Iren Sawas kan ong Doaropwehn Kasukuhl ong Mihting en Mour oh Kalohk
April 2-8
SOAHNG KESEMPWAL KAN SANG MAHSEN EN KOHT | MADIU 26
“Pahsohpao oh Katamano—Duwehpene kan oh Wekpeseng kan”
nwtsty-E kilel oh kisin kasdo kan
Saken Pahsohpao
Soahng kesempwal kan ong ni saken Pahsohpao iei: sihmpwul kereng (sohte tih pwoat rehn mahno pahn ohla) (1); pilawa sohte doal ihs (2); oh tehntuhke katik (3). (Eks 12:5, 8; Nem 9:11) Nin duwen me kosonned en Mishnah koasoia me dihpw oh tehntuhke katik kan me kadoadoahk mwein lettuce, chicory, pepperwort, endive, de dandelion, uhdahn katamankihong mehn Israel ko arail wie kalokolok nan Isip nin duwen lidu kei. Sises ketin doadoahngki pilawa sohte doal ihso nin duwen kilel ehu ong sapwellime kahlep unsek. (Md 26:26) Oh wahnpoaron Pohl kahdaneki Sises “atail sihmpwul en Pahsohpa.” (1Ko 5:7) Ni mwehin tepin Kristian akan, wain (4) pil kin kohda pwehn wia kisehn saken Pahsohpao. Sises ketin doadoahngki waino pwehn wia kilelepen sapwellime nta, me pahn kepwilipwildi nin duwen meirong ehu.—Md 26:27, 28.
nwtsty-E mehn onop ong Md 26:26
wehwehki: Lepin lokaiahn Krihk e·stinʹ (uhdahn wehwehki “iei”) wasaht wehwehki en “kasalehda; kilelepen; wehwehki; wiliepen.” Wehwehn met sansal ong wahnpoaron ko, pwehki ni ahnsowo sapwellimen Sises kahlep unseko mihmi mwo mwohrail oh pil lopwon en pilawa me sohte dol ihso me re pahn tungoale. Kahrehda, pilawao sohte kak wia uhdahn kahlepeo. Eri e mwahu en tehk me lepin lokaiahn Krihkohte pil kadoadoahk nan Md 12:7, oh tohto kawehwehn Paipel kan kawehwehdi lepin lokaiao “wehwehki.”
nwtsty-E mehn onop ong Md 26:28
ntahn inou lapo: Inou kapwo, nanpwungen Siohwa oh Kristian keidi kan, manamanlahr sang ni sapwellimen Sises meirongo. (Ipr 8:10) Wasaht Sises ketin doadoahngki soangen mahsenohte me Moses doadoahngki ni ahnsou me e wia sounkadokepene oh kasalehda inoun Kosonnedo ong mehn Israel ko ni Nahna Sanai. (Eks 24:8; Ipr 9:19-21) Duwehte ntahn kou kan oh kuht kan eh kamanahla inoun Kosonnedo nanpwungen Koht oh wehin Israel, ntahn Siseso kamanahla inoun kapwo me Siohwa pahn ketin wiahiong Israel en Koht. Inowo tepidahr doadoahk nan Pendekos en pahr 33.—Ipr 9:14, 15.
Raparapahki Soahng Kesempwal kan Sang Mahsen en Koht
(Madiu 26:17, NW) Ni keieun rahn en Pilawa me Sohte Doal Ihs, tohnpadahk ko patohdo rehn Sises, patohwan: “Ia wasa komw kupwurki sen kaunopadahng komwi en konote Pahsohpao ie?”
