Kristian Akan Kin Kaudok Ki Ngehn Oh Mehlel
“Ngehn ehu Koht, oh me kin kaudokiong re en kaudongki ngehn oh mehlel.”—SOHN 4:24.
1. Soangen kaudok dah me kin kaperenda Koht?
SAPWELLIMEN Siohwa Iehros, Sises Krais, kin kawehwehda ni sansal duwen soangen kaudok me kin kaperenda Seme nanleng. Nin doken Sises wia kadehde limpoak ong lihen Sameria men mpen pwarer ehu limwahn kahnimw en Saikar, e mahsanih: “Kumwail mehn Sameria kan sohte ese ihs me kumwail kin kaudokiong; a kiht mehn Suhs, se ese ihs ih me se kin kaudokiong; pwe komouro kin pwarodo sang mehn Suhs akan. Ahpw, ahnsou pahn leledo, oh e lelehr, me tohn kaudok mehlel kan pahn kaudokiong Sahmo ni ngehn oh mehlel, pwe iei soangen tohn kaudok kan me Sahmo ketin kupwurki en kaudokiong ih. Ngehn ehu Koht, oh me kin kaudokiong re en kaudongki ngehn oh mehlel.” (Sohn 4:22-24) Iaduwen atail wehwehki mahsen pwukat?
2. Ahn mehn Sameria kaudok kin poahsoankihda dah?
2 Mehn Sameria kan kin ahneki madamadau sapwung ong duwen kaudok. Irail kin kamehlele me audepen tepin pwuhk limaute en Paipel me pwilisang rehn Koht—oh pwuhk limau pwukat anahne pahrekiong pein arail kawehwe, kahrehda e adaneki “Samaritan Pentateuch.” Edetehn mehn Sameria kan sohte uhdahn ese Koht, irail mehn Suhs akan ale sohso en ahneki loalokong pwung sang Koht. (Rom 3:1, 2) Irail mehn Suhs oh mehteikan me kin lelepek kan kin kak perenki irair en keniken rehn Siohwa. Ahpw, soangen pwukoah dah me met kihong irail?
3. Dahme anahn pwe aramas en kak kaudokiong Koht “ki ngehn oh mehlel”?
3 Pwehn kak kaperenda Siohwa, dahme mehn Suhs, mehn Sameria, oh pil meteikan en kawao anahne wia? Irail anahne kaudokiong Koht “ki ngehn oh mehlel.” Pil kitail en wia duwehte. Mehnda ma papah Koht en wiawi ni ngenen ngoang oh pil pahn tepisang nan mohngiong limpoak oh pwoson, kaudokiong Koht ki ngehn kin wehwehki me kitail anahne mweidohng ngehn sarawi en kahluwa oh kaweid atail mour. Sang ni atail kin pein onop oh doadoahngki sapwellimen Koht mahsen, atail madamadau kan oh pepehm akan pahn kak pahrekiongala sapwellimen Koht. (1 Korint 2:8-12) Pwe Siohwa en kak kupwurperenki atail kaudok, e pahn wiawi ni irair en padahk mehlel. Atail kaudok anahne pahrekiong dahme Paipel kin kasalehda duwen Koht oh sapwellime koasoandi kan.
Padahk Mehlel Kak Dierek
4. Iaduwen ekei kin kilang duwen mehlel?
4 Ekei tohnsukuhl en madamadau en aramas kin nda me padahk me uhdahn mehlel sohte mweimweiong aramas en ese. Ni mehlel, soun nting en Sweden me ede Alf Ahlberg ntingihdi: “Peidek tohto ong palien madamadau en aramas kin wiawi ni ahl ehu me e kin apwal en kihda pasapeng me wehwe mwahu.” Edetehn ekei aramas kin nda me mehkot mehlel kin ongete irair en ahnsouohte, iaduwen—met me mehlel? Sises Krais sohte kamehlele met.
