“Me Mehlelo Pahn Kasaledengkumwailla”
“Kumwail pahn dehdehki dahme mehlelo, oh me mehlelo pahn kasaledengkumwailla.” Sises mahsanih met ni ah kin padapadahk ong pokon en aramas kan nan tehnpaso nan Serusalem. (Sohn 8:32) Sapwellimen Sises wahnpoaron kan kin pohnese me sapwellimen Sises padahk kan iei padahk mehlel. Re kilangehr mehn kadehde tohto me kasalehda me utupen en arail sounpadahko padahk kan kin kohsang rehn Koht.
AHPW, rahnwet, me tohto pahn apwalki kadehdehda me mehlelo me Sises kin padahngki. Duwehte ni mwein soukohp Aiseia, rahnwet mie “irail ko me kin kahdaneki me suwed me mwahu oh me mwahu me suwed. Kumwail wekidohng rotorot ni marain oh marain ong ni rotorot. Kumwail wekidala mehkot katik pwehn memla oh mehkot mem pwehn katikala.” (Aiseia 5:20) Pwehki aramas kin utungada soangsoangen madamadau kan, oh padahk kan, oh soahngen mwomwen mour kan nan rahnpwukat, me tohto kin lemeleme me mehkoaros apali kin mehlel ah apali soh oh sohte mehkot me uhdahn mehlel.
Ni ahnsou me Sises mahsanihong irail kan me rongorong ah padahk me me mehlelo pahn kasaledekirailla, re sapengki: “Kiht kadaudok en Eipraam, oh se saikinte wia lidun emen sang mahs kohdo. Ia wehwehn omwi mahsen, ‘Kumwail pahn saledekla’?” (Sohn 8:33) Re sohte lemeleme me mie anahnepen emen de mehkot me pahn kasaledekirailla. Ahpw Sises kawehwehda: “I ndaiong kumwail ni mehlel: mehmen me kin wiahda dihp, iei ih me lidun dihp.” (Sohn 8:34) Me mehlelo me Sises kin koasoakoasoia kak ritingada elen saledek sang dihp. Sises mahsanih: “Eri, ma Sapwellimeo pahn kasaledengkumwailla, kumwail uhdahn pahn saledek mehlel.” (Sohn 8:36) Ihme me mehlelo me kin kasaledekala aramas iei padahk mehlel duwen Sises Krais, sapwellimen Koht Ohlo. Emen kak saledek sang dihp oh mehla ihte ma e pwoson meirong en mour unsek en Sises.
Ehu ahnsou Sises mahsanih: “Komw ketin kasarawihkinirailla me mehlelo; sapwellimomwi mahsen, iei me mehlel.” (Sohn 17:17) Mahsen en Koht me sansalda nan Paipel iei padahk mehlel me kak wahdo saledek sang ketieni oh kaudok likamw. Paipel kin audaudki padahk mehlel kan duwen Sises Krais, me kak kahluwa aramas kan en pwosonla ih oh ritingada elen koapworopwor kaselel ong ahnsou kohkohdo. E wia mehkot kaselel en esehla padahk mehlel en Mahsen en Koht!
Ia uwen kesempwal en esehla me mehlelo? Pelien lamalam tohto nan rahnwet, nindoken arail kin kose me re kin idawehn Paipel, kin mihmi pahn manaman en padahk kan en aramas oh tiahk en aramas. Pak tohto, kaun en lamalam kan sohte kin nsenohki ma arail padahk me pwung de sapwung ahpw re kin nsenohki me aramas kan en pwungkin irail. Ekei kin lemeleme me Koht kin itarki soahngen kaudok koaros, ihte ma re kin mehlel ong dahme re kamehlele. Ahpw Sises Krais kawehwehda: “Ahpw ahnsou pahn leledo, oh e lelehr, me tohn kaudok mehlel kan pahn kaudokiong Sahmo ni ngehn oh mehlel, pwe iei soangen tohn kaudok kan me Sahmo ketin kupwurki en kaudokiong ih.”—Sohn 4:23.
Ma kitail men kaudok ong Koht ni ahl me pwung, kitail anahne esehla me mehlelo. Met ire kesempwal ehu. Atail nsenamwahu poatopoat kin poahsoanda pohn met. Ihme kahrehda, koaros anahne pein kalelepek rehrail: ‘Elen ahi kaudok me pwung mwohn Koht? I uhdahn kin nsenohki sukuhlki padahk mehlel en Mahsen en Koht? De I kin masak dahme keseu keneinei pahn kasalehda?’