Iren Sawas kan ong Doaropwehn Kasukuhl ong Mihting en Mour oh Kalohk
November 5-11
SOAHNG KESEMPWAL KAN SANG MAHSEN EN KOHT | SOHN 20-21
“Ke Poakohng Ie Laudsang Mepwukat?”
nwtsty-E mehn onop kan ong Soh 21:15, 17
Sises ahpw mahsanihong Saimon Piter: Koasoakoasoipene wet nanpwungen Sises oh Piter wiawi mwurin Piter eh kahmahmkihla Sises pak silipak. Sises ketin keinemwe rehn Piter pak siluh duwen ia eh pepehm ong ih, lao “Piter ahpw nsensuwedkihla.” (Soh 21:17) Dahme Sohn kilelehdi nan Soh 21:15-17 doadoahngki lepin lokaiahn Krihs riau: a·ga·paʹo, me kawehwehdiong poakohng, oh phi·leʹo, me kawehwehdiong poakepoakei. Pak riau Sises ketin keinemwe rehn Piter: “Ke poakohng ie?” Pak riau pwukat, Piter uhdahn kamehlelehiong me e “poakepoakei” Sises. Eri, Sises ketin keinemwe: “Ke poakepoake ie?” Piter pil pwurehng kamehlelehiong me e poakepoake. Ehuehu ahnsou me Piter kin kamehlelehiong ih eh limpoak, Sises ketin kasalehda me soangen limpoak oh pepehm wet anahne kamwakid Piter en kamwenge oh “apwalih” sapwellimen Sises tohnpadahk kan, wasaht dokedoke sapwellime sihmpwul kan, de “kisin sihpw kan.” (Soh 21:16, 17; 1Pi 5:1-3) Sises ketin mweidohng Piter en kamehlelehla eh limpoak pak silipak, ih eri ketikihong Piter pwais en apwahpwalih sihpw kan. Ni ahl wet, Sises ketin kasalehda ni soh peikasal me e ketin mahkohng Piter eh kahmahmkihla ih pak silipak.
ke poakohng ie laudsang mepwukat?: Ni koasoandien lokaia, lokaia wet “laudsang mepwukat,” wehweh kak tohtohsang ehute. Ekei semen kan pwungki wehweo me nda “ke poakohng ie laudsang omw poakohng tohnpadahk teikat?” de “ke poakohng ie laudsang en tohnpadahk pwukat ar poakohng ie?” Ahpw, wehwe me pahn pwungo iei “ke poakohng ie laudsang mepwukat?” me iei, mwahmw ko me re koledi de soahng kan me pid pesines en laid. Kahrehda madamadau en iretikitiko mwomwen nda: ‘Ke poakohng ie laudsang kepwe kan de soahng kan me ke kin rapahki? Ma ei, eri kamwenge nei sihmpwul kan.’ Peidek wet pahn pwung pwehki en Piter mouren mahso. Mendahki Piter wia emen sapwellimen Sises tepin tohnpadahk kan (Soh 1:35-42), e sohte mwadangete doadoahngki pali laud en eh ahnsou pwehn idawehn Sises. Ahpw, e pwuralahng eh doadoahk en laid. Sounpwong kei mwuri, Sises ketin malipehsang Piter ni pesines laud wet pwe en wiahla “sounlaidih aramas.” (Md 4:18-20; Lu 5:1-11) Pil mwurinte Sises eh ketin pwoula, Piter ndaiong meteikan me e pahn kohla laid, oh wahnpoaron teikan iangada ih. (Soh 21:2, 3) Kahrehda e mwomwen me wasaht, Sises ketin kasalehiong Piter ni sansal anahnepen wiahda pilipil kesempwal ehu. Ia duwe, e pahn mwohneki mahs nan eh mour doadoahk en laid, me koasoakoasoak en mwahmw mwohrailo wia kilelepe, de e pahn keieu kesempwalki doadoahk en kamwenge sapwellimen Sises sihmpwul kan, de tohnpadahk kan?—Soh 21:4-8.