nwtsty-E mehn onop ong Md 26:17
Ni keieun rahn en Pilawa me Sohte Doal Ihs: Kasarawien Pilawa me Sohte Doal Ihs tepida nan Nisan 15, mwurin rahn en Pahsohpao (Nisan 14), oh wiewiawihki rahn isuh. (Kilang sgd-PP 19.) Ahpw, ni mwehin Siseso, Pahsohpao uhdahn kereniong patehng kasarawi wet me rahn waluh koaros, iangahki Nisan 14, ekei pak kin wehwehkiong “Kasarawien Pilawa me Sohte Doal Ihs.” (Lu 22:1, NW) Nan ire wet, lokaia ko “Ni keieun rahn en” kak wehwehki “Ni rahn en mwoweo.” (Kilang Soh 1:15, 30, wasa me lepin lokaiahn Krihk “keieun” [proʹtos] kawehwehdi “mwowe” wehwe me duwehte, “e ketiketier mwohi [proʹtos].”) Eri, lokaiahn Krihk oh pil iangahki tiahk en mehn Suhs kin kasalehda me tohnpadahk ko idek rehn Sises peideko ni Nisan 13. Erein nin rahn en Nisan 13, tohnpadahk ko kaunopada ong Pahsohpao, me pahn wiawi “mwurin eh soutikpene” ni tepidahn Nisan 14.—Mr 14:16, 17, NW.
(Madiu 26:39, NW) E ahpw ekis ketilahsang wasao, poarikidiong silangi nanpwel, loulou mahsanih, “Ipa, ma kak, mweidohng kep wet en douluhlweisang ie. Ahpw kaidehn nsenei pwe kupwuromwihte.”
nwtsty-E mehn onop ong Md 26:39
mweidohng kep wet en douluhlwei: Nan Paipel, “kep” kin kalapw kadoadoahk ni karasaras ong kupwuren Koht, de “pwukoa me kohwohng,” aramas emen. (Kilang mehn onop ong Md 20:22.) Sises uhdahn ketin pwunodki laud me eh pwoula nin duwen emen me dipkihda lahlahwe oh uhwong pahn wahdo kanamenek ong Koht, met kamwakid ih en kapakapki “kep” wet en douluhlweisang ih.
April 9-15
SOAHNG KESEMPWAL KAN SANG MAHSEN EN KOHT | MADIU 27-28
“Kohla Katohnpadahk—Dahme Kahrehda, Ia Wasa, oh Ia Duwen?”
‘Kohwei Oh Katohnpadahk’
4 Sises sapwellimaniki manaman en kaunda mwomwohdiso, oh tepisang pahr 1914 e pil sapwellimaniki manaman pohn sapwellimen Koht Wehio me kokouda nanleng. (Kolose 1:13; Kaudiahl 11:15) Sises me kin wia tohnleng me keieu lapalap me adaneki “archangel” oh e kin kaunda sapwellime karis nanleng me wiawihkihda tohnleng rar kei. (1 Deselonika 4:16; 1 Piter 3:22; Kaudiahl 19:14-16) E alehdi manaman sang rehn Seme pwen kasorehla “wehi kan koaros oh kaunda koaros iangahki manaman koaros” me kin uhwong a koasoandi pwung kan. (1 Korint 15:24-26; Episos 1:20-23) Ahn Sises manaman kaidehn ihte ong me momour. E pil wia “sounkopwung en me memour oh me mehla kan” oh pil sapwellimaniki manaman en kaiasada irail me mehlahr akan. (Wiewia 10:42; Sohn 5:26-28) Pwehki kitail wehwehki me Siohwa ketikihong Sises manaman laud, met pahn kamwekid kitail en peikiong kehkehlik kan me Sises kin ketikihda. Eri, kitail ni wahu oh nseneki kapwaiada kehkehlik en Krais en ‘kohwei oh katohnpadahk.’
nwtsty-E mehn onop kan ong Md 28:19
padahkihong . . . ren wiahla nei tohnpadahk: Lokaiahn Krihk ma·the·teuʹo kak wehwehki “padahk” me pidada en sewese emen en wiahla tohnsukuhl kan de tohnpadahk kan. (Kilang nan Md 13:52, NW, wasa me e kawehwehdi “sukuhlki.”) Lepin lokaia pwukat “papidaisihirailla” oh “padahkihong” kasalehda me e pidada kehkehlik en “padahkihong . . . ren wiahla nei tohnpadahk.”
