Iren Sawas kan ong Doaropwehn Kasukuhl ong Mihting en Mour oh Kalohk
November 6-12
SOAHNG KESEMPWAL KAN SANG MAHSEN EN KOHT | EIMWOS 1-9
“Rapahki Siohwa, Kumwail Ahpw Pahn Mourla”
Rapahki Siohwa, Soun Kasawih Mohngiong kan
20 E sohte pahn mengei ong aramas emen me mi nan Israel nan rahn oko en kolokol ah lelepek ong Siohwa. E apwal ong Kristian kan koaros, me laud oh pwulopwul akan, en pelian wiewia kaperen akan me aramas en sampah wet kin wia rahnwet. Ahpw, limpoak ong Koht oh ineng en kaperenda Ih kin kamwakid kapehden ekei mehn Israel akan en wiewia kaudok pwung. Siohwa ketikihda luhk kaperen ong irail me ntingihedi nan Eimwos 5:4: “Kumwail kohdo rehi, kumwail ahpw pahn mourla.” Rahnwet, Koht pil kin ketin wia met ni E kin ketin kasalehda mahk ong irail akan me koluhla oh kin rapahki Ih ni arail kin alehda loalokong pwung en sapwellime Mahsen, oh wia kupwure. E sohte mengei en wia met, ah kapwaiada met kin imwikihla mour soutuk.—Sohn 17:3.
jd-E 90-91 par. 16-17
Papah Siohwa nin Duwen Sapwellime Koasoandi Ileile kan
16 Tepin aramas, Adam, wiahda pilipil sapwung ehu ong en ihs koasoandi me keieu mwahu oh suwed. Kitail pahn wiahda elen pilipil loalokong me mwahusang? Eimwos kehkehlikihong kitail en kin kesempwalki duwen met, ni eh kangoange kitail: “Tatki me suwed, oh kesempwalki dahme mwahu.” (Eimwos 5:15) William Rainey Harper, sounpadahk kapw en lokaiahn oh nting en Ipru nan University en Chicago, koasoia duwen iretikitik wet: “Nan en [Eimwos] madamadau duwen koasoandi en me mwahu oh suwed, pahrekiong kupwuren Iahweh.” Met wia ire kesempwal ehu me kitail kak sukuhlkihsang soukohp 12 ko. Kitail pahn pwungki en doadoahngki sapwellimen Siohwa koasoandi kan duwen mwahu oh suwed? Koasoandi ileile pwukat sansalda ong kitail nan Paipel oh kawehwehdi sang irail me koahiek kan, Kristian koahiek kan me wiawihkihda “ladu lelepek oh loalokong.”—Madiu 24:45-47, NW.
17 Atail kailongki dahme suwed pahn sewese kitail en soikala soahng kan me kin kansensuwedihala Koht. Karasepe, ele ohl emen pahn kanahieng keper en kilel de kasdo suwed kan nan Internet oh song en soikala kilang. Ahpw, ia en ohlo pepehm duwen audepen kilel de kasdo suwed kan Web site kan? (Episos 3:16) Sang ni eh pahn kapwaiada mehn kangoang sang rehn Koht me mi nan Eimwos 5:15, e pahn diarada me e mengei en kakairada kailongki dahme suwed. Ele e pil pahn pweida ni eh kin nannanti powehdi eh kahpwal en nanpwungmwahu rehn Siohwa.
Raparapahki Soahng Kesempwal kan Sang Mahsen en Koht
Ire Kesempwal akan Sang nan Pwuhken Soel oh Eimwos
2:12. E konehng kitail en dehr kamworusihala irail pioneer kan me kin doadoahk laud, sounapwalih en mwemweit kan, misineri kan, de irail akan me wia kisehn peneinei en Pedel ni atail pahn kangoange irail en uhdihsang doadoahngki pali laud en ahnsou ong papah Siohwa oh uhd alehda soangen mour me aramas akan kin nda me iei mour. Weksang met, kitail anahne kangoange irail en wonowei nan ar doadoahk mwahu.
