Ahn Lod Pwoud Sohpeila Mwuhri

LOD oh ah peneinei iang Apram kousoandi nan sahpwen Kenaan. Ehu rahn Apram eri padahkiong Lod: ‘Sohte itar sahpw wasaht ong neita mahn akan. Kita pahn mweipesang. Ma ke pahn kohla paliet, I pahn kohla pali teio.’

Lod ahpw kilang sahpwo. E kilangada wasakis me inenen kasehlel me diren pihl oh reh mwahu ong nah mahn akan. Met wasa me adaneki Wehin Sordan. Ihme Lod oh ah peneinei iangahki nah mahn ko kohieila wasao. Mwuhri ekis irail kousoanla nan kahnihmwo me adaneki Sodom.

Aramas kan nan Sodom me inenen suwed. Met kahreong Lod en insensuwed, pwehki ih ohl mwahu men. Koht pil sapwungki wiewia kan en mehn Sodom. Koht eri poaronehla tohnleng riemen pwen kairehki Lod me e pahn kawehla kahnihmw en Sodom oh kahnihmw limwah Komorrah, pwehki arail suwed.

Tohnleng ko eri padahkiong Lod: ‘Pitipit! Alehda ahmw pwoud oh noumw serepein riemen ko oh pidoi sang wasaht!’ Lod oh ah peneinei ekis pwand ni arail mwesel, ihme tohnleng ko pein koledi pehrail oh kahrehla irail sang kahnihmwo. Emen tohnleng ko ahpw padahkiong irail: ‘Tang en mour! Dehr kilangala mwuhri. Tangwong nan nahna, pwe kumwail en dehr iang kamakamala.’

Lod oh nah serepein ko peikiong oh tangwei sang Sodom. Re sohte uhdi kisin ansou, re pil sohte kilangala mwuhri. Ahpw ahn Lod pwoud sapeik. Mwehrin arail tangwei ekis sang Sodom, liho uhdi oh kilangala mwuhri. Ihme ahn Lod pwoudo uhd wiahla uren soahl. Ke kak kilang ih nan kilel wet?

Kitail kak sukuhliki padahk mwahu sang met. E kasaleong kitail me Koht kin kamourala irail kan koaros me peikiong ih, ahpw koaros me sapeik pahn kamakamala.