MEHN ONOP 13
Kasansalehda Kamwahupen Omw Padahko
Lepin Padahk 3:21
DAHME KE PAHN WIA: Sewese sounrongorong kan ren wehwehki ia duwen audepen padahko eh pahn kamwakid arail mour, oh kasalehiong irail dahme re pahn wiahiong dahme re sukuhlki.
IA DUWEN OMW PAHN WIA MET:
Medewe duwen sounrongorong kan. Doudouloale ia kahrepen sounrongorong kan anahne rong duwen ire kan me ke pahn ehukihong irail, oh medewe mehnia ire me pahn keieu sewese irail.
Erein omw wia padahko, kasalehiong sounrongorong kan dahme re pahn wia. Sangete nin tapio, emenemen sounrongorong anahne pohnese, ‘Met pidada ie.’ Ni omw kalaudehla ehuehu ire kesempwal, kasalehda ia duwen ren kapwaiada. Dehr koasoi ni oaralapte.