Iren Sawas kan ong Doaropwehn Kasukuhl ong Mihting en Mour oh Kalohk
October 2-8
SOAHNG KESEMPWAL KAN SANG MAHSEN EN KOHT | DANIEL 7-9
“En Daniel Kokohpo Kohpada Pwarodohn Mesaia”
it-2-E 902 par. 2
Wihk Isihsek
Kauhdi sapwung oh katokehdi dihp. Sang pwoulahn Sises, eh ketin iasada, oh eh ketidahla nanleng met imwikihla ‘kauhdi sapwung kan oh katokedi dihp, oh iangahki wiahda mahkpen sapwung.’ (Da 9:24, NW) Inou en Kosonnedo kasansalehda oh kadeikada me mehn Suhs kan aramas dipan kei, oh kerieirailla nin duwen me kin kauwehla inou. Ahpw ni dihp eh “laudla” nin duwen me Kosonned en Moseso kin kasalehda, sapwellimen Koht mahk oh kupwuramwahu ahpwte pil laudla pwehki sapwellime Mesaiao. (Ro 5:20) Sang ni meirong en Mesaiao, sapwung oh dihp en irail me koluhkihla diparail kan kak sohrala oh kalokeparail kak kohsang.
it-2-E 900 par. 7
Wihk Isihsek
Pwarodohn Mesaia Mwurin ‘Wihk Weneisek Duwau.’ Ahpw me pid “wihk weneisek riau” (Da 9:25, NW), me wia kisehn wihk 70 oh keriaun keirekidi, e pahn pousehla sang kaimwiseklahn “wihk isuh.” Ihme kahrehda, ahnsou “me mahsen en onehda sapahl Serusalem” lao lel “Kaun Mesaia,” pahn “wihk” 7 patehng “wihk” 62, de “wihk” 69, me wehwehki sounpar 483, sangete pahr 455 Mwohn Krais lel pahr 29 Mwurin Krais. Nin duwen me sansalda powe, kohkohlahng ni imwin pahr 29 Mwurin Krais, Sises ketin papidaisla nan pihl, keikihdi sapwellimen Koht manaman, oh tapiada sapwellime doadoahk en kalohk nin duwen “Kaun Mesaia.”—Lu 3:1, 2, 21, 22.
it-2-E 901 par. 2
Wihk Isihsek
“Kamakamala” nanwerengen wihko. Kapriel pousehla mahsanihong Daniel: “Mwurin wihk weneisek riauo Mesaiao pahn kamakamala, ni eh tounmeteikihla soahng koaros me e sapwellimanki.” (Da 9:26, NW) Ahnsou kei mwurin imwiseklahn wihk ‘isuh patehng wihk weneisek riau,’ ni mehlel sounpar siluh elep mwurin mwo, me Krais kamakamala pohn tuhkehn kalokoloko, ni eh toukihda soahng koaros me e sapwellimanki, pwehn wia pweinen pweipwei sapahl ong aramas akan. (Ais 53:8) Mehn kadehde kan kasalehda me Sises ketin doadoahngkihla tepin elep en “wihko” ong doadoahk en kalohk. Ehu ahnsowo, ele mwein nan pahr 32, e kihda karasaras pwoat me pid wehin Suhs nin duwen tuhke pik pwoat (pil kilang Md 17:15-20; 21:18, 19, 43) me sohte kin kapwarehda wah kan erein “sounpar siluh.” Soumweto ahpw ndaiong ohl me sapweniki mwahto: “Komw ketin mweidohng mahs ma e sohte pahn wa nan sounparet. Pwe I pahn song kapilkipene tapiet ehu warawar en oh kesehiong koiasi loale. Ma e pahn wa nan sounpar kohkohdo, me mwahu; a ma soh, eri, kitail nek pelehdihsang.” (Lu 13:6-9) Ele e mahmahsanih wasaht duwen ia uwen werei en eh doadoahk en kalohk nan wehi wet me sohte mwekidki met, eh doadoahk en kalohk ahnsowo ele lelehr sounpar siluh oh pahn tepidahr kapahieun sounpar.