5. Dahme kahrehda Sises ketikihdo nin sampah?
5 Kitail mwomwehda mahs me dene kitail iang kilang dahme wiawi ni ahnsou pwukat: Met tepin pahr 33 C.E., oh Sises wie kesikesihnen mwohn Kepina en Rom Pontius Pailet. Sises mahsanih ong Pailet: “Ong ni kahrepe wette me I kohkidohng sampah, pwe I en kadehdehda duwen padahk mehlel.” Pailet eri idek: “Dahkot padahk mehlel?” Ahpw e sohte awih sapwellimen Sises pasapeng.—Sohn 18:36-38, NW.
6. (a) Ia wehwehn “padahk mehlel”? (b) Kehkehlik dah me Sises ketikihong sapwellime tohnpadahk kan?
6 “Padahk mehlel” wehwehki “patpenehr soahng kei, irair ekei oh wiewia mehlel kan.” (Webster’s Ninth New Collegiate Dictionary) Ahpw, iaduwen—Sises kin kadehde oh oaralapiehda soangen me mehlel koaros? Soh. Sapwellime irair en kadehde kin dokedoke mehkot tehieu me mehlel. E kilelehiong sapwellime werek kan en kadehde padahk mehlel wet, ni ah padahkiong irail: “Kumwail eri kohwei wasa koaros oh padahkiong tohn wehi kan koaros; pwe re en wiahla nei tohnpadahk; papidaisihirailla ni mwaren Sahm oh Sapwellime oh Ngehn Sarawi, oh kehkehlingkihong irail re en peikiong mehkoaros me I koasoanehdiong kumwail.” (Madiu 28:19, 20) Mwohn “koasoandi wet ah pahn imwisekla,” sapwellimen Sises tohnpadahk lelepek kan pahn lohki “padahk mehlel duwen Rongamwahu” nan sampah pwon. (Kalesia 2:14) Met pahn wiawi pwe mahsen en Sises kak pweida: “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros—a mwuri, imwin sampah ahpw pahn kohdo.” (Madiu 24:14) Kahrehda, e kesempwal kitail en kasawihada irail oko me padahkiong wehi kan koaros duwen me mehlelo ni arail kin kalohki Rongamwahu en Wehio.
Iaduwen Atail Kak Sukuhliki me Mehlelo
7. Iaduwen ahmw pahn kadehde me Siohwa iei me utupen padahk mehlel?
7 Siohwa iei Ih me utupen padahk mehlel en pali ngehn—dahme mehlel duwen Ih oh sapwellime kupwur kan. Ni mehlel, sounmelkahka Depit kin ekerki Siohwa: “Koht en me mehlelo.” (Melkahka 31:5; 43:3) Sises pohnese me sapwellimen Semeo mahsen iei me mehlelo, oh ih pil mahsanih: “Soukohp ako ntingihedier, ‘Irail koaros pahn ale padahk sang rehn Koht [“Siohwa,” NW].’ Emenemen me rong Sahmo oh padahngkihsang, e kin kohdo rehi.” (Sohn 6:45; 17:17; Aiseia 54:13) Eri, e sansal me irail oko me raparapahki me mehlelo pahn uhdahn ale kasukuhl sang rehn Siohwa, me iei Soun Kasukuhl Keieu Lapalap. (Aiseia 30:20, 21) Irail me kin raparapahki me mehlelo anahne alehda “loalokong me pid duwen Koht.” (Lepin Padahk 2:5) Oh Siohwa kin ketikihda kasukuhl ni limpoak oh pil ketikihda me mehlel ni soangsoangen ahl ekei.
8. Ni ahl dah kan me Koht kin ketin padahki de kawehwe duwen me mehlelo?
8 Karasepe, sang ni ah ketin doadoahngki tohnleng kan, Koht ketikihdohki Kosonnedo ong mehn Israel. (Kalesia 3:19) Sang nan ouraman kan, E ketin inoukihong Eipraam oh Seikop kapai kan. (Senesis 15:12-16; 28:10-19) Koht pil ketin mahsen sang nanleng, me duwehte me E ketin wia ni ahnsou me Sises papidais oh mahsen pwukat leldihdo nin sampah: “Met nei ohl kompoake, me I kin kupwurperenki.” (Madiu 3:17) Kitail pil kak kapingki me Koht kin ketin mahsanih dahme mehlel sang ni ah ketin kamwekid soun nting en Paipel kan ki ngehn sarawi. (2 Timoty 3:16, 17) Sang ni atail kin ale kasukuhl sang ni mahsen en Koht akan, kitail kak “pwoson me mehlelo.”—2 Deselonika 2:13.