kesilipak: Piter kahmahmkihla eh Kaun pak silipak; Sises eri ketikihong ih ahnsou mwahu en kamehlelehla eh pepehm kan pak silipak. Ni Piter eh wia met, Sises ketin mahsanihong ih en kasalehda limpoak oh ahneki pepehm en limpoak laud sang ni eh mwohneki doadoahk en papah Koht sang soahng teikan koaros. Piter iangahki ohl teikan me ahneki pwukoa kan pahn kamwenge, kakehlaka, oh apwalih sapwellimen Krais pelin sihpw en tohnpadahk lelepek kan. Irail pwukat keidier ahpw re pil anahnehte iang tungutungoale padahk mehlel.—Lu 22:32.
Raparapahki Soahng Kesempwal kan Sang Mahsen en Koht
nwtsty-E mehn onop ong Soh 20:17
Pweisang ie mahs: Lepin lokaiahn Krihso haʹpto·mai kak wehwehki “en doahke” de “en pasehng; en kolokolete.” Ekei kawehwe kan kawehwehda sapwellimen Sises mahseno: “Dehr doahke ie.” Ahpw, Sises sohte ketin sapwungki Mery mehn Makdala en doahke ih, pwehki e sohte ketin sapwungki ni lih teikan me kilangada ih mwurin eh kaiasadao ar “koledi aluweluwe kan.” (Md 28:9) E mwomwen me Mery Makdala masak me Sises pahn ketidalahr nanleng. Pwehki eh uhdahn men mihmihte rehn eh Kaun, e koledi teng Sises oh sohte men kadarala ih. Pwehn ketin kamehlelehiong me e saik pahn ketidahla, Sises ketin kaweid Mery en pweisang ih, ahpw en kohla rehn sapwellime tohnpadahk kan oh pakairki rohngo me e ketin iasadahr.
nwtsty-E mehn onop ong Soh 20:28
Ei Kaun oh ei Koht!: Ni lokaiahn Krihs, “Kaun en ngehi oh Koht [ho the·osʹ] en ngehi!” Ekei semen kan kin medewehki koasoi wet nin duwen koasoi en pwuriamwei ong Sises ahpw ni mehlel e kohwong Koht, Semeo. Ekei nda me dene uhdahn lepin lokaiahn Krihso anahne lepin lokaia ko en kohwong Sises. Mendahki ma met mehlel, wehwehn lepin lokaia kan “ei Kaun oh ei Koht” pahn keieu wehwe mwahu nan wasa teikan koaros en Nting Sarawi kan. Pwehki dahme ntingdier kasalehda me Sises ketin ahpwtehn kadarowohng sapwellime tohnpadahk ko rohng wet, “I pahn patohdahla rehn Semei oh Samamwail, oh ei Koht oh amwail Koht,” eri sohte kahrepen kitail en kamehlele me Tomas medemedewe me Sises iei Koht me keieu manaman. (Pil kilang mehn onop ong Soh 20:17.) Tomas rongehr Sises eh ketin loulou ong ‘Semeo,’ oh patohwanohng “komwihte me Koht mehlel.” (Soh 17:1-3) Kahrehda Tomas ele likwerihki Sises “ei Koht” ong kahrepe pwukat: E wiahki Sises nin duwen “koht emen” ahpw kaidehn Koht me keieu manamano. (Kilang mehn onop ong Soh 1:1.) De ele e likweriong Sises nin duwen me sapwellimen Koht ladu kan kin wia ong sapwellimen Siohwa tohnleng sounkair kan, nin duwen me ntingdier nan Palien Paipel ni Lokaiahn Ipru. Tomas ese iren Paipel kan me emenemen, de ekei pak sounnting en Paipel en ire ko kin sapengki de koasoiahki tohnleng sounkair men likamwete tohnlengo me Siohwa Koht. (Pil kilang Sen 16:7-11, 13; 18:1-5, 22-33; 32:24-30; Sk 6:11-15; 13:20-22.) Eri, Tomas ele likwerihki Sises “ei Koht” ni ahlohte, ni eh pohnese me Sises iei wiliepen oh sounkair en Koht mehlelo.