it-2-E 901 par. 5
Wihk Isihsek
“Elep en wihko” pahn lel nanwerengen sounpar isuhwo, de mwurin sounpar siluh elep, pwehki “wihk” ehu kin wehwehki sounpar isuh. Pwehki “wihk” keisihsek pahn tepida mpen pahr 29 ni ahnsou me Sises ketin papidaisla oh keidi wiahla Krais, elep en wihko (sounpar siluh elep) pahn imwila nan pahr 33, ahnsoun pahsohpa (Nisan 14) en pahro. Rahno mwomwen April 1 pahr 33, nan kalender en Gregorian. (Kilang SAK EN SOUTIK EN KAUNO [Ahnsou me E Wiawihda].) Wahnpoaron Pohl padahkihong kitail me Sises ‘ketido pwehn wia kupwuren Koht,’ me iei en ‘ketikihsang me keieuo [meirong kan nin duwen Kosonnedo] pwe en ketin wiahda me keriauo.’ E ketin wia met ni eh ketikihda paliwere nin duwen meirong ehu.—Ipr 10:1-10.
Raparapahki Soahng Kesempwal kan Sang Mahsen en Koht
w01-E 5/15 27
Peidek kan Sang Sounwadawad kan
Iahd “me Sarawiheo” keikihdi sapwellimen Koht manaman, nin duwen me kokohpda nan Daniel 9:24?
Daniel 9:24-27 iei kokohp ehu me pid pwaradahn “Kaun Mesaia” me iei Krais. Eri kokohp duwen keiehdi “me Sarawiheo” sohte wehwehki keiehdi Wasa Sarawiheo nan tehnpaso Serusalem. Ahpw, wehwehn “me Sarawiheo” kin pidada sapwellimen Koht Wasa Sarawiheo nanleng, nan sapwellimen Siohwa tehnpas sarawi lapalap.—Ipru 8:1-5; 9:2-10, 23.
Iahd me sapwellimen Siohwa tehnpaso tepida wiawi? Tehk mahs dahme wiawi ni ahnsou me Sises ketikihda pein ih pwehn papidaisla nan pahr 29. Sang ahnsowo, Sises ketin kapwaiada mahsen kan nan Melkahka 40:6-8. Mwuhr wahnpoaron Pohl kasalehda me Sises ketin kapakapkihong Koht: “Komw sohte ketin kupwurki meirong oh kisakis en mahn, pwe paliwar ehu me komw ketin kaunopohng ie.” (Ipru 10:5) Sises mwahngih me Koht “sohte ketin kupwurki” meirong en mahn akan en pousehlahte wiawi nan tehnpaso Serusalem. Ahpw, Siohwa ketin kaunopadahr paliwar unsek ehu rehn Sises pwehn ketikihda meirongo. Sises ketin kasalehda dahme uhdahn mi nan eh mohngiong, ni eh pousehla mahsanih: “Iet ngehi, Maing Koht, I patohdohn (nin duwen me ntingdier nan pwuhken Kosonned duwen ngehi) kapwaiada kupwuromwien.” (Ipru 10:7) Oh dahme Siohwa ketin sapengki? Pwuhken Rongamwahu en Madiu kasalehda: “Sises lao ketin papidaisla, e ahpw ketida sang nan pihlo; a iet ahnsowo nanleng pa ritpeseng. Sises eri ketin mahsanihada Ngenen Koht eh ketiket kohdi ni mwomwen mwuroi men oh ketidi powe. A kapitie ieu ahpw peidihdo sang nanleng, me mahsanih, ‘Kowe, me iei nei pwutak kompoake, me I kin kupwurperenki.’”—Madiu 3:16, 17.
Pwehki Siohwa Koht ketin kupwurki meirong en paliweren Siseso, met wehwehki me miehier pei sarawi ehu me lapalap sang pei sarawi me mi nan tehnpaso nan Serusalem. Met iei pei sarawi en “kupwur en” Koht, de koasoandi en kupwurki sapwellimen Sises mour nin duwen meirong ehu. (Ipru 10:10) En Sises keikihdi sapwellimen Koht manaman wehwehki me met Koht ketikidohr sapwellime koasoandi en tehnpas sarawio pwon. Ihme kahrehda, ni ahnsou me Sises ketin papidaisla, wasa me Koht kin ketiket ieo nanleng, keidi de katohrohrla, nin duwen “me Sarawiheo” nan koasoandi en tehnpas lapalap sarawio.
