Iren Sawas kan ong Doaropwehn Kasukuhl ong Mihting en Mour oh Kalohk
MAY 2-8
SOAHNG KESEMPWAL KAN SANG MAHSEN EN KOHT | 1 SAMUEL 27-29
“En Depit Koasoandi ong Mahwen”
it-1 41
Akis
Ni ahnsou me Depit tangasang Sohl, pak riau e rukula nan sapwen Nanmwarki Akis. Ni keieun ahnsowo, ni ahnsou me re medewe me Depit wia imwintihti men, Depit ahpw mwomwehda sahliella, oh Akis wiahki ih aramas sahliel men oh mweidohng en kohkohla. (1Sa 21:10-15; Me 34; 56) Ni keriaun ahnsou me Depit pwurala, sounpei 600 oh ar peneinei kan iangih, eri Akis koasoanehdi ren kousoan nan Siklak. Erein sounpar ehu oh sounpwong pahieu me re mihmihki wasao, Akis kamehlele me en Depit pwihno kin kulih kisin kahnimw en Sudia kan, ahpw ni mehlel Depit kin kulih mehn Kesur, mehn Kirsi oh mehn Amalek kan. (1Sa 27:1-12) En Depit widingo uhdahn pweida me kahrehda Akis wiahkihla ih pein nah sounsilasil men ni ahnsou me mehn Pilisdia kan koasoakoasoane ren mahweniong Nanmwarki Sohl, ahpw mwohnte mahweno, “nanmwarki” teikan en mehn Pilisdia kan ngihtehtehki Depit oh nah ohl ako ren pwurala Siklak. (1Sa 28:2; 29:1-11) Ni ahnsou me Depit wiahla nanmwarki oh mahweniong Kahd, e sansal me Akis sohte kamakamala. Akis momour lao lel ni kaundahn Solomon.—1Na 2:39-41; kilang GATH.
Mwahnakapw kan—Ia Duwen Meteikan Ar Kak Likih Iuk?
8 Pil medewehla ehu kahpwal me Depit lelohng. Mwurin Samuel eh keiehdi Depit en wiahla nanmwarki, Depit anahne awih sounpar tohto mwohn eh tepida kaunda nin duwen nanmwarki en Suda. (1 Sam. 16:13; 2 Sam. 2:3, 4) Erein ahnsowo, dahme sewese ih en kanengamah oh awih? E sohte uhdahn mworusala ahpw e doadoahngki eh ahnsou pwehn wia dahme e kak wia. Karasepe, ni eh rukurukseli nan Pilisdia, Depit isaneki ahnsowo pwehn peiong en mehn Israel ko imwintihti kan. Ni eh kin wia met, e kin pere idin sapwen wehin Suda.—1 Sam. 27:1-12.
it-2 245 par. 6
Likamw
Mendahki Paipel kin sapwungki wiahda likamw, met sohte wehwehki me aramas emen pwukoahki kasalehda ire mehlel kan ong aramas akan me sohte warohng ese. Sises Krais ketin kaweidki: “Kumwail dehr kihong kidi kan mehkot sarawi de pil kesehdiong mwohn pwihk noumwail perl kan, pwe re de tiakpeseng oh sohpeiong kumwail oh tehrkumwailpeseng.” (Md 7:6) Ihme kahrehda, ekei pak Sises sohte kin ketikihda ekei ire kan de uhdahn sapengala ekei peidek kan, pwe ni eh wia met e pahn kakete keper ong meteikan. (Md 15:1-6; 21:23-27; Soh 7:3-10) Kitail anahne kilengwohng met duwehte me Eipraam, Aisek, Reap oh Elaisa wia, ni ar sohte ndahla ire kan me uhdahn pwung de ni ar koledihsang irail akan me sohte kin kaudokiong Siohwa ire mehlel koaros.—Sen 12:10-19; ire 20; 26:1-10; Sos 2:1-6; Sei 2:25; 2Na 6:11-23.
Ire Kesempwal kan
Me Melahr akan Kak Sewese me Momour kan?
Nna medewehla. Paipel mahsanih me ni ahnsou me aramas mehla, “ar koasoandi kan kin imwisekla.” (Melkahka 146:4) Sohl oh Samuel koaros ese me Koht ketin keinepwihsang irail en tuhwong sounkapwour eni kan. Mwohn mwo, Sohl tiengla mwowe en kihsang tiahk en wunahni nan sahpwo.—Lipai 19:31.
Medewe duwen ireo. Ia duwe, ma ohl lelepek Samuel momourte nin duwen ngehn emen, e pahn kauwehla sapwellimen Koht kosonned oh ehuiong sounkapwour enio pwehn tuhwong Sohl? Siohwa solahr kupwurki mahseniong Sohl. Eri ia duwe, sounkapwour eni men kak iding Koht Wasa Lapalahpie en mahseniong Sohl ni eh ketin doadoahngki Samuel me melahr? Soh. Sansal me ape wet me mwomwen Samuel kaidehn uhdahn sapwellimen Koht soukohp lelepeko. Ih ngehn saut men me mwomwehda wia Samuel me melahr.