Ire Kesempwal akan Sang nan Pwuhken Soel oh Eimwos
8:1, 2—Dahme “kopwou en wahntuhke ehu” kin wehwehki? E kin wehwehki me rahn en Siohwa kerendohr. Dondol en wahntuhke kan me kin wah ni ahnsoun karakar kin wiawi ni ahnsou me kerenlahng imwin rahk. Ni en Siohwa kahrehiong Eimwos en kilangada “kopwou en wahntuhke ehu,” met wehwehki me imwilahn Israel kerendohr. Kahrehda, Koht mahsanihong Eimwos: “Eri, imwilahn nei aramas en Israel kan leledohr. I sohte pahn wekidala kupwurei ong ei pahn kaloke irail.”
November 13-19
SOAHNG KESEMPWAL KAN SANG MAHSEN EN KOHT | OPADAIA 1–SONA 4
“Sukuhl Sang Omw Sapwung kan”
ia-E 114 par. 22-23
E Sukuhl Sang Eh Sapwung kan
22 Ia duwen Sona? E sukuhlkihdi en kasalehda eh kalahngan ong Siohwa sang eh peik? Ei. Mwurin rahn siluh oh pwohng siluh mwahmwo wahla Sona pohn oaroahro oh ‘mwusikilahng Sona pohn sahpwo.’ (Sona 2:10) Medewehla, mwurin soahng pwukat koaros Sona sohte anahne papolong pohn oaroahro! Ahpw, sohte lipilipil mehnia oaroahr me e mihmi ie, e anahne rapahkihda eh ahl en kohkohlahsang mwo. Mwurinte mwo, eh kalahngan ong Siohwa lelohng songosong. Sona 3:1, 2, mahsanih: “KAUN-O eri pil pwurehng mahsanihong Sona, ‘Kohwei Ninipe, kahnimw kalaimwuno, oh padahkihong irail mahseno me I ketikihonguhkehr.’” Dahme Sona pahn wia?
23 Sona sohte pweiek. Kitail wadek: “Sona eri kapwaiada kupwur en KAUN-O, oh kohla Ninipe.” (Sona 3:3) Ei, e peik. E sansal me e sukuhl sang eh sapwung kan. Kitail pil anahne alasang en Sona pwoson. Kitail koaros kin wiahda dihp oh sapwung kan. (Rom 3:23) Ahpw, ia duwe kitail kin uhdi, de kitail kin sukuhl sang atail sapwung kan oh peikiong Koht sang atail papah ih?
Raparapahki Soahng Kesempwal kan Sang Mahsen en Koht
Ire Kesempwal akan Sang nan Pwuhken Opadaia, Sona, oh Maika
10—Ia duwen Edom “mwomwla . . . kohkohlahte”? Nanmwarki en Papilon Nabonidus kalowehdi Edom mpen sounpar 2,500 samwalahr. Mpen sounpar 2,300 samwalahr, mehn Nabateans kan me uhd kousoanla nan Edom oh mehn Edom kan uhd kousoanla palieir en Suda, sapwen Nekep kan me met uhd adaneki Idumea. Mwurin mehn Rom kan kalowehdi Serusalem nan 70 C.E., sohla mehn Edom kan. Nin duwen me kohpadahr, Edom, uhdahn wehi ehu me wiawihkihda pwihn en aramas ehu me kin mi wasakis nan sampah mahsie ahpw met sohla mie.
