Ahnsou Koaros Siohwa Kin Ketin Wia Dahme Pwung

“Siohwa kin ketin pwung ni mehkoaros me e kin ketin wia.”​—MELKAHKA 145:17, NW.

1. Dahme ke pahn wia ma aramas emen karaunlikamwih iuk, oh dahme kitail kak sukuhliki sang met?

MIE PAK aramas kin keinahkin uhk me ke sapwung, mwein ele kelikamwe ahmw mwekid de ahmw madamadau, ahpw aramaso sohte wehwehki soahng koaros me pid dahme e karaunehkin uhko? Ma iei, ele ke kin medek ki met. Pwehki met, kitail kak sukuhliki mehkot kesempwal: E wia elen erpit kitail en dehr mwadangete karaunehki mehkot aramas teio, ma kitail saikinte esehda soahng koaros duwen ireo.

2, 3. Dahme ekei aramas kin wia ni ahnsou me ire kan nan Paipel sohte kihda oaritik kan me itar pwehn pasapeng peidek kan koaros me re ahneki, oh dahme Paipel mahsanih duwen Siohwa?

² E pahn mwahu en tamataman ahnsou koaros ire wet ahpw mehlel ong mehkan me pid Siohwa Koht. Pwekihda? Pwehki mie soahng kei nan Paipel me tepin atail wadek e sohte pahn wehwe mwahu ong kitail. Soahng pwukat​—ele me pid sapwellimen Koht wiewiahn kaudok de me pid sapwellime irair en kopwung kan kawao​—me ele sohte kawehwehparail oaritik kan me kak sapengala atail peidek kan koaros. E kansensuwed pwe ekei aramas kin kihda lokaiahn uhwong kan me pid ire pwukat, oh pil kin peidek ma Koht me pwung oh kin toupahrek. Ahpw, Paipel kin padahkiong kitail me “Siohwa kin ketin pwung ni mehkoaros me e kin wia.” (Melkahka 145:17, NW) Sapwellime Mahsen kin pil kamehlelehiong kitail me e “sohte kin ketin kupwur sapahrek ong emen.” (Sohp 34:12; Melkahka 37:28) Kitail kak kilang ia mwomwen kupwure ni ahnsou me aramas teikan kin wiahda koasoi likamw akan duwen ih!

³ Kitail tehkpene ire limau me pahn sewese kitail en pwungki sapwellimen Siohwa elen kadeik kan. Oh sang ni ire pwukat, kitail pahn kasawih irair riau nan Paipel me ekei aramas pahn apwaliki wehwehki.

Dahme Kahrehda Kitail en Pwungki Sapwellimen Siohwa Kopwung kan?

4. Dahme kahrehda kitail en ahneki lamalam karakarahk ni atail pahn tehk sapwellimen Koht wiewia kan? Kihda karasaras.

⁴ Keieu, pwehki Siohwa mwahngih soahng koaros me pid ire kan ah kitail soh, kahrehda kitail anahne ahneki lamalam karakarahk ni atail kin tetehk sapwellimen Koht mwekid akan. Karasepe: Medewehla ma sounkopwung emen me kin ndandki ah doadoahk ah kin mwahu oh pwung pahrek oh ih eri kihda pwunglahn kopwung ehu. Ia omw madamadau ma aramas emen me sohte ese soahng koaros me pid dihpo de pil sehse kosonned ahpw tapiada kasapwunge ahn sounkopwungo ah madamadau ong dihpo? E pahn wia elen saloalokong ieu aramas emen en tenekihda dihp ehu ma e sohte tehkada soahng koaros me pid duwen dihpo. (Lepin Padahk 18:13) Ia uwen ah pil pahn wia elen pweipwei aramas en kasohwe wiewiahn “Sounkopwungpen sampah pwon”!​—Senesis 18:25.

5. Dahme kitail en dehpa manokehla ni atail wadek wiewia kan nan Paipel me pid sapwellimen Koht kadeik kan ong emen emen aramas akan?

