“Met Kaidehn Ei Ahnsoun Mehla”

Ohl emen me tangahki lapalahn sidohsa en wisik kihd sapwungala oh doakoahdi pwopwoud ehu oh ohl emen me mahki sounpar 23 ni arail alialu ni keilen ahlo. Ripoht sang New York kasalehda me pwopwoudo mehla ni ahnsowohte ahpw ohl pwulopwulo lipwongmaskihla. Ahnsou me e kehnda wasa oh kilangada dahme wiawi, e nda: “I sohte kak kamehlele me met wiawi. Koht, komw ketin sewese ie. Met kaidehn ei ahnsoun mehla.”

MWEIN ke kin rong soangen koasoi pwukat. Ahnsou me emen pitsang kahpwal ehu, aramas kin nda, ‘Kaidehn eh ahnsou.’ Ahpw ma emen mehkihla aksident ehu, re kin uhd nda, ‘Iei eh ahnsou’ de ‘Kupwuren Koht.’ Sohte lipilipil ma re kin nda “paisuwed” de “kupwuren Koht,” irail ahneki madamadau tehieu. Aramas tohto kin kamehlele me dahme kin wiawi nan arail mour kin koasoandier oh sohte mehkot me re kak wiahiong. Kaidehn ihte ahnsou me mehla oh aksident wiawi me aramas kin ahneki soangen madamadau wet. Oh met kaidehn madamadau kapw ehu.

Karasepe, mehn Papilon kan mahs kamehlele me mwekimwekid en usu kan kin koasoanehdi dahme pahn wiawi ong arail mour. Kahrehda irail kin kilengdalahng pahnlahng pwehn rapahki kilel kan me pahn kaweidih irail. Mehn Krihk oh mehn Rom kan kin kaudokiong koht lih akan me ahneki manaman en wahdo paiamwahu de paisuwed ong aramas. Re kamehlele me ekei ahnsou, koht lih pwukat kak manaman sang arail koht kehlail kan me duwehte Zeus oh Jupiter.

Nan Eisia, irail me iang sarawi en Hindu oh Buddhist kin kamehlele me dahme kin wiawi ong arail mour met iei imwilahn dahme irail wia nan arail mour en mahso. Oh arail wiewia kan met pahn koasoanehdi dahme pahn wiawi ong arail mour en mwuhr. Pelien lamalam teikan me iangahki pwihn kan me dene irail Kristian pil kin padahngki soangen padahk me duwehte atail mour kin koasoandier.

Eri, e sohte kapwuriamwei me mendahki aramas tohto kin lemeleme me irail marain sang aramas en mahs, me tohto kin kamehlele me imwilahn arail mour kin koasoandier oh sohte mehkot me re kak wiahiong. Ih met me ke kin kamehlele? Ia duwe, soahng kan me pid mour, wiewia kan, atail pweida kan oh paisuwed kan, oh pil atail ipwidi oh mehla kin koasoandier? Kitail pahn kilang ia duwen Paipel kak sewese kitail en sapengla peidek wet.

[Kawehwehpen kilel kan nan ehu ehu pali 3]

Ken Murray/New York Daily News