Ire Kesempwal akan Sang nan Pwuhken Daniel
9:27—Mehnia inou me wie manamante ong me tohto leledo ni imwin wihk 70, de pahr 36 C.E.? Inou en Kosonnedo sohla manaman sangehr nan pahr 33 C.E. ni ahnsou me Sises kamatalahu. Ahpw, Siohwa ketin kareireihala sapwellime kupwur mwahu tohrohr ong mehn Suhs akan, nin duwen arail wia kadaudoken Eipraam kei, oh ketin kolokolete manaman en Inou en Eipraam leledohng nan pahr 36 C.E. Inou en Eipraam manamante ong “Israel en Koht.”—Kalesia 3:7-9, 14-18, 29; 6:16, NW.
October 9-15
SOAHNG KESEMPWAL KAN SANG MAHSEN EN KOHT | DANIEL 10-12
“Siohwa Ketin Kohpada Nanmwarki kan en Ahnsou Kohkohdo”
dp-E 212-213 par. 5-6
Nanmwarki Riemen Nanpwung suwed
5 Tepin nanmwarki silimen ko iei Sairus Lapalap, Cambyses II, oh Darius I (Hystaspes). Pwehki Bardiya (de Gaumata, emen me eh pwuhng en kaunda aramas kin akupwungki) kakaunkihte sounpwong isuh, kokohpo sohte koasoia duwen ahnsou mwotomwot me e kakaunki. Nan pahr 490 Mwohn Krais, kesilimen en nanmwarki, Darius I, song en pil pwurehng wiahda Krihs. Ahpw, mehn Persia kan kaloweiraildi oh pwurala Asia Minor. Mendahki Darius kaunopada mwahu pwehn pousehla eh pelian Krihs, e sohte kapwaiada met mwohn eh mehla sounpar pahieu mwuri. Nah pwutako oh meteikan me wia met, “kapahmen” en nanmwarki, Serksihs I. Ih me Nanmwarki Ahasuerus me pwoudiki Ester.—Ester 1:1; 2:15-17.
6 Serksihs I me “uhwong wehin Krihs,” met wehwehki ehuehu wehin Krihs kan me uhtohrda ahpw kohpene nin duwen pwihn ehu. Pwuhken The Medes and Persians—Conquerors and Diplomats koasoia: “Pwehki aramas lapalap kan kin kangoange Serksihs en wia met, e wiahda mahwen kan pohn sahpw oh pil nansed.” Soupoad en Krihk Herodotus sang nan pahr wenepwiki samwa Mwohn Krais, ntingihedi me “sohte pil ehu karis en mahwen me kin seiloakseli pahrekiong met.” E koasoia me sounpei en nansed kan “lella meh 517,610. Nempehn sounpei kan me alu meh 1,700,000; me kin dake oahs 80,000; patehng mehn Arep kan me kin dake kamel kan, oh mehn Lipia kan me kin dake kuruma kan, me mwein lella meh 20,000. Eri, patpene koaros sounpei en pohn sapw oh nansed lella meh 2,317,610.”
dp-E 213 par. 8
Nanmwarki Riemen Nanpwung suwed
8 Tohnlengo mahsanih: “Nanmwarki men me keieu kehlail pahn pwarada. E pahn kaunda wehi lapalap ehu oh kin wia dahme e kupwurki.” (Daniel 11:3) Aleksander me sounpar rieisek, “pwarada” oh wiahla nanmwarkien Masedonia nan pahr 336 Mwohn Krais. E wiahla “nanmwarki men me keieu kehlail”, iei Aleksander Lapalap. E mwekidki en eh pahpao Philip II eh koasoandio, ih eri kihsang sapwen Persia kan nan Middle East. Nah sounpei 47,000 kan kotehla pillap Iupreitis oh Daikris oh katangapeseng nein Darius III sounpei 250,000 nan Gaugamela. Mwuri, Darius tang oh kamakamala, met kaimwisekala kaundahn mehn Persia kan. Krihs me uhd wiahla kaunda me keieu kehlail nan sampah, oh Aleksander “kaunda wehi lapalap ehu oh kin wia dahme e kupwurki.”