⁵ Keriau en kahrepe kitail en pwungki sapwellimen Koht kopwung kan pwehki e weksang kopwung en aramas, pwe Koht kin ketin mwahngih dahme mih nan mohngiong en aramas akan. (1 Samuel 16:7) Sapwellime Mahsen mahsanih: “Ngehi, Siohwa, I kin rapahki nan mohngiong, kasakasawih nan mwidihlihk kan, pil pwainohng emen emen ni duwen ele kan.” (Seremaia 17:10, NW) Kahrehda, nin doken atail kin wadek wiewia kan nan Paipel me pid duwen sapwellimen Koht kadeik de kopwung ong aramas akan, kitail en dehpahno manokehla me E kin ketin ireirong mehkoaros lelohng madamadau rir akan oh pilahn akan me rir me pil sohte kin koasoipe mie nan sapwellime Mahsen.​—⁠1 Kronikel 28:9.

6, 7. (a) Iaduwen Siohwa a ketin kasalehda me E kin ketin tengediong sapwellime elen pwung oh tenek pahrek, mendahki ma e apwal de e pahn anahne meirongkihla mehkot? (b) Dahme kitail en tamataman ma kitail wadek mehkot nan Paipel me kitail sohte nohn kamehlele ma Koht wia dahme pwung oh pahrek?

⁶ Pil tehk kahrepe kesiluh me kitail en pwungki sapwellimen Siohwa kopwung kan: E kin ketin tengediong sapwellime elen pwung oh tenek pahrek, mendahki ma e apwal de e pahn anahne meirongkihla mehkot. Karasepe: Ni ah ketikihda sapwellime ohl pwehn wia tomw pwehn doarehla aramas akan me kin peik sang ni diparail oh sang mehla, Siohwa kin kasalehda ni pwung sapwellime irair akan en kopwung pahrek oh wiewia mwahu. (Rom 5:18, 19) Ahpw, ni ah mahmahsanih sapwellime ohl kompoak ah kin lokolok oh matala pohn tuhkehn kalokoloko, met uhdahn kihong Siohwa Koht en sapwellimaniki medek laud. Dahme met kin padahkiong kitail duwen Koht? Paipel mahsanih duwen “tomw me Sises Krais ketikihda”: “Met pwehki en kasalehda sapwellimen Koht irair en pwung.” (Rom 3:24-​26, NW) Ehu kawehwehn Rom 3:25 mahsanih: “Met kasalehdahr me Koht kin ahnsou koaros ketin wia dahme pwung oh pahrek.” (New Century Version) Ei, sang ni sapwellimen Siohwa kupwur ngoang me E ketin wia ni ah ketikihda tomw en dihp kin wia kasalepen me Ih me keieu sapwellimaniki “dahme pwung oh nehne pahrek.”

⁷ Kahrehda, ma kitail kin wadek mehkot nan Paipel me kitail sohte nohn kamehlele ma Koht wia dahme pwung oh pahrek, kitail en tamanda met: Pwehki E kin ketin lelepekiong sapwellime koasoandi kan me pid pwung oh kopwung pahrek, Siohwa sohte ketin kapweiekasang sapwellime ohlo sang ah pahn lelohng mehla kamedek. Iaduwe​—⁠E kak ketin kasapwungehla koasoandi teikan? Ni mehlel, Siohwa sohte pak ehu ketin kasapwungehla sapwellime irair en pwung oh mehlel. Kahrehda, e inenen konehng kitail en kamehlele me ahnsou koaros E pahn ketin wia dahme pwung oh pahrek.​—Sohp 37:23.

8. Dahme kahrehda e sohte wia irair en pwung pahrek ieu en medemedewe me Siohwa sohte sapwellimaniki irair en pwung oh tenek pahrek?

⁸ Pil tehk kapahieu en kahrepe me kitail en pwungki sapwellimen Siohwa kopwung kan: Siohwa ketin wiahda aramas rasehng ih. (Senesis 1:27) Kahrehda, aramas alehier irair akan me rasehng irair kan me Koht sapwellimaniki, me iangahki irair en kopwung pwung. E sohte wia irair en pwung pahrek en medemedewe me Siohwa sohte sapwellimaniki irair en pwung oh tenek pahrek. Ma kitail apwaliki wehwehki koasoi pwoat de poadoapoad ehu nan Paipel, kitail anahne tamataman me met pwehki dihp me kitail sohsohki, oh pil koahiek me mih rehtail en kak ese dahme pwung oh pahrek kin sohte unsek. Siohwa Koht, me kitail kin rasehng Ih, me sapwellimaniki irair unsek ni kupwur pahrek oh pwung. (Deuderonomi 32:4) E pahn kemenkouruhr ma kitail pahn lemehiong me aramas kak ahneki irair en pwung pahrek laud sang Koht!​—Rom 3:4, 5; 9:14.

