“Pil Apwoatete”

ALLEN ni eh sounpar 11, ih oh ienge ko kin mwadong nan welo oh kin alasang aramas kei me re kin kilang nan kasdo.a Aramas ko me re alasang sohte uhdahn mie, ahpw sakau en wai me Allen oh ienge ko kin nim uhdahn sakau.

Tony sounpar 40 ahnsou me eh kang sakau lalaudla. Mahs e kin nimala kep ehu de riau ni soutik kan ahpw mwuhr e kin lel kep limau de weneu. Mwuhr e sohla kin taman meh depe e nimala nan rahn ehu.

Allen rapahki sawas ong eh kahpwal en kamamsakau. Tony sohte ale sawas sang eh peneinei oh kompoakepah kan me kin poakohng ih. Allen momour rahnwet oh e koasoiahda duwen eh mour, ahpw Tony mehla sounpar kei samwalahro pwehki e sakaula oh aksident nan ehu sidohsa.

Mehnda ma emen kin kelehpw kamamsakau, ahpw kahpwal kin lelohng meteikan oh pali laud en ahnsou e kin imwila suwed.b Kamamsakau kin kalapw kahrehda lokaia kamedek, kamakam, kamaramas, aksident kan, kahpwal ni ahnsoun doadoahk oh pil soangsoangen soumwahu kan. Kamamsakau kin kahrehiong aramas en kesehla tala rar kei nan ehu pahr. E pil kin kahrehda kahpwal en pepehm oh kahpwal teikan ong emenemen, peneinei oh pil seri kan.

Ehu pwihn me kin apwalih palien roson koasoia: “Kaidehn koaros me kin kalapw nim sakau kin ahneki kahpwal en sakau, oh kaidehn koaros me kin ahneki kahpwal en sakau kin sakau rahn koaros.” (U.S. National Institutes of Health) Tohto irail me sohte kin kamamsakau tepidahr kang sakau laud ni arail sohte pohnese duwen met. Ekei sohte kin sakau ahnsou koaros ahpw ni ahnsou me re kin nim sakau, re kin kak kangala tohtohsang kep limau pak ehute.

Ma ke pilada ken kang sakau, ia uwen me ke pahn nda me e daulihalahr? Ia duwen omw kak ese iahd me ke sohte pahn pwurehng nim ehu? (Lepin Padahk 23:29, 30) Ire kan mwurin met pahn kasalehda ire kan me kak sawas.

[Nting tikitik me mi pah]