aramas en wehi koaros: Uhdahn lokaiahn Krihs wehwehki “wehi koaros,” ahpw ireo kasalehda me lepin lokaia wet dokedoke emenemen sang nan wehi koaros, pwehki lokaiahn Krihk “irail” sang lepin lokaia papidaisihirailla wehwehki ohl oh kin dokedoke aramas akan, kaidehn ong “wehi” kan, me lokaiahn Krihk kin kasalehda ohl de lih. Kehkehlik wet en lelohng “aramas en wehi koaros” kapw. Mwohn Sises eh ketin tepida kalohk, Paipel kasalehda me mehn liki kan mweimweiong kohla Israel ma re pahn papah Siohwa. (1Na 8:41-43) Ahpw, pwehki kehkehlik wet, Sises ketin koasoanehong sapwellime tohnpadahk kan ren kalaudehla doadoahk en kalohk ong aramas teikan me kaidehn mehn Suhs, kasansalehda doadoahk en katohnpadahk nan sampah pwon me Kristian kan pahn wia.—Md 10:1, 5-7; Kau 7:9; kilang mehn onop ong Md 24:14.
nwtsty-E mehn onop ong Md 28:20
padahkihong irail: Lepin lokaiahn Krihk me wehwehki “en padahk” kin pidada en kaweid, kawehwehda, koasoipene ni omw kasalehda soahng kan, oh kihda mehn kadehde kan. (Kilang mehn onop kan ong Md 3:1; 4:23.) En padahkihong irail ren kapwaiada mehkoaros me Sises ketin kehkehlingki pahn wia mehkot me pahn pousehlahte wiewiawi, me pahn iangahki en padahngki dahme e kin ketin padahngki, kapwaiada eh padahk, oh idawehn eh mehn kahlemeng.—Soh 13:17; Ep 4:21; 1Pi 2:21.
Raparapahki Soahng Kesempwal kan Sang Mahsen en Koht
nwtsty-E mehn onop kan ong Md 27:51
kahdeng: Likou lingan kaselel wet irepeseng Wasa Sarawiheo sang Wasa Sarawio nan tehnpaso. En mehn Suhs tiahk kasalehda me kahdeng toutou wet reireiki mpen meter 18 (60 ft), meter 9 (30 ft) tehlap, oh centi meter 7.4 (2.9 in.) mosul. Ni kahdengo eh teipeseng wiahda riau, Siohwa ketin kasalehda eh engieng pahn irail me kemehla sapwellime Ohlo, oh e pil ketin kasalehda me kohdahla nanleng kakehr wiawi.—Ipr 10:19, 20; kilang Kawehwehn Lepin Lokaia kan.
wasa sarawio: Lepin lokaiahn Krihk na·osʹ wasaht dokedoke ihmwo pwon me pere riau Wasa Sarawio oh Wasa Sarawiheo mi loale.
nwtsty-E mehn onop ong Md 28:7
ndaiong sapwellime tohnpadahk ko me e ketin iasada: Lih pwukat iei tepin tohnpadahk me rong duwen kaiasadahn Sises, oh ira pil alehdi kehkehlik en padahkihong tohnpadahk teiko. (Md 28:2, 5, 7) Tiahk en mehn Suhs kan me sohte poahsoankihda Paipel, kasalehda me lih emen sohte mweimwei en kihda mehn kadehde nan mwoalen kopwung en kosonned ehu. Weksang met, sapwellimen Siohwa tohnlengo kawauwihala lih ako ni eh kihong ira pwukoa kaperen wet.
