Ia Duwen Siohwa Eh Ketin Kamehlelehiong Kitail Sapwellime Inou en Paradais

1. Rohng dahieu me soukohp Aiseia padahkihong mehn Israel kan?

SOUKOHP Aiseia koasoia me Siohwa iei “Koht en mehlel.” Lepin lokaiao me kawehwehdi ong “mehlel” kin wehwehki “amen.” (Ais. 65:​16, NW, ntp.) “Amen” kin wehwehki “en wiawi,” de “en mehlel.” Paipel kin kalapw doadoahngki lepin lokaiao “amen” pwehn kasalehda me dahme Siohwa de Sises kin ketin mahsanih oh wia kin uhdahn mehlel. Eri, iet rohngo me Aiseia padahkihong mehn Israel ko: Ni Siohwa eh ketin kohpada mehkot, e kin ahnsou koaros wiawi. Siohwa ketin kadehdehda ire mehlel wet sang ni eh kin kapwaiada sapwellime inou kan koaros.

2. Dahme kahrehda kitail kak likih sapwellimen Siohwa inou kan duwen ahnsou kohkohdo, oh peidek dah kan me kitail pahn koasoiapene?

² Ia duwe, kitail pil kak likih me inou kan me Siohwa ketin wiahda ong ahnsou kohkohdo pahn uhdahn pweida? Kereniong sounpar 800 mwurin mwehin Aiseia, wahnpoaron Pohl kawehwehda dahme kahrehda sapwellimen Koht inou kan kin ahnsou koaros pweida. Pohl koasoia: ‘Koht sohte kak ketin likamw.’ (Ipru 6:18) Duwehte utuhnpihl ehu eh sohte kak kapwarehda uhdahn pihl oh pilen soahl, Siohwa, me ketin wia Utupen mehlel, sohte kak ketin likamw. Eri, kitail kak uhdahn likih soahng koaros me Siohwa ketin mahsanih, iangahki sapwellime inou koaros ong ahnsou kohkohdo. Nan iren onop wet, kitail pahn koasoiapene peidek pwukat: Dahme Siohwa ketin inoukihda en ketikihong kitail ni ahnsou kohkohdo? Oh ia duwen Siohwa eh ketin kamehlelehiong kitail me sapwellime inou kan pahn pweida?

DAHME SIOHWA KETIN INOUKIHDA?

3. (a) Inou dahieu me uhdahn kesempwal ong sapwellimen Koht ladu kan? (Kaudiahl 21:​3, 4) (b) Ia duwen ekei kin mwekidki ni atail ehukihong irail inowo?

³ Inou me kitail pahn koasoiapene kin uhdahn kesempwal ong sapwellimen Koht ladu kan koaros nan sampah pwon. (Wadek Kaudiahl 21:​3, 4.) Siohwa ketin inoukihda ahnsou ehu me “mehla solahr pahn wiawi, solahr mwahiei, solahr sengiseng oh solahr medek.” Tohtohn kitail kin doadoahngki ire pwukat nan kalohk pwehn kasalehiong irail ia pahn mwomwen mour nan Paradais. Ia duwen ekei ar mwekidki ni atail ehukihong irail inou wet? Irail kakete nda, “Soahng pwukat uhdahn kaselel, ahpw I sohte kamehlele me e kak pweida.”

4. (a) Dahme Siohwa ketin mwahngiher pahn wiawi nan atail ahnsou? (b) Likin eh ketin wiahda inou ehu, dahme Siohwa pil ketin wia?

⁴ Ni Siohwa eh ketin doadoahngki Sohn pwehn ntingihedi inou wet duwen mour nan Paradais, e ketin mwahngiher me rahnwet kitail pahn ehukihong meteikan koapworopwor wet ni atail kalohki rongen Wehio. Siohwa pil ketin mwahngih me e pahn apwal ong me tohto en kamehlele duwen “irair kapw” kan me pahn wiawi ahnsou kohkohdo. (Ais. 42:9; 60:2; 2 Kor. 4:​3, 4) Eri ia duwen atail kak kamehlelehiong meteikan—oh pein kitail—me kapai kan me kileldi nan Kaudiahl 21:​3, 4 pahn pweida? Siohwa sohte ketikihdahte inou kaselel pwukat, ahpw e pil ketikihda kahrepe mwahu kan pwe kitail en kak kamehlele me inou pwukat pahn pweida. Kahrepe dah kan me e ketikihda?