jd-E 112 par. 4-5
Wiahiong Meteikan nin Duwen me Koht Kupwurki
4 Ke kak diarada mehn kasukuhl sang sapwellimen Koht kadeik ong Edom, sahpw ehu me karanih Israel: “Ke sohte pahn perenkihda paisuwed me lelohng riomw kan nan Suda. Ke sohte pahn perenda ni rahn me re ohlahro. Ke sohte pahn kouruhrkin irail nan ar pahtoula.” (Opadaia 12) Mehn Dair mwomwen wia ‘riarail’ pwehki soahng kan me re kin wia, ahpw mehn Edom kan uhdahn wia ‘rien’ mehn Israel kan, pwe irail kadaudok en Esau, emen nein Seikop mwpwero. Pil Siohwa ketin kahdaneki mehn Edom kan ‘kisehn’ mehn Israel kan. (Deuderonomi 2:1-4) Eri, e uhdahn pahn wia kailok ehu ma mehn Edom kan perenda ni ahnsou me mehn Suhs kan lelohng kahpwal sang rehn mehn Papilon kan.—Esekiel 25:12-14.
5 E sansal me Koht sohte ketin kupwurki dahme mehn Edom kan kin wiahiong riarail mehn Suhs kan. Ahpw, ele kitail pahn idek, ‘Ia duwen Koht eh pahn ketin kilengwohng mwomwen ei wiewia ong riei Kristian kan?’ Ehu me kitail kak medewe iei mwomwen atail kin kilengwohng oh atail wiewia ong riatail Kristian kan ni ahnsou me soahng kan sohte wiawi ni soandi mwahu. Karasepe, medewehla me Kristian men kansensuwedihiukada de mie eh kahpwal ehu rehn emen omw peneinei. Ma mie kahrepen ken “kaulime emen”, ke pahn kolokol omw lingeringer ni omw sohte pahn manokehla dahme wiawi de ke pahn song en kamwahwihala kahpwalo? (Kolose 3:13; Sosua 22:9-30; Madiu 5:23, 24) Ni omw pahn wia met, e pahn kamwakid omw wiewia kan ong riomw Kristian; ele ke pahn mwomwehdahte me soahng koaros mwahu, sohla patehng, de kin koasoia soahng suwed kan duwen ih. Pwehn kalaudehla atail wehwehki karasaras wet, medewehla me mwuhr brother menet wiahda sapwung ehu oh ele pil anahne kaweid de elder kan nan mwomwohdiso anahne kapwungala ih. (Kalesia 6:1) Ia duwe, ke pahn kasalehda wiewiahn mehn Edom kan oh perenkihda en brothero kahpwalo? Soangen wiewia dah me Koht pahn ketin kupwurki ken kasalehda?
November 20-26
SOAHNG KESEMPWAL KAN SANG MAHSEN EN KOHT | MAIKA 1-7
“Dahme Siohwa Kupwurki Sang Rehtail?”
Ia Pahn Duwen Atail Wiewia ong Meteikan?
20 Mwohn silangin Koht, atail nanpwungmwahu rehn riatail akan kin wia mehkot me inenen kesempwal nan kaudok mehlel. Meirong en mahn akan kin sohla katepe ong Siohwa ma irail kan me wia meirongo sohte kin kanahieng arail wiewia ong kisehrail kan. (Maika 6:6-8) Kahrehda, Sises ketin kangoange sapwellime tohnpadahk kan en kin mwadang ‘kapwungala mahs nanpwungarail.’ (Mad. 5:25) Pil ni soangen madamadauohte, Pohl ntingihedi: “Ma kumwail pil lingeringer, kumwail dehr mweidohng amwail lingeringer en kahrehiong kumwail nan dihp; pil dehr kolokol amwail lingeringer rahn ehu pwon. Kumwail dehr kihong Tepil eh ahnsou mwahu.” (Ep. 4:26, 27) Ma kitail kin lingeringerda ni kahrepe pwung ehu, kitail anahne en mwekid karuwaru oh kapwungala kahpwalo pwe kitail en dehr lingeringerki rahn ehu pwon pwe met kakete mweidohng Tepilo eh ahnsou mwahu en isaneki kasonge kitail en wiahda dihp.—Luk 17:3, 4.
Dahme Siohwa Ketin Kupwurki Kitail en Wia?