MAY 9-15
SOAHNG KESEMPWAL KAN SANG MAHSEN EN KOHT | 1 SAMUEL 30-31
“Kakehlakahkihda Pein Kowe Siohwa Omw Koht”
Lemmwiki Siohwa—Wie Pereperen!
12 Ahn Depit lemmwiki Siohwa sohte kin ihte irehsang ih wia dihp. E pil kin kakehlail ih en wiahda pilipil ni soh peikasal oh erpit nan irair apwal akan. Erein sounpahr ehu oh sounpwong pahieu, Depit oh nah ohl akan rukuruk sang Sohl nan Siklak nan wehin Pilisdia. (1 Samuel 27:5-7) Ehu ahnsou me ohl akan sohte mih nan kahnimwo mehn Amalek lemei kan isikada kahnimwo oh wahsang lih akan, seri kan oh mahn akan. Ni Depit ah sapahldo oh diarada dahme wiawihier, Depit oh sapwellime kan sengiseng. Mwahiei mwadangete wekidekiong kailok, oh sapwellimen Depit ohl ako koasoia me re katepwekehdi ih. Edetehn e mih nan pwunod, Depit sohte kin mworusala. (Lepin Padahk 24:10) Ah lemmwiki Koht kin kamwekid ih en sohpeiong Siohwa, oh e “kehlailkihda kehl sang rehn Siohwa.” Sang ni sapwellimen Koht sawas, Depit oh sapwellime ohl akan kalowehdi mehn Amalek kan oh kapwurehdo soahng koaros.—1 Samuel 30:1-20.
Siohwa Kin Ketin Pere Kitail Pwe Kitail en Komourala
14 Depit lelohng irair kansensuwed oh kapwunod tohto nan eh mour. (1 Sam. 30:3-6) Paipel kasalehda me Siohwa ketin mwahngih ahn Depit pepehm kan. (Wadek Melkahka 34:18; 56:8.) Koht pil ketin mwahngih atail pepehm kan. E kin kansenamwahwih kitail en tamataman me Koht ketin mwahngih ni ahnsou me kitail kin “nan kapehd tikitiklahr” oh ‘sohla atail koapworopwor.’ Ire mehlel wet kansenamwahwihala Depit me koulki: “I pahn nsenamwahu oh pereperen pwehki sapwellimomwi limpoak poatopoat. Komw kin ketin mahsanih ei lokolok; komw pil ketin mwahngih ei apwal.” (Mel. 31:7) Ahpw Siohwa kin ketin wia laudsang mwahngih atail kapwunod kan. E kin ketin sewese kitail en dadaurete ni eh kin ketin kansenamwahwih kitail oh ketikihong kitail mehn kangoang kan. Ehu ahl me e kin ketin wia met iei nan mihting en Kristian kan.
Ire Kesempwal kan
Ire Kesempwal akan Sang Nan Pwuhken Samuel Keieu
30:23, 24. Pilipil wet, me poahsoanda pohn Nempe 31:27, kin kasalehda me Siohwa kin kesempwaliki irail oko me kin utungada koasoandi en mwomwohdiso. Sohte lipilipil dahme kitail wiewia, kitail “doadoahk ni mohngiong unsek ong Siohwa, ahpw kaidehn ong aramas.”—Kolose 3:23, NW.
MAY 16-22
SOAHNG KESEMPWAL KAN SANG MAHSEN EN KOHT | 2 SAMUEL 1-3
“Dahme Kitail Sukuhlkihsang Kedepwidepw Duwen Sohl oh Sonadan?”
Wauneki Irail Akan Me Pwukoahki En Apwalih Kumwail
9 Depit kin pwunod ni ahnsou me e lelohng kahpwal wet? Depit likweriong Siohwa, “Aramas lemei kan . . . songosong en kemeiehla.” (Melkahka 54:3) E kasalehong Siohwa e pepehm loal kan: “Maing ei Koht, komw ketin doareiesang ei imwintihti kan . . . Aramas lemei kei irail me pokonpenehr pwehn uhwong ie. Maing Kaun, kaidehn pwehki ei dipadahr de wiadahr sapwung ehu, de pwehki kisin sapwung kis me mie rehi, me re mwadamwadangkipenehng nan dewerail.” (Melkahka 59:1-4) Mie ahnsou ehu me ke ahneki soangen pepehmohte—me ke sohte wia sapwung ehu ong emen me ahneki manaman pohmw, ahpw e kin kihong uhk apwal? Depit kin wauneki Sohl ahnsou koaros. Ni ahnsou me Sohl mehla, Depit sohte peren, ahpw e wiahda koul en kedepwidepw ehu: “Sohl oh Sonadan, ira koaros me kupwurkalahngan oh kapwuriamwei, ni ara mour oh pil ni ara mehla; ira koaros marahra sang ikel, ira koaros kehlailasang laion. Kumwail lihen Israel kan, kumwail mwahieiki Sohl.” (2 Samuel 1:23, 24) Depit kin wia mehn kahlemeng mwahu en emen me kin kasalehda wahu ni mehlel ong sapwellimen Siohwa me keidi, edetehn Sohl kin wia sapwung ong ih!