SIOHWA KETIN KAMEHLELEHIONG KITAIL ME SAPWELLIME INOU PAHN PWEIDA

5. Iretikitik dah kan me kihong kitail kahrepe mwahu en likih sapwellimen Koht inou, oh dahme re koasoia?

⁵ Nan iretikitik kan me kileldi mwuhr, kitail diarada kahrepe kan me kitail en likihki sapwellimen Siohwa inou en Paradais. Ire ko mahsanih: “Meno me ketiket nan mwoahl ketin mahsanih: ‘Kilang! I wiewiahda mehkoaros en kapw.’ E pil ketin mahsanih: ‘Ntingihedi, pwe mahsen pwukat me lelepek oh mehlel.’ Oh e ketin mahsanihong ie: ‘Mahsen pwukat pweidahr! Ngehi me Alpa oh Omeka, me tapi oh imwi.’”—Kaud. 21:​5, 6a.

6. Dahme kahrehda mahsen kan nan Kaudiahl 21:​5, 6 kakehlaka atail likih sapwellimen Koht inou?

⁶ Dahme kahrehda mahsen pwukat kakehlaka atail likih sapwellimen Koht inou? Pwuhken Revelation Climax koasoiahki duwen iretikitik pwukat: “Met mwomwen duwehte Siohwa eh ketin sainihala doaropwe ehu me kamehlelehiong aramas lelepek kan me kapai pwukat pahn uhdahn pweida.”b Sapwellimen Koht inowo kileldi nan Kaudiahl 21:​3, 4. Oh nan iretikitik 5 oh 6, e pil mwomwen ketin sainihala mehlelpen sapwellime inou. Kitail pahn tehk mwahu lepin lokaia kan me Siohwa ketin doadoahngki nan sapwellime inowo.

7. Ihs me tepin koasoi nan iretikitik 5, oh dahme kahrehda met tohrohr?

⁷ Iretikitik 5 tepikihda met: “Meno me ketiket nan mwoahl ketin mahsanih.” (Kaud. 21:5a) Mahsen pwukat kesempwal pwehki nan pwuhken Kaudiahl, ahnsou siluhte me pein Siohwa ketin mahsen, oh met wia ehu ahnsou ko. Eri kaidehn tohnleng men de pil Sises me ketin wiahda inou wet, ahpw pein Siohwa! Met kadehdehda me kitail kak uhdahn kamehlele dahme e ketin mahsanih mwuri. Dahme kahrehda? Pwehki Siohwa “sohte kak ketin likamw.” (Taitus 1:2) Eri mahsen kan me kitail wadek nan Kaudiahl 21:​5, 6 pahn uhdahn pweida.

“KILANG! I WIEWIAHDA MEHKOAROS EN KAPW”

8. Dahme Siohwa ketin mahsanih pwehn kasalehda me sapwellime inou pahn pweida? (Aiseia 46:10)

⁸ Mwuri Siohwa ketin mahsanih; “Kilang!” (Kaud. 21:5) Lepin lokaiahn Krihs me kawehwehdiong “kilang!” kin kalapw pwarada nan pwuhken Kaudiahl. Ehu pwuhk koasoia me lepin lokaia wet kin kadoadoahk pwehn padahkihong soun wadawado en tehk kanahieng dahme ireo pahn koasoia mwuri. Dahme Koht mahsanih mwuri? E ketin mahsanih: “I wiewiahda mehkoaros en kapw.” Mehlel, Siohwa pahn ketin wiahda wekidekla pwukat ni ahnsou kohkohdo. Ahpw ong ih, inou pwukat pahn uhdahn pweida me kahrehda ni eh ketin mahsanih duwen wekidekla pwukat, e mwomwen me wekidekla pwukat wiawiher.—Wadek Aiseia 46:10.

