Kaudokihong Koht Ni Mehlel

Pwe kaudok en pwung mwohn Koht, e anahne poahsoanda pohn me mehlelo. (Sohn 4:​23) Paipel kasalehda me tohnkaudok mehlel kan kin iang “mwomwohdisohn Koht ieias, me wia uhr oh poahsoanpen me mehlelo.” (1 Timoty 3:​15) Irail ko me wiawihkihda mwomwohdisohn Koht sohte kin ihte kamehlele padahk mehlel en Mahsen en Koht ahpw pil kin mour kapahrekiong met oh kin pere, oh kasansalehda nan sampah pwon.​—Madiu 24:14; Rom 10:​9-​15.

SOUNKADEHDEHN SIOHWA kan kin ndandki arail kasukuhl en Paipel, me ahnsouwet wiawihdahr nan sahpw dauli 200. Re kin onopki Paipel oh padahngki me met iei padahk mehlel, oh sohte kin doaloal ong padahk luwet en aramas. Komw kin ese arail padahk kan me poahsoanda pohn Paipel? Me tohto kin pweiek sang rong Sounkadehdehn Siohwa kan pwehki ire sapwung kan me aramas kin ndahkin irail. Ahpw aramas mohngiong mehlel kan kin ale luhk en pein kasawih ma dahme Sounkadehde kan kin padahngki me iei padahk mehlel de soh. Soahngen keseu kesempwal wet sohte kin poahsoanda pohn dahme re rongasang mehteikan. Me tohto me kin pein kasawih padahk kan en Sounkadehde kan en Siohwa kin paiekihda laud met.

Loalokongki Padahk Mehlel kin Kihsang Masak

Tehk, karasepe ehu, duwen Eugenia. E tikida nan peneinei ehu me kehlail nan pelien Kadolik. Ah pahpa iei emen sounkoasoanehdi mwemeit en Pope ong nan Mexico nan 1979. Nindoken Eugenia mwemweit rehn kompoakepah kan, e tuhwong Sounkadehdehn Siohwa kan. Ki arail sawas e tepiada kasawih ni keneinei dahme Paipel mahsanih. E tamanda: “Nin tepio, I masepwehkada. I diaradahr padahk mehlel! Ahpw met kin wehwehki me pali moron en padahk kan me I kin kamehlele mahso sapwung. Padahk kan en ahi peneinei, kompoakepahi kan, aramas kan me I kin poakepoake​—⁠irail koaros sapwung. I inenen saloh. I wie kalkalelepek rehi iaduwen ahi peneinei pahn mwekidiki dahme I ahpwtehn diarada. Mwurin ahnsou kis oh ki sawas en Siohwa, I tepiada ahnla wiewia wet me lelohng ie. Ehu rahn, I koasoanehdi en likihkiohng met emen kompoakepahn ahi peneinei, emen sounpadahk en sarawi. I padahkihong ih ahi ineng en rapahkihda padahk mehlel. Ohlo eri nda, ‘Ma ke men esehla padahk mehlel, rapahki Sounkadehde kan en Siohwa.’”

Nin duwen me Eugenia masak me pahn wiawi, ah peneinei kasarehsang ih nan imwarail. Ahpw, Sounkadehde kan, kin pousehlahte kihong ih sawas en pali ngehn. E koasoia: “I kehlailkihda ahi kesihnenda teng ong padahk mehlel. I wehwehkihda me padahk mehlel wia mehkot me katapan en peiki. En Sounkadehdehn Siohwa kan kin kasamwo ie me inenen kesempwal. I pehm limpoak nan mwomwohdisohn Kristian. Kerenihla pwihn en Koht kin sewese ie en powehdi masak en kelehpw uhki padahk mehlel ni soh utuht sang ahi peneinei.”

Tehk pil ehu karasaras. Sabrina tikihda ahn ah peneinei kin kaukaule koasoia Paipel. Ni mehlel, re wiahda mwomwen ‘kaudok en peneinei’ ehu. Sabrina kin wiahkihla tiahk ehu en werekiong tohn soangsoangen pelien lamalam kan pwehn kasansalehda sapwung en arail padahk kan. Ni ahnsou me emen Sounkadehdehn Siohwa kan pekih en onop Paipel reh, e perenkihda met pwe e medemedewe en kasalehda sapwung en padahk kan en Sounkadehde kan. E tamanda: “Mwurin ahi onopkiehr daulih sounpar ehu, I masak kesehla ‘ahi padahk mehlel.’ I kin mengeiki kasansalehda likamw en pelien lamalam tohto me I kin werekiong, ahpw ahnsouwet I sohte kak wia met ong Sounkadehde kan en Siohwa.”