Pangala Emen—Kilelepen Imwin Rahn akan!
8 Paipel pil audaudki karasepe tohto en irail kan me kin loalopwoat. Kitail pahn tehkpene dahme kitail kak sukuhlki sang meh riemen. Kitail pahn tepikihda ohl emen me kin kasalehda eh loalopwoat ong Depit. Sonadan, nein Nanmwarki Sohl me keieu laud, pahn kakete wia nanmwarki en Israel mwurin eh pahpao. Ahpw Siohwa ketin pilada Depit. Sonadan kin wauneki sapwellimen Koht pilipilo oh sohte peirinki Depit. Sonadan “inenen poakepoakehla Depit duwehte eh poakohng pein eh mour,” oh Sonadan inoukihda me e pahn loalopwoatohng. E pil kasalehiong Depit wahu ni eh kihong eh likou, nah kedlahs, ketieu oh kateng. (1 Sam. 18:1-4) Sonadan wia uwen eh kak pwehn utung Depit. E pil mweidala eh mour en mihla nan keper ni eh perehla Depit sang Sohl. Sonadan kin loalopwoat oh ndaiong Depit: “Komwi me pahn wiahla nanmwarkien Israel oh ngehi me pahn keriaun kaun.” (1 Sam. 20:30-34; 23:16, 17) E sohte kapwuriamwei me mwurin Sonadan eh mehla, Depit kasalehda eh pahtou oh limpoak ong ih nan koul ehu.—2 Sam. 1:17, 26.
Ire Kesempwal kan
it-1 369 par. 2
Pirien
Lepin lokaia pirien pil kin kadoadoahk ong irail akan me kin miniminkihpene kahrepe ehu oh ahneki mehn akadei me duwepenehte. Karasepe, Nanmwarki Airam en Dair ekerki Nanmwarki Solomon rie, kaidehn pwehki ira koaros mi nan dehu ehute ahpw pil pwehki ira koaros kin nsenohki kihda tuhke kan oh soahng teikan ong tehnpas sarawio. (1Na 9:13; 5:1-12) Depit ntingihedi: “Ia uwen lingan, ia uwen kansenamwahu en sapwellimen Koht aramas akan [“pirien kan,” NW] ar kin miniminpene!” Met wehwehki me kaidehn pirien ni ntahte me kin wiahda popohl oh miniminpene nanpwungarail. (Me 133:1) Ni mehlel, Depit ekerki Sonadan rie, pwehki ira koaros kin poakpene oh nsenohki emenemen a kaidehn pwehki ira kohsang pahpa de nohno tehmen. (2Sa 1:26) Kompoakepah kan me kin ahneki irair akan me duwepenehte, mehnda ma pil suwed, kin kak ekerki emenemen rie.—Lep 18:9.
MAY 23-29
SOAHNG KESEMPWAL KAN SANG MAHSEN EN KOHT | 2 SAMUEL 4-6
“Kolokolete Omw Masak Kansensuwedihala Siohwa”
Ire Kesempwal akan Sang Nan Pwuhken Samuel Keriau
6:1-7. Edetehn Depit ahneki madamadau mwahu, e song en kihdahng kohpwahn inou pohn kuruma oh kamwekid sang wasa e mih ia me kawehla sapwellimen Koht koasondi oh kahrehda ah sohte pweida. (Eksodus 25:13, 14; Nempe 4:15, 19; 7:7-9) Ahn Ussa ah parokedi Kohpwahn Inowo kasalehda lamalam mwahu ahpw met sohte wekidala sapwellimen Koht koasoandi.
