Mie Mwaren Koht?
Pasapeng kan me kalapw kohda:
▪ “Mware iei Kauno.”
▪ “Sohte mie pein mware.”
Dahme Sises mahsanih?
▪ “Eri, iet duwen amwail pahn kin kapakap: ‘Samat me ketiket nanleng: Mwaromwi en sarawihla rehn aramas koaros.’” (Madiu 6:9) Sises ketin kamehlele me mie mwaren Koht.
▪ “Ngehi me kahrehiong irail en esei komwi [“mwaromwi,” NW], oh I pil pahn usehla wiewia met pwe limpoak me komw ketin wiahiong ie en mi rehrail, oh I en pil kak mi rehrail.” (Sohn 17:26) Sises ketin kasalehda mwaren Koht.
▪ “Ke solahr pahn kilang ie, ahnsou lao leledo me ke pahn nda, ‘Koht en kupwuramwahwih me ketiket kohdo ni mwaren Kaun-o [“Siohwa,” NW]!’”a (Luk 13:35; Melkahka 118:26) Sises ketin doadoahngki mwaren Koht.
KOHT ketin padahkihong kitail duwen mware. E mahsanih: “Ngehite me KAUN-O [“Siohwa,” NW], omw Koht. Sohte emen koht pahn ahneki lingan en mwarei.”b (Aiseia 42:8) Ni lokaiahn Pohnpei, mwar wet “Siohwa” iei me aramas akan kin ese. Ele ke pahn pwuriamweikihla me ni lokaiahn Ipru, mwar wet kin pwarada pak kid kei nan nting kan en mahs en Paipel. Ni mehlel, e kin pwarada pak tohto sang ahd teikan nan Paipel.
Ekei pahn sapeng peidek wet, “Ia mwaren Koht?” ni ar pahn nda, “Kaun-o.” E sohte pahn wehwe pwehki e pahn duwehte omw sapengki emen me idek, “Ihs me kana nan weiren tango?” a ke pahn nda “Soun tango.” Pasapeng riau wet sohte uhdahn kihda wehwe mwahu pwehki “Kaun-o” oh “Soun tango” kaidehn uhdahn ahd kei.
Dahme kahrehda Koht ketin kasalehiong kitail mware? E ketin wia met pwe kitail en kak esehla ih. Karasepe, kitail kak likwerihki aramas men Ohl, Kaun, Pahpa, de Pahpa Kahlap. Soangen lengileng de daidel pwukat kin kasalehda mehkot duwen ih. Ahpw pein eden aramaso pahn katamankihong kitail soahng koaros me kitail ese duwen ih. Pil duwehte, lengileng pwukat duwehte Kaun-o, Wasa Lapalahpie, Sahm, oh Sounkapikada kin kasalehda irair wekpeseng kan duwen sapwellimen Koht wiewia kan. Ahpw pein mwareo, Siohwa, kin katamankihong kitail duwen soahng koaros me kitail ese duwen ih. Ahpw ia duwen omw pahn esehla Koht ma ke sehse mware?
E uhdahn kesempwal kitail en ese oh pil doadoahngki mwar wet. Dahme kahrehda? Pwehki Paipel mahsanih: “Koaros me kin likweriong mwaren Kaun-o pahn mourla.”—Rom 10:13; Soel 2:32.
[Nting tikitik me mi pah]
a Pwehn kalaudehla omw wehwehki wehwehn mwaren Koht, oh pil dahme kahrehda ekei Paipel kan sohte kin doadoahngki mwar wet, menlau kilang pali 195-197 nan pwuhken Dahme Paipel Uhdahn Padahngki? (What Does the Bible Really Teach?) me Sounkadehdehn Siohwa kan wiahda.
[Kawehwehpen kilel kan nan ehu ehu pali 6]
Kitail kak likwerihki aramas men Ohl, Pahpa, de Pahpa Kahlap. Ahpw pein eden aramaso pahn katamankihong kitail soahng koaros me kitail ese duwen ih
[Nting tikitik me mi pah in Box]
b Sises ketin doadoahngki mahsen kan sang Melkahka 118:26 me doadoahngki lepin lokaia “KAUN-O” pwehn kasalehda me mwaren Koht, Siohwa, kin kileldi nan tepin nting kan en Paipel.