Me Mehlelo oh Sapwellimen Koht Ohl
9. Iaduwen Koht a ketin doadoahngki sapwellime ohlo pwehn kasalehda padahk mehlel?
9 Koht ketin doadoahngki sapwellime Ohl, Sises Krais, pwehn kasalehda padahk mehlel ong tohnsampah. (Ipru 1:1-3) Ni mehlel, Sises padahkki dahme mehlelo ni ahl me sohte emen tohrohr wiahier sang mahs. (Sohn 7:46) Pil mwurin ah ketidahla nanleng, e kasalehda me mehlelo sang rehn Semeo. Karasepe, wahnpoaron Sohn ale “kaudiahl ehu sang rehn Sises Krais, me Koht ketikihong, pwehn kasalehong sapwellime ladu kan mehkan me ahnsou mwadang pahn wiawi.”—Kaudiahl 1:1-3.
10, 11. (a) Padahk mehlel me Sises kin kadehde kin pid dah? (b) Iaduwen Sises ah kahrehong me mehlelo en pweida?
10 Sises mahsanihong Pontius Pailet me e ketidohng sampah pwe en kadehde me mehlelo. Nin doken ahnsou me e kalohk, Sises kasalehda me soangen padahk mehlel wet kin pid kasarawihalahn sapwellimen Siohwa kaundahn lahng oh sampah ki Wehin Koht me Krais wia Nanmwarki. Ahpw, kadehde me mehlelo kin anahne Sises en ihte kalohk oh padahk. Sises wiahkihla me mehlelo en wiahla mehkot me pein ih kin kapwaiada ah kaidehn koasoiahte. Nin duwen met, wahnpoaron Pohl ntingihdi: “Eri, kaleke emen wiahda kosonned me pahn pid dahme kumwail en kang de nim, de iren rahn sarawi kan, de kaudok en maram pwul kan, de rahnen Sapad kan. Soahng pwukat koaros mwetehn soahng me pahn pwarodo, a uhdahn waro, iei Krais.”—Kolose 2:16, 17.
11 Ehu ahl me dahme mehlelo pweida iei sang ni kokohp en ipwidi en Sises nan Pedleem ah pweida. (Maika 5:2; Luk 2:4-11) Me mehlelo pil pweida ni kokohp en Daniel me pid iahd Mesaia pahn pwarada oh kokohp wet pweida ni imwin wihk 69 me wehwehki ‘wihk en pahr.’ Met wiawi ni ahnsou me Sises toukihda pein ih ong Koht ni papidais oh keikihdi ngehn sarawi nan pahr 29 C.E.—ni ahnsou me kokohpo kasalehdahr. (Daniel 9:25; Luk 3:1, 21, 22) Me mehlelo pi pweida ni Sises kalokalohki Wehin Koht nin duwen sounkalohk men. (Aiseia 9:1, 2, 6, 7; 61:1, 2; Madiu 4:13-17; Luk 4:18-21) Mehlelo pil pweida ni ahnsou me Sises pwoula oh iasada.—Melkahka 16:8-11; Aiseia 53:5, 8, 11, 12; Madiu 20:28; Sohn 1:29; Wiewia 2:25-31.
12. Dahme kahrehda Sises kak mahsanih me: ‘Ngehi me mehlelo’?
12 Pwehki padahk mehlel kin pidada laud duwen Sises Krais, e kak mahsanih: “Ngehi me ahl, ngehi me mehlel, ngehi me mour; sohte me kak kolahng Semei ma soh ngehi.” (Sohn 14:6) Aramas akan kin saledekla ni pali ngehn ni arail kin “uhpalihkihda me mehlelo” sang ni ahr kin kamehlele pwukoahn Sises nan sapwellimen Koht koasoandi kan. (Sohn 8:32-36; 18:37) Pwehki aramas me rasehng sihpw kan arail pwungihlahr me mehlelo oh idawehn Krais ni pwoson, irail pahn ale mour soutuk.—Sohn 10:24-28.
