Sises Iei Koht Wasa Lapalahpie?
Pasapeng kan me kalapw kohda:
▪ “Ei, Sises iei Koht Wasa Lapalahpie.”
▪ “Sises iei kasalepen Koht ni paliwar uduk.”
Dahme Sises mahsanih?
▪ “Ma kumwail poakohng ie, kumwail pahn perenki ei kohkolahng rehn Sahmo, pwehki ih me lapalapasang ie.” (Sohn 14:28) Sises mwahngih me ih kaidehn Koht Wasa Lapalahpie.
▪ “I pahn pwuradalahng rehn Semei oh pil Samamwail, rehn ei Koht oh pil amwail Koht.” (Sohn 20:17) Sises sohte mahsanih me iei ih Koht, ahpw e mahsanih me Koht wia Emen tohrohr.
▪ “I sohte kin kihda padahk sang pein ngehi; a Semei me ketin kadariehdo, pein ih me ketin mahsanih dahme I pahn koasoia oh kadehdehda.” (Sohn 12:49) Sapwellimen Sises padahk kan kin pwilisang rehn Koht ahpw kaidehn sang pein ih.
SISES mahsanih me ih iei sapwellimen Koht Ohl, ahpw kaidehn Koht Wasa Lapalahpie. Ma Sises iei Koht, eri ihs me e ketin kapakap ong ahnsou me e ketiket sampah? (Madiu 14:23; 26:26-29) Ia duwe, mehlel Sises kak mwomwehda kapakap ong emen tohrohr?
Ni ahnsou me sapwellimen Sises tohnpadahk riemen peki en ahneki pwais tohrohr nan sapwellime Wehi, e ketin sapeng mahsanih: “Sohte ahiong kilelehdi ihs me pahn mwohd ni palimaun oh palimeingi, pwe met pwaisen irailte me Semei ketin onopadahng.” (Madiu 20:23) Ia duwe, Sises ketin wiahda likamw pwoat ni eh mahsanih me e sohte sapwellimanki manaman en kapwaiada ara pekipeko? Uhdahn soh! Ahpw ni karakarahk e ketin pohnese me Koht me sapwellimanki manaman en wiahda pilipil pwukat. Sises mahsanih me mie soahng kei me ih oh tohnleng teikan sohte mwahngih duwe ahpw Semeo kelehpw.—Mark 13:32.
Ia duwe, ihte ahnsowo me Sises ketiket sampah me Koht ketin lapalap sang ih? Soh. Pwehki mwurin eh pwoula oh iasada, Paipel mahsanih me Sises kin ketin uhpah Koht. Wahnpoaron Pohl kin katamankihong kitail duwen “Koht eh tapwin Krais.” (1 Korint 11:3) Paipel mahsanih me “mehkoaros lao pahn lohdiong pahn manaman en Krais, iei ahnsou me pein Krais pahn ketin uhpahiong Koht me ketikihdiong mehkoaros pah. Eri, Koht ahpw pahn ketin kakaun mehkoaruhsie.”—1 Korint 15:28.
Eri e sansal me Sises kaidehn ih Koht Wasa Lapalahpie. Ih kahrepen e kin mahsanihki duwen Semeo “ei Koht.”—Kaudiahl 3:2, 12; 2 Korint 1:3, 4.a
[Nting tikitik me mi pah]
a Pwehn kalaudehla omw wehwehkihla ire wet, menlau kilang pali 201-204 en pwuhken Dahme Paipel Uhdahn Padahngki? (What Does the Bible Really Teach?) me Sounkadehdehn Siohwa kan wiahda.
[Kawehwehpen kilel kan nan ehu ehu pali 7]
Sises mahsanih me mie soahng kei me ih oh tohnleng teikan sohte mwahngih duwe ahpw Semeo kelehpw