Pwehki Sabrina masak kesehla ah kaudok, met kahrehong ih en uhdisang onop Paipel rehn Sounkadehdehn Siohwa kan. Ahpw e sohte nsenamwahuki ah pali ngehn. E koasoanehdi en pwurehng pousehla onopo oh kedekedeo pwungkihla padahk mehlel me e ahpwtehn diarada. Sabrina kekeirada lau e men ehukihong mehteikan dahme e sukusukuhlki. E pil pekih me en kin iang Sounkadehde kan nan arail kalohk en ihmw-lel-ihmw. Sabrina kawehwehda: “Mwohn I pahn warohng iang Sounkadehdehn Siohwa kan kalohk, peidek me kohieng ie iei: ‘Ke uhdahn men wiahla emen Sounkadehdehn Siohwa?’ I sapengki: “Soh!’ I pil pwurehng masepwehkada.” Ikmwuri, mwurin ah pousehlahte towehda mihding kan koaros oh kilikilang sapwellimen Koht aramas kan oh iaduwen arail kin kapwaiada mouren kosonned kan en Paipel, Sabrina pwungkihda me met uhdahn padahk mehlel. E papidaisla oh ahnsouwet wia emen sounkalohk kaukaule.

Dahme Kahrehda Re Weksang Mehteikan?

Emen ele pahn kalelepek, ‘Dahme kahrehda padahk en Sounkadehde kan en Siohwa kin weksang padahk en kaudok teikan?’ Ni omw pahn kasawih ni mwotomwot dahme Sounkadehde kan kin kamehlele e pahn sewese iuk en kilang me re wia Kristian kan me mehlel oh pil tohnsukuhl pwerisek kei en Paipel. Se kangoangehkin komwi en kilangada nan pein noumw Paipel iren Pwuhk Sarawi kan me pwarada nan kisin koakon powe me kin oaralapiada arail padahk kan.

Ni omw pahn kasawih ni keneinei dahme Sounkadehdehn Siohwa kan kin kamehlele oh iaduwen arail kin peikiong dahme Paipel kin padahngki, komw pahn paiekihda saledeko me padahk mehlel kin kihda. (Sohn 17:17) Sohte kahrepen en masak me mehlelo. Tamataman inoun Sises: “Kumwail pahn dehdehki dahme mehlel, oh me mehlelo pahn kasaledengkumwailla.”​—⁠Sohn 8:​32.

[Koakon nan pali 6]

EKEI PADAHK KAN EN SOUNKADEHDEHN SIOHWA KAN

◯ Siohwa iei Koht Lapalahpie. Mwareo kin pwarada dauli pahn pak 7,000 nan nting en mahs kan en Paipel.​—⁠Melkahka 83:18.

◯ Sises Krais iei sapwellimen Koht Ohlo, me ketido sampah pwehn kihda moure wiliankihdi tohnsampah. (Sohn 3:​16, 17) Sounkadehdehn Siohwa kan kin idawehn padahk kan en Sises Krais me diarekda nan Rongamwahu kan.

◯ Ahdo Sounkadehde kan en Siohwa kin poahsoanda pohn Aiseia 43:10, me mahsanih: “‘Kumwail me iei ei sounkadehde,’ Siohwa me mahmahsen.”

◯ Wehio me aramas kin kapakapki nan kapakap en “Samat” iei wehin nanleng ehu me pahn ahnsou keren kihsang lokolok koaros oh medek nan sampah pwehn wiahda wasa ong Paradais me Paipel inoukihda.​—⁠Aiseia 9:​6, 7; Daniel 2:​44; Madiu 6:​9, 10; Kaudiahl 21:​3, 4.

◯ Koaros me kin wia kupwuren Koht kin ahneki ahnsou mwahu en paiekihda kapai kan en Wehio kohkohlahte.​—Sohn 17:3; 1 Sohn 2:​17.

◯ Kristian kan anahne kapahrekiong arail wiewia ong dahme Paipel mahsanih. Re anahne nantiong en mehlel, en mourki mour mwakelekel oh tiahk mwahu, oh en kasalehda limpoak ong mehn mperail kan.​—Madiu 22:39; Sohn 13:35; 1 Korint 6:​9, 10.

[Kilel nan pali 5]

Sounkadehdehn Siohwa kan kin kasansalehda padahk mehlel en Paipel ong aramas kan nan sahpw dauli 200