Padahk Mehlel Kak Wekidala Omw Mour
ELE KE kin rong de sukuhlki ehu likamw pwukat duwen Koht me pwuhk wet kasalehda. Mwein apwal ken wekidala omw pelien lamalam pwehki ahnsou reirei ke kin kamehlele padahk likamw pwukat.
Met kin kak wiawi. Ekei pelien lamalam sohte kin pwungki ken kapahrekihong arail padahk kan dahme Paipel padahngki. Pil ekei kin song en utung arail padahk likamw kan ni arail kin nda me e apwal en wehwehkihla Paipel, de e sohte wiawihda pwe koaros en wehwehki. Pali laud en sapwellimen Sises tohnpadahk kan sohte iang sukuhl laud, ahpw re kin mwadang koledi dahme e kin ketin padahngki.—Wiewia 4:13.
Mwein ke kin masak kasawih mwahu padahk kan me ke kin kamehlele pwehki ke medewe me met kasalepen sohte pwoson. Ahpw ia duwe, mehlel Koht pahn kupwursuwedkihla omw pahn kasawih audepen Paipel, sapwellime mahsen ong aramas akan, pwe ken wehwehkihla dahme e ketin kupwurki ken wia? Soh. Sapwellime mahsen kin kangoange iuk ken pein tehk mwahu iren Paipel kan. E mahsanih: “Esehda dahme kupwuren Koht—dahme mwahu, oh dahme e kin ketin kupwurperenki, oh dahme unsek.”—Rom 12:2.
E kesempwal en rapahki dahme mehlel duwen Koht, kaidehn ihte pwe ken sukuhlkihdi mehkot, ahpw pwehki met kak kamwahwihala omw mour. (Sohn 8:32) Deanne, me kitail koasoiapene nin tapio, kin kamehlele Mahsen en Koht ahnsouwet. E koasoia: “I sohte kin ese me iren Paipel kan inenen sansal lao I tepida onopki. Met I eseier me Siohwa kaidehn Koht emen me kin dohsang kitail, ahpw iei Semei nanleng me limpoak. Met mieier katepen ei mour.”
Mwein ke kin onopki Paipel mahs ahpw ke sohte kin pehm me ke paiekihda. Ma iei, a ke dehr uhdihsang omw onop. En wehwehkihla Paipel mwurin omw sukuhlkier likamw tohto duwen Koht, kin duwehte omw doadoahngki ehu pwuhken kaweid sapwung oh nantihong kamwahwihala misihn ehu. Ele ke kamwahwihala ekei wasa nan misihno ahpw mwuri ke uhdi pwehki ke pwunodikihda omw sohte kak kamwahwihala misihno pwon. E pahn mwahu ma ke doadoahngki ehu pwuhken kaweid me pwung pwe ken kamwahwihala misihno pwon.
Ke men doadoahngki pwuhk ehu me audepe pwung oh sukuhlki me mehlel duwen Koht? Se luke iuk ken tuhwong Sounkadehdehn Siohwa kan nan omw kousoan de ntinglahng adres me karanih omw wasa me mi pali 4 en kisin pwuhk wet pwe ken onopki Paipel ni soh isepe.
[Blurb nan pali 9]
“Esehda dahme kupwuren Koht—dahme mwahu, oh dahme e kin ketin kupwurperenki, oh dahme unsek.”—ROM 12:2.