dp-E 214 par. 11
Nanmwarki Riemen Nanpwung suwed
11 Mwurinte mehlahn Aleksander, eh wehi ko “pwalpeseng wiahda wehi pahieu.” Pali laud en nah kaunen sounpei tohto kan kin akamai nanpwungarail, ni arail song en alehdi arail wasa. Kaunen sounpei maspali Antigonus I song en kihpene en Aleksander wehi kan pwehn kaunda. Ahpw e kamakamala nan mahwen ehu nan Ipsus nan Phrygia. Nan pahr 301 Mwohn Krais, nein Aleksander kaunen sounpei pahmen kaunda sahpw kan me arail kaun kalowehdiher. Cassander kaunda Masedonia oh Krihs. Lysimachus me kaunda Asia Minor oh Thrace. Seleucus I Nicator kaunda Mesopodamia oh Siria. Oh Ptolemy Lagus kaunda Isip oh Palestine. Mahsen en kohkohpo mehlel, en Aleksander wehi lapalapo kohpeseng wiahda wehi pahieu.
Raparapahki Soahng Kesempwal kan Sang Mahsen en Koht
“Kilang! I Pahn Ieiang Kumwail Rahn Koaros”
Daniel 12:3 koasoia me irail me “kupwurokong kan [Kristian keidi kan] pahn lingalingki marain en pahnlahng.” Ni arail mihmihte sampah, re wia met sang ni arail iang wia doadoahk en kalohk. Ahpw, Madiu 13:43 kin koasoia duwen ahnsowo me re pahn lingalingla nan Wehin nanleng. Mwowe kitail kin medewe me iren Paipel pwukat kin dokedoke doadoakohte, me iei doadoahk en kalohk.
dp-E 315 par. 18
Siohwa Ketin Inoukihong Daniel Keting Kaselel Ehu
18 Pwuhken Daniel kaimwisekihla ehu kisehn inou keieu kaselel kan me Koht ketin wiahiong aramas akan. Sapwellimen Siohwa tohnleng men mahsanihong Daniel: “Ke pahn kesihnenda pwe ken ale ketingpomw ni imwin ahnsou.” Ia wehwehn en tohnleng koasoio? Pwehki “kommoal” me tohnlengo koasoiao kin wehwehkiong mehla, inou me Daniel pahn “kesihnenda” mwuhr kin wehwehki soahng ehute, iei iasada! Ni mehlel, ekei semen kan kin koasoia me Daniel irelaud 12 audaudki tepin ire me koasoia duwen iasada nan Palien Paipel ni Lokaiahn Ipru. (Daniel 12:2) Ahpw, me pid duwen met, irail sapwung. Daniel uhdahn esehier duwen koapworopwor en kaiasada.
October 16-22
SOAHNG KESEMPWAL KAN SANG MAHSEN EN KOHT | OSEIA 1-7
“Siohwa Kin Ketin Kupwurperenki Limpoak Loalopwoat—Ia Duwen Kowe?”
w10 8/1 27 par. 18
“Kosonned en Limpoak-kadek” en Kin Sansal nan Atail Koasoi
18 Limpoak mehlel kin anahne sansal nan atail wiewia kan ong iengetail tohnkaudok en Siohwa. Mendahki kahpwal kan, kitail anahne kasalehda limpoak-kadek nan atail koasoi. Siohwa kupwursuwedkihla ni ahnsou me limpoak-kadek en mehn Israel kan kin “rasehng pwoaik, me kin mwadang sohrala.” (Os. 6:4, 6) Ahpw Siohwa kupwurperenki wiewia en limpoak-kadek ahnsou koaros. Kitail pahn kilang ia duwen eh ketin kapaiada irail kan me kin rapahki met.
Ire Kesempwal akan Sang nan Pwuhken Oseia
6:6. Ma emen pwurepwurehng wiahda dihp, met kin kasalehda me eh limpoak lelepek ong Koht sohte itar. Sohte tounmetei ong doadoahk en Siohwa kak pwaindi soh itar wet.
Siohwa Ketin Kesempwalki Omw Peik
7 Me pid duwen ire wet, tamanda me mahsie, Siohwa ketin kasalehiong sapwellime aramas en mahs kan me peik kesempwal sang meirong en mahn akan. (Lepin Padahk 21:3, 27; Oseia 6:6; Madiu 12:7) Dahme kahrehda Siohwa ketin mahsanih met mendahki ih me ketin padahkiong sapwellime aramas akan en wiahda soangen meirong pwukat? Eri, dahme kin kamwekid emen en wiahda meirong? E kin wia met pwehn kaperenda Koht? De e kin idawehnlahte soangen koasoandi kan? Ma tohnkaudok men uhdahn men kaperenda Koht, e pahn kanahieng pwehn peikiong sapwellimen Koht koasoandi kan koaros. Koht sohte ketin anahne meirong en mahn akan, ahpw peik me wia mehkot kesempwal me kitail kak kihong ih.