Ahnsou Koaros Siohwa Kin Ketin Wia Dahme Pwung
20 Tamataman me Ussa uhdahn pahn esehki Kosonned en Siohwa. Kohpwahn Inowo kin weliwelian Siohwa. Kosonnedo ketihtihki me ekeite aramas ahneki mweimwei en doake Kohpwahn Inowo, oh Kosonnedo kin kadehdehda mwahu me aramas emen me pahn kasapwungehla pahn ale kalokepen kamakamala. (Nempe 4:18-20; 7:89) Kahrehda, kamwekidahn Kohpwao wia doadoahk kesempwal ieu. E sansal me Ussa mehn Lipai men—ahpw kaidehn samworo men—kahrehda e pahn wehwehki audepen Kosonnedo. Likin met, sounpahr kei mwowe Kohpwahn Inowo wisiklahng nekinek nan imwen ah pahpa. (1 Samuel 6:20–7:1) Kohpwahn Inowo mihmi wasao erein sounpahr 70, lao lel ahnsou me Depit lemehda en kamwekid sang wasao. Kahrehda, sangete ni ah seri, Ussa uhdahn pahn esehki kosonned akan me pid Kohpwahn Inowo.
Ahnsou Koaros Siohwa Kin Ketin Wia Dahme Pwung
21 Nin duwen ah kawehwehdahr mwowe, Siohwa kin ketin mwahngih dahme mih nan mohngiong en aramas akan. Pwehki sapwellime Mahsen padahkiong kitail me dahme Ussa wia kasalehda me e “sohte wauneki Kohpwao,” Siohwa kak mwahngih madamadau en roporop me koasoipe sohte pwarada wasaht. Ussa soh wia ohl pohnmwahso men, me kin kalap kauwehla kaweid akan? (Lepin Padahk 11:2) Kaidehn pwehki ih me kahluwa wisiklahn Kohpwao me ih oh ah peneinei nekinekidkiher ahnsou werei kihong ih madamadau en aklapalap? (Lepin Padahk 8:13) Ussa kin wia aramas emen me sohte ah pwoson oh medemedewe me limen Siohwa sohte pahn kak pein pere Kohpwao me kin wia weliepe? Sohte lipilipil dahme uhdahn mehlel, kitail kak koapworopworki me Siohwa ketin wia dahme pwung. Siohwa mwahngih mehkot nan ahn Ussa mohngiong me kahrehiong Ih en ketikihda kadeik karuwaru wet.—Lepin Padahk 21:2.
Ire Kesempwal kan
w96 4/1 29 par. 1
Ahnsou Koaros Mweidohng Siohwa Omw Wisik Toutou
Nin duwen nanmwarki, Depit pil iang pwukoahki met. Eh mwekido kasalehda me irail akan me ahneki nanpwungmwahu rehn Siohwa kakete wiahda mwekid sapwung nan kahpwal akan. Keieu Depit lingeringerda. Mwuri e masepwehkada. (2 Samuel 6:8, 9) Eh kin likih Siohwa lelohng kasongosong laud. Dahme wiawi wasaht mwomwen kasalehda me e sohte mweidohng Siohwa eh kahpwalo, ni eh sohte idawehn sapwellime kehkehlik kan. Met kin wiawihong kitail ekei pak? Mie pak kitail kapwukoahki Siohwa atail kahpwal akan pwehki atail pohnsehse sapwellime kaweid kan?—Lepin Padahk 19:3.
MAY 30–JUNE 5
SOAHNG KESEMPWAL KAN SANG MAHSEN EN KOHT | 2 SAMUEL 7-8
“Siohwa Ketin Wiahda Inou Lap Rehn Depit”
w10 4/1 20 par. 3
“Omw Wehi Pahn Poatopoat”
Siohwa kin ketin kupwurperenkihda en Depit ineng sang nan eh mohngiong. Koht ketin mwekidki en Depit lelepek oh me pahrekiongete kokohp, e ketin wiahda inou lap ehu rehn Depit me e pahn ketikihda emen kadaudoke me pahn kakaun kohkohlahte. Nadan ndaiong Depit sapwellimen Koht inowo: “Kadaudokomw kan pahn kin mihmiehte, oh omw wehi pahn poatopoat kohkohlahte. Oh sapwellimomwi mwehi sohte pahn imwisekla.” (Iretikitik 16) Ihs me wia Kadaudok poatopoat en inou lap wet me pahn kakaun kohkohlahte?—Melkahka 89:20, 29, 34-36.
w10 4/1 20 par. 4
“Omw Wehi Pahn Poatopoat”
Sises mehn Nasaret wia kadaudok en Depit. Ni ahnsou me tohnlengo pakairki ipwidien Sises, e koasoia: “Siohwa Koht pahn ketikihong ih mwoalen seme Depit, oh e pahn ketin kaunda imwen Seikop nin duwen Nanmwarki men kohkohlahte oh sapwellime Wehi sohte pahn imwisekla.” (Luk 1:32, 33) Eri inou lapo me wiawihong Depit pweida rehn Sises Krais. Kahrehda, e kin ketin kaunda sang ni inou en Koht me kihong ih pwuhng en kaunda kohkohlahte a kaidehn sang ni pilipil en aramas. Kitail en taman me sapwellimen Koht inou kan kin ahnsou koaros pweida.—Aiseia 55:10, 11.
