IREN MEHN KASUKUHL 23

Mie Kamwahupen en Nantihong Papidaisla!

Me kin print

Sises ketin padahngki me Kristian kan anahne papidaisla. (Wadek Madiu 28:19, 20.) Ahpw dahkot papidais? Oh dahme aramas emen anahne wia pwehn kak papidaisla?

1. Dahkot papidais?

Lepin lokaia “papidais” kohsang ni lepin lokaiahn Krihs me wehwehki “kaduhdi” nan pihl. Ni ahnsou me Sises ketin papidaisla, Sohn kaduhdi Sises nan Pillap Sordan, oh mwuri e ahpw “ketida sang nan pihlo.” (Mark 1:9, 10) Duwehte met, Kristian mehlel kan kin papidaisla ni paliwararail pwon eh kin duhdi pahn pihl.

2. Dahme papidais kin kasalehda?

Ni aramas emen eh kin papidaisla, met kin kasalehda me e inoukihongehr Siohwa Koht eh mour. Ia duwen aramas emen eh kin wiahda inou? Mwohn eh papidaisla, e kin kapakap oh patohwanohng Siohwa me e men papah Ih kohkohlahte. E kin inoukihda me e pahn papah Siohwa kelehpw oh e pahn kin keieu kesempwalki wia kupwuren Koht nan eh mour. E kin pilada “en tounmeteikihla pein ih oh . . . kin ideidawehn” sapwellimen Sises padahk kan oh mehn kahlemeng. (Madiu 16:24) Ni eh wiahda inou oh papidaisla, met kak kahrehiong ih en ahneki nanpwungmwahu keren rehn Siohwa oh ienge tohnkaudok kan.

3. Dahme aramas emen anahne wia mwohn eh kak papidaisla?

Ke kak kaunopada ong papidais ni omw sukuhlki duwen Siohwa oh kalaudehla omw pwoson ih. (Wadek Ipru 11:6.) Ni omw kalaudehla omw ese oh pwoson ih, omw poakohng ih pahn pil laudla. Eri ke pahn kin men lohki duwen ih oh mourki sapwellime koasoandi kan. (2 Timoty 4:2; 1 Sohn 5:3) Ni aramas emen eh kin “weweid ni ahl me Siohwa ketin kupwurki,” ele e pahn men pilada en inoukihong Koht eh mour oh papidaisla.—Kolose 1:9, 10.a

KALAUDEHLA OMW ESE MET

Kilang dahme kitail kak sukuhlkihsang sapwellimen Sises papidaiso oh ia duwen emen eh kak kaunopada ong kahk kesempwal wet.

4. Kitail kak sukuhlkihsang sapwellimen Sises papidais

Wadek Madiu 3:13-17 pwe ken ese oaritik kan me pid sapwellime papidaiso. Mwuri koasoiapene peidek pwukat:

Sises seri pwelel ni ahnsou me e papidaisla?
Ia mwomwen eh papidaisla? Mie me usupihki pihl pohn tapwi?

Sises ketin tapiada doadoahk kesempwal me Koht ketikihong en wia ni ahnsou me e ketin papidaisla. Wadek Luk 3:21-23 oh Sohn 6:38, oh mwuri koasoiapene peidek wet:

Mwurin Sises eh ketin papidaisla, doadoahk dah me e kin ketin mwohneki?

5. Omw nannanti en papidaisla kak pweida

Mwein nin tapio ke sohte medewe me ke kak wiahda inou oh papidaisla. Ahpw ma ke pousehlahte sukuhlki duwen Siohwa oh esehla mwahu ih, ke pahn kamehlele me ke kak wiahda soangen pilipil kesempwal wet. Pwe ken kilang ekei aramas me wia met, kilang KISIN KASDO.

KISIN KASDO: Building a Relationship With Jehovah (1:11)

Wadek Sohn 17:3 oh Seims 1:5, oh mwuri koasoiapene peidek wet:

Dahme kak sewese aramas emen en onopada ong papidais?