13. Kitail pahn kasawihada irair 3 dah kan me pid padahk mehlel?
13 Poahsoan en padahk mehlel me Sises oh sapwellime tohnpadahk kan kin padahki kin pid duwen pwoson en Kristian mehlel akan. Irail “me peikiong pwosono” kin “momourki padahk mehlelo.” (Wiewia 6:7; 3 Sohn 3, 4) Eri, ihs irail akan me kin momourki padahk mehlel nan rahnwet? Ihs irail akan me kin padahkiong me mehlelo ong wehi kan koaros? Ni atail pahn sapeng soangen peidek pwukat, kitail pahn tehk kanahieng mahs irail Kristian en mahs oko oh kasawih padahk mehlel en Paipel me pid (1) poahsoanpen pwoson (padahk kan), (2) wiepe de mwomwen wia kaudok, oh (3) wiewiahn aramas.
Padahk Mehlel oh Poahsoanpen Pwoson
14, 15. Dahme ke pahn ndahki elen madamadau en Kristian en mahs oko oh Sounkadehdehn Siohwa kan ohng Pwuhk Sarawi?
14 Sapwellimen Siohwa Mahsen me ntingihdi wia mehkot inenen kesempwal ong Kristian akan en mahs. (Sohn 17:17) E wia arail mehn kaweid ong dahme re kamehlele oh dahme irail kin wia. Clement en Aleksandria en senturi keriau oh kesiluh koasoia: “Irail oko me nannantihong wehwehkihla mwahu, sohte pahn uhdi sang raparapahki me mehlelo, lao lel re ale mehn kadehde mehlel en dahme pein irail kamehlele me mih nan Nting Sarawi kan.”
15 Duwehte Kristian akan en mahs oko, Sounkadehdehn Siohwa kan kin inenen kesempwaliki audepen Paipel. Re kamehlele me “audepen Pwuhk Sarawi unsek pwilisang rehn Koht oh mwahu ong padahk.” (2 Timoty 3:16) Eri, kitail tehkpene ekei padahk me Kristian en mahs oko kamehlele oh karasahdohng dahme sapwellimen Siohwa ladu kan nan rahnwet sukuhlikihier sang ni arail onop Paipel oh wiahki me ihte pwuhken kaweid.
Dahme Mehlel Me Pid Duwen Soul
16. Dahme mehlel me pid duwen soul?
16 Pwehki tepin Kristian akan ahr kamehlele dahme Pwuhk Sarawi mahsanih, irai kin padahki me mehlel duwen soul. Irail ese me “aramas wiahla soul momour” ni ahnsou me Koht kapikada ih. (Senesis 2:7) Oh pil, irail kamehlele me soul en aramas kin mehla. (Esekiel 18:4; Seims 5:20) Irail pil ese me ‘aramas mehla kan sohte kin kehn wasa douluhl.’—Eklesiasdes 9:5, 10.
17. Iaduwen ahmw pahn kawehwe duwen koapworopwor en me mehlahr akan?
17 Ahpw, sapwellimen Sises wahnpoaron akan koapworopworki mehlel me mehlahr akan me mihmi nan sapwellimen Koht irair en kataman pahn iasada, de pwurehng mourda. Pohl kasalehda mwahu irair en pwoson mehlel wet ni a mahsanih: “I koapworopworki Koht . . . me pahn mie iasadahn koaros me pwung oh me sapwung kan.” (Wiewia 24:15) Pil mwuridohsang ekis, Minucius Felix, aramas emen me nda me ih emen Kristian, ntingihdi: “Ihs me nohn pweipwei oh sohte ah madamadau me kak nda me aramas me Koht me ketin wiahda, ahpw dene E sohte kak pwurehng wiahda ih en ahneki paliwar kapw?” Sounkadehdehn Siohwa kan kin duwehte tepin Kristian oko pwe irail kin kolokolete me mehlelo—padahk mehlel—duwen aramas me pid soul, mehla oh kaiasada. Ni ahnsou wet, kitail kak koasoia duwen irair akan me kin wia mehn kadehde ihs Koht oh Krais.