April 16-22
SOAHNG KESEMPWAL KAN SANG MAHSEN EN KOHT | MARK 1-2
“Dipomw kan Lapwadahr”
jy-E 67 par. 3-5
“Dipomw kan Lapwadahr”
Ni Sises eh ketin padapadahk nan pereo me diren aramas, ohl pahmen pa wahdo ohl mwoator men pohn mehn roh ehu. Irail men Sises en ketin kamwahwihala kompoakparail me soumwahwo. Ahpw, pwehki pokono, irail sohte kak “patohwanlahng ih mpen Sises.” (Mark 2:4, NW) Medewehla ia uwen kansensuwed en met. Irail doudahla pohn pwelengen ihmwo oh koupwoarehda pohn ihmwo. Irail eri kakihredihla mehn roh me ohl mwoatoro mi loale nan ihmwo.
Ia duwe, Sises ketin engiengkihda ar kedikedirepwa? Uhdahn soh! E uhdahn ketin pwuriamweikihla arail pwoson oh mahsanihong ohl mwoatoro: “Dipomw kan lapwadahr.” (Madiu 9:2) Ahpw ia duwe, Sises kak ketin lapwahda dihp kan? Sounkawehwehn kosonned ko oh Parisi ko tehkada duwen mwekid wet, oh medemedewe: “Dahme kahrehda ohl menet wiahki soangen lokaia wet? E lahlahwe. Ihs me kak lapwahda dihp, kaidehk Koht kelehpw?”—Mark 2:7, NW.
Ni Sises eh mwahngihada arail lamalam, e mahsanihong irail: “Dahme kahrehda kumwail medemedewe mepwukat nan mohngiongimwail? Mehnia me mengei en ndaiong me mwoatoro, ‘Dipomw kan lapwadahr,’ de nda, ‘Uhda, ale omw mehn roh oh alu’?” (Mark 2:8, 9, NW) Ei sang ni meirong me Sises pahn ketikihda, e kak ketin lapwahda dipen ohlo.
nwtsty-E mehn onop ong Mr 2:9
Mehnia me mengei: E pahn mengei ong emen en nda me e kak lapwahda dihp kan, pwehki sohte mehn kadehde sansal me pahn anahn pwehn kadehdehda met. Ahpw en nda, Uhda . . . oh alu anahne manaman kapwuriamwei ehu me pahn kadehdehiong koaros ren kilang me Sises sapwellimanki manaman en lapwahda dihp kan. Ire wet oh Ais 33:24 kasalehda soumwahu eh wia kisehn irair en dihp.
Raparapahki Soahng Kesempwal kan Sang Mahsen en Koht
nwtsty-E mehn onop kan ong Mr 1:11
ngihl ehu kohsang nanleng: Tepin wasa siluh nan pwuhken Rongamwahu ko me kasalehda wasa me Siohwa ketin mahseniong aramas akan.—Mehn onop kan ong Mr 9:7; Soh 12:28.
Kowe me nei Pwutak: Nin duwen ngehn emen, Sises iei sapwellimen Koht Ohl. (Soh 3:16) Sang ahnsou me e ketin ipwidi nin duwen aramas emen, Sises iei “sapwellimen Koht pwutak” unsek duwehte Adam nin tapio. (Lu 1:35; 3:38) Ahpw e wia elen madamadau pwung me mahsen en Koht wasaht kasalehda laud sang met duwen Sises. Sang ni kadehde wet iangahki sapwellimen Koht manaman, Koht ketin kadehdehda ni sansal me ohlo Sises wiahla sapwellime Ohl, ‘ipwsapahlki’ koapworopwor en pwurehng mour nanleng oh keikihdi sapwellimen Koht manaman pwehn wia sapwellimen Koht Nanmwarki oh Samworo Lapalap idihdida men.—Soh 3:3-6; 6:51; kilang Lu 1:31-33; Ipr 2:17; 5:1, 4-10; 7:1-3.