9, 10. Dahme kahrehda Siohwa sohte pwukoahki kawehwe de pil song en kehsehki aramas dahme kahrehda E ketin wiahki mehkan ong aramas?

⁹ Kahrepe kelimau me kitail en pwungki sapwellimen Siohwa kopwung kan iei pwehki Ih me “ileile sang mehkoaros nan sampah.” (Melkahka 83:18, NW) Pwehki met, E sohte ketin sapwellimaniki pwukoa en kawehwe de pil song en kehsehki aramas dahme kahrehda E ketin wiahki mehkan ong aramas. Ih me Sounwia Dahl Lapalap, oh kitail kin duwehte pwehl en wia dahl me kin wiawihda ohng soangen mwomwen dahl akan, ni soangsoangen mwohmw me E ketin kupwurki wiahda. (Rom 9:19-​21) Ihs kitail​—dahl akan sang ni wiepen lime​—pwe kitail en peidek ki sapwellime pilipil de pil sapwellime wiewia kan? Ni ahnsou me samatail kahlap Sohp sohte wehwehki sapwellimen Koht mwekid akan ong aramas, Siohwa ketin kapwung ih ni eh mahsanih: “Ke songosong kadehdehda me ngehi me sapwung​—⁠ke wiahki me ngehi me sapwung oh kowe me pwung?” Ni ahnsou me Sohp diaradahr me e sapwung ah madamadau, mwuri e koluhla. (Sohp 40:8; 42:6) Kitail en dehpa sapwungala oh soahng en rapahki sapwellimen Koht sapwung!

¹⁰ E sansal me mie kahrepe mwahu kan me kahrehda kitail en kamehlele me ahnsou koaros Siohwa kin ketin wia dahme pwung. Sang ni poahsoan en wehwe wet ohng dahme Siohwa kin wia, kitail kak tehkpene irair riau nan Paipel me ekei aramas kin sohte wehwehki mwahu. Keieu me pidada wiewiahn tohnkaudok en Koht emen, oh meteio kin pidada kadeik me pein Koht ketikihda.

Dahme Kahrehda Lohd Ndahki me E Pahn Kihong Nah Serepein akan Rehn Aramas Suwed oko?

11, 12. (a) Kasalehda dahme wiawi ni ahnsou me Koht poaronehla tohnleng riemen nan Sodom. (b) Mehnia peidek kan me koasoipen wasaht kihong nan madamadau en ekei aramas?

¹¹ Nan Senesis irelaud 19, kitail wadek dahme wiawi nin doken Koht ah ketin poaronehla tohnleng riemen me wiahla mwomwen aramas akan en kohlahng Sodom. Lohd eri ngidingidkihong aramas en keiru ko en pweidi ni imweo. Ahpw, ni pwongo, pwihn en ohl suwed ekei sang nan kahnimwo kapilpene ihmwo oh wie ngidingidiki ohlen keiru ko en kohiei ohng irail pwe ren wiahiong ira tiahk suwed kanamenek kan. Lohd song en koasoiong irail ahpw ohl suwed oko kahng rong. Lohd koasoia pwe en doare mour en ira mehn keiru ko: “Menlau, riei kan, kumwail dehr wia mehkot suwed. Iet, mie nei serepein riemen me meipwon. I pahn kihong kumwail pwe kumwail en wiahiong ira nsenamwail. Ahpw, I peki rehmwail, kumwail dehpa wiahiong ohl pwukat mehkot, pwehki iei me kahrehda ira mihmi pahn ririn oasen imweiet.” Ahpw, pwihn en ohl suwed oko sohte men rong oh irail kereniong dapengpeseng wenihmwo. Ni imwio, tohnleng ko eri karotongehla mesen irail ohl suwed ko oh irail eri sohla kak diar wehnimwo.​—Senesis 19:1-​11.

¹² Mehlel, dahme wiawi nan poadoapoad wet kin kahrehda peidek kan nan madamadau en ekei aramas. Irail wahpwonki: ‘Dahme kahrehda Lohd men perehki kamwahupen aramas en kohdo ko oh ih eri nda me nah serepein ko en kohwong rehn pwihn en ohl suwed akan? E soh wia mehkot sapwung, de e soh pil masapwehk?’ Ni atail kilang ireo, dahme kahrehda Koht ketin kamwekid Piter en kahdaneki Lohd “ohl pwung men”? Koht kupwurki ahn Lohd mwekid? (2 Piter 2:7, 8) Kitail en tehk mwahu ire wet pwe kitail en dehr ahneki madamadau sapwung.