Raparapahki Soahng Kesempwal kan Sang Mahsen en Koht
Ire Kesempwal akan Sang nan Pwuhken Oseia
1:7—Iahd Koht ketin kasalehda mahk ong mehn Suda kan oh doareirailla? Met wiawi nan pahr 732 Mwohn Krais, nan mwehin Nanmwarki Esekaia. Ni ahnsowo, Siohwa ketin kaimwisekala ahn Asiria mahwen ong Serusalem sang ni eh ketin doadoahngki tohnleng men en kemehla neirail sounpei 185,000 ni pwongohte. (2 Nanmwarki 19:34, 35) Ni ahl wet, Siohwa ketin doarehla Suda, kaidehn “sang ni mahwen, de kedlahs, de kesik ketieu, de oahs akan oh soundakepe kan,” ahpw tohnleng men.
Sapwellimen Oseia Kokohp Kin Sewese Kitail En Kak Iang Koht Kekeidwei
16 Koht pil ketin kaunsekala inou wet me mahsanih: “I pahn wiahda inou ehu ong mahn lawalo oh menpihr kan, pwe re en dehr kahpwalihala nei aramas akan. I pahn kasorehsang tehtehn mahwen koaros nan wehiet—kedlahs oh kesik ketieu koaros—oh mweidohng nei aramas akan re en momour ni popohl oh onepek mwahu.” (Oseia 2:18) Irail luhwen mehn Suhs me pwurodohng uhdakarailo kousoan ni meleilei oh sohte me re pahn masak ki mahn akan. Kokohp wet pil pwurehng pweida nan pahr 1919 C.E., ahnsou me luhwen Israel en ngehn saledekla sang nan “Papilon Lapalap” me iei kaudok likamw kan koaros. Ahnsou wet, irail koukousoan nan meleilei oh perenki mour nan paradais en ngehn iangahki iengerail teikan, me arail koapworopwor iei en kousoan nan sampah kohkohlahte. Irair en mahn lawalo oh kommwad kan sohte kin dierek nanpwungen Kristian mehlel pwukat.—Kaudiahl 14:8; Aiseia 11:6-9; Kalesia 6:16.
g05-E 9/8 12 par. 2
Ahnsou me Sampah Pwon Pahn Ehupene
Ni mehlel, soahng momour kan nan sampah pahn paieki soangen ehupene ieu me kapw, pwe Koht pahn ketin padahkihong sapwellime aramas loalopwoat kan ia duwen ar pahn apwalih mwahu arail wasahn kousoan. E pil pahn ketin kahrehiong mahn kamasepwehk kan koaros en momour ni popohl oh peikiong aramas akan, rasehng e “wiahda inou ehu” ong irail.—Oseia 2:18; Senesis 1:26-28; Aiseia 11:6-8.
October 23-29
SOAHNG KESEMPWAL KAN SANG MAHSEN EN KOHT | OSEIA 8-14
“Patohwanohng Siohwa Dahme Keieu Mwahu Rehmw”
w07-E 4/1 20 par. 2
Patohwanda Meirong kan me Kin Kaperenda Koht
Laudsang met, Paipel kin kasalehda me atail koasoi en kaping kak duwehte meirong ehu me kitail kin patohwanohng Siohwa. Soukohp Oseia doadoahngki koasoi “koupwul en kilinewet” me kasalehda Koht kin ketin kilengwohng kaping en kilinewetail kan nin duwen atail meirong me keieu mwahu. (Oseia 14:2) Wahnpoaron Pohl kangoangehki Kristian en Ipru kan: “Patohwanohng Koht meirong en kaping, me iei, wahn kilinewetail me kin kadehdehda ong wehi pokon duwen mwareo.” (Ipru 13:15) Rahnwet, Sounkadehdehn Siohwa kan kin kedirepwki kalohkiseli rongamwahwo oh wia katohnpadahk nan wehi koaros. (Madiu 24:14; 28:19, 20) Irail kin kihda meirong en kaping ong Koht ni rahn oh ni pwong nan sampah pwon.—Kaudiahl 7:15.