Ahneki Pwoson Kehlail me Wehio Pahn Kapwaiada Kupwuren Koht
14 Siohwa ketin wiahda inou ehu ong Nanmwarki Depit en Israel en mahs. Inou wet adaneki inou en Depit. (Wadek 2 Samuel 7:12, 16.) Siohwa ketin inoukihda me Mesaiao pahn ketin wia emen kadaudoken Depit. (Luk 1:30-33) Ni ahl wet, Siohwa ketin kasalehda ni oaritik duwen peneinei me Mesaiao pahn ketidohsang ie. Siohwa ketin mahsanih me “nanmwarki kapw men pahn pwarada sang ni kadaudok en Nanmwarki Depit” pwehn wia Nanmwarki en Wehin Mesaiao. (Ais. 11:1) Kaundahn Depit sohte pahn imwisekla pwehki Sises, me wia kadaudoken Depit, “pahn kin poatopoat ahnsou koaros . . . erein ketipin eh pahn kin dakedaker wasa.” (Mel. 89:34-37) Kitail kak uhdahn kamehlele me kaundahn Mesaiao sohte pahn suwedla oh me kapai kan me kohsang kaunda wet pahn mihmi kohkohlahte.
Ire Kesempwal kan
it-2 206 par. 2
Imwin Rahn akan
En Palaam Kokohp. Mwohn mehn Israel kan ar pedolong nan Sapwen Inowo, soukohp Palaam ndaiong Palak Nanmwarkien Mohap: “I men kehsehkin komwi dahme mehn Israel kan pahn wiahiong sapwellimomwi kan ni rahn akan me pahn kohdo. . . . Nanmwarki men pahn ketin pwarada nan wehio, rasehng usu ehu, e pahn ketieisang nan Israel, rasehng rakim lingaling ehu. E pahn ketin kauwehla kaunen wehin Mohap kan, oh kamwomwala me akalapalap oh lemei kan koaros.” (Nem 24:14-17) Ni tepin pweidahn kokohp wet, ‘usuwo’ me kin dokedoke Nanmwarki Depit, iei me kalowehdi mehn Mohap kan. (2Sa 8:2) Kahrehda, e sansal me pweidahn kokohp wet, “rahn akan me pahn kohdo” tepida ni ahnsou me Depit wiahla nanmwarki. Pwehki Depit kin kamwomwada Sises nin duwen Nanmwarki oh Mesaia, kokohp wet pil dokedoke Sises ni ahnsou me e pahn ketin kalowehdi sapwellime imwintihti kan.—Ais 9:7; Me 2:8, 9.
JUNE 6-12
SOAHNG KESEMPWAL KAN SANG MAHSEN EN KOHT | 2 SAMUEL 9-10
“Depit Kasalehda Limpoak Loalopwoat”
w06 6/15 14 par. 6
Ei, Ke Kak Diarada Peren
Depit ntingihedi: “Meid pai irail kan me kin nsenohki apwalih me semwehmwe kan.” E pousehla ntingihedi: “KAUN-O pahn ketin sewese irail nan arail apwal. KAUN-O pahn ketin sinsile irail oh kolokol arail mour; e pahn ketin kaperenihirailda nan sahpwo.” (Melkahka 41:1, 2) Limpoak me Depit kasalehiong Mepiposed me mwoator oh pahpahki kompoakepaho Sonadan, wia mehn kahlemeng mwahu duwen ahneki madamadau pwung ong me semwehmwe.—2 Samuel 9:1-13.
Ire Kesempwal akan Sang Nan Pwuhken Samuel Keriau
9:1, 6, 7. Depit kolokolete dahme e inoukihda. Pil kitail en kin nantiong kapwaiada atail inou.
Irail Kin Kanengamahiong Kisin Tek Kamedek Kis Me Kohieng Ni Paliwararail Kan
10 Sounpar kan dowe power, Nanmwarki Depit, pwehki e kin poakpoake Sonadan, kin kasalehda limpoak-kadek ong Mepiposed. Depit uhd kihong ih sahpw me Sohl kin sapweniki oh e pil kihong ih ladu en Sohl, Sipa, pwehn apwalpwalih sahpwo. Depit pil padahkiong Mepiposed: ‘Ke pahn kin iang tungoal ni ei tehpel ahnsou koaros.’ (2 Samuel 9:6-10) E sansal me ahn Depit limpoak-kadek kin kamweitihala Mepiposed oh met kin ekis katikitikihala medek en eh soumwahu. Ia uwen kaselel mehn kasukuhl wet! Kitail pil anahne kasalehda kadek ong irail akan me kin lelohng kahpwal me kin rasehng kisin tek kamedek kis nan paliwararail.