13, 14. (a) Dahme kitail en tehk kanahieng me pid wiewiahn Lohd nan Paipel? (b) Dahme kasalehda me dahme Lohd wia kaidehn wiewiahn aramas masepwehk men?

¹³ Keieu, kitail en tehk me ahn Lohd mwekid, wasaht sohte kasalehda me e pwung de e sapwung, ahpw Paipel kin kasalehdahte dahme wiawi. Oh pil, Paipel sohte kin kasalehda dahme Lohd medemedewe de pil dahme poahsoanehda dahme e wia. Ni ah pahn pwurehng mourda ni ahnsoun “iasadahn . . . irail me pwung,” mwein e pahn kasalehda duwen oaritik kan.​—Wiewia 24:15.

¹⁴ Lohd kaidehn aramas masepwehk emen. E mih nan apwal nan irairo. Ni ah nda me aramas en keiru ko “mihmi pahn riren oasen imweiet,” Lohd kasalehda duwen ah pepehm me e pahn doare ara mour oh kihong ira wasahn ruk. Ahpw, met sohte pahn mengei. Soupoad en Suhs me ede Josephus ripohtki me irail mehn Sodom akan kin “wia tiahk samin ong ohl akan, oh kin lahlahwe Koht . . . Irail kin kailongki aramas en wasa doh kan, oh kin wiahiong irail dipen Sodom.” Ahpw, Lohd sohte kin rempwidihsang irail pwihn en ohl suwed oko. Weksang met, e pidoilahng rehrail oh koasoiong ohl lemei pwukat. Ni ahnsou e pidoi sang imweo, e pil “ritingedi wenihmwo.”​—Senesis 19:6.

15. Dahme kasalehda me ahn Lohd mwekid mwein ele poahsoanda pohn pwoson?

¹⁵ Ekei pil kin idek, nda: ‘Ahpw, dahme kahrehda Lohd toukihda nah serepein ko ong aramas suwed oko?’ Kitail en dehr mwadang medemedewe me e ahneki lamalam suwed, ahpw kitail soh tehk ma mie soahng teikan nan ah madamadau? Keieu, ele Lohd wia met sang nan ah pwoson. Ia mwomwe? Ele Lohd wehwehki duwen Siohwa ah ketin pere Sara, en Eipraam ah pwoud (Lohd nein rien Eipraam). Kitail kak tamanda me Sara inenen masamwahu, kahrehda Eipraam ndaiong Sara en nda me ih rien Eipraam, pwe aramas akan dehr kemehkihla Eipraam pwe en adihada Sara.a Mwurin mwo, Parao ale Sara oh wahla nan tehnpaso pwehn pekeiki. Siohwa eri mwadangete sewese Sara pwe Parao en dehr kasaminehla ih. (Senesis 12:11-​20) E kakete me Lohd pwoson me Siohwa pahn pere nah serepein riemeno ni soangen ahl me kereniong duwehte me Siohwa ketin wiahiong Sara. E sansal me sapwellimen Siohwa tohnleng kan me doareirailla, oh serepein ko eri pitida.

16, 17. (a) Ni ahl dah me Lohd song en kapwuriamwei de kapingada madamadau en ohlen Sodom kan? (b) Sohte lipilipil dahme Lohd medemedewe, dahme kitail kak kamehlele?

¹⁶ Medemedewe pil ehu ahl. Mwein Lohd kihda nah serepein kan pwe en songen kapwuriamwei oh kapingada madamadau en ohlen Sodom kan. Ele e kamehlele me irail sohte pahn mwahuki nah serepein oko pwehki irail mehn Sodom kan kin mwahuki ohl. (Sud 7) Kapataiong met, nah serepein riemen inou en pwopwoud ong ohl riemen en nan kahnimwo, kahrehda ara peneinei, kompoakepahra kan, oh iengera soun pisnis kan kakete iang mihmihseli nan pokono. (Senesis 19:14) Lohd kakete kehliki me pwehki met, mie ohl akan nan pokono me pahn uhwong dahme Lohd ndahng irail. Pokono kakete pwalpeseng oh uhpene oh solahr nohn kehlail.b

¹⁷ Sohte lipilipil dahme Lohd medemedewe, kitail kak kamehlele me: Pwehki ahnsou koaros Siohwa kin ketin wia dahme pwung, e uhdahn mie ahn Lohd madamadau pwung me nin duwen “ohl pwung men.” Oh sang ni atail tehk duwen mwekid en ohl suwed oko, mie mehkot me pahn kahrehiong atail en kalikemwe me e pwung Siohwa ah ketin kadeikada tohn kahnimw suwedo?​—Senesis 19:23-​25.