Padahk Mehlel oh Trinity
18, 19. Dahme kahrehda kitail kak ndahki me Trinity kaidehn padahk en Pwuhk Sarawi?
18 Tepin Kristian akan sohte kin wiahki Koht, Krais oh ngehn sarawi wiahda Trinity. The Encyclopædia Britannica koasoia: “Lepin lokaia “Trinity” oh pil padahk en Trinity sohte pwarada nan Kadehde Kapw, pil Sises oh sapwellime wahnpoaron oh tohnpadahk kan koaros sohte kin songen uhwong “Shema” [kapakap en Ipru] me mihmi nan Kadehde Mering: ‘Israel, kumwail en tamataman met: Kauno, atail Koht, Kaun tehmen’ (Deuderonomi 6:4).” Kristian akan sohte kin iang kaudokiong ahn mehn Rom koht moahng siluh de pil arail koht teikan. Irail kapwaiada mahsen en Sises me Siohwa kelepw me kitail en pwongih. (Madiu 4:10) Oh pil, irail kin kamehlele mahsen en Krais: “Sahmo lapalapsang ie.” (Sohn 14:28) Sounkadehdehn Siohwa kan pil kolokolete soangen padahk pwukat te nan rahnwet.
19 Sapwellimen Sises tohnpadahk ko wehwehki mwahu wekpeseng en Koht, Krais oh ngehn sarawi. Ni mehlel, re kin papidaisih tohnpadahk kapw kan (1) ni mwaren Sahm, (2) ni mwaren sapwellime ohl, oh (3) ni mwaren ngehn sarawi, ahpw kaidehn ni mwaren Trinity. Pil duwehte Sounkadehdehn Siohwa kan, irail padahki padahk mehlel sang nan Pwuhk Sarawi oh ese wekpeseng en Koht, sapwellime ohl, oh ngehn sarawi.—Madiu 28:19.
Padahk Mehlel oh Papidais
20. Dahme aramas akan anahne wehwehki mwohn irail pahn kak papidaisla?
20 Sises kehkehlingkihong sapwellime tohnpadahk kan en katohnpadahkihla aramas ni arail pahn padahkiong aramas akan padahk mehlel. Pwe ren kak papidaisla, irail anahne wehwehki tepin padahk en Pwuhk Sarawi kan. Karasepe, irail uhdahn pahn pohnese duwen manaman me Sahmo oh Sapwellime Ohl, Sises Krais, sapwellimaniki. (Sohn 3:16) Aramas akan me pahn papidaisla kan pil anahne wehwehki me ngehn sarawi kaidehn aramas emen ahpw ngehn sarawi iei sapwellimen Koht manaman me E kin ketin doadoahngki.—Senesis 1:2, footnote.
21, 22. Dahme kahrehda ke kak ndahki me papidais mehkot me ongete irail me pwosonlahr?
21 Tepin Kristian akan kin papidaisih irail kante me wehwehki padahk mehlel oh koluhkihlahr diparail akan oh eri inoukihong Koht arail mour pwehn wia kupwure. Mehn Suhs oh mehn liki kan (me iangala pelien lamalam en mehn Suhs) me pokonpenehr nan Serusalem nan Pendekos 33 C.E.—irail pwukat marainkihlahr palien Pwuhk Sarawi ni lokaiahn Ipru. Ni arail rong wahnpoaron Piter ah koasoia duwen Sises me iei ih me Mesaia, mpen aramas 3,000 “pwosonla eh padahk” oh “papidaisla.”—Wiewia 2:41; 3:19–4:4; 10:34-38.
