MEHN ONOP 4

Kasalehda Iren Paipel kan ni Ahl Pwung

Madiu 22:41-45

DAHME KE PAHN WIA: Kaunopada madamadau en sounrongorong kan mwohn omw wadek ehu iren Paipel.

Medewe ia kahrepen omw pahn wadek iren Paipelo. Kasalehda ehuehu iren Paipel ni ahl ehu me pahn sewese sounrongorong kan ren kak kilang ire kesempwalo me ke men kasansalehda.

Tehk ireo pwon oh pil ire kan me mi limwah. Ma ke pahn kasalehda iren Paipel ehu oh ihs me koasoakoasoi de ihs me ntingihada pwuhken Paipelo, tehk mwahu me dahme ke pahn nda kin pwung.
Doadoahngki Paipel nin duwen Pwuhk ehu me ahneki manaman. Ni omw koasoakoasoiong aramas akan me kin kamehlele Koht, sewese irail en tehk Paipel nin duwen Mahsen en Koht, ni ahl wet ke kin kasalehda me dahme ke kin padahngki iei sapwellimen Koht madamadau.
Kamwakid sounrongorong kan en men wadek iren Paipel. Idek peidek ehu me iren Paipel pahn sapengala, koasoia kahpwal ehu me iren Paipelo pahn sapengala, de kasalehda ire mehlel ehu me iren Paipelo pahn sewese ren wehwehki.

Medewe dahme sounrongorong kan eseier duwen dahme ke pahn koasoia oh iren Paipelo. Kasalehda pil ehu iren Paipel me re kin ese ni ahl ehu me pahn kamwakid irail en men wadek, oh sewese irail en pwurehng medewe de wehwehkihla mwahu oaritik ehu de wehwehkihla ni ahl kapw ehu.