Ekei akupwungki me ni lokaiahn Krihs, kadoadoahkpen lepin lokaia ehu (definite article) mwohn lepin lokaia kan ong “kaun” oh “koht” kasalehda me lepin lokaia pwukat kin dokedoke Koht me keieu manaman. Ahpw, nan ire wet, kadoadoahkpen lepin lokaia wet (definite article) ele kin kasalehdahte koasoandien lokaiahn Krihs. Mie ahnsou kan me lepin lokaia wet kin iang eden mehkot ahpw kin kadoadoahk nin duwen ahd ehu pwehn likwerih aramas. Met kak karasahda soangen kawehwe me kawehwehdi ehuehu lepin lokaia kan, duwehte nan Lu 12:32 (ni lokaiahn Krihs ong, “kisin pwihn sihpwo”), oh Kol 3:18–4:1 (lokaiahn Krihs ong, “lih pwopwoud ko”; “ohl pwopwoud ko”; “seri ko”; “pahpa ko”; “ladu ko”; “soumas ako”). Ni ahlohte, kawehwehpen 1Pi 3:7 kak mahsanih: “Ohl pwopwoud ko.” Kahrehda, kadoadoahkpen lepin lokaia wet (definite article) wasaht sohte nohn kesempwal pwehn wehwehki dahme Tomas medemedewe ni eh wiahda koasoi wet.
November 12-18
SOAHNG KESEMPWAL KAN SANG MAHSEN EN KOHT | WIEWIA 1-3
“Sapwellimen Koht Manaman Mwerediong Pohn Mwomwohdisohn Kristian”
w86-E 12/1 29 par. 4-5, 7
Sawas kan me Kin Kahrehiong Mohngiong Peren
Ni tepin rahn en kokoudahn mwomwohdisohn Kristian nan pahr 33, meh 3,000 me ahpwtehn papidaisla ko kin ‘ehupene, mwengepene oh pil kin kapakappene.’ Ong kahrepe mwahu dah? Pwe irail en kak kakairada arail pwoson me re ahpwtehn ahnekihda ni “arail poadidiongete ale padahk en wahnpoaron ko.”—Wi 2:41, 42.
Mehn Suhs akan oh irail me wekiong mehn Suhs koasoanehdi me re pahn kohdo Serusalem mihmi ongete ahnsoun Kasarawi en Pendekos. Ahpw irail me wialahr Kristian kei men mihmi werei oh sukusukuhlki ren kalaudehla arail pwoson me re ahpwtehn ahnekihda. Met kahrehda anahnepen mwenge oh wasahn pweidi ie. Ekei me kohdo ko sohte neirail mwohni me itar, ahpw ekei naineki me laud. Eri ong ahnsou kis re sawaskipene dahme arail oh nehkpeseng dipwisou ko ong irail me anahne kan.—Wi 2:43-47.
Netilahn sahpw oh ehukipene soahng koaros iei sawas kei sang rehn irail kan me pein men toukihda sawas. Sohte emen pwukoahki netkihla de sawaskihda mehkot; met kaidehn mehn kangoang ehu pwehn semwehmwehla. Ire wet sohte kasalehda me irail me kepwehpwe en netikihla arail kepwe koaros oh semwehmwehla. Ahpw pwehki arail poakohng iengarail me pwoson kan nan irair en ahnsowo, re netikihla arail kepwe kan oh sawaskihda mwohnio koaros pwehn sewese dahme anahn ong kalaudlahn doadoahk en Wehio.—Pil kilang 2 Korint 8:12-15.
