MEHN ONOP 6

Kawehwehda ni Sansal Kahrepen Omw Pahn Doadoahngki Ehu Iren Paipel

Sohn 10:33-36

DAHME KE PAHN WIA: Dehr ihte wadekala ehu iren Paipel kowe eri doula koasoia mehkot tohrohr. Kanahieng pwe sounrongorong kan en kilang ni sansal dokpenehn iren Paipel me ke wadeko oh ire kesempwal me ke koasoiao.

IA DUWEN OMW PAHN WIA MET:

Kasansalehda lepin lokaia kesempwal kan. Mwurin wadawadpen ehu iren Paipel, kasalehda lepin lokaia kan me pid ire kesempwalo. Ke kak wia met sang ni omw pahn kapwurehiong lepin lokaia ko, de kihda peidek ehu me pahn kahrehiong sounrongorong kan ren diarada lepin lokaia kesempwal kan.

Ma ke pahn doadoahngki lepin lokaia tohrohr pwehn pwurehng ndahla wehwehn iren Paipelo, kanahieng pwe sounrongorong kan en kak kilang ia duwen lepin lokaiahn iren Paipelo eh dokedoke ire kesempwal me ke koasoakoasoiao.
Kasansalehda ire kesempwal kan. Ma ke kasalehda iren Paipelo oh kawehwehda ni sansal kahrepen omw pahn wadek, eri kawehwehda ia duwen lepin lokaia kesempwal kan nan iren Paipelo ar utung kahrepeo.

Ni omw pahn koasoakoasoia iren Paipelo, pahkpesengte noumw Paipel. Met pahn sewese sounrongorong kan ren kadokepene lepin lokaia kan me ke doadoahngki ong iren Paipel me ke ahpwtehn wadeko.
Omw kawehwehda iren Paipelo en mengei en wehwehki. Dehr koasoia oaritik kan me sohte pid ire kesempwalo. Medewe duwen dahme sounrongorong kan eseier duwen ireo, oh pilada ire mehlel depe me anahn pwehn wiahiong ire kesempwalo en sansal oh wehwe ong sounrongorong kan.