Ia Uwen Laud en Omw Ese Koht?
Ma emen me lapalap ndaiong uhk me ke kak doadoahngki edeo ni omw pahn koasoiong, ke sou pahn kalahnganki oh perenkihda? Aramas akan kin kalapw likwerikin lapalap akan arail lengileng me duwehte “Maing President” de “Maing Isoko.” Eri ma emen me lapalap ndaiong uhk, “Menlau doadoahngki edei,” ke uhdahn pahn perenkihda.
KOHT mehlelo ketin padahkihong kitail nan sapwellime Mahsen, Paipel: “Ngehite me KAUN-O [“Siohwa,” NW], omw Koht. Sohte emen koht pahn ahneki lingan en mwarei.” (Aiseia 42:8) Mendahki e sapwellimanki lengileng tohto me duwehte “Sounkapikada,” “Wasa Lapalahpie,” oh “Kaun Lapalap,” ahnsou koaros e kin ketin wauneki sapwellime ladu kan ni eh kin ketin mweidohng irail en doadoahngki mware, “Siohwa.”
Karasepe, ehu ahnsowo, soukohp Moses patohwanohng Koht: “Maing, [Siohwa].” (Eksodus 4:10)a Ni kasarawihen tehnpas en Serusalem, Nanmwarki Solomon tapiada eh kapakap oh doadoahngki mahsen pwukat: “Maing [Siohwa].” (1 Nanmwarki 8:22, 23) Oh ni ahnsou me soukohp Aiseia patohong Koht pwehn wiliandi mehn Israel kan, e patohwan: “Komwi, Maing [Siohwa] me uhdahn samat.” (Aiseia 63:16) E sansal me Samatail nanleng kin ketin luke kitail en doadoahngki mwareo.
Mehlel me doadoahngki mwaren Siohwa kesempwal ahpw en uhdahn esehla ih kin laudsang ihte ese mwareo. Me pid duwen emen me poakohng ih oh likih ih, Siohwa ketin inoukihdi: “I pahn ketin pere ih pwehki e esehla mwarei.” (Melkahka 91:14, NW) E sansal me soahng tohto kin pidada en esehla mwaren Koht pwehki e wia mehkot kesempwal ong emen en kak ale doarepe sang rehn Koht. Eri, dahme ke anahne wia pwehn kalaudehla omw esehla Siohwa?
[Nting tikitik me mi pah]
a Nan iren Paipel wet oh pil ire kan nan 1 Nanmwarki 8:22, 23 oh Aiseia 63:16, Paipel ni mahsen en Pohnpei kin kasalehda me sapwellimen Siohwa ladu kan kin likwerihki “KAUN.” Ahpw ni ahnsou me Paipel tepin ntingda, e kin doadoahngki mwaren Koht “Siohwa” nan ire pwukat.