I kin kupwurperenkin uhk: De “I uhdahn pwungkin uhk; I kin uhdahn perenkin uhk.” Soangen koasoiohte me kadoadoahk nan Md 12:18, me kohsang nan Ais 42:1 me pid duwen Mesaia me inoudao, de Krais. Sang sapwellimen Koht manaman eh ketidiong powe oh sapwellimen Koht mahsen duwen Sises, e kadehdehda ni sansal me Sises iei Mesaia me inoudahro.—Kilang mehn onop kan ong Md 3:17; 12:18.
nwtsty-E mehn onop ong Mr 2:28
Kaunen Sapad: Ni Sises eh ketin karasahiong met ong pein ih, (Md 12:8; Lu 6:5), e ketin kasalehda me e kak ketin doadoahngki rahnen Sapado pwehn wia doadoahk me Semeo nanleng ketin kehkehlikihong ih en wia. (Pil kilang Sohn 5:19; 10:37, 38.) Ni rahnen Sapad, Sises ketin wiahda ekei sapwellime manaman kapwuriamwei kan, me iangahki kamwahwihala me soumwahu. (Lu 13:10-13; Soh 5:5-9; 9:1-14) Met kasalehda ni sansal duwen soangen nsenamwahu laud me e pahn ketikihdo erein kaundahn sapwellime Wehio, me pahn duwehte kommoal en sapad.—Ipr 10:1.
April 23-29
SOAHNG KESEMPWAL KAN SANG MAHSEN EN KOHT | MARK 3-4
“Kamwahwihala ni Rahnen Sapad”
jy-E 78 par. 1-2
Dahme Kosonned Mweidada ni Rahnen Sapado?
Pil ehu rahnen Sapad, Sises ketila nan sinakoke ehu, ele mwein nan Kalili. Wasao e ketin diarada ohl emen me peh palimaun mwoatorala. (Lu 6:6) Sounkawehwehn Kosonned ko oh Parisi ko kadekadehde Sises. Dahme kahrehda? Irail kasalehda dahme irail uhdahn men wia ni ar idek: “Kosonned mweidada kamwahulahn me soumwahu kan ni rahnen Sapad?”—Madiu 12:10, NW.
Kaunen pelien lamalam en mehn Suhs ko kamehlele me e mweimwei en kamwahwihala me soumwahu ni rahnen Sapad ihte ma mouro mi nan keper. Karasepe, ni rahnen Sapad e sohte mweimwei en koasoanehdi tih pwoat de kidimpene ohla ehu, irair kan me sohte keper ong mour. E sansal me sounkawehwehn kosonned ko oh Parisi ko sohte peipeidek rehn Sises pwehki re uhdahn nsenohki ohl menet me wie lokolok. Irail songosong en rapahkihda kahrepe ehu pwehn kedipahki Sises.
jy-E 78 par. 3
Dahme Kosonned Mweidada ni Rahnen Sapado?
Ahpw, Sises mwahngih arail madamadau sapwung kan. E mwahngihada me irail alehda madamadau kan me nohn daulihala oh sohte poahsoanda sang Paipel duwen soangen doadoahk dah me keinapwidi ni rahnen Sapad. (Eksodus 20:8-10) E ketin lelohngehr aramas akan ar kauwe sapwellime doadoahk mwahu kan. Sises ketin wia mehkot me kahrehda uhpene ehu ni eh mahsanihong ohl peh mwoatoro: “Uhda oh kohdo nanwerenge.”—Mark 3:3, NW.
nwtsty-E mehn onop ong Mr 3:5
ni engieng oh uhdahn kupwurohkihla: Ong ni dahme wiewiawio, Mark kelehpw kilelehdi dahme Sises ketin wia ni eh mwahngihada mohngiong keptakai en kaunen pelien lamalam ko. (Md 12:13; Lu 6:10) Piter wia ohl emen me ahneki pepehm loal, ele ih me kawehwehda ire pisetik kan duwen sapwellimen Sises pepehm kan.—Kilang “Audepen Pwuhken Mark.”