9. (a) Ia wehwehn en “wiewiahda mehkoaros en kapw”? (b) Dahme pahn wiawihong “lahng” oh “sampah”?

⁹ Nan Kaudiahl 21:​5, Siohwa ketin mahsanih: “I wiewiahda mehkoaros en kapw.” Ia wehwehn met? Nan irelaud wet, e kin dokedoke soahng riau me Siohwa ketin wia. Keieu, Siohwa pahn ketin kasohrehla koasoandi mering wet. Keriau, e pahn ketikihdo koasoandi kapw ehu. Kaudiahl 21:1 mahsanih: “Lahng en mahso oh sampah en mahso sohralahr.” “Lahng en mahso” kin dokedoke koperment kan me mi pahn manaman en Sehdan oh nah ngehn suwed kan. (Mad. 4:​8, 9; 1 Sohn 5:19) Nan Paipel, “sampah” kin kak dokedoke tohn sampah kan. (1 Kron. 16:31; Mel. 97:1) Eri, “sampah en mahso” kin dokedoke aramas suwed kan rahnwet. Siohwa sohte pahn ketin kamwahwihalahte “lahng” oh “sampah” en ahnsou wet, ahpw e pahn ketin kamwomwala douluhl. Ih eri pahn ketin wiliankihdi “lahng kapw oh sampah kapw”—me wehwehki koperment kapw ehu me pahn kaunda aramas pwung kan.

10. Dahme Siohwa pahn ketin wiahda me pahn kapw?

¹⁰ Ni ahl dah teikan me Siohwa pahn ketin wiahda mehkoaros en kapw? (Kaud. 21:5) Siohwa pahn ketin kamwahwihala sampah oh aramas akan pwe ren unsekla. E pahn ketin wiahiong sampah pwon en wiahla wasa kaselel ehu me duwehte mwetuwel en Ihden. Oh e pahn ketin kamwahwihala douluhl emenemen kitail. Me nehtuk, maskun, oh salengepon pahn mwahula, oh pil me mehlar kan pahn iasada.—Ais. 25:8; 35:​1-7.

“MAHSEN PWUKAT ME LELEPEK OH MEHLEL. . . . MAHSEN PWUKAT PWEIDAHR!”

11. Dahme Siohwa ketin mahsanihong Sohn en wia, oh dahme kahrehda?

¹¹ Dahme Koht pil ketin mahsanih pwe kitail en kak likih ih? Siohwa ketin mahsanihong Sohn: “Ntingihedi, pwe mahsen pwukat me lelepek oh mehlel.” (Kaud. 21:5) Siohwa sohte ketin kehkehlingkihongete en “ntingihedi,” ahpw e pil ketikihda kahrepe. E ketin mahsanih: “Pwe mahsen pwukat me lelepek oh mehlel.” Kitail kalahnganki me Sohn peikiong kehkehliko en “ntingihedi.” Kahrehda, kitail kak wadek duwen sapwellimen Koht inou en Paradais oh doudouloale kapai kaselel kan me mi mwohtail.

12. Dahme kahrehda Siohwa mahsanih: “Mahsen pwukat pweidahr!”

¹² Dahme Koht ketin mahsanih mwuri? “Mahsen pwukat pweidahr!” (Kaud. 21:6) Dahme kahrehda Siohwa ketin mahsanih me inou pwukat pweidahr? Pwehki sohte mehkot kak kauhdi en ketin kapwaiada kupwure. Pil mie mehkot me Siohwa ketin mahsanih pwehn kamehlelehiong kitail me sapwellime inou kan pahn uhdahn pweida. Dahkot mwo?