Raparapahki Soahng Kesempwal kan Sang Mahsen en Koht
it-2 61 par. 1
Sises Krais
“Wiliepe Lapalap en mour.” Nin duwen kasalepen kadek sapan en Semeo, Krais Sises ketin meirongkihla sapwellime mour unsek. Met kahrehda sapwellimen Krais tohnpadahk me pilipilda kan oh Krais ren kak ehupene nan sapwellime kaunda nanleng oh pil kahrehda tohnsampah ren kak wiahla towe kan pahn kaundahn sapwellime Wehio. (Md 6:10; Soh 3:16; Ep 1:7; Ipr 2:5; kilang PWEINEN PWEIPWEI SAPAHL.) Ih eri ketin wiahla “Wiliepe Lapalap [“Nein Nanmwarki Pwutak,” KJ; JB] en mour” ong aramas koaros. (Wi 3:15) Lepin lokaiahn Krihs me kadoadoahk wasaht wehwehki, “kaun lapalap,” lepin lokaia ehu me duwehte lepin lokaia me kadoadoahk ong Moses (Wi 7:27, 35) nin duwen ‘kaun’ nan Israel.
cl-E 265 par. 14
Koht Emen me “Diren Mahk”
14 Sapwellimen Siohwa mahk pil kawehwehda nan Wiewia 3:19: “Eri, koluhla oh wiliakapwala pwe dipamwail kan en lapwada.” Imwin mahseno kawehwehda lepin lokaiahn Krihs ehu me kak wehwehki “en irihrsang, . . . kauhdi de kasohrehla.” Ong ekei semen kan, madamadauo kasalehda irisasang nting kan. Ia duwen met eh wiawi? Ink me re kin doadoahngki mahs kin wiawihkihda carbon, mehkot me pwilipwil, oh pihl. Mwurinte aramas kin doadoahngki ink wet, e kak ale lihmw wisekesek oh irisasang nting ko. Met kasalehda kilel kaselel ehu duwen sapwellimen Siohwa mahk kalahngan. Ni eh kin ketin mahkohng dipatail kan, e kin mwomwen me e ketin ale lihmw ehu oh irisasang.
November 19-25
SOAHNG KESEMPWAL KAN SANG MAHSEN EN KOHT | WIEWIA 4-5
“Irail Kalokalohki Mahsen en Koht ni Eimah”
w08-E 9/1 15, kakon
Sang Dahme Re Koasoia ong nan Nting Sarawi kan—Nting oh Tepin Kristian kan
Ia duwe, Wahnpoaron ko Sehse Wadawad de Nting?
Ni kaun akan oh ohl mah en Serusalem ar “kilang Piter oh Sohn ara kin eimah koasoi, oh re wehwehkihda me ira sohte iang sukuhl oh sohte wad, irail ahpw pwuriamweikihla.” (Wi 4:13) Ia duwe, wahnpoaron ko uhdahn sehse wadawad de nting? Me pid ire wet, ehu pwuhken kawehwehn Paipel (The New Interpreter’s Bible) koasoia: “Lepin lokaia pwukat sohte pahn uhdahn wehwehki me Piter [oh Sohn] sohte sukuhl oh sohte kak nting de wadawad. Irail ihte pohnese wekpeseng en pwihn en aramas akan nanpwungen irail me mwomwohd nan dewen kadeik oh wahnpoaron kan.”
Ire Kesempwal akan Sang nan Pwuhken Wiewia kan
4:13—Dahme kahrehda aramas akan kin nda me Piter oh Sohn “sohte iang wad oh pil sohte iang sukuhl”? Irail kin nda met pwehki Piter oh Sohn sohte iang sukuhl en sounpadahk kan ong kasukuhl en palien lamalam.