A. Lih emen wiahda pein eh inou ong Koht ni eh kapakap.

B. Lihohte papidaisla nin duwen emen Sounkadehdehn Siohwa ni paliwere pwohn eh duhdi nan pihlo.

Kitail kin wiahda inou sang ni atail patohwanohng Siohwa me kitail men papah ih kohkohlahte
Ni atail kin papidaisla, kitail kin kasalehiong irail kan me kilang kitail me kitail wiadahr inou ong Koht

6. Ni atail papidaisla kitail kin wiahla kisehn sapwellimen Siohwa peneinei

Ni atail papidaisla, kitail kin wiahla kisehn peneinei minimin ehu nan sampah pwon. Mendahki wasa kan me kitail kohsang oh mwomwen atail tikida kin wekpeseng, dahme kitail koaros kin kamehlele oh koasoandi me kitail kin mourki kin duwepenehte. Wadek Melkahka 25:14 oh 1 Piter 2:17, oh mwuri koasoiapene peidek wet:

Nin duwen me iretikitik pwukat mahsanih, kapai dah me emen kak alehdi ni eh papidaisla?

Kilel kan: Sister papidaislahr men me mas peren wie medemedewe duwen eh nanpwungmwahu rehn meteikan nan mwomwohdiso. 1. E wehkohng sister men eh pepehm. 2. E sewese sister mah men alu. 3. E mwengemwenge rehn kompoakepah kan me ar sounpar wekpeseng. 4. E kalohk ong ohl emen oh mie emen sister me iangih. 5. E kilel rehn Sounkadehde riemen me kohsang keinek teikan nan mihting tohrohr ehu.

EKEI ARAMAS KIN NDA: “I saikinte onopadahng papidais.”

Ma ih omw pepehm en met, ke men papidaisla ehu rahn?

DAHME KE SUKUHLKIER

Sises ketin padahngki me Kristian kan anahne papidaisla. Mwohn emen eh kak papidaisla, e anahne kalaudehla eh pwoson Siohwa, mourki sapwellime koasoandi kan oh inoukihong Ih eh mour.

Kousapahl

Dahkot papidais, oh dahme kahrehda e kesempwal?
Dahme kahrehda wiahda inou oh papidais kesempwal?
Dahme emen anahne wia mwohn eh kak inoukihda eh mour oh papidaisla?

Rahn me ke kanekehla:

Dahme ke kak wia

Tehk wasa kan me mi ni imwin Pali 4, me nda “I Onopadahngehr Iang Mwomwohdiso Kalohk?” oh “I Onopadahngehr Papidaisla?,” pwe ken kilang ia duwen omw pahn kakehr papidaisla.

Soahng teikan:

Soahng teikan

PIL TEHK

Sukuhlki dahkot papidais oh dahme sohte pwung duwen papidais.

“What Is Baptism?” (Web article)

Kilang soahng kan me aramas emen kak wia pwehn papidaisla.

“Limpoak oh Kalahngan ong Siohwa Pahn Kamwakid Uhk en Papidaisla” (Kahn Iroir, March 2020)

Wadek dahme kamwakid ohl emen en papidaisla.

“Ira Men I en Pein Diarada Dahme Paipel Uhdahn Mahsanih” (Kahn Iroir, February 1, 2013)

Tehk dahme kahrehda papidais kesempwal oh ia duwen omw kak onopadahng met.

“Should I Get Baptized?” (Questions Young People Ask—Answers That Work, Volume 2, chapter 37)

a Ma aramas emen papidaislahr nan ehu pelien lamalam, e pahn anahne pwurehng papidais. Dahme kahrehda? Pwehki pelien lamalamo sohte kin padahngki padahk mehlel sang nan Paipel.—Kilang Wiewia 19:1-5 oh Iren Mehn Kasukuhl 13.