Raparapahki Soahng Kesempwal kan Sang Mahsen en Koht
nwtsty-E mehn onop kan ong Mr 3:29
lahlahwe sapwellimen Koht manaman: Lahlahwe kin wehwehki kauwehla adamwahu, kamedekihala, de lokaia lemei ong Koht de ong soahng sarawi kan. Pwehki sapwellimen Koht manaman kin pwilisang reh, nsenkihda uhwong de pohnsehse mwomwen eh kin doadoahk kin duwehte lahlahwe Koht. Nin duwen me sansalda nan Md 12:24, 28 oh Mr 3:22, kaunen pelien lamalam en mehn Suhs kan kilang me sapwellimen Koht manaman kin doadoahk rehn Sises ni eh kin ketin wiahda manaman kapwuriamwei kan; ahpw, irail kin kose me manaman wet kohsang rehn Sehdan me Tepil.
dipeo pahn mihmi kohkohlahte: E mwomwen kin dokedoke dihp me emen nsenki wiahda me mie imwila me pahn poatopoat; sohte meirong ehu mie me kak pwainla soangen dihp wet.—Kilang mehn onop ong lahlahwe sapwellimen Koht manaman nan ire wet oh mehn onop ong Md 12:31, ire me pahrekiong iren Paipel wet.
Ke Kin “Dehdehkihla Pwuhk Sarawi”?
6 Dahme kitail kak sukuhlkihsang karasaras wet? Keieu, kitail anahne pohnese me kitail sohte kak kaunda ia uwen mwadang en tohnsukuhl en Paipel men kin kekeirda nan padahk mehlel. Mendahki kitail kin wia soahng koaros me kitail kak pwehn sewese tohnsukuhlo, kitail sohte pahn idingkihong en papidaisla. Ahpw, ni aktikitik, kitail pohnese me ih kelehpw me kak pilada ma e pahn inoukihong Koht eh mour. Siohwa ketin kupwurki atail poadidiong ih ihte ma kitail uhdahn poakohng ih.—Mel. 51:12; 54:6; 110:3.
7 Keriau, atail wehwehkihla mehn kasukuhl sang karasaras wet pahn sewese kitail en dehr nsensuwedla ma kitail sohte mwadang kilang lipwen atail doadoahk en kalohk. Kitail anahne kanengamah. (Seims 5:7, 8) Ma kitail wiahier soahng koaros me kitail kak pwehn sewese tohnsukuhlo ahpw padahk mehlel sohte kekeirda nan eh mohngiong, met sohte wehwehki me kitail sounpadahk kei me sehse kasukuhl. Siohwa ketin mweidohng wahn padahk mehlel en kekeirdahte nan mohngiong en me aktikitik kan me men wiahda wekidekla kan. (Mad. 13:23) Eri kitail en dehr kadeik uwen pweidahn doadoahk en kalohk sang ni uwen tohtohn aramas me papidaisla. Mwohn silangin Siohwa, pweidahn atail kalohk sohte kin kohsang mwomwen ahn aramas ar mwekidki atail padahk. Ahpw e kin ketin kesempwalki atail pwerisekiong kalohk.—Wadek Luk 10:17-20; 1 Korint 3:8.
8 Kesiluh, kitail sohte kak ahnsou koaros kilang wekidekla kan me wiawi nan mohngiong en emen. Karasepe, pwopwoud ehu me misineri men kin onop Paipel rehra padahkihong ih me ira men wiahla sounkalohk me saikinte papidais. E katamankihong ira me ira pahn anahne mahs uhdihsang simoak. E pwuriamweikihla ni ara padahkihong ih me ira uhdihsangehr simoak sounpwong kei samwalahro. Ira wehwehkihda me mehnda ma ira rukula oh simoak, Siohwa kak ketin mwahngih oh e ketin kalahdeki aramas mwalaun. Eri ira anahne wiahda pilipil ehu, ira pahn simoak mwohn misinerio de sohla simoak douluhl. Mendahki misinerio uhdahn sehse wekidekla laud me pwopwoudo wiahda, ara limpoak ong Siohwa wie kekeirda oh sewese ira en wiahda pilipil pwung.