it-1-E 128 par. 3
Wahnpoaron
Doadoahk nan mwomwohdisohn Kristian. Mweredi en sapwellimen Koht manaman pohrail ni Pendekos uhdahn kakehlehda wahnpoaron ko. Tepin irelaud limau en Wiewiahn Wahnpoaron ko kadehdehda soh masepwehk en wahnpoaron ko oh arail eimah ni ar kalohkihda rongamwahwo oh iasadahn Sises mendahki re selidi, kamakam, oh kereniong kamakamala sang kaun akan. Nan erein rahn pwuko mwurin Pendekos, doadoahk kehlail en wahnpoaron ko me kohsang ni kehl en sapwellimen Koht manaman, imwikihla tohtohlahn tohn mwomwohdisohn Kristian ni ahl kapwuriamwei. (Wi 2:41; 4:4) Arail doadoahk en kalohk tepida wiawi nan Serusalem, mwurin mwo e lella nan Sameria oh kedekedeo lel ni irepen sampah.—Wi 5:42; 6:7; 8:5-17, 25; 1:8.
Raparapahki Soahng Kesempwal kan Sang Mahsen en Koht
it-1-E 514 par. 4
Takain pwukakeimw
Melkahka 118:22 kasalehda me takai me sounkou ihmw kan kesepwekelahr wialahr “moangen keimwo” (ni lokaiahn Ipru, roʼsh pin·nahʹ). Sises ketin mahsanih oh ketin doadoahngki kokohp wet ong pein ih nin duwen “takain pwukakeimw me keieu kesempwal” (ni lokaiahn Krihs, ke·pha·leʹ go·niʹas, moangen keimw). (Md 21:42; Mr 12:10, 11; Lu 20:17) Duwehte takain ihmw ehu me mi keieu powe oh kin sansal ong mesen aramas, ih duwen Sises eh ketin wia moangen takai en mwomwohdisohn Kristian en me keidi kan, me rasehng tehnpas sarawi en Koht. Piter pil doadoahngki Melkahka 118:22 ong Krais, ni eh kasalehda me Sises me “takaio” me aramas akan kesepwekehla ahpw Koht ketin pilada pwehn wiahla “moangen keimw.”—Wi 4:8-12; pil kilang 1Pi 2:4-7.
w13-E 3/1 15 par. 4
Piter oh Ananaias Likamw—Mehn Kasukuhl Dah Kitail Kak Sukuhlki?
Ananaias oh eh pwoudo netin sahpw pwehn ale mwohni oh sewese me ahpwtehn papidaisla kan. Ni Ananaias eh wahdo mwohni ko rehn wahnpoaron ko, e nda me ih uwen pweinen sahpwo koaros mwo. Ahpw kaidehn! Ekei mwohni ko e kolokol ong pein ih! Koht ketin mweidohng Piter en ese met, kahrehda Piter ndaiong Ananaias: “Ke wiadahr likamw, kaidehn ong aramas, pwe Koht.” Ananaias eri pwupwudihte mehla! Mpen awa siluh mwuri, eh pwoudo pedolong. Ni eh sohte ese dahme wiawihong eh pwoudo, e pil lokaia likamw oh pwupwudihte mehla.
November 26–December 2
SOAHNG KESEMPWAL KAN SANG MAHSEN EN KOHT | WIEWIA 6-8
“Mwomwohdisohn Kristian Kapw Lelohng Kasongosong”
bt-E 41 par. 17
“Se Anahne Peikiong Koht nin Duwen Kaun Emen, A Kaidehn Aramas”
17 Met mwomwohdiso kapwo pahn lelohng kahpwal ehu me tepida wiawi nanpwungarail me pahn ekisekis wiahla mehkot keper ong tohnmwomwohdiso. Dahieu mwo? Tohnpadahk tohto me papidaislahr mwemweitla Serusalem oh men kalaudehla arail sukuhl mwohn ar pahn pwurala ni imwarail kan. Tohnpadahk kan me kin kousoan nan Serusalem men kihda mwohni me pahn apwalih anahn ong mwenge oh soahng teikan. (Wiewia 2:44-46; 4:34-37) Ni ahnsowo, kahpwal ehu pwarada. “Ni arail kin nehkpeseng kanarail mwenge ehuehu rahn,” liohdi kan me kin lokaiahki lokaiahn Krihs ‘sohte kin epwel mwahu.’ (Wiewia 6:1) Ahpw, liohdi kan me kin lokaiahki lokaiahn Ipru kin epwel mwahu. Eri kahpwalo kin pidada lipilipilki aramas. Kahpwal wet wia ehu kahpwal me keieu keper me kak kahrehda liaktohrohr.