Ire Kesempwal kan
it-1 266
Alis
Nanpwungen aramas en Palimese en mahs ako, iangahki mehn Israel kan, alis kin kesempwal nin duwen kasalepen wahupen ohl. Sapwellimen Koht kosonnedo keinapwihdi mehn Israel kan ren dehpa sehk ‘pengepengen moangarail kan,’ pitenmoang me mi nanpwungen salengarail oh masarail oh ni imwin ar alis. (Lip 19:27; 21:5) Pwehki met wia tiahk en pelien lamalam ehu rehn ekei mehn liki kan.
JUNE 13-19
SOAHNG KESEMPWAL KAN SANG MAHSEN EN KOHT | 2 SAMUEL 11-12
“Dehr Mweidohng Ineng Suwed kan en Poweiukedi”
Ke Kak Tangasang Lidip kan en Tepil!
10 Siohwa ketikihong Depit soahng tohto, me iangahki en kepwehpwehla, lapalapala, oh en kalowehdi imwintihti tohto. Depit kalahnganki mepwukat oh nda me sapwellimen Koht kisakis kan ‘uhdahn tohtohsang me e kak kasalehda!’ (Mel. 40:5) Ahpw Depit noahrokla oh men ahneki tohtohsang dahme Siohwa ketikihongehr ih. Depit pwoudiki lih tohto, ahpw e tepida inangih emen lih me pwoudiki emen tohrohr, mendahki Siohwa mahsanih me met sapwung. Liho iei Padsipa, oh eh pwoudo iei Uraia mehn Id. Depit wendi rehn Padsipa, oh Padsipa liseianda. Dahme Depit wiao uhdahn suwed, ahpw e pil wiahda mehkot suwedsang. Depit koasoanehdi me Uraia en kamakamala! (2 Sam. 11:2-15) Dahme Depit medewe? E medewe me Siohwa sohte kak ketin mwahngih? Depit papahki Siohwa erein ahnsou werei, ahpw e noahrokla oh met kahrehiong ih lokolok laud. Mwuhr, Depit wehkada dipe ko oh koluhla. E uhdahn kalahnganki me Siohwa ketin mahkohng ih!—2 Sam. 12:7-13.
Men Uhpahiong Siohwa—Dahme Kahrehda oh Ia Duwen?
15 Siohwa ketin idihada Depit en wia tapwin eh peneinei oh pil wehin Israel pwon. Nin duwen nanmwarki, Depit ahneki manaman laud. Ekei pak, e doadoahngki eh manaman ni ahl sapwung oh wiahda sapwung laud kan. (2 Sam. 11:14, 15) Ahpw e kasalehda eh uhpahiong Siohwa sang eh pwungki ale kaweid sang reh. E kasalehiong Siohwa audepen eh mohngiong nan eh kapakap. Oh e song en wia uwen eh kak pwehn peikiong sapwellimen Siohwa kaweid. (Mel. 51:1-4) Patehng met, e aktikitik oh ale kaweid mwahu kaidehn ihte sang ohl akan ahpw pil lih akan. (1 Sam. 19:11, 12; 25:32, 33) Depit sukuhlkihsang eh sapwung kan oh wiahkihla papah Siohwa me keieu kesempwal nan eh mour.
Mweidohng Sapwellimen Koht Kosonned oh Ire Mehlel kan en Kaiahne Kadeikpen Loalomw
7 Kitail sohte anahne lokolongki imwila suwed kan me kohsang atail kauwehla sapwellimen Koht kosonned kan pwehn esehla dahme pwung oh sapwung. Kitail kak sukuhlkihsang sapwung kan me meteikan wiahda mahso. Karasepe pwukat kileldi nan Paipel. Lepin Padahk 1:5 (NW) mahsanih: “Aramas loalokong men kin rong oh alehdi kaweid tohto.” Kaweid wet kohsang rehn Koht oh met kaweid me keieu mwahu! Karasepe, medewehla ia uwen Depit eh lokolok mwurin eh sapeikiong Siohwa oh wia tiahk samin me pid nsenen pwopwoud rehn Padsipa. (2 Sam. 12:7-14) Ni omw wadek duwen met, pein idek rehmw: ‘Ia duwen Depit eh kakete soikala kahpwal pwukat? Dahme I pahn wia ma I lelohng soangen irairohte? I pahn wia tiahk samin me pid nsenen pwopwoud duwehte Depit de I pahn tangasang duwehte me Sosep wia?’ (Sen. 39:11-15) Ma kitail medewe mwahu duwen imwila suwed kan me kohsang dihp, e pahn laudla atail “tatki me suwed.”
