MEHN ONOP 1

Tepin Koasoi me Pahn Pweida Mwahu

Wiewia 17:22

DAHME KE PAHN WIA: Tepin omw koasoi anahne kamwakid sounrongorong kan, kasalehda ire me ke pahn koasoia, oh kasalehda ia kahrepen sounrongorong kan ar anahne ese ireo.

IA DUWEN OMW PAHN WIA MET:

Kamwakid Sounrongorong kan. Pilada ehu peidek, dahme uhdahn kin wiawi nan mouren aramas, rohng kan, de mehkot me sounrongorong kan pahn perenki rong.

Mwohn omw pahn wia met, medewe mwahu dahme sounrongorong kan kin men ese oh pwunodki oh wekidala omw tepin koasoio.
Kasalehda ire me ke pahn koasoia. Tehk kanahieng me omw tepin koasoi pahn wiahiong ireo oh kahrepen ireo en sansal ong sounrongorong kan.
Kasalehda kahrepen ireo eh kesempwal. Wekidohng dahme ke pahn koasoia ong dahme sounrongorong kan anahne. Irail pahn anahne wehwehki ni sansal ia duwen ireo eh kak sewese irail.

Ni omw kaukaunopada padahk ehu, pein idek rehmw, ‘Soangen irair dah kan me riei kan nan mwomwohdiso kin lelohng?’ Mwuri, wiahiong omw tepin koasoi en konehng arail anahn kan.