IREN MEHN KASUKUHL 53
Pilada Mehn Kamweit me Kin Kaperenda Kupwuren Siohwa
Siohwa iei “Koht me peren.” (1 Timoty 1:11) E ketin kupwurki kitail en nsenamwahu oh perenki mour. E ketin kupwurki ni atail kin koasoanehdi ekei ahnsou en kommoal. Nan iren mehn kasukuhl wet kitail pahn kilang ia duwen atail kak doadoahngki atail ahnsoun kommoal ni ahl me pahn kaperen, katapan oh pil kaperenda kupwuren Siohwa.
1. Dahme kitail anahne medemedewe ni atail kin pilada mehn kamweit?
Dahme ke kin perenki wia ni ahnsou me ke kin kommoal? Ekei aramas kin perenki mihmihte ni imwarail kan, wadek pwuhk, rong koul, kilang kasdo de doadoahngki Internet. A ekei kin perenki iang kompoakparail kan kohla alu, pampap de mwadong. Sohte lipilipil dahme kitail perenki wia, kitail anahne tehk mwahu ma “Kauno kin ketin kupwurperenki” mehn kamweit me kitail pilada. (Episos 5:10) E kesempwal kitail en wehwehki met pwehki mehn kamweit tohto kin kasalehda soahng kan me Siohwa ketin kalahdeki, me duwehte, tiahk lemei, tiahk samin me pid wia nsenen pwopwoud de wunahni. (Wadek Melkahka 11:5.) Dahme pahn sewese kitail en pilada mehn kamweit mwahu?
Ma kitail pilada kompoakepatail me kin poakohng Siohwa, re kak kangoange kitail oh sewese kitail en pilada mehn kamweit mwahu. Duwehte me kitail sukuhlki nan Iren Mehn Kasukuhl 48, “ma ke pahn padahngki mehkot sang rehn me loalokong kan, ke pahn pil loalokongla.” Ahpw, ma kitail kin kalapw patehng aramas akan me sohte kin poakohng sapwellimen Koht koasoandi kan, kitail “pahn ohkihla.”—Lepin Padahk 13:20.
2. Dahme kahrehda e kesempwal kitail en dehr doadoahngkihla ahnsou laud ong mehn kamweit?
Mehnda ma mehn kamweit me kitail pilada kin mwahu, kitail anahne kanahieng en dehr doadoahngkihla ahnsou laud ong met. Pwe ma soh, e pahn sohla atail ahnsou ong soahng kan me kesempwalsang met. Paipel kin mahsanihong kitail en “doadoahngki mwahu [atail] ahnsou.”—Wadek Episos 5:15, 16.
KALAUDEHLA OMW ESE MET
Sukuhlki ia duwen omw kak wiahda pilipil mwahu duwen mehn kamweit kan.
3. Soikala mehn kamweit suwed
Dahme kahrehda kitail en kanahieng ni atail pilada mehn kamweit? Kilang KISIN KASDO, oh mwuri koasoiapene peidek pwukat.
Ia duwen ekei mehn kamweit en rahnpwukat eh duwehte siai en pei nan Rom mahso?
Dahme Danny esehda duwen mehn kamweit?
Wadek Rom 12:9, oh mwuri koasoiapene peidek wet:
Ia duwen iretikitik wet eh pahn seweseiuk en pilada mehn kamweit mwahu?
Ia ekei soahng kan me Siohwa ketin kalahdeki? Wadek Lepin Padahk 6:16, 17 oh Kalesia 5:19-21. Mwurin omw wadek ehuehu iren Paipel, koasoiapene peidek wet:
Mehnia rehn soahng pwukat me kin kalapw pwarada nan mehn kamweit kan rahnwet?
Ia duwen omw kak pilada mehn kamweit mwahu
Pein idek rehmw:
Dahkot? Met kin pidada mehkot me Siohwa ketin kalahdeki?
Iahd? Met kin kihsang ahnsou ong soahng kesempwal kan?
Ihs? Met pahn kahrehiong ie I en kalapw patehng aramas me sohte kin poakohng Siohwa?
E pahn mwahu en dohsang mehkot keper ni uwen me kitail kak. Ihme kahrehda kitail anahne keisang mehn kamweit kan me ele sohte mwahuong kitail
4. Doadoahngki mwahu omw ahnsou
Kilang KISIN KASDO, oh mwuri koasoiapene peidek wet.
Brothero sohte kilikilang mehkot suwed, ahpw dahme wiahla eh kahpwal?
Wadek Pilipai 1:10, oh mwuri koasoiapene peidek wet:
Ia duwen ire wet eh kak sewese kitail en pilada uwen ahnsou me kitail pahn doadoahngki ong mehn kamweit?
5. Pilada mehn kamweit mwahu
Mendahki ekei mehn kamweit kan kin kansensuwedihada kupwuren Siohwa, mie soahng tohto me sohte kin. Wadek Eklesiasdes 8:15 oh Pilipai 4:8, oh mwuri koasoiapene peidek wet:
Soangen mehn kamweit mwahu dah me ke kin perenki?
Mie soahng mwahu kan me ke kak perenki wia
EKEI ARAMAS KIN NDA: “Mehn kamweit kan me kin kasalehda tiahk lemei, tiahk samin de wunahni sohte suwed, ma I sohte kin wia mepwukat.”
Dahme ke pahn nda?
DAHME KE SUKUHLKIER
Siohwa ketin kupwurki kitail en pilada oh perenki mehn kamweit mwahu kan.
Kousapahl
Soangen mehn kamweit dah me Kristian kan anahne soikala?
Dahme kahrehda kitail anahne kanahieng uwen ahnsou me kitail doadoahngki ong mehn kamweit?
Ke men pilada mehn kamweit me kin kaperenda kupwuren Siohwa? Dahme kahrehda?
PIL TEHK
Kilang ihs me kin pwukoahki pilada omw mehn kamweit.
“Do Jehovah’s Witnesses Ban Certain Movies, Books, or Songs?” (Web article)
Kilang ia duwen omw kak wiahda pilipil mwahu ong mehn kamweit kan.
“Omw Mehn Kamweit oh Mwadong Kin Wia Kamwahu ong Uhk?” (Kahn Iroir, October 1, 2011)
Kilang kahrepen emen ohl eh wekidala eh pilipil ong mehn kamweit nan oaralap “I Even Overcame My Prejudice.”
“The Bible Changes Lives” (The Watchtower, February 1, 2010)
Kilang ia duwen nohno men eh wiahda pilipil mwahu duwen mehn kamweit me kin kasalehda duwen eni aramas.