Ire Kesempwal kan
it-1 590 par. 1
Depit
Ahpw Siohwa ketin mahmahsanih oh kasalehda wiewia suwedo pwon. Ma Siohwa ketin mweidohng dahme wiawi nanpwungen Depit oh Padsipa en epwella rehn sounkopwung kan pahn Kosonned en Moseso, ira koaros pahn kakete kamakamala oh seri me saikinte ipwidi sang ni ara wia tiahk en kamwahlo pil pahn iangete nohnou mehla. (Deu 5:18; 22:22) Ahpw, pein Siohwa me ketin apwalihala irairo oh kasalehiong Depit kadek kalahngan pwehki inou lap en Wehio (2Sa 7:11-16), oh pwehki Depit eh kin kasalehda mahk kalahngan (1Sa 24:4-7; pil kilang Sei 2:13) oh pwehki Koht ketin mwahngih me ira koaros koluhla. (Me 51:1-4) Ahpw ira sohte pitsang kalokepara kan koaros. Siohwa ketin doadoahngki soukohp Nadan oh mahsanih: “I pahn kahredohng uhk apwal sang nan omw peneinei.”—2Sa 12:1-12.
JUNE 20-26
SOAHNG KESEMPWAL KAN SANG MAHSEN EN KOHT | 2 SAMUEL 13-14
“En Amnon Roporop Imwikihla Kahpwal”
it-1 32
Apsalom
Kamakamalahn Amnon. Masamwahu en Damar rien Apsalom serepeino kahrehiong rie pwutak laudo Amnon me nohnohki emen lih tohrohr eh mwahukihda ih. Amnon mwomwehda soumwahu oh peki Damar en kohla nan eh pereo pwehn kuk ong ih oh mwuri e angkehlailih. En Amnon limpoako wekiong ni kailok oh e kausala Damar likio. Damar eri tehrpeseng eh likou alahlo me kin kasalehda nein nanmwarki serepein meipwon men, oh kesedahng pehs pohn moangeo, ih eri tuhwongedi Apsalom. Apsalom mwadangete tehkada irairo oh kasalehda eh lemelemehngki me Amnon me wia mwo, met kasalehda me e kin tetehk ineng suwed en rie pwutako sangete mahs. Ahpw Apsalom kaweidki rie serepeino en dehpa kedipahda, ih eri mweidohng en mihmi nan imweo.—2Sa 13:1-20.
Kakairada Irair en Kaunda Pein Kitail
11 Paipel pil kihda karasaras en irail kan me sohte pelianda kasongosong en wia tiahk samin me pid wia nsenen pwopwoud. E pil kasalehda imwila suwed kan ni ahnsou me kitail sohte kin kaunda pein kitail. Ma ke mi nan soangen irairo me Kimberly ahneki, medewehla duwen mwahnakapw pweipweio nan Lepin Padahk irelaud 7. Pil medewehla duwen Amnon oh imwila suwed en eh wiewiao. (2 Sam. 13:1, 2, 10-15, 28-32) Pahpa nohno kan kak sewese neirail seri kan en kakairada irair en kaunda pein irail oh pil erpit sang ni arail koasoiapene mehn kahlemeng pwukat nan arail kaudok en peneinei.
it-1 33 par. 1
Apsalom
Sounpar riau dowehr powe. E lelehr ahnsoun sehk sihpw, ahnsou kaperen ehu. Apsalom eri koasoanehdi kamadipw ehu ni Paal Asor mpen mwail 14 (km 22) ni paliepeng en palimesehn Serusalem, ih eri lukehdo nein nanmwarkio pwutak kan oh Depit. Ni eh pahpao eh nda me e sohte pahn iang towehda, Apsalom ahpw ngihtehtehkiong en kadarala nah meseniho, Amnon, en wiliandi ih. (Lep 10:18) Nan kamadipwo, ni ahnsou me Amnon “sakaula,” Apsalom eri ruwese nah ladu ko ren kemehla. Nein Depit pwutak teiko eri pwurala Serusalem, oh Apsalom tangala rehn eh pahpa kahlap mehn Siriao nan wehin Kesur ni Palimesehn Sehden en Kalili. (2Sa 13:23-38) “Mehla” me soukohp Nadan kohpada me pahn lelohng ‘kadaudoken’ Depit pweidahr oh met pahn mihmihte reh erein eh mour.—2Sa 12:10.
Ire Kesempwal kan
g04 12/22 8-9
Soangen Kaselel me Keieu Kesempwal
Ahpw weksang met, medewehla Apsalom, emen nein Depit pwutak ko. Mendahki e masamwahu, e wiahla aramas sohte mwahu men. Paipel mahsaniheki ih: “Eri, sohte aramas emen mie nan wehin Israel me ndandki eh masamwahu oh paliwaramwahu duwehte Apsalom; sang ni moange lel ni sendin neh.” (2 Samuel 14:25) Ahpw en Apsalom ineng en men pweida kahrehiong eh uhwongada eh pahpao oh adihasang mwoalen nanmwarki. E pil wendi rehn eh pahpao pekehi kan. Imwilahn met, Apsalom eri alehdi engieng en Koht oh e lelohng mehla kamedek ehu.—2 Samuel 15:10-14; 16:13-22; 17:14; 18:9, 15.