Dahme Kahrehda Siohwa Kemehkihla Ussa?

18. (a) Dahme wiawi ni ahnsou me Depit song en wahdo Kohpwahn Inowo nan Serusalem? (b) Soangen peidek dah me wiewia wet kapwarehda?

¹⁸ Ehu wiewia me kakete wia mehn kapwonopwon ong ekei aramas iei me pidada ahnsou me Depit song en wahdo Kohpwahn Inou nan Serusalem. Kohpwahn Inowo kohieng pohn kuruma ieu, me Ussa oh rie pwutako kahluwa. Paipel kin kasalehda me: “Ni ar lel ni en Nakon eh wasahn kamwakelehsang dipwen wahntuhke kan, kouwol ko ahpw dipekelekel. Ussa eri kapahla peho pwe en kolada Kohpwao. Ni ahnsowohte engieng en Kauno [“Siohwa,” NW] Koht ahpw lelohng Ussa oh kemehla pwehki eh sohte wauneki Kohpwao. Ussa eri mehla wasao limwahn Kohpwahn Inowo.” Sounpwong kei mwuri, keriau en posongosong pil wiawihier oh pweida ni ahnsou me Kohpwao wisikida ni mwohmw me Koht ketin koasoanehdi en wiawi, ni arail mehn Kohad en Lipai kan kapaik pohn pwopwerail akan. (2 Samuel 6:6, 7; Nempe 4:15; 7:9; 1 Kronikel 15:1-​14) Ekei aramas kak peidek: ‘Dahme kahrehda Siohwa ketin wiahki mwekid kehlail ieu? Pwe Ussa ihte me e wia​—⁠e song en pere Kohpwahn Inou.’ Pwe kitail en dehr ahneki madamadau sapwung, e pahn mwahu kitail en tehk kanahieng ekei oaritik kan me pahn wia mehn sawas.

19. Dahme kahrehda kitail ese me Siohwa sohte kak wiahda mehkot sapwung oh E sohte kak wia mehkot me pahn tenek sapahrek?

¹⁹ Kitail anahne tamataman me Siohwa sohte kak wiahda mehkot sapwung oh E sohte kak wia mehkot me pahn tenek sapahrek. (Sohp 34:10) Ma E pahn ketin wiahda sapwung eri E pahn mih ni elen sempoak, oh kitail esehier sang ni atail sukuhliki Paipel me “Koht iei limpoak.” (1 Sohn 4:8) Kapatahiong met, iren Pwuhk Sarawi kan padahkiong kitail me “sapwellimen Koht kaunda kin poahsoankihda pwung oh kopwung pahrek.” (Melkahka 89:14, NW) Eri, ia pahn duwen Siohwa a pahn ketin wia mehkot me sapwung? Ma E pahn ketin wiahda sapwung, E pahn ketin kamwamwahlihala utupen sapwellime kaunda lapalap en lahng oh sampah.

20. Ia kahrepe kan Ussa uhdahn pahn esehki kosonned akan me pid Kohpwahn Inowo?

²⁰ Tamataman me Ussa uhdahn pahn esehki Kosonned en Siohwa. Kohpwahn Inowo kin weliwelian Siohwa. Kosonnedo ketihtihki me ekeite aramas ahneki mweimwei en doake Kohpwahn Inowo, oh Kosonnedo kin kadehdehda mwahu me aramas emen me pahn kasapwungehla pahn ale kalokepen kamakamala. (Nempe 4:18-​20; 7:89) Kahrehda, kamwekidahn Kohpwao wia doadoahk kesempwal ieu. E sansal me Ussa mehn Lipai men​—⁠ahpw kaidehn samworo men​—⁠kahrehda e pahn wehwehki audepen Kosonnedo. Likin met, sounpahr kei mwowe Kohpwahn Inowo wisiklahng nekinek nan imwen ah pahpa. (1 Samuel 6:⁠20–​7:1) Kohpwahn Inowo mihmi wasao erein sounpahr 70, lao lel ahnsou me Depit lemehda en kamwekid sang wasao. Kahrehda, sangete ni ah seri, Ussa uhdahn pahn esehki kosonned akan me pid Kohpwahn Inowo.

