasoanehdier me rongamwahu en Wehio pahn lohkiseli. Sounkadehdehn Siohwa kan kin uhdahn kapwaiada arail pwukoa en kalohk. Ahpw, pakpakairki me Wehio ihte koapworopwor en aramas akan kin wia “takai toutou ehu” ong wehi kan. Wehi pwukat kin song en irehdi doadoahk wet sang ni arail kin lidere irail sounkalohk kan en Wehio. Sang ni arail kin wia met, wehi kan me kin lidere doadoahk en kalohki Wehio kin ale “ohla” ni ahl tohto. Adarail kin ohla pwe re sohte kin pweida. Irail sohte kak kauhdi tohnkaudok mehlel kan, me kin kesempwaliki pwais en pakairki “rongamwahu poatopoat” en Wehin sapwellimen Koht Mesaia mwohn imwin koasoandi wet eh pahn leledo. (Kaudiahl 14:6) Ni ahnsou me emen silepen imweteng nan ehu sahpw nan Aprika kilangada tiahk lemei me wiawi ong sounkadehdehn Siohwa kan, e koasoia met: ‘Kumwail kin kauwehla mwahl amwail kehl en nannantihong kaloke aramas pwukat. Irail sohte pahn wekila. Re pahn wie tohtohlahte.’
(Sekaraia 12:7, NW) “Oh Siohwa pahn ketin doarehla impwal en Suda mahs, pwe lingan en tehnpas en Depit oh lingan en tohn Serusalem sohte pahn nohn lapalapasang Suda.
Sohte Tehtehn Mahwen Ehu Pahn Kak Kauweiukala
13 Wadek Sekaraia 12:7, 8, NW. Nan Israel en mahs, aramas akan kin kalapw doadoahngki impwal kan, keieu irail silepen sihpw kan oh soumwet kan. Soangen aramas pwukat pahn keieu mih nan keper oh anahne pereparail ma imwintihti kan pahn kohdo mahweniong kahnimw en Serusalem. Lepin lokaia kan “impwal en Suda” kin kasalehda me ni karasaras, me keidi kan nan atail ahnsou kin mih nan mohs, wasa me sohte mie pereparail, kaidehn nan kahnimw kehlail kan. Ih wasa me re kin ni eimah apwahpwalih mehkan me pid Wehin Mesaiao. Siohwa pahn ketin doarehla “impwal en Suda mahs” pwehki irail me Sehdan kin nantihong en kauwehla.
December 25-31
SOAHNG KESEMPWAL KAN SANG MAHSEN EN KOHT | MALAKAI 1-4
“Omw Mouren Pwopwoud Kin Kaperenda Siohwa?”
jd-E 125-126 par. 4-5
Kakairada Mour en Peneinei me Kin Kaperenda Koht
4 Erein ni mwehin Malakai nan pahr 400 samwa Mwohn Krais, mweipeseng en pwopwoud kalapw wiawi rehn mehn Suhs kan. Malakai ndaiong irail: “Pwehki eh mwahngih duwen amwail kauwelahr amwail inou ong lih me kumwail pwoudikidahr ni amwail pwulopwul. Lih menet wialahr kisehn paliwaramwail, oh kumwail kauwelahr amwail inou.” Pwehki wiewia suwed kan me ohl pwopwoud kan kin wia, pei sarawi en Siohwa direkihla pilen mesen lih pwopwoud kan me arail pwoud kan soaloalopwoat ong irail, ni ar “kin sengiseng oh mwahmwahiei.” Oh samworo mwersuwed kan kin mendahki wiewia suwed wet!—Malakai 2:13, 14.
5 Ia duwen Siohwa eh kin ketin kilengwohng wiewia kansensuwed wet ong mouren pwopwoud ni mwehin Malakai? Malakai ntingihedi: “KAUN-O, Koht en Israel, ahpw mahsanih, ‘I kin kalahdeki mweipeseng en pwopwoud!’” E pil koasoia me Siohwa “sohte pahn wekila.” (Malakai 2:16; 3:6) Ia ire kesempwalo? Sangete nin tapio Koht sohte ketin kupwurki mweipeseng. (Senesis 2:18, 24) Pil duwehte ni mwehin Malakai. Oh pil leledo rahnwet Siohwa sohte ketin kupwurki mweipeseng. Ele ekei aramas pahn pilada ren sohla pwopwoud ihte pwehki re sohte kin nsenamwahu rehn arail pwoud. Siohwa kin ketin mwahngih arail mohngiong widing kan. (Seremaia 17:9, 10) E kin ketin mwahngih widing de likamw kan duwen mweipeseng ehu, ahpw ele emen rehra me pahn pwukoahki met. Ei, “mehkoaros nanleng oh sampah pokon kin sansal oh dehde mwohn silangi. Eri, kitail koaruhsie pahn wehkadahng ih atail wiewia kan.”—Ipru 4:13.