Ke pahn men karanihala Apsalom? Uhdahn soh. E wiahla aramas emen me uhdahn kadongodong. Eh paliwaramwahu me inenen kaselel sohte pwainla eh aklapalap oh soaloalopwoat, de pil irehdihsang ih mwomwla. Ni pali teio, Paipel kin audaudki karasepen aramas tohto me loalokong oh mwahu oh e sohte kin koasoia duwen mwomwarail masliki. Eri, e sansal me dahme keieu kesempwal iei masloalen aramas.
JUNE 27–JULY 3
SOAHNG KESEMPWAL KAN SANG MAHSEN EN KOHT | 2 SAMUEL 15-17
“Apsalom Uhwongada Pwehki Aklapalap”
it-1 860
Me Kin Tieng Mwowe
Iei tiahk en mehn palimese kan, irail kan me kin tieng mwowe pahn tiengla mwohn weren nanmwarki kuruma oh kin pakairki me nanmwarki kohkohdo oh re pil kin sewese ih ni soahng teikan. (1Sa 8:11) Duwehte met, Apsalom oh Adonaisa eri kihdi aramas 50 mwohn warara kuruma kan, ira alasang soangen mwekid wet oh kalaudehla kehlepen ara uhwongo.—2Sa 15:1; 1Na 1:5; kilang RUNNERS.
Papah Kohto me Kin Ketikihda Saledek
5 Tohto karasepe kan nan Paipel duwen irail kan me kin kamwakid suwed meteikan. Ehu karasepe pwukat iei Apsalom, nein Nanmwarki Depit pwutak. Apsalom inenen masamwahu. Duwehte Sehdan, e mweidohng ineng sapwung en kekeirda nan eh mohngiong. E men ih me en wiahla nanmwarki a kaidehn eh papaho, mendahki e ese me e sohte ahneki pwung en wia nanmwarki. Pwehn ale dahme e mwahuki, Apsalom kahrehiong aramas ako ren kamehlele me e men sewese irail ahpw nanmwarkio sohte men sewese irail. Duwehte Tepilo nan mwetuwel en Ihden, Apsalom kahrehiong aramas ko ren medewe me e nsenohki irail oh pil ahnsowohte kinehda likamw laud ehu duwen eh pahpao.—2 Sam. 15:1-5.
it-1 1083-1084
Epron
Sounpar kei mwuri, nein Depit pwutako Apsalom ahpw pwurodo Epron oh sang wasao me e tepida song adihasang mwoalen eh pahpao ahpw e sohte pweida. (2Sa 15:7-10) Mwein pwehki Epron iei wasa kesempwal ehu nan poadopoad nin duwen poasen kaun en Suda mahso, oh pil pwehki Apsalom uhdaken kahnimwo, e pilada kahnimw wet wasa me e kak tepida koasoakoasoane eh pahn adihasang mwoalen nanmwarkio. Mwuhr, Nanmwarki Reopoham me pahpa kahlapki Depit onehda sapahl Epron. (2Kr 11:5-10) Mwurin mehn Papilon kan ar kauwehla Suda oh ni mehn Suhs kalipilipala kan ar pwurodo, ekei mehn Suhs me pwurodo ko kousoanla nan Epron (Kiriad-Arpa).—Neh 11:25.
Ire Kesempwal kan
Ke Alehdi Ire Mehlel kan Koaros?
11 Ele e pahn mie ahnsou ehu me kitail pahn medengkihla wiewia sapahrek pwehki ekei aramas ar kihpeseng koasoi kan duwen kitail me ekeite ire me mehlel. Medewehla dahme wiawihong Mepiposed. Nanmwarki Depit kihong Mepiposed sahpw kan koaros me eh pahpa kahlapo, Sohl, sapweniki. (2 Sam. 9:6, 7) Ahpw mwuhr, Depit rongada koasoi likamw kei duwen Mepiposed. Depit sohte tehk mwahu ma koasoi ko mehlel, ih eri kihsang soahng koaros me Mepiposed ahneki. (2 Sam. 16:1-4) Ni ahnsou me Depit koasoiong ih mwuhr, e esehda me e wiadahr sapwung ehu. Ih eri kapwurehiong Mepiposed ekei sahpw ko. (2 Sam. 19:24-29) Ma Depit kihongete ahnsou en alehdi ire mehlel kan koaros ahpw dehr mwadang en mwekidki ire kan me ekeite me mehlel, Mepiposed sohte pahn lokolongki wiewia sapahrek wet.