21. Me pid Ussa, dahme kahrehda e kesempwal kitail en tamataman me Siohwa kin ketin mwahngih dahme mih nan mohngiong en aramas akan?

²¹ Nin duwen ah kawehwehdahr mwowe, Siohwa kin ketin mwahngih dahme mih nan mohngiong en aramas akan. Pwehki sapwellime Mahsen padahkiong kitail me dahme Ussa wia kasalehda me e “sohte wauneki Kohpwao,” Siohwa kak mwahngih madamadau en roporop me koasoipe sohte pwarada wasaht. Ussa soh wia ohl pohnmwahso men, me kin kalap kauwehla kaweid akan? (Lepin Padahk 11:2) Kaidehn pwehki ih me kahluwa wisiklahn Kohpwao me ih oh ah peneinei nekinekidkiher ahnsou werei kihong ih madamadau en aklapalap? (Lepin Padahk 8:13) Ussa kin wia aramas emen me sohte ah pwoson oh medemedewe me limen Siohwa sohte pahn kak pein pere Kohpwao me kin wia weliepe? Sohte lipilipil dahme uhdahn mehlel, kitail kak koapworopworki me Siohwa ketin wia dahme pwung. Siohwa mwahngih mehkot nan ahn Ussa mohngiong me kahrehiong Ih en ketikihda kadeik karuwaru wet.​—Lepin Padahk 21:2.

Kahrepe Mwahu Kitail en Ahneki Koapworopwor

22. Iaduwen sapwellimen Siohwa erpit kin sansal nan sapwellime Mahsen ni ahnsou me ekei oaritik kan sohte kin pwarada?

²² Sapwellimen Siohwa erpit me sohte mehkot kak pahrekiong kin sansalki nan sapwellime Mahsen pwe ekei pak oaritik kan sohte kin pwarada. Ni ahl wet, Siohwa kin ketikihong kitail ahnsou mwahu kan en kasalehda atail likih Ih. Sang ni mehkan me kitail tehkpene nan artikel wet, e soh kin kasalehiong kitail ni sansal kahrepe kan me kahrehda kitail en pwungki sapwellimen Siohwa kopwung kan oh elen kadeik kan? Ei, ni atail sukuhliki Mahsen en Koht sang nan mohngiong mehlel oh madamadau saledek, kitail kin sukuhliki soahng tohto duwen Siohwa oh wehwehkihda me ahnsou koaros E kin ketin wia dahme pwung. Kahrehda, ma ekei wasa nan Paipel kahrehda peidek kan en pwarada me kitail sohte kak wehwehki mwahu, kitail en ahneki koapworopwor unsek me Siohwa kin ketin wia dahme pwung.

23. Soangen koapworopwor dah me kitail kak ahneki me pid sapwellimen Siohwa wiewia kan ong ni ahnsou kohkohdo?

²³ Ni mwomwohte, kitail en pil likih sapwellimen Siohwa wiewia kan me pahn kohdo. Kahrehda, kitail en koapworopworki me ni ahnsou me E pahn ketikihda kadeik nan Kahn Kamakam Kowahlap me pahn wiawi ni ahnsou kohkohdo, Siohwa sohte pahn “kamwomwala irail me pwung kan iangahki me suwed akan.” (Senesis 18:23, NW) Sapwellime limpoak ong dahme pwung oh tenek pahrek sohte pahn mweidohng Ih en wia met. Kitail kak ahneki koapworopwor unsek me nan sampah kapw, Siohwa pahn ketin kaitarala atail anahn akan koaros ni ahl me keieu mwahu.​—Melkahka 145:⁠16.

[Nting tikitik me mi pahs]

Ke Tamataman?

• Ia kahrepe kan me kitail en pwungki sapwellimen Siohwa kopwung kan?

• Dahme kak sewese kitail en pere pwe kitail dehpahno ahnekihda madamadau sapwung ong ahn Lohd a kihda nah serepein riemeno ohng pwihn en ohl suwed oko?

• Soahng dah kan me kak sewese kitail en wehwehki kahrepen Siohwa ah ketin kemehla Ussa?

• Koapworopwor dah me kitail en ahneki me pid sapwellimen Siohwa wiewia kan ong ahnsou kohkohdo?