Siohwa Kin Kalahdeki Salelepek
19 Ahpw, Malakai kin pil kawehwehda me mie ekei ohl pwopwoud kan me sohte kin salelepek ong arail pwoud lih kan. Irail ‘alehier sawas sang sapwellimen Koht ngehn sarawi.’ (Malakai 2:15) E inenen kaperen pwe, rahnwet—sapwellimen Koht pwihn kin dirkihla soangen ohl akan me kin ‘waunekin arail pwoud lih kan.’ (1 Piter 3:7, NW) Irail sohte kin keme de doadoahngki lokaia kamedek kan ong arail pwoud lih, oh re pil sohte kin wia wiewiahn nsenen pwopwoud me sohte konehng kan, oh irail pil sohte kin mwamwahleki ahr pwoud lih pwe irail sohte kin mwomwehda me re mwahuki lih teikan oh re pil sohte kin kilikilang pwuhk de kasdo suwed kan. Sapwellimen Siohwa pwihn kin pil paiekihda irail lih pwopwoud Kristian tohto me kin lelepek ong Koht oh sapwellime kosonned akan. Ohl oh lih pwukat koaros kin wehwehkihla duwen dahme Koht kin kalahdeki, oh re kin kapwaiada ni arail wiewia oh madamadau kan. Nantihong alasang irail, ‘peikiong Koht’ oh paiekihda sapwellimen Koht ngehn sarawi.—Wiewia 5:29.
Raparapahki Soahng Kesempwal kan Sang Mahsen en Koht
Ire Kesempwal akan Sang nan Pwuhken Malakai
1:10. Siohwa sohte kupwurperenki meirong kan me samworo noahrok kan kin wiahda, me kin ale pweinen soangen kisin doadoahk duwehte ritingedi wenihmw kan de isikada kisiniei pohn pei sarawio. Ia uwen kesempwal me atail wiewiahn kaudok kan iangahki dahme kitail kin wia nan doadoahk en kalohk en Kristian kin kohsang atail limpoak mehlel ong Koht oh mehn mpatail kan, kaidehn atail ineng en ale mwohni!—Madiu 22:37-39; 2 Korint 11:7.
“Kilang! I Pahn Ieiang Kumwail Rahn Koaros”
5 Sounpar epwiki kei mwohn Sises ketikihda karasaras en tuhke mwahu ko oh dihpw suwed ko, Siohwa ketin doadoahngki soukohp Malakai en kohpada mwekid kan me sansalda nan sapwellimen Sises karasaraso. (Wadek Malakai 3:1-4.) Sohn Sounpapidais iei ‘meninkeder me kaunopada ahlo.’ (Mad. 11:10, 11) Ni eh pwarada nan pahr 29, ahnsoun kadeikada wehin Israel kerendohr. Sises iei keriemen en meninkeder. E ketin kamwakelehda tehnpaso nan Serusalem pak riau. Keieun pak iei ni ahnsou me e ketin tepida sapwellime doadoahk en kalohk oh keriaun pak iei ni imwilahn sapwellime doadoahko. (Mad. 21:12, 13; Sohn 2:14-17) Eri, doadoahk en kamwakel wet me Sises ketin wia kin pidada erein ahnsou ehu.
6 Iahd me pweida keieu kesempwal en kokohp en Malakai wiawi? Erein sounpar silihsek samwa mwohn pahr 1914, C. T. Russell oh ienge ko wia doadoahk me rasehng dahme Sohn Sounpapidais wia. Doadoahk kesempwal wet kin pidada padahk mehlel kan en Paipel ar pwurehng sansalda. Tohnsukuhl en Paipel kan padahngki mehlelpen wehwehn sapwellimen Krais meirong, kasalehda padahk likamw duwen kalokolok soutuk nan kisiniei, oh kalohki duwen imwiseklahn ahnsoun mehn liki kan. Ahpw miehte pwihnen pelien lamalam tohto me dene irail iei sapwellimen Sises tohnpadahk kan. Eri peidek kesempwal ehu anahne pasapengla: Ihs nanpwungen pwihn pwukat iei tuhke mwahu ko? Pwehn sapengala met, Sises ketin tapiada dauwih koasoandi en kaudok min nan pahr 1914. Doadoahk en dou oh kamwakel wet pidada erein ahnsou ehu, me iei sang pahr 1914 lao lel tepidahn pahr 1919.