April 30–May 6
SOAHNG KESEMPWAL KAN SANG MAHSEN EN KOHT | MARK 5-6
“Sises Sapwellimanki Manaman en Kaiasada Irail kan me Kitail Poakohng Mehla”
nwtsty-E mehn onop ong Mr 5:39
sohte mehla, ahpw e wie memeir: Nan Paipel, e kin kalapw kasalehda me mehla duwehte memeir. (Me 13:3; Soh 11:11-14; Wi 7:60; 1Ko 7:39; 15:51; 1De 4:13) Sises pahn ketin pwurehng kamourada serepeino sang mehla, eri ele e mahsanih met pwehki e pahn ketin kasalehda me duwehte aramas ar kak pirida sang meir kelik, irail kak pwurehng mourda sang mehla. Sapwellimen Sises manaman en kaiasada serepeino pwilisang rehn Semeo, “me kin ketin kamourada me melahr oh ketin mahsanihki soahng kan me sohte mie duwehte re mie.”—Ro 4:17, NW.
(Mark 5:42, NW) Oh ni ahnsowohte serepeino uhda oh tepida alialu. (E sounpar 12.) Ni ar kilang met, re ahpw sohla kak koledi arail pepehm pwehki ar inenen peren kowahlap.
jy-E 118 par. 6
Kisin Serepein Kis Pwurehng Mourda!
Dahme wiawihier mwowe ko, Sises ketin kehkehlikihong irail me e ketin kamwahwihala ko ren dehr ndaseli dahme e ketin wiahiongirailehr, oh e pil pwurehng ketin wia met ong pwopwoud wet. Ahpw, pwopwoudo perendao oh meteikan lohkiseli rohngo “wasao pwon.” (Madiu 9:26, NW) Ia duwe, ke sou pahn perenkihda oh koasoia met ma ke kilang emen me ke poakohng eh mourda sang mehla? Met iei keriaun kaiasada me Sises ketin wia me kileldi.
Raparapahki Soahng Kesempwal kan Sang Mahsen en Koht
nwtsty-E mehn onop ong Mr 5:19
ndaiong irail: Weksang Sises eh kin ketin kehkehlingki ren dehr ndaseli sapwellime manaman kapwuriamwei kan (Mr 1:44; 3:12; 7:36), e ketin kehkehlingkihong ohl menet en padahkihong kiseh kan dahme wiawihero. Ele Sises ketin wia met pwehki e alehdi pekipek ehu en ketiketla sang wasao oh e sohte kak pein kalohk ong irail; met pil pahn kauhdi koasoien uhwong sang mehlahn pwihk ko me kakete kalohkpeseng.
(Mark 6:11, NW) “Oh sohte lipilipil wasa ehu me sohte kasamwo kumwail de rong kumwail, ni amwail kohieisang wasao, sipedasang pwehl ni nehmwail kan pwe en wia kadehde ehu ong irail.”
nwtsty-E mehn onop ong Mr 6:11
sipedasang pwehl ni nehmwail kan: Mwekid wet wia kasalepen me tohnpadahk ko sohte pwukoahki imwila kan me pahn pwilisang rehn Koht. Koasoi me duwehte met pwarada nan Md 10:14; Lu 9:5. Mark oh Luk kapatahiong koasoi wet pwe en wia kadehde ehu ong [de, “uhwong”] irail. Pohl oh Parnapas kapwaiada kaweid wet nan Pisidia Andiok (Wi 13:51), oh ni Pohl eh wia soahngohte nan Korint ni eh siped eh likou kan, e kapatahiong koasoi sansal pwukat: “Kumwail me pwukoahki amwail mehla. I sohte pahn dipikihda.” (Wi 18:6, NW) Ele tohnpadahk ko ahnlahr kilang soangen mwekid wet; irail mehn Suhs poadidi kan me kin seiloaklahng sapwen liki kan kin sipedasang soahng kan me re medewe me samin ni arail suht kan mwohn ar kin pwurodohng nan sapwen mehn Suhs kan. Ahpw, e sansal me Sises sapwellimanki ehu wehwe tohrohr ni ahnsou me e ketikihong sapwellime tohnpadahk ko kaweid pwukat.