bt-E 42 par. 18
“Se Anahne Peikiong Koht nin Duwen Kaun Emen, A Kaidehn Aramas”
18 Wahnpoaron ko, me wia pwihn me kin apwalih mwomwohdisou me lalaudla, pohnese me e sohte pahn wia elen loalokong ong irail en ‘pwilikihdi mahsen en Koht pwe ren nehk mwenge ni tehpel kan.’ (Wiewia 6:2) Pwehn apwalihala kahpwal ko, irail koasoanehiong tohnpadahk ko ren rapahkihda ohl isimen “me diren sapwellimen Koht manaman oh erpit” me wahnpoaron ko kak idihada ong “anahn wet.” (Wiewia 6:3) Ohl koahiek kan anahn pwehki doadoahko sohte pidadahte nehkpeseng mwenge, ahpw pil pidada apwalih mwohni, pwainda kepwe kan, oh kilikilelehdi ni keneinei soahng kan. Eden ohl pilipildahr ko koaros eden mehn Krihs me ele kahrehda liohdi nsensuwedlahr ko pwungkin irail. Mwurin arail kapakapki pilipildahn ohl ako, wahnpoaron ko idihada ohl isimeno pwe ren apwalih “anahn wet.”
Raparapahki Soahng Kesempwal kan Sang Mahsen en Koht
bt-E 45 par. 2
Stipen—“Direkihla Kupwuramwahu oh Roson en Koht”
2 Mie mehkot kapwuriamwei pohn mesen Stipeno ni ahnsowo. Sounkopwung ko kilikilang ih oh kilangada me meseo “likamwete mesen tohnleng men.” (Wiewia 6:15) Tohnleng kan kin wahseli rohng sang rehn Siohwa Koht, eri mie kahrepen arail sohte pahn masepwehk, meleilei oh popohl. Pil duwehte Stipen—sounkopwung kan me direkihla kailok pil kak kilang met. Ia duwen eh kak meleilei?
bt-E 58 par. 16
Lohkiseli “Rongamwahu Duwen Sises”
16 Kristian akan rahnwet kin ahneki pwais kaselel en iang doadoahk me duwehte dahme Pilip kin wia. Re kin kalapw kak kalohki rongen Wehio ong irail kan me re kin tuhwong wasa sohte lipilipil, duwehte ni ahnsoun seiloak. Pak tohto, e kin sansal me kaidehn sapwungala ehu arail kin tuhwong aramas mohngiong mehlel men. Kitail pahn kasik me met uhdahn pahn wiawi, pwehki Paipel kasalehda ni sansal me tohnleng kan kin kaukaweid doadoahk en kalohk pwe rohngo en lel “wehi koaros oh keinek koaros oh lokaia koaros oh aramas koaros.” (Kaud. 14:6) Kaweid en tohnleng kan nan doadoahk en kalohk iei me Sises ketin kohpadahr. Nan sapwellime karasaras en wihd ko oh dihpw suwed ko, Sises ketin mahsanih me erein ahnsoun dolung—imwin koasoandi en mwehi wet—“soundolung kan iei tohnleng kan.” E pil ketin mahsanih me tohnleng pwukat pahn “kihsang mehkoaros me kin kahrehda dipekelekel oh aramas me kin wia me suwed nan sapwellime Wehi.” (Mad. 13:37-41) Ni ahnsowohte, tohnleng kan pahn kihpene irail me pahn sohsohki Wehin nanleng—oh mwuri “pokon kalaimwun” en “sihpw teikan”—me Siohwa ketin kupwurki kahredohng irail nan sapwellime pwihn.—Kaud. 7:9; Sohn 6:44, 65; 10:16.