22 Papidais en Kristian kin wiawi rehn irail me pwosonlahr akan. Aramas akan nan Sameria alehdahr padahk mehlel, oh “ni arail pwosonlahr mahsen en Pilip oko, me padahkiong irail duwen Rongamwahu en Wehin Koht oh pil mwaren Sises Krais, irail eri papidaislahr, koaros ohl oh lih.” (Wiewia 8:12, NW) Ohlen Idiopia, nin duwen a wia mehn liki men me kin poadidi oh ese Siohwa, e kamehlelehla sapwellimen Pilip padahk kan me pid kokohp en Mesaia me pweidahr, oh mwuri, e papidaisla. (Wiewia 8:34-36) Mwuri, Piter padahkiong Kornilius oh mehn liki teikan me “Koht kin ketin kupwurperenki mehmen me kin lemmwiki, oh pil wiewia me pwung” oh mehmen me kin pwoson Sises Krais pahn ale lapwepen dipe kan. (Wiewia 10:35, 43; 11:18) Mepwukat koaros pahrekiong dahme Sises kehkehlik en wia doadoahk en ‘katohnpadahk, padahkiong irail en kapwaiada mehkoaros me e padahkiong irail.’ (Madiu 28:19, 20; Wiewia 1:8) Sounkadehdehn Siohwa kan kin kolokol teng soangen koasoandi pwukat, wehwehki irail kin papidaisih ihte irail kohte me wehwehkihlahr poahsoan en padahk kan en Pwuhk Sarawi oh pil inoukihong Koht arail mour.
23, 24. Ia wiepen papidais me pwung ong Kristian akan?
23 Duhdi pahn pihl iei wiepe pwung en papidais ong irail me pwosonlahr akan. Mwurin Sises ah papidaisla nan Pillap Sordan, e “ketida sang nan pihlo.” (Mark 1:10) Ohlen Idiopia pil papidaisla “nan lehn pihl ehu.” Ih oh Pilip “ketidilahng nan pihlo” oh mwuri ira “pwurada sang nan pihlo.” (Wiewia 8:36-40) Pwuhk Sarawi kin karasahiong papidais duwehte seridi en mehla oh pil kin kasalehda duhdi pahn pihl.—Rom 6:4-6; Kolose 2:12.
24 Pwuhk me oaralap koasoia The Oxford Companion to the Bible koasoia: “Kawehwe kan en papidais me mih nan Kadehde Kapw kin kasalehda me aramas me papidais kin kaduhdi pahn pihl.” Nin duwen pwuhk en France ieu me oaralap koasoia Larousse du XXe Siècle (Paris, 1928), e koasoia me “tepin Kristian akan kin papidais ni arail kin kaduhdi paliwar unsek pahn pihl ong wasa kan me pihl kin dierek ie.” Oh pwuhk me ede After Jesus—The Triumph of Christianity ntingihdi: “Ni mengei, papidais kin anahne aramaso en wehkada me e ahneki pwoson oh mwuri ahpw pahn kaduhdi paliware pwon pahn pihl ni mwaren Sises.”
25. Dahme kitail pahn koasoiapene nan artikel en mwuhr?
25 Ire kesempwal pwukat me poahsoankihda padahk mehlel kan en Paipel oh wiewia kan en tepin Kristian akan kin wiahte mehn karasepe. Kitail pahn kak kihda irair akan me kak karasapene dahme irail kamehlele kan oh dahme Sounkadehdehn Siohwa kan kin kamehlele. Nan artikel en mwuhr, kitail pahn koasoiapene pil ekei ahl akan me kasalehda ihs irail akan me kin padahkiong aramas teikan padahk mehlel.
Iaduwen Ke Pahn Sapeng?
• Soangen kaudok dah kan me Koht kin kupwurki?
• Iaduwen padahk mehlel pweida sang rehn Sises Krais?
• Dahme mehlel me pid soul oh mehla?
• Iaduwen papidais en Kristian a kin wiawi, oh dahme irail me pahn papidaisla anahne wehwehki?
[Kilel nan Pali 11]
Sises mahsanih ong Pailet: ‘I kohkihdohng sampah pwe I en kadehdehda duwen padahk mehlel’
[Kilel nan Pali 12]
Ke kak kawehwehda dahme kahrehda Sises mahsanih: ‘Ngehi me mehlel’?
[Kilel nan Pali 13]
Dahme pid me mehlel nin duwen papidais en Kristian emen?