“Kitail en wiahda me pwung.” Lepin lokaiahn Ipru me kawehwehdi “pwung,” nin duwen me ehu pwuhk koasoia, “kin pid wiewia pwung oh pahrek ong aramas akan nan wasahn kousoan.” Koht ketin kupwurki atail wiewia ong aramas akan en pahrekiong sapwellime koasoandi ong dahme pwung oh pahrek. Kitail kin wia dahme pwung oh pahrek ni atail sohte kin lipilipilki aramas, oh atail wiewia ong meteikan kin mwahu oh mehlel. (Lipai 19:15; Aiseia 1:17; Ipru 13:18, NW) Ni atail wiahda dahme pwung ong meteikan, ele re pahn mwekidki oh pil wia dahme mwahu ong kitail.—Madiu 7:12.
“Kitail en kin kasalehda atail limpoak poatopoat.” Koht mahsanihong kitail en dehr kasalehdahte kadek ahpw kitail en pil poakohng. Lepin lokaiahn Ipru wet “limpoak poatopoat” (cheʹsedh), emen me samanih Paipel koasoia: “Limpoak, kalahngan oh kadek sohte nohn kawehwehda mwahu lepin lokaia wet [cheʹsedh]; kaidehn ehute nanpwungen lepin lokaia pwukat, ahpw e kin oarepene koaros. Koht ketin kupwurki kitail en kasalehda limpoak poatopoat. Kitail anahne perenki kasalehda irair wet oh perenki sewese irail me anahne sawas. Imwilahn met, kitail kin ahneki peren me kohsang atail kin kihkihwei.—Wiewia 20:35.
“Peikiong atail Koht ni karakarahk.” Kitail kin peikiong Koht ni atail kin idawehn elen mour me e ketin kilelehdi nan Paipel. Kitail anahne wia met “ni karakarahk” ni atail kin idawehn elen mour wet. Ia duwen? Ni atail kin karakarahk mwohn Koht, kitail kin pohnese ni mehlel uwen atail tikitik oh dipan mwohn silangi oh pohnese dahme kitail kak oh sohte kak wia. Kahrehda, en peikiong Koht ni karakarahk kin wehwehki en ahneki madamadau pwung ong dahme e ketin kupwurki oh dahme kitail kak patohwanohng ih.
E wia kalahngan ehu me Siohwa sohte ketin kupwurki sang kitail laudsang dahme kitail kak patohwanohng. E ketin kupwurperenki atail nannanti papah ih ni uwen atail kak. (Kolose 3:23) E ketin mwahngih dahme kitail kak oh sohte kak wia. (Melkahka 103:14) Ma ni karakarahk kitail sukuhlki en pohnese atail sapwung kan, kitail kak ahneki peren ni atail kin peikiong Koht. Ke sou sukuhlki ia duwen omw kak tepida peikiong Koht? Elen mour wet kin wahdo kapai laud sang reh.—Lepin Padahk 10:22.
Raparapahki Soahng Kesempwal kan Sang Mahsen en Koht
Ire Kesempwal akan Sang nan Pwuhken Opadaia, Sona, oh Maika
2:12, NW—Iahd me kokohp me pid ‘kihpene en luhwen mehn Israel kan’ pweida? Pweida keieu wiawi nan 537 Mwohn Krais ni ahnsou me irail luhwen mehn Suhs kan pwurodohng nan pein sapwarail sang arail sensel nan Papilon. Nan atail ahnsou, e kin pweida rehn “Israel en Koht.” (Kalesia 6:16, NW) Sang pahr 1919, irail Kristian keidi kan tepida pokonpene “rasehng pelin sihpw me pwurodohng nan kehl ehu.” Ni ahnsou me “pokon kalaimwun” me wiawihkihda “sihpw teikan” iang irail pwihn en me keidi kan, ahpw mehlel sang 1935, irail wiahla mehn “katairong ong aramas kan.” (Kaudiahl 7:9, NW; Sohn 10:16, NW) Irail patpene oh ni ngoang utung kaudok mehlel.