Alehda Kupwuramwahu en Koht Kin Kahluwalahng Mour Soutuk
15 Ia duwen Siohwa eh kin ketin sapeng irail kan me wia soangen meirong en kaping pwukat? E mahsanih: “I pahn poakohng irail ni mohngiongi unsek.” (Os. 14:4) Siohwa kin ketin mahkohng, kupwuramwahwih, oh kompoakepahnki irail kan me wiahda soangen meirong en kaping pwukat.
jd-E 87 par. 11
Papah Siohwa nin Duwen me Pahrekiong Sapwellime Kosonned Ileile kan
11 Oseia 14:9 pil kahrehiong kitail en tehk soahng mwahu kan me kin kohsang kapwaiada koasoandi pwung ehu. Kapai kan oh kamwahu kan kin kohsang atail kin mour pahrekiong sapwellimen Koht koasoandi kan. Nin duwen Sounkapikadao, e ketin mwahngih duwen kitail. Dahme e ketin kupwurki sang kitail wia kamwahupatail. Pwehn karasahda nanpwungatail oh Koht, kitail kak medewehla sidohsa ieu oh me wiahda sidohsao. Sounwiahdao ese ia mwomwen sidohsao eh wiawihda oh mwomwen eh kihpene. E ese me oil en sidohsao kin anahne weliweliali. Dahme pahn wiawi ma ke pohnsehsehla koasoandi wet, pwe ke medewe me sidohsao wie tangatang mwahu? Misihn en sidohsao pahn mwadang en luwetala oh ohla. Met pil duwehte aramas akan. Atail Sounkapikadao ketikihong kitail kehkehlik kan. Atail kapwaiada mepwukat kin wia kamwahupatail. (Aiseia 48:17, 18) Atail wehwehki me met wia kamwahupatail kin kalaudehla kahrepen atail men mour pahrekiong eh koasoandi kan oh peikiong eh kehkehlik kan.—Melkahka 112:1.
Raparapahki Soahng Kesempwal kan Sang Mahsen en Koht
“Sapwellimen Siohwa Ahl Akan Me Pwung”
7 Ma kitail kin kaudokiong Siohwa ni ahl me sohte mwalaun pidada oh ni ahl me pwung, kitail pahn ale sapwellime limpoak-kadek, de limpoak mehlel. Kaweid kohwong wehin Israel salelepeko en: “Kamwerehdiong kumwail weren pwung oh dolung nin duwen limpoak-kadek. Kumwail deipweliada pein amwail pwehl kapw, ni ah miemiehte ahnsou en rapahki Siohwa lao e ketido oh ketikihda elen kaweid pwung ong kumwail.”—Oseia 10:12, NW.
Re Awiawih Mesaiao
10 Mesaiao pahn wisiksang Isip. (Os. 11:1) Tohnleng men padahkihong Sosep oh Mery ira en kohkohsang Israel oh wahlahng Sises nan Isip pwehn doarehsang Sises Nanmwarki Erod. Re mihmi mwo lao Erod mehla. Mwurin Erod eh mehla, Sosep kapwurehla Sises nan Israel. Eri, dahme Siohwa ketin mahsanihong Oseia pweida: “I malipedohr nei pwutako sang Isip.” (Mad. 2:13-15) Mehlel me Sises sohte kak ketin pein kamwakid dahme wiawi sangete ni eh ketin ipwidi lao eh laudla.
October 30–November 5
SOAHNG KESEMPWAL KAN SANG MAHSEN EN KOHT | SOEL 1-3
“Noumwail Pwutak oh Serepein kan Pahn Kalohkiseli Ei Mahsen”
Mwekidki “Soangen Manaman Kapwuriamwei Kan Me Koht Ketin Wiadahr”
4 Mwurin irail tohnpadahk kan nan Serusalem alehdi ngehn sarawi, irail mwadangete tepida kalohk ong aramas teikan Rongamwahu en komour, oh irail tepida kalohk ong aramas me pokonpene ni mensengo. Kokohp ehu kin pweida ni arail kin wia doadoahk en kalohk, me Soel nein Petuel ntingihdi sounpar walipwuki mwowe: “Mwurin mepwukat I pahn kamwerehdi ngeni pohn aramas akan koaros: noumwail pwutak oh serepein kan pahn kalohkiseli ei mahsen; me mah kan rehmwail pahn wia ouramen kei, oh noumwail mwahnakapw kan pahn kilang kaudiahl kan. Ni ahnsowo I pahn kamwerehdi ngeni . . . mwohn rahn lapalap oh kamasepwehk wet en ketidohn [Siohwa].”—Soel 1:1; 2:28, 29, 31; Wiewia 2:17, 18, 20.