“NGEHI ME ALPA OH OMEKA”

13. Dahme kahrehda Siohwa ketin mahsanih: “Ngehi me Alpa oh Omeka”?

¹³ Nin duwen me kitail koasoiapenehr, pein Siohwa ketin mahsen pak siluh nan kaudiahlo ko me Sohn kilangada. (Kaud. 1:8; 21:​5, 6; 22:13) Ni ehuehu ahnsou ko, Siohwa ketin mahsanih: “Ngehi me Alpa oh Omeka.” Alpa iei tepin mesen nting en lokaiahn Krihs, oh omeka iei lahsen mesen nting. Ni eh ketin mahsanih “Alpa oh Omeka,” Siohwa ketin sewese kitail en wehwehki me ni eh kin ketin tapiada mehkot, e pahn ketin kaimwisekala.

14. (a) Menlau karasahda ahnsou me Siohwa pahn mwomwen mahsanih “Alpa” oh ahnsou me e pahn mwomwen mahsanih “Omeka.” (b) Dahme mahsen kan nan Senesis 2:​1-3 kamehlelehiong kitail?

¹⁴ Mwurin Siohwa ketin kapikada Adam oh Ihp, E ketin padahkihong ira ia kupwure ong aramas oh sampah. Paipel mahsanih me Koht ketin “kupwuramwahwih ira, mahsanih, ‘Kumwa kaparaparala pwe kadaudokamwa kan pahn kousoanla wasa koaros.’” (Sen. 1:28) Ni ahnsowo, Siohwa mwomwen mahsanih “Alpa.” E ketin kasalehda kupwure ni sansal: Ahnsowo pahn kohdo me kadaudok en Adam oh Ihp unsek oh peik kan pahn kadirehla sampah oh kaparadaisihala. Ni ahnsou me met pahn pweida, e pahn mwomwen me Siohwa pahn ketin mahsanih “Omeka.” Mwurin Siohwa eh ketin kanekehla eh kapikada “sampah oh pahnlahng oh audepara kan koaros,” e ketin mahsanih mehkot me kasalehda me kupwure uhdahn pahn pweida. Met kileldi nan Senesis 2:​1-3. (Wadek.) Siohwa ketin mahsanih me rahn keisuhwo wia rahn sarawi ehu ong ih. Ia wehwehn met? Siohwa ketin inoukihda me e pahn uhdahn ketin kapwaiada kupwure ong sampah oh aramas akan. Met pahn uhdahn pweida ni kaimwiseklahn rahn keisuhwo.

15. Dahme kahrehda Sehdan kakete medewe me e kak kauhdi Siohwa en ketin kapwaiada kupwure?

¹⁵ Mwurin Adam oh Ihp uhwongada Koht, ira wiahla aramas dipan oh kadaurohng kadaudokara kan dihp oh mehla. (Rom 5:12) Pwehki met, e pahn mwomwen me aramas unsek kan me pahn peikiong Siohwa sohte kak kadirehla sampah. Ia duwe, Sehdan kak kauhdi Siohwa en ketin kapwaiada sapwellime inou? Ele Sehdan medewe me Siohwa sohte kak ketin kapwaiada sapwellime inou. E kakete medewe me Koht pahn ketin kemehla Adam oh Ihp oh kapikada ehu pwopwoud tohrohr me unsek pwehn ketin kapwaiada kupwureo ong aramas akan. Ahpw ma Koht ketin wia met, Tepilo pahn karaunehki me e ketin likamw. Dahme kahrehda? Pwehki nin duwen me Senesis 1:28 mahsanih, Siohwa ketin mahsanihong Adam oh Ihp me kadaudokara kan pahn kadirehla sampah.

16. Dahme kahrehda Sehdan kak medewe me e kak karaunehki Siohwa eh sohte ketin kapwaiada sapwellime inou?

¹⁶ Ia pil ehu pilipil me Sehdan kakete medewe me Koht pahn ketin wiahda? Ele Sehdan medewe me Siohwa pahn ketin mweidohng Adam oh Ihp en naineki seri, ahpw re sohte pahn unsekla. (Ekl. 7:20; Rom 3:23) Oh ma nein Adam oh Ihp seri kan sohte kak unsekla, Tepilo pahn kak nda me Siohwa sohte ketin kapwaiada kupwureo. Sampah sohte pahn direkihla aramas unsek kan.

17. Ia duwen Siohwa eh ketin kapwungala uhwong me Sehdan oh tepin aramas ko wiahda, oh ia pahn imwilahn met? (Pil kilang kilel.)

¹⁷ Sehdan uhdahn sohte kak medewehda dahme Siohwa pahn ketin wia. Siohwa sapwellimanki koasoandi me keieu mwahu pwehn kapwaiada kupwure mendahki Sehdan, Adam, oh Ihp uhwongada ih. (Mel. 92:5) Siohwa ketin mweidohng Adam oh Ihp en nainekihda seri, oh ni ahl wet, sapwellime mahsen kan pweida. E sohte ketin likamw. Oh Siohwa ketin kasalehda me ni eh mahsanih me e pahn ketin wia mehkot, sohte mehkot kak kauhdi. E ketin tehk mwahu me kupwureo pahn pweida ni eh ketikihda “kadaudoke” men me pahn doarehla kadaudok en Adam oh Ihp me peik kan. (Sen. 3:​15, NW; 22:18) Sehdan sohte mwahn kasik sapwellimen Siohwa koasoandi en pweinen pweipwei sapahlo! Dahme kahrehda? Pwehki koasoandi wet poahsoankihda limpoak me sohte kin roporop. (Mad. 20:28; Sohn 3:16) Sehdan sohte ahneki irair wet pwehki e roporop. Eri dahme pahn wiawi pwehki koasoandi en pweinen pweipwei sapahlo? Ni imwin pahr Kido, kadaudok en Adam oh Ihp me unsek oh peik kan pahn sohsohki paradais nin sampah—duwehte me Siohwa ketin kupwurki nin tapio. Ni ahnsowo, e pahn mwomwen me Siohwa pahn ketin mahsanih, “Omeka.”

IA DUWEN ATAIL KAK KALAUDEHLA ATAIL LIKIH SAPWELLIMEN SIOHWA INOU EN PARADAIS

18. Mehn kamehlel siluh dah kan me Koht ketikihong kitail? (Pil menlau kilang koakono “Kahrepe Siluh en Likih Sapwellimen Siohwa Inou.”)

¹⁸ Nin duwen me kitail koasoiapenehier, mehn kamehlel dah kan me kitail kak ehukihong irail kan me kin peikasalki me sapwellimen Koht inou en Paradais pahn pweida? Keieu, pein Siohwa me ketin wiahda inou wet. Pwuhken Kaudiahl mahsanih: “Meno me ketiket nan mwoahl ketin mahsanih: ‘Kilang! I wiewiahda mehkoaros en kapw.’” E sapwellimanki erpit, manaman, oh ineng en kapwaiada sapwellime inou. Keriau, pweidahn sapwellime inou uhdahn mehlel me kahrehda ong ih, inou wet mwomwen pweidahr. Kahrehda e kak ketin mahsanih: “Mahsen pwukat me lelepek oh mehlel. . . . Mahsen pwukat pweidahr!” Kesiluh, sohte mehkot kak kauhdi Siohwa en ketin kanekehla mehkot me e ketin tapihadahr. Ihme kahrehda e mahsanih: “Ngehi me Alpa oh Omeka.” Siohwa pahn ketin kadehdehda me Sehdan sounlikamw men me sohte kak kauhdi kupwure en pweida.

19. Ni aramas akan ar apwalki kamehlele inou en Paradais, dahme ke kak wia?

¹⁹ Tamataman, ehuehu ahnsou me ke kin ehukihong meteikan nan kalohk duwen sapwellimen Koht inou, ke kin kalaudehla omw likih inou pwukat. Eri ni omw pwurehng wadek ong emen duwen inou kaselelo me kileldi nan Kaudiahl 21:4 oh e nda, “Soahng pwukat kaselel, ahpw I sohte kamehlele me e kak pweida,” dahme ke kak wia? Ke sou wadek oh kawehwehiong irail iretikitik 5 oh 6. Kasalehda ia duwen Siohwa eh kin ketin kamehlelehiong kitail me sapwellime inou pahn pweida, me mwomwen duwehte eh ketin sainihala.—Ais. 65:16.