Dahme Siohwa Kupwurki Kitail En Wia?
20 Alehdi sapwellimen Siohwa kapai kan kin kamwakid kitail en kahlemengih Maika. Maika mahsanih: “I pahn koapworopwor awiawih Koht me pahn ketin komouriehla.” (Maika 7:7) Ia duwen mahsen pwukat kin pid atail kin peikiong Koht ni karakarahk? Awiawih oh kanengamah, kin sewese kitail en dehr nsensuwedki Rahnen Siohwa eh saikinte leledohr. (Lepin Padahk 13:12) Ni mehlel, kitail koaros kin kasikasik imwin sampah suwed wet. Ahpw, ni ehuehu wihk, aramas kid kid kei kin tepida iang Koht kekeid. Atail kin ese duwen met kin kihong kitail kahrepe ehu en awiawih oh kanengamah. Emen me wereilahr wiahla Sounkadehde koasoia met: “Ni ahnsou me I kin katamando erein sounpar 55 me I kin iang wia doadoahk en kalohk, I kamehlelehiong pein ngehi me sohte mehkot I katihasang ni ei kin awiawih Siohwa. Weksang met dahme I diar iei me I kin pitsang soangen kansensuwed tohto.” Ke pil kin iang ahneki soangen irair duwehte met?
November 27–December 3
SOAHNG KESEMPWAL KAN SANG MAHSEN EN KOHT | NAHUM 1–APAKUK 3
“Mwasamwasahn oh Pwerisekiong Papah Siohwa”
Ire Kesempwal akan Sang nan Pwuhken Nahum, Apakuk, oh Sepanaia
2:1. Duwehte Apakuk, kitail anahne mwasamwasahn duwen atail nanpwung mwahu rehn Siohwa oh soupisengki sapwellime doadoahk. Kitail pil anahne mwadang wekidala atail madamadau ni ahnsou me kitail ale kaweid kan.
2:3; 3:16. Nin duwen atail kin awiawih rahnen Siohwa me pahn kohkohdo, kitail men kolokol atail pepehm en karuwaru.
2:4. Pwehn pitsang rahnen sapwellimen Siohwa kadeik me pahn kohkohdo, kitail anahne dadaurete oh kolokol atail lelepek.—Ipru 10:36-38.
Raparapahki Soahng Kesempwal kan Sang Mahsen en Koht
Ire Kesempwal akan Sang nan Pwuhken Nahum, Apakuk, oh Sepanaia
2:6—Mehnia “ewen kehl kan limwahn pillapo” me langadahr? Ewen kehl pwukat kin pid wasa me kelen kahnimw en Ninipe kan me ohkihla pilen Pillap Daikris. Nan 632 Mwohn Krais., ni ahnsou me sounpei en mehn Papilon kan oh mehn Media kan kohla mahweniong Ninipe, e sohte perki mehkot. Pwehki kehl ileile kan kin kapilpene ih, e lemeleme sohte mehkot me pahn kak pedolong loale. Ahpw, keteu mosul me kahrehda Pillap Daikris en lapakehda. Emen soun poadopoad me adaneki Diodorus koasoia, me lapake wet “kahrehda pihl en kipehdi ekei wasa nan kahnimwo oh kauwehla laud kelen kahnimw pwukat.” Ni mwomw wet, kehl kan limwahn pillapo langadahr, oh nin duwen me e kohpadahr, Ninipe mwadang lohdi duwehte tuhke dihpw meng kin mwadang mwasingkihla kisiniei.—Nahum 1:8-10.
Ire Kesempwal akan Sang nan Pwuhken Nahum, Apakuk, oh Sepanaia
3:17-19. Mendahki kahpwal kan pahn lelohng kitail mwohn oh erein Armakedon, kitail kak kamehlele me Siohwa pahn ‘kakehleikitailda’ pwe kitail en perenki pousehlahte papah ih.