5 Met kin wehwehki me Koht pahn ketin kahrehong aramas akan nan ehu dih en wiahla soukohp akan, ohl oh lih, duwehte e doadoahngki Depit, Soel, oh Depora en kohpada dahme pahn wiawi ni ahnsou kohkohdo? Soh. Nein Kristian ‘pwutak oh serepein kan’ pahn wia kokohp kan ni ahl wet: Sapwellimen Siohwa ngehn sarawi pahn kamwekid irail en kalohkiseli ‘soangen kapwuriamwei kan” me Siohwa ketin wiadahr oh pahn wia. Irail pahn wiahla sounkair akan ong Wasa Lapalapo. Iaduwen pokono mwekidki met?—Ipru 1:1, 2.
jd-E 167 par. 4
“Kumwail Kalohkihda Pakair Wet Nanpwungen Wehi kan”
4 Medewe duwen met ni ehu ahl tohrohr. Siohwa Koht mahsanihong soukohp Soel duwen ahnsou me soangsoangen aramas koaros pahn wia kokohp: “Mwurin mwo I pahn kamwerehdi ei manaman pohn soangsoangen aramas akan, oh noumwail pwutak kan oh serepein kan pahn wia kokohp, me mah kan rehmwail pahn wia ouraman kei, oh noumwail mwahnakapw kan pahn kilang kaudiahl kan.” (Soel 2:28-32, NW) Ni rahnen Pendekos nan pahr 33, wahnpoaron Piter kasalehda me ire wet doakedoake sapwellime manaman eh mweredi pohn irail kan me pokonpene nan pere ehu powe nan Serusalem oh arail kalohki “soangen manaman kapwuriamwei kan me Koht ketin wiadahr.” (Wiewia 1:12-14; 2:1-4, 11, 14-21) Nna medewe duwen atail ahnsou. Ahn Soel kokohp kin pweida laud sang mpen sounpar epwiki samwalahro. Kristian me keidi kan, ohl oh lih, me mah oh me pwulopwul, tepida “wia kokohp” me iei kalohki “soangen manaman kapwuriamwei kan me Koht ketin wiadahr” iangahki rongamwahu en Wehio me kokoudahr nanleng.
Ire Kesempwal akan Sang nan Pwuhken Soel oh Eimwos
2:32, NW—Ia wehwehn en ‘likweriong mwaren Siohwa’? En likweriong mwaren Koht kin wehwehki ken ese mwahro, en wauneki mehlel, oh en koapworopworki oh likih ih me mwarenki mwahro.—Rom 10:13, 14.
Raparapahki Soahng Kesempwal kan Sang Mahsen en Koht
Ire Kesempwal akan Sang nan Pwuhken Soel oh Eimwos
2:12, 13. Koluhla mehlel kin kohsang nan mohngiongitail. E kin pidada nsensuwed en loaletail de ‘ohlahn mohngiongimwail,’ kaidehn nsensuwed me kin wiawi ni sansal ni ‘amwail tehrpeseng amwail likou kan.’
Ire Kesempwal akan Sang nan Pwuhken Soel oh Eimwos
3:14—Dahkot “Wahun Kopwung”? Ni karasaras, e wia wasa ehu me Koht kin ketin wia sapwellime kopwung. Ni mwehin Seosopat, Nanmwarki en Sudia, me mware kin wehwehki “Siohwa Iei Sounkopwung,” Koht kapitala Suda sang wehi kan me kapilpene ih ni eh kapingada madamadau en irail pwihn en sounpei kan. Nan atail ahnsou, e wia karasepen wasa ehu me wehi kan pahn kamwutumwutpene duwehte kreip kan me kin kamwutumwutpene nan wasahn kamwute wain.—Kaudiahl 19:15.