Watchtower ONLINE LIBRARY
Watchtower
ONLINE LIBRARY
Ponapean
  • PAIPEL
  • SAWASEPEN PAIPEL KAN
  • MIHTING KAN
  • lr irelaud 17 pp. 92-96
  • Ia Duwen Ahmw Kak Peren?

Sohte kasdo ong met

Kupwurmahk, mehkot sapwung en kihda kasdo

  • Ia Duwen Ahmw Kak Peren?
  • Sukuhlki Sang Sounpadahk Lapalapo
  • Ire kan me Duwehte Met
  • Meid Pai Irail kan me Kin Papah “Koht me Peren”
    Kahn Iroir Pakpakairki Wehin Siohwa (Ong Onop)—2018
  • “Ih Kisakis me Keieu Mwahu me I Alehdi”
    Kahn Iroir Pakpakairki Wehin Siohwa (Ong Wehipokon)—2017
Sukuhlki Sang Sounpadahk Lapalapo
lr irelaud 17 pp. 92-96

IRELAUD 17

Ia Duwen Ahmw Kak Peren?

[Kilel nan pali 92]

Dahme kahrehda Siohwa iei “Koht en peren”?

KITAIL koaros sou kin men peren?— Ahpw aramas tohto sohte kin peren. Ke ese dahme kahrehda?— Met pwehki irail saikinte esehla dahme kin wiahda emen en peren. Re kin lemeleme me en ahneki dipwisou tohto iei ahl en peren. Ahpw mwurin arail ahnekihla dipwisou tohto, arail peren sohte kin werei.

Iet me keieu kesempwal. Sounpadahk Lapalapo mahsanih: “Kihwei kaperen sang ale.” (Wiewia 20:35) Eri, ia duwen atail kak peren?— Iei sang ni atail kin kihong soahng kan oh wia soahng kan ong meteikan. Ke kin ese duwen met?—

Kitail pahn song medewe duwen met. Ia duwe, Sises kin mahsanih me emen me kin ale kisakis sohte pahn peren?— Soh, e sohte mahsanih duwen met. Ke sou kin perenki ale kisakis kan?— Koaros kin perenki. Kitail kin perenki ma kitail ale soahng mwahu kan.

Ahpw Sises mahsanih me kihwei kaperen sang ale. Ia ahmw madamadau, ihs me kin keieu kihong aramas soahng kan?— Ei, Siohwa Koht.

Paipel mahsanih me Koht “ketikihong mour oh esingek oh soahng teikan ong aramas akan koaros.” E ketikihong kitail keteu sang nanleng oh ketipin pwe wahnsahpw akan en kak kekeirda oh mie kenetail mwenge. (Wiewia 14:17; 17:25) Ihme kahrehda Paipel kin kahdaneki Siohwa “Koht en peren”! (1 Timoty 1:11, NW) En ketikihong meteikan soahng kan iei mehkot me kin kahrehiong Koht en ketin peren. Ni atail kin kihwei, e kak kahrehiong kitail en pil peren.

[Kilel nan pali 93]

Dahme ke kak wia me pahn kaperen sang ahmw pahn kelehpw kangala koaros?

Eri dahme kitail kak kihong aramas teikan? Ia ahmw madamadau?— Ekei pak ke kin anahne mwohni pwehn pwainda kisakis. Ma ke pahn ale kisakis sang nan sidohwa, ke pahn anahne pwain. Eri ma ke men wia soangen kisakis wet, ke pahn anahne nekidala mwohni lao ke kak pwainda kisakiso.

Ahpw ke sohte anahne pwainda kisakis ahnsou koaros. Karasepe, ma e uhdahn karakar, kep en pihl lemwulemwur ehu pahn uhdahn kansenamwahu. Eri ma ke pahn kihong emen me men nimpil kisakis wet, ke pahn kak diar peren en kihkihwei.

Ehu rahn mwein kowe oh ahmw nohno pahn kak wia pirain en uht. E pahn kaperen. Ahpw dahme ke kak wia me pahn kaperen sang ahmw pahn kelehpw kangala uht pirain ko koaros?— Ke kak kihong ekei emen kompoakepahmw. Ke men song wia met?—

Sounpadahk Lapalapo oh sapwellime wahnpoaron ko koaros kin ese duwen kaperen en kihkihwei. Ke ese dahme re kin kihong aramas teikan?— Re kin kihong irail dahme keieu mwahu nin sampah! Irail ese dahme mehlel duwen Koht oh re perenki ehukihong meteikan rongamwahu wet. Irail kin wia met oh sohte kin ale mwohni sang rehn aramas akan.

Ehu rahno, wahnpoaron Pohl oh tohnpadahk Luk me wia kompoakepah tuhwong lih emen me pil men ahneki peren en kihkihwei. Ira tuhwong ih ni keilen pillap pwoat. Pohl oh Luk kohla wasao pwehki ira rong me e wia wasahn kapakap ehu. Ni ara lella wasao, ira diarada lih ekei me wie kapakap.

Pohl tepida padahkihong lih pwukat duwen rongamwahu en Siohwa Koht oh sapwellime Wehio. Emen rehrail adaneki Lidia oh e wie rongorong kanahieng. Mwurin mwo, Lidia men wia mehkot pwehn kasalehda me e uhdahn perenki rongamwahwo. Ih eri ndaiong Pohl oh Luk: ‘Kumwa kohdo oh kousoan nan imweiet, ma kumwa kamehlele me ei pwoson me uhdahn mehlel.’ Met kahrehiong ira en kohla ni imweo.​—Wiewia 16:13-15.

[Kilel nan pali 94]

Dahme Lidia ndaiong Pohl oh Luk?

Lidia perenki sapwellimen Koht ladu pwukat ara mihmi nan imweo. E poakohng ira pwehki re sewese ih en esehla Siohwa oh Sises oh ia duwen aramas arail kak mour kohkohlahte. E kin kaperenda ih ni eh kihong Pohl oh Luk kenara mwenge oh wasahn kommoal. Eri en Lidia kin kihwei kahrehiong ih en peren pwehki e uhdahn men kihwei. Kitail anahne tamataman duwen met. Emen kak ndaiong kitail me kitail anahne kisikise meteikan. Ahpw ma kitail sohte uhdahn men wia met, atail kihwei sohte pahn kahrehiong kitail en peren.

[Kilel nan pali 94]

Dahme kahrehda Lidia perenki sewese Pohl oh Luk?

Karasepe, ia duwen ma mie kenomw kirahka me ke men kang? Ma I ndaiong uhk me ke anahne kihong ekis kenomw kirahkao emen seri, ke pahn perenki wia met?— Ahpw ia duwen ma mie kenomw kirahka ni ahnsou me ke tuhwong kompoakepahmw men me ke uhdahn poakepoake? Ke sou pahn peren ma pein kowe me medewehda kihong ekis kompoakepahmwo?—

Ekei pak kitail kin uhdahn poakepoake emen oh kitail men kihong ih soahng koaros. Ih pahn duwen atail pepehm ong Koht ni atail kin kalaudehla atail limpoak ong ih.

[Kilel nan pali 96]

Dahme kahrehda lih semwehmwe menet perenki kihla soahng koaros me e ahneki?

Sounpadahk Lapalapo mwahngih emen lih semwehmwe me ahneki soangen pepehm wet. E ketin kilang lih menet nan tehnpas sarawien Serusalem. Liho naineki sens toantoal riaute. Ahpw e kihong koaros nan koakon en meirong ong tehnpaso. Sohte me idingki ih en wia met. Pali laud en aramas akan me mi wasao sohte ese duwen met. E wia met pwehki ih me e men wia oh pwehki e uhdahn poakohng Siohwa. E kaperenda ih pwehki e kak kihla mehkot.​—Luk 21:1-4.

Mie soangen ahl tohto me kitail kak kihwei. Ke kak medewehda ekei?— Ma kitail kin kihwei pwehki kitail men wia, kitail pahn peren. Ihme kahrehda Sounpadahk Lapalapo ketin padahkihong kitail: “Kumwail kihwei.” (Luk 6:38) Ma kitail wia met, kitail pahn kaperenda aramas teikan. Oh kitail me pahn keieu peren!

Kitail pil wadek ekei ire kan duwen peren me kohsang atail kin kihwei nan Madiu 6:1-4; Luk 14:12-14; oh 2 Korint 9:7.

    Pwuhk kan en lokaiahn Pohnpei (1987-2025)
    Log Out
    Log In
    • Ponapean
    • Share
    • Me Ke Mwahuki
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share