IREN MEHN KASUKUHL 28
Kasalehda Omw Kalahnganki Dahme Siohwa oh Sises Ketin Wiahiong Uhk
Ia omw pepehm ni kompoakepahmw men eh kihong uhk kisakis kaselel ehu? Mwein, ke uhdahn perenkihda oh ke men kasalehiong me ke kalahnganki kisakiso. Siohwa oh Sises ketikihong kitail kisakis me keieu laud. Kisakis dahieu met, oh ia duwen atail kak kasalehda me kitail kalahnganki met?
1. Ia ehu ahl me kitail kak kasalehda atail kalahnganki dahme Koht oh Krais ketin wiahiong kitail?
Paipel inoukihda me “mehmen me kin kasalehda eh pwoson [Sises]” kak mour kohkohlahte. (Sohn 3:16) Ia wehwehn kasalehda pwoson? Met kin wehwehki laudsang en kamehlelehte Sises. Kitail pil anahne kasalehda atail pwoson sang ni pilipil kan me kitail wiahda oh soahng kan me kitail kin wia. (Seims 2:17) Ni atail kin kasalehda atail pwoson sang ni dahme kitail wia oh nda, kitail kin kakehlakahla atail nanpwungmwahu rehn Sises oh Semeo, Siohwa.—Wadek Sohn 14:21.
2. Soangen ahnsou dah me kin sewese kitail en kasalehda atail kalahnganki dahme Siohwa oh Sises ketin wiahda?
Ni soutiko mwohn eh pwoula, Sises ketin padahkihong sapwellime tohnpadahk ko ehu ahl me re kak kasalehda ar kalahnganki sapwellime meirongo. E ketin padahkihong irail en kin pokonpene ong ni ahnsou tohrohr ehu me Paipel kin kahdaneki “Sak en Soutik en Kauno,” me pil adaneki Katamanpen pwoulahn Krais. (1 Korint 11:20) Sises ketin koasoanehdi met pwe sapwellime wahnpoaron ko oh Kristian mehlel kan koaros mwurirail, en tamataman me e toukihda sapwellime mour ong kitail. Me pid kataman wet, Sises ketin kehkehlingki: “Kumwail en kin wia met ong ni katamanpei.” (Luk 22:19) Ni omw iang towehda Katamano, ke kak kasalehda me ke kalahnganki limpoak laud me Siohwa oh Sises ketin kasalehiong kitail.
KALAUDEHLA OMW ESE MET
Tehk duwen soahng kan me ke kak kasalehda omw kalahnganki limpoak laud me Siohwa oh Sises ketin kasalehda. Medemedewe kesempwalpen Katamanpen pwoulahn Krais.
3. Kasalehda atail kalahngan sang ni atail wiewia
Medewehla aramas emen me doareiukala ni omw pahn kereniong duhla. Ke pahn wiahkintehieu manokehla dahme aramaso wiahiong uhk? De ke pahn rapahki elen omw kak kasalehiong ih me ke kalahnganki dahme e wiao?
Kitail pweipwandkihong Siohwa atail mour. Wadek 1 Sohn 4:8-10, oh mwuri koasoiapene peidek pwukat:
Dahme kahrehda sapwellimen Sises meirongo wia kisakis kesempwal ehu?
Ia omw pepehm ong dahme Siohwa oh Sises ketin wiahiong uhk?
Ia duwen atail kak kasalehda atail kalahnganki dahme Siohwa oh Sises ketin wiahiong kitail? Wadek 2 Korint 5:15 oh 1 Sohn 4:11; 5:3. Mwurin omw wadek ehuehu iren Paipel, koasoiapene peidek wet:
Sang ni ire wet, dahme kitail kak wia pwehn kasalehda atail kalahngan?
4. Kahlemengih Sises
Pil ehu ahl me kitail kak kasalehda atail kalahngan iei sang ni atail kahlemengih Sises. Wadek 1 Piter 2:21, oh mwuri koasoiapene peidek wet:
Ni ahl dah kan me ke kak idawehn mwahu dahme Sises kin ketin wia?
Sises kin ketin poakohng Mahsen en Koht, kalohki rongamwahwo oh sewese meteikan
5. Towehda Katamanpen pwoulahn Krais
Pwe ken kilang dahme wiawi ni tepin katamanpen Sak en Soutik en Kauno, wadek Luk 22:14, 19, 20. Mwuri koasoiapene peidek pwukat:
Dahme wiawi ni Sak en Soutik en Kauno?
Dahme pilawao oh waino kin wehwehki? —Kilang iretikitik 19 oh 20.
Sises kupwurki sapwellime tohnpadahk kan ren wia Katamano pak ehu nan sounpar koaros ni rahn me e pwoula. Kahrehda, Sounkadehdehn Siohwa kan kin pokonpene nan sounpar koaros pwe ren wia katamanpen pwoulahn Krais duwehte me e ketin kehkehlingki. Pwehn kalaudehla omw wehwehki duwen mihting kesempwal wet, kilang KISIN KASDO. Mwuri koasoiapene peidek wet.
Dahme kin wiawi ni Katamano?
Pilawao oh waino kin wia karasepen mehkot. Pilawao kin wehwehki kahlepen Sises me unsek me e ketin meirongkihla. Waino kin wehwehki ntah
EKEI ARAMAS KIN NDA: “Ihte me ke anahne wia pwe ken komourla iei pwoson Sises.”
Ia duwen omw kak doadoahngki Sohn 3:16 oh Seims 2:17 pwehn kasalehda me kaidehn pwosonte me anahn?
DAHME KE SUKUHLKIER
Kitail kin kasalehda atail kalahnganki dahme Sises ketin wiahiong kitail ni atail kasalehda atail pwoson ih oh iang towehda Katamanpen sapwellime pwoula.
Kousapahl
Ia wehwehn kasalehda pwoson Sises?
Dahme ke men wia pwe ken kasalehda me ke kalahnganki dahme Siohwa oh Sises ketin wiahiong uhk?
Dahme kahrehda e uhdahn kesempwal en iang towehda Katamanpen pwoulahn Krais?
PIL TEHK
Dahme pwoulahn Krais kin kamwakid kitail en wia?
Kalaudehla omw ese duwen pwoson oh ia duwen atail kak kasalehda pwoson.
“Kasalehda Omw Pwoson Sapwellimen Siohwa Inou kan” (Kahn Iroir, October 2016)
Nan koasoi wet “I Feel Clean, Alive, and Whole,” kilang duwen en emen lih mour eh mwahula ni eh sukuhlki wehwehn sapwellimen Krais meirongo ong ih.
Tehk dahme kahrehda ekeite me kin iang tungoale